ನವದೆಹಲಿ: ಕಾಶ್ಮೀರದ ಪಹಲ್ಗಾಮ್ನಲ್ಲಿ ಏಪ್ರಿಲ್ 22, 2025 ರಂದು ಉಗ್ರರು ನಡೆಸಿದ ಭೀಕರ ದಾಳಿಯಲ್ಲಿ 26 ಪ್ರವಾಸಿಗರು ಪ್ರಾಣ ಕಳೆದುಕೊಂಡಿದ್ದರು. ಈ ದಾಳಿಯಲ್ಲಿ ತಮ್ಮ ಪತಿಯನ್ನು ಕಳೆದುಕೊಂಡ ಮಹಿಳೆಯೊಬ್ಬರು, “ನನ್ನನ್ನೂ ಕೊಂದುಬಿಡಿ” ಎಂದು ಕಣ್ಣೀರಿಟ್ಟಾಗ, ಉಗ್ರನೊಬ್ಬ “ನಿನ್ನನ್ನು ಕೊಲ್ಲಲ್ಲ, ಮೋದಿಗೆ ಹೋಗಿ ಹೇಳು” ಎಂದಿದ್ದ. ಈ ಘಟನೆಗೆ ಭಾರತೀಯ ಸೇನೆಯಿಂದ ದಿಟ್ಟ ಉತ್ತರ ಬಂದಿದೆ. ‘ಆಪರೇಷನ್ ಸಿಂಧೂರ್’ ಹೆಸರಿನಲ್ಲಿ ಭಾರತೀಯ ಸೇನೆ ಪಾಕಿಸ್ತಾನದ ಉಗ್ರರ ನೆಲೆಗಳನ್ನು ಧ್ವಂಸಗೊಳಿಸಿದೆ. ಈ ಕಾರ್ಯಾಚರಣೆಯ ಬೆನ್ನಲ್ಲೇ #Itoldmodi ಮತ್ತು #JusticeServed ಟ್ಯಾಗ್ಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.
ಪಹಲ್ಗಾಮ್ನ ದಾಳಿಯ ಸಂದರ್ಭದಲ್ಲಿ ಉಗ್ರರು ಭಾರತೀಯ ಮಹಿಳೆಯ ಸಿಂಧೂರವನ್ನು ಅಳಿಸಿ, “ಮೋದಿಗೆ ಹೋಗಿ ಹೇಳು” ಎಂದು ಹೇಳಿದ್ದರು. ಈಗ ಪ್ರಧಾನಿ ನರೇಂದ್ರ ಮೋದಿಯ ನೇತೃತ್ವದಲ್ಲಿ ಭಾರತೀಯ ಸೇನೆ ತಕ್ಕ ಪ್ರತೀಕಾರ ತೀರಿಸಿದೆ. ಮಂಗಳವಾರ ತಡರಾತ್ರಿ, ಸೇನೆಯು ಪಾಕಿಸ್ತಾನದೊಳಗೆ ನುಗ್ಗಿ ಒಟ್ಟು 9 ಉಗ್ರ ತಾಣಗಳ ಮೇಲೆ ಏರ್ಸ್ಟ್ರೈಕ್ ನಡೆಸಿ, ಅವುಗಳನ್ನು ಸಂಪೂರ್ಣ ಧ್ವಂಸಗೊಳಿಸಿದೆ. ಈ ಕಾರ್ಯಾಚರಣೆಗೆ ದೇಶಾದ್ಯಂತ ಮೆಚ್ಚುಗೆಯ ಮಹಾಪೂರವೇ ಹರಿದುಬಂದಿದೆ. ಸಾಮಾಜಿಕ ಜಾಲತಾಣಗಳಲ್ಲಿ “ನಾನು ಮೋದಿಗೆ ಹೇಳಿದೆ” ಎಂಬ ಕಾರ್ಟೂನ್ಗಳು ವೈರಲ್ ಆಗುತ್ತಿವೆ.
ಈ ದಾಳಿಯಲ್ಲಿ ಶಿವಮೊಗ್ಗದ ಪಲ್ಲವಿ ಎಂಬ ಮಹಿಳೆಯ ಪತಿ ಮಂಜುನಾಥ್ ರಾವ್ ಕೊಲೆಯಾದರು. ರಿಯಲ್ ಎಸ್ಟೇಟ್ ಉದ್ಯಮಿಯಾಗಿದ್ದ ಮಂಜುನಾಥ್ ಅವರನ್ನು ಉಗ್ರರು ತಮ್ಮ ಮಗನ ಎದುರೇ ಗುಂಡಿಟ್ಟು ಕೊಂದಿದ್ದರು. ಪಹಲ್ಗಾಮ್ನ ರಸ್ತೆಯಲ್ಲಿ ಬೇಲ್ಪುರಿ ತಿನ್ನುತ್ತಿದ್ದಾಗ, ಸೇನಾ ಸಮವಸ್ತ್ರದಲ್ಲಿ ಬಂದ ಉಗ್ರರು ಜನರ ಧರ್ಮ ಮತ್ತು ಹೆಸರನ್ನು ಕೇಳಿ, ಮುಸ್ಲಿಮರಲ್ಲದವರ ಮೇಲೆ ಗುಂಡು ಹಾರಿಸಿದ್ದರು. ಈ ಘಟನೆಯನ್ನು ಮಾಧ್ಯಮಗಳಿಗೆ ವಿವರಿಸಿದ ಪಲ್ಲವಿ, “ನನ್ನ ಮತ್ತು ನನ್ನ ಮಗನನ್ನೂ ಕೊಲ್ಲಿ” ಎಂದು ಉಗ್ರರ ಎದುರು ಕಣ್ಣೀರಿಟ್ಟಿದ್ದೆ. ಆದರೆ ಉಗ್ರ, “ನೀನು ಮಹಿಳೆ, ನಿನ್ನನ್ನು ಕೊಲ್ಲಲ್ಲ. ಇದನ್ನು ಮೋದಿಗೆ ಹೋಗಿ ತಿಳಿಸು” ಎಂದಿದ್ದ ಎಂದು ಹೇಳಿದ್ದಾರೆ. ಈ ಘಟನೆ ದೇಶಾದ್ಯಂತ ಆಕ್ರೋಶಕ್ಕೆ ಕಾರಣವಾಯಿತು.
ಆಪರೇಷನ್ ಸಿಂಧೂರ್ನ ಯಶಸ್ಸಿನ ಬೆನ್ನಲ್ಲೇ, “ನಾನು ಮೋದಿಗೆ ಹೇಳಿದೆ” ಎಂಬ ಶೀರ್ಷಿಕೆಯೊಂದಿಗೆ ಕಾರ್ಟೂನ್ಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿವೆ. ಈ ಕಾರ್ಟೂನ್ಗಳು ಉಗ್ರರ ಕೃತ್ಯಕ್ಕೆ ಭಾರತದ ದಿಟ್ಟ ಉತ್ತರವನ್ನು ಅರ್ಥಗರ್ಭಿತವಾಗಿ ಚಿತ್ರಿಸುತ್ತವೆ. “ಕೊಲೆ ಮಾಡಿದ್ದನ್ನು ಮೋದಿಗೆ ತಿಳಿಸು ಎಂದಿದ್ದೆ, ತಿಳಿಸಿದೆ!” ಎಂಬ ಶೀರ್ಷಿಕೆಯೊಂದಿಗೆ ಈ ಕಾರ್ಟೂನ್ಗಳು ಜನರ ಮನಸ್ಸಿನಲ್ಲಿ ದೇಶಭಕ್ತಿಯ ಉತ್ಸಾಹವನ್ನು ಮೂಡಿಸಿವೆ..
