ರಾಜ್ಯಸಭೆಯಲ್ಲಿ ರಾಷ್ಟ್ರಪತಿಗಳ ಭಾಷಣಕ್ಕೆ ಧನ್ಯವಾದ ಸೂಚನೆಯ ಮೇಲಿನ ಚರ್ಚೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಭಾರತದ ಆರ್ಥಿಕ ಪ್ರಗತಿಯ ಬಗ್ಗೆ ತೀವ್ರವಾಗಿ ಮಾತನಾಡಿದರು. ಸ್ವಾತಂತ್ರ್ಯದ ಸಮಯದಲ್ಲಿ (1947) ಭಾರತ ವಿಶ್ವದ 6ನೇ ಅತಿದೊಡ್ಡ ಆರ್ಥಿಕತೆಯಾಗಿತ್ತು ಎಂದು ಹೇಳಿದ ಮೋದಿ, ಕಾಂಗ್ರೆಸ್ ಆಳ್ವಿಕೆಯಲ್ಲಿ 2014ರ ವೇಳೆಗೆ ಅದು 11ನೇ ಸ್ಥಾನಕ್ಕೆ ಕುಸಿದಿತ್ತು ಎಂದು ಆರೋಪಿಸಿದರು. ಆದರೆ ಎನ್‌ಡಿಎ ಸರ್ಕಾರದ ನೀತಿಗಳಿಂದಾಗಿ ಇಂದು ಭಾರತ ವಿಶ್ವದ 4ನೇ ಅತಿದೊಡ್ಡ ಆರ್ಥಿಕತೆಯಾಗಿದ್ದು, ಬೇಗನೇ 3ನೇ ಸ್ಥಾನಕ್ಕೆ ಏರುವತ್ತ ಸಾಗುತ್ತಿದೆ ಎಂದು ಅಭಿಮಾನದಿಂದ ಹೇಳಿದರು.
ರಾಜ್ಯಸಭೆಯಲ್ಲಿ ವಿರೋಧ ಪಕ್ಷಗಳ ಗದ್ದಲ :
ಬಜೆಟ್ ಅಧಿವೇಶನದ ಭಾಗವಾಗಿ ನಡೆದ ಈ ಚರ್ಚೆಯಲ್ಲಿ ವಿರೋಧ ಪಕ್ಷಗಳು ತೀವ್ರ ಪ್ರತಿಭಟನೆ ನಡೆಸಿದವು. “ತನಾಶಾಹಿ ನಹಿ ಚಲೇಗಿ” ಸೇರಿದಂತೆ ಘೋಷಣೆಗಳನ್ನು ಕೂಗುತ್ತಾ ಸದನದಲ್ಲಿ ಅವ್ಯವಸ್ಥೆ ಸೃಷ್ಟಿಸಿದರು. ಇದರ ನಡುವೆಯೂ ಪ್ರಧಾನಿ ಮೋದಿ ತಮ್ಮ ಭಾಷಣವನ್ನು ಮುಂದುವರಿಸಿದರು.
ಭಾಷಣದಲ್ಲಿ ಮೋದಿ ಹೇಳಿದ ಕೆಲವು ಮುಖ್ಯ ಅಂಶಗಳು:
- ಸ್ವಾತಂತ್ರ್ಯದ ಸಮಯದಲ್ಲಿ ಭಾರತ 6ನೇ ಸ್ಥಾನದಲ್ಲಿತ್ತು.
- ಕಾಂಗ್ರೆಸ್ ಆಳ್ವಿಕೆಯಲ್ಲಿ “ದುರ್ಬಲ” ಆರ್ಥಿಕತೆಗಳಲ್ಲಿ ಒಂದಾಗಿ ಕುಸಿಯಿತು, 11ನೇ ಸ್ಥಾನಕ್ಕೆ ಕುಸಿದಿತ್ತು.
- ಎನ್‌ಡಿಎ ಸರ್ಕಾರದ ಸುಧಾರಣೆಗಳಿಂದ ಇಂದು 4ನೇ ಸ್ಥಾನಕ್ಕೆ ಏರಿಕೆ, 3ನೇ ಸ್ಥಾನದ ಹತ್ತಿರವಾಗುತ್ತಿದೆ.
- ಭಾರತ ಗ್ಲೋಬಲ್ ಸೌತ್‌ನ ನಾಯಕ ಧ್ವನಿಯಾಗಿದೆ, 9 ಮುಖ್ಯ ವಾಣಿಜ್ಯ ಒಪ್ಪಂದಗಳನ್ನು ಮಾಡಿದೆ.
- ಹೆಚ್ಚಿನ ಬೆಳವಣಿಗೆ ಮತ್ತು ಕಡಿಮೆ ಹಣದುಬ್ಬರದೊಂದಿಗೆ ಆರ್ಥಿಕತೆ ಬಲಿಷ್ಠವಾಗಿದೆ.
ಖರ್ಗೆ ಅವರ ಆರೋಗ್ಯಕ್ಕೆ ಮೋದಿ ಕಾಳಜಿ
ವಿರೋಧ ಪಕ್ಷಗಳ ಘೋಷಣೆಗಳ ನಡುವೆಯೂ ಪ್ರಧಾನಿ ಮೋದಿ ವಿರೋಧ ಪಕ್ಷದ ನಾಯಕ ಮಲ್ಲಿಕಾರ್ಜುನ ಖರ್ಗೆ ಅವರ (83 ವರ್ಷ) ಆರೋಗ್ಯದ ಬಗ್ಗೆ ವಿಶೇಷ ಕಾಳಜಿ ತೋರಿದರು. ಸಭಾಪತಿಗೆ ಮನವಿ ಮಾಡಿ, “ಖರ್ಗೆ ಜೀ ಅವರ ವಯಸ್ಸನ್ನು ನೋಡಿ..ಅವರು ಕೂತ್ಕೊಂಡೇ ಘೋಷಣೆ ಕೂಗಬಹುದು. ಅವರಿಗೆ ಕಷ್ಟವಾಗದಂತೆ ನೋಡಿಕೊಳ್ಳಿ. ಹಿಂದೆ ಯುವಕರು ಇದ್ದಾರೆ, ಅವರು ನಿಲ್ಲಲಿ” ಎಂದು ಹೇಳಿದರು. ಈ ಮಾತುಗಳು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿ ಮಾನವೀಯತೆಯ ಉದಾಹರಣೆಯಾಗಿದೆ.
ಈ ಭಾಷಣದ ಮೂಲಕ ಮೋದಿ ಅವರು ಕಾಂಗ್ರೆಸ್ ವಿರುದ್ಧ ತೀವ್ರ ಟೀಕೆ ಮಾಡುವ ಜೊತೆಗೆ ಎನ್‌ಡಿಎ ಸರ್ಕಾರದ ಆರ್ಥಿಕ ಸಾಧನೆಗಳನ್ನು ಎತ್ತಿ ತೋರಿಸಿದರು. ವಿಪಕ್ಷಗಳ ವಾಕ್‌ಔಟ್ ನಂತರವೂ ಚರ್ಚೆ ಮುಂದುವರಿದಿದ್ದು, ಸಂಸತ್ತಿನಲ್ಲಿ ತೀವ್ರ ರಾಜಕೀಯ ಉದ್ವಿಗ್ನತೆ ಕಂಡುಬಂದಿದೆ.
