ಆಸ್ಟ್ರೇಲಿಯಾದಲ್ಲಿ ಆಪರೇಷನ್ ಸಿಂಧೂರ್ ಕೊಂಡಾಡಿದ ಪ್ರಧಾನಿ ಮೋದಿ

ಮೆಲ್ಬರ್ನ್: ಆಸ್ಟ್ರೇಲಿಯಾದ ಪ್ರಸಿದ್ಧ ಮಾರ್ವೆಲ್ ಸ್ಟೇಡಿಯಂ (Marvel Stadium) ನಲ್ಲಿ ಪ್ರಧಾನಿ ನರೇಂದ್ರ ಮೋದಿ (PM Narendra Modi) ಅವರು ಆಸ್ಟ್ರೇಲಿಯಾ ಪ್ರಧಾನಿ ಆಂಥೋನಿ ಅಲ್ಟನೀಸ್ (Anthony Albanese) ಅವರೊಂದಿಗೆ ಹಮ್ಮಿಕೊಳ್ಳಲಾಗಿದ್ದ ಅನಿವಾಸಿ ಭಾರತೀಯರ ಸಮುದಾಯದ ಬೃಹತ್ ಕಾರ್ಯಕ್ರಮವನ್ನುದ್ದೇಶಿಸಿ ಮಾತನಾಡಿದರು. ಈ ಐತಿಹಾಸಿಕ ಸಮಾವೇಶದಲ್ಲಿ ಪ್ರಧಾನಿ ಮೋದಿ ಅವರು ಭಾರತದ ಸೇನಾ ಶೌರ್ಯ, ಆರ್ಥಿಕ ಪ್ರಗತಿ, ಬಾಹ್ಯಾಕಾಶ ಸಾಧನೆ, ಮತ್ತು 2047ರ ವಿಕಸಿತ ಭಾರತದ ಕನಸನ್ನು ಅನಾವರಣಗೊಳಿಸಿದರು.

ಆಸ್ಟ್ರೇಲಿಯಾ ಪ್ರಧಾನಿಯಿಂದ ವಿಶೇಷ ಶ್ಲಾಘನೆ

ಕಾರ್ಯಕ್ರಮದಲ್ಲಿ ಮಾತನಾಡಿದ ಆಸ್ಟ್ರೇಲಿಯಾ ಪ್ರಧಾನಿ ಆಂಥೋನಿ ಅಲ್ಬನೀಸ್ ಅವರು, ಪ್ರಧಾನಿ ನರೇಂದ್ರ ಮೋದಿ ಅವರನ್ನು ‘ಭಾರತ ಮತ್ತು ಆಸ್ಟ್ರೇಲಿಯಾ ದೇಶಗಳ ನಡುವಿನ ಜೀವಂತ ಸೇತುವೆ’ (Living Bridge) ಎಂದು ಮುಕ್ತಕಂಠದಿಂದ ಶ್ಲಾಘಿಸಿದರು. ಇಲ್ಲಿ ನೆರೆದಿರುವ ಜನಸಾಗರದ ಶಕ್ತಿ ಮತ್ತು ಉತ್ಸಾಹವೇ ಭಾರತ-ಆಸ್ಟ್ರೇಲಿಯಾ ಪಾಲುದಾರಿಕೆಯ ಅಸಲಿ ಶಕ್ತಿಯಾಗಿದೆ ಎಂದು ಅವರು ಅಭಿಪ್ರಾಯಪಟ್ಟರು. ಪ್ರಧಾನಿಯಾಗಿ ತಾವು ಎರಡು ಬಾರಿ ಭಾರತಕ್ಕೆ ಭೇಟಿ ನೀಡಿದ ಅವಕಾಶ ಪಡೆದಿದ್ದು, ಪ್ರತಿ ಬಾರಿಯೂ ಭಾರತದ ಭೌಗೋಳಿಕ ಸೌಂದರ್ಯ, ಜನರ ಆತ್ಮೀಯತೆ ಮತ್ತು ಔದಾರ್ಯಕ್ಕೆ ಮನಸೋತಿದ್ದಾಗಿ ಹಂಚಿಕೊಂಡರು.

ಮೆಲ್ಬರ್ನ್‌ನಲ್ಲಿ ಮೋದಿ ಮ್ಯಾಜಿಕ್

ತಮಗೆ ಆಸ್ಟ್ರೇಲಿಯಾದಲ್ಲಿ ಸಿಕ್ಕ ಭವ್ಯ ಸ್ವಾಗತಕ್ಕೆ ಪ್ರಧಾನಿ ಆಂಥೋನಿ ಅಲ್ಪನೀಸ್ ಅವರಿಗೆ ಧನ್ಯವಾದ ಅರ್ಪಿಸಿದ ಮೋದಿ, ಮೆಲ್ಬರ್ನ್‌ನ ಹಲವು ಪ್ರದೇಶಗಳು ಇಂದು ‘ಮಿನಿ ಇಂಡಿಯಾ’ (Mini India) ಆಗಿ ಮಾರ್ಪಟ್ಟಿವೆ ಎಂದು ಭಾರತೀಯ ಸಮುದಾಯದ (Indian Diaspora) ಪ್ರಭಾವವನ್ನು ವರ್ಣಿಸಿದರು. ಮಾರ್ವೆಲ್ ಸ್ಟೇಡಿಯಂನಲ್ಲಿ ನೆರೆದಿದ್ದ ಲಕ್ಷಾಂತರ ಭಾರತೀಯರನ್ನು ನೋಡಿ ಹರ್ಷ ವ್ಯಕ್ತಪಡಿಸಿದ ಅವರು, “ಇಂದಿನ ಕಾರ್ಯಕ್ರಮ ಹೌಸ್‌ಫುಲ್ ಆಗಿದೆ. ಇದೊಂದು ಕಂಪ್ಲೇಟ್ ಬ್ಲಾಕ್‌ಬಸ್ಟರ್ ಶೋ” ಎಂದು ಹಾಸ್ಯದ ನುಡಿಗಳಲ್ಲಿ ಹೇಳಿದರು.

ಸಿಡ್ನಿಯಲ್ಲಿ ಎರಡು ಬಾರಿ ಭೇಟಿಯಾಗಿದ್ದ ನಾನು, ಮೆಲ್ಬರ್ನ್ ಜನರನ್ನು ಭೇಟಿಯಾಗಲು ಬಹಳ ದಿನಗಳಿಂದ ಕಾಯುತ್ತಿದ್ದೆ. ಅದಕ್ಕಾಗಿಯೇ ಈ ಬಾರಿ ಮೆಲ್ಬರ್ನ್ ಜನರ ಜೊತೆಯೇ ಪ್ರಸಿದ್ಧ ‘ಫ್ಲಾಟ್ ವೈಟ್’ ಕಾಫಿ ಕುಡಿಯುತ್ತಾ ಮಾತನಾಡಲು ಇಲ್ಲಿಗೆ ಬಂದಿದ್ದೇನೆ” ಎಂದು ಸ್ಥಳೀಯ ಸಂಸ್ಕೃತಿಯೊಂದಿಗೆ ತಮ್ಮ ಬಾಂಧವ್ಯವನ್ನು ವ್ಯಕ್ತಪಡಿಸಿದರು.

‘ಆಪರೇಷನ್ ಸಿಂಧೂರ್’ ಶೌರ್ಯಕ್ಕೆ ಸಲ್ಯೂಟ್

ತಮ್ಮ ಭಾಷಣದಲ್ಲಿ ಪ್ರಧಾನಿ ಮೋದಿ, ಪಾಕಿಸ್ತಾನದ ವಿರುದ್ಧ ಭಾರತೀಯ ಸಶಸ್ತ್ರ ಪಡೆಗಳು ನಡೆಸಿದ ಮಿಲಿಟರಿ ಕಾರ್ಯಾಚರಣೆಯ ಯಶಸ್ಸನ್ನು ಗೌರವಿಸಿದರು. “ಆಪರೇಷನ್ ಸಿಂಧೂರ್ (Operation Sindoor) ಮೂಲಕ ಭಾರತೀಯ ಸೇನೆಯು ಪಾಕಿಸ್ತಾನದ ಗಡಿಯಲ್ಲಿದ್ದ ಭಯೋತ್ಪಾದಕರ ಲಾಂಚ್ ಪ್ಯಾಡ್‌ಗಳನ್ನು ಸಂಪೂರ್ಣವಾಗಿ ಧ್ವಂಸಗೊಳಿಸಿದ್ದನ್ನು ಇಡೀ ಜಗತ್ತೇ ನೋಡಿದೆ” ಎಂದು ಅವರು ಹೇಳಿದರು.

ಭಾರತ ಇಂದು ರಕ್ಷಣಾ ವಲಯದಲ್ಲಿ ಸಂಪೂರ್ಣವಾಗಿ ಆತ್ಮನಿರ್ಭರ (ಸ್ವಾವಲಂಬಿ) ಆಗಲು ಶ್ರಮಿಸುತ್ತಿದೆ ಎಂದು ವಿವರಿಸಿದ ಅವರು, “ಒಂದು ಗುರಿಯನ್ನು ತಲುಪಿದ ತಕ್ಷಣ ಅದಕ್ಕಿಂತಲೂ ದೊಡ್ಡ ಸಂಕಲ್ಪ ಅದರ ಜಾಗವನ್ನು ಆಕ್ರಮಿಸಿಕೊಳ್ಳುತ್ತದೆ. ಇನ್ನೂ ಹೆಚ್ಚು ಬೆಳೆಯಿರಿ, ಇನ್ನೂ ಹೆಚ್ಚಿನದನ್ನು ಸಾಧಿಸಿ (Grow More, Achieve More) ಎನ್ನುವ ತತ್ವವನ್ನು ನಂಬಿರುವ 140 ಕೋಟಿ ಆಕಾಂಕ್ಷೆಗಳ ಭಾರತ ಇದು” ಎಂದು ಉತ್ಸಾಹದಿಂದ ಹೇಳಿದರು.

2047ರ ವಿಕಸಿತ ಭಾರತದ ಮುನ್ನೋಟ

ಬರುವ 2047 ರ ವೇಳೆಗೆ ಭಾರತವನ್ನು ಸಂಪೂರ್ಣವಾಗಿ ವಿಕಸಿತ ಭಾರತ (Viksit Bharat – ಅಭಿವೃದ್ಧಿ ಹೊಂದಿದ ರಾಷ್ಟ್ರ) ಮಾಡುವ ಗುರಿಯನ್ನು ಪುನರುಚ್ಚರಿಸಿದ ಮೋದಿ, ದೇಶದ ಹೆಮ್ಮೆಯ ಸಾಧನೆಗಳನ್ನು ಜಾಗತಿಕ ವೇದಿಕೆಯಲ್ಲಿ ತೆರೆದಿಟ್ಟರು.

• ಬಾಹ್ಯಾಕಾಶ: ಚಂದ್ರನ ದಕ್ಷಿಣ ಧ್ರುವವನ್ನು ಯಶಸ್ವಿಯಾಗಿ ತಲುಪಿದ ಭಾರತ, ಈಗ ಸ್ವಂತ ಬಾಹ್ಯಾಕಾಶ ನಿಲ್ದಾಣ (Space Station) ಸ್ಥಾಪಿಸಲು ಸಜ್ಜಾಗುತ್ತಿದೆ.

• ಡಿಜಿಟಲ್ ತಂತ್ರಜ್ಞಾನ: ಭಾರತ ಇಂದು ಜಗತ್ತಿನ 2ನೇ ಅತಿ ದೊಡ್ಡ 5G ಮಾರುಕಟ್ಟೆಯಾಗಿದ್ದು, ಸಂಪೂರ್ಣ ಮೇಡ್ ಇನ್ ಇಂಡಿಯಾ ತಂತ್ರಜ್ಞಾನದ 6G ನೆಟ್ವರ್ಕ್ ಮೇಲೆ ಕೆಲಸ ಮಾಡುತ್ತಿದೆ.

• ಸಾರಿಗೆ: ವಿಶ್ವದಲ್ಲೇ 3ನೇ ಅತಿ ದೊಡ್ಡ ಮೆಟ್ರೋ ರೈಲು ಜಾಲವನ್ನು ಹೊಂದಿರುವ ಭಾರತ, ದೇಶೀಯವಾಗಿ ವಂದೇ ಭಾರತ್ ಮತ್ತು ನಮೋ ಭಾರತ್ ರೈಲು ಸೇವೆಗಳ ಮೂಲಕ ಸಾರಿಗೆ ಕ್ರಾಂತಿ ಸೃಷ್ಟಿಸಿದೆ.

• ಡಿಜಿಲಾಕರ್: ಭ್ರಷ್ಟಾಚಾರ ಮುಕ್ತ ಹಾಗೂ ಪಾರದರ್ಶಕ ಆಡಳಿತಕ್ಕಾಗಿ ಡಿಜಿಲಾಕರ್ (DigiLocker) ನಂತಹ ವ್ಯವಸ್ಥೆಯನ್ನು ಜಾಗತಿಕ ಮಟ್ಟದ ಭದ್ರತೆಯೊಂದಿಗೆ ಯಶಸ್ವಿಯಾಗಿ ದೇಶದ ನಾಗರಿಕರಿಗೆ ತಲುಪಿಸಲಾಗಿದೆ.

ಫಸ್ಟ್ ರೆಸ್ಪಾಂಡರ್ ಭಾರತ

ಇದೇ ತಿಂಗಳು ವೆನೆಜುವೆಲಾದಲ್ಲಿ ಸಂಭವಿಸಿದ ಭೂಕಂಪದ ಸಂದರ್ಭದಲ್ಲಿ ಭಾರತವು ವೇಗವಾಗಿ ಧಾವಿಸಿ ಸಹಾಯ ಹಸ್ತ ಚಾಚಿದ್ದನ್ನು ಉಲ್ಲೇಖಿಸಿದ ಮೋದಿ, ನೈಸರ್ಗಿಕ ವಿಕೋಪಗಳ ಸಂದರ್ಭದಲ್ಲಿ ಜಗತ್ತಿಗೆ ತಕ್ಷಣ ಸ್ಪಂದಿಸುವ ‘ಫಸ್ಟ್ ರೆಸ್ಪಾಂಡರ್’ (First Responder) ಆಗಿ ಭಾರತ ಹೊರಹೊಮ್ಮಿದೆ ಎಂದರು.

ಕೋವಿಡ್-19 ಸಾಂಕ್ರಾಮಿಕದ ಅವಧಿಯಲ್ಲೂ ಭಾರತ ಜಗತ್ತಿನ 100ಕ್ಕೂ ಹೆಚ್ಚು ದೇಶಗಳಿಗೆ ಲಸಿಕೆ ಹಾಗೂ ವೈದ್ಯಕೀಯ ನೆರವು ನೀಡಿ ಮಾನವೀಯತೆ ಮೆರೆದಿದೆ ಎಂದು ಸ್ಮರಿಸಿದರು. ಕ್ರೀಡಾ ವಲಯದಲ್ಲೂ ಭಾರತ-ಆಸ್ಟ್ರೇಲಿಯಾ ಬಾಂಧವ್ಯ ಬೆಳೆಯುತ್ತಿದ್ದು, ಭಾರತವು 2030 ರ ಕಾಮನ್‌ವೆಲ್ತ್ ಗೇಮ್ಸ್ ಆತಿಥ್ಯ ವಹಿಸಲು ಸಜ್ಜಾಗಿದೆ ಹಾಗೂ 2036 ರ ಒಲಿಂಪಿಕ್ಸ್ ಆತಿಥ್ಯದ ರೇಸ್‌ನಲ್ಲಿದೆ ಎಂದು ಹೇಳಿದರು.