ಮುಂಬೈ: ಮುಂಬೈ ಪೊಲೀಸರ ಸೋಷಿಯಲ್ ಮೀಡಿಯಾ ಪೋಸ್ಟ್ಗಳು ಯಾವಾಗಲೂ ಜನಮನ ಸೆಳೆಯುತ್ತವೆ. ಈಗ ಅವರು ತುರ್ತು ಸಹಾಯವಾಣಿ ಸಂಖ್ಯೆ 112 ರ ಬಳಕೆಯ ಬಗ್ಗೆ ಜನರಿಗೆ ತಿಳಿಸಲು ವಿಶ್ವವಿಖ್ಯಾತ ಜಪಾನಿ ಕೋತಿ ‘ಪಂಚ್’ ಮೊರೆ ಹೋಗಿದ್ದಾರೆ. ಸಂಕಷ್ಟದಲ್ಲಿರುವವರಿಗೆ ಸಹಾಯ ಹಸ್ತ ಚಾಚುವ ಉದ್ದೇಶದ ಈ ಅಭಿಯಾನಕ್ಕೆ ಪಂಚ್ ಕೋತಿಯ ಜೀವನಗಾಥೆಯೇ ಸ್ಪೂರ್ತಿಯಾಗಿದೆ.
ಯಾರು ಈ ಪಂಚ್ ಕೋತಿ ?
ಜಪಾನಿನ ಇಚಿಕಾವಾ ಸಿಟಿ ಮೃಗಾಲಯದಲ್ಲಿರುವ ಪಂಚ್ ಎಂಬ ಈ ಕೋತಿ ಸದ್ಯ ಇಂಟರ್ನೆಟ್ ಜಗತ್ತಿನಲ್ಲಿ ಭಾರಿ ಫೇಮಸ್. ಇದರ ಕಥೆ ಸ್ವಲ್ಪ ನೋವಿನಿಂದ ಕೂಡಿದೆ. ಹುಟ್ಟುವಾಗ ಕೇವಲ 600 ಗ್ರಾಂ ತೂಕವಿದ್ದ ಈ ಪುಟಾಣಿ ಕೋತಿಯನ್ನು ಅದರ ತಾಯಿಯೇ ಸಾಕಲಾಗದೆ ಬಿಟ್ಟು ಹೋಗಿತ್ತು. ಮೃಗಾಲಯದ ಇತರ ಕೋತಿಗಳು ಈ ಒಂಟಿ ಜೀವಕ್ಕೆ ಚಿತ್ರಹಿಂಸೆ ನೀಡುತ್ತಿದ್ದವು. ಸದಾ ಭಯದಲ್ಲೇ ಇರುತ್ತಿದ್ದ ಪಂಚ್, ತನ್ನ ರಕ್ಷಣೆಗಾಗಿ ಒಂದು ಗೊಂಬೆಯನ್ನು ಅಪ್ಪಿಕೊಂಡು ಕಾಲ ಕಳೆಯುತ್ತಿತ್ತು.
ಪಂಚ್ ಅನುಭವಿಸಿದ ಈ ಏಕಾಂಗಿತನ ಮತ್ತು ಸಂಕಷ್ಟವನ್ನು ಗಮನಿಸಿದ ಪೊಲೀಸರು, ಸಮಾಜದಲ್ಲಿ ಯಾರೇ ತೊಂದರೆಯಲ್ಲಿದ್ದರೂ ಅವರಿಗೆ ಸಹಾಯ ಮಾಡಲು ನಾವು ಸಿದ್ಧ ಎನ್ನುವ ಸಂದೇಶ ಸಾರಲು ಈ ಕೋತಿಯನ್ನು ಬಳಸಿಕೊಂಡಿದ್ದಾರೆ.
ಅಭಿಯಾನದ ವಿಶೇಷತೆ
ಮುಂಬೈ ಪೊಲೀಸರು ತಮ್ಮ ಇನ್ಸ್ಟಾಗ್ರಾಂ ಪುಟದಲ್ಲಿ ಈ ಹಿಂದೆಯೇ ‘ಕೆಟ್ಟದ್ದನ್ನು ಕೇಳಬೇಡ, ನೋಡಬೇಡ, ಮಾತನಾಡಬೇಡ’ ಎನ್ನುವ ಮೂರು ಮಂಗಗಳ ಸಂಕೇತವನ್ನು ಬಳಸಿದ್ದರು. ಈಗ ಅದನ್ನು ಮುಂದುವರಿಸಿ, ಪಂಚ್ ಕೋತಿಯ ಚಿತ್ರದೊಂದಿಗೆ “ಕೆಟ್ಟದ್ದನ್ನು ಮಾಡಬೇಡಿ” ಎನ್ನುವ ಹೊಸ ಶೀರ್ಷಿಕೆ ನೀಡಿದ್ದಾರೆ. ನಾಗರಿಕರು ಸಮಾಜದಲ್ಲಿ ಜವಾಬ್ದಾರಿಯುತವಾಗಿ ವರ್ತಿಸಬೇಕು ಮತ್ತು ತೊಂದರೆಯಲ್ಲಿರುವವರಿಗೆ 112 ಸಹಾಯವಾಣಿ ಮೂಲಕ ಪೊಲೀಸರ ನೆರವು ಪಡೆಯಲು ಪ್ರೇರೇಪಿಸುವುದು ಈ ಅಭಿಯಾನದ ಗುರಿ. 112 ಇದು ಭಾರತದ ಏಕೈಕ ತುರ್ತು ಪ್ರತಿಕ್ರಿಯೆ ಸಂಖ್ಯೆಯಾಗಿದ್ದು, ಒಂದೇ ಕರೆಯಲ್ಲಿ ಪೊಲೀಸ್, ಅಗ್ನಿಶಾಮಕ ದಳ ಮತ್ತು ಆಂಬ್ಯುಲೆನ್ಸ್ ಸೇವೆಗಳನ್ನು ಪಡೆಯಬಹುದಾಗಿದೆ.
ಪಂಚ್ ಈಗ ಸ್ವತಂತ್ರ !
ಮೃಗಾಲಯದ ಆರೈಕೆದಾರರ ಪ್ರಕಾರ, ಪಂಚ್ ಈಗ ಇತರ ಕೋತಿಗಳ ನಡುವೆ ಇರಲು ಕಲಿಯುತ್ತಿದೆ ಮತ್ತು ಕ್ರಮೇಣ ಸ್ವತಂತ್ರವಾಗುತ್ತಿದೆ. ದೆಹಲಿ ಪೊಲೀಸರು ಕೂಡ ಈ ಹಿಂದೆ ಪಂಚ್ನ ಚಿತ್ರವನ್ನು ಜಾಗೃತಿಗಾಗಿ ಬಳಸಿಕೊಂಡಿದ್ದರು. ಮುಂಬೈ ಪೊಲೀಸರ ಈ ಕ್ರಿಯೇಟಿವ್ ಪ್ರಯತ್ನಕ್ಕೆ ನೆಟ್ಟಿಗರಿಂದ ಭಾರಿ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಯಾರಾದರೂ ಬೆದರಿಕೆ ಹಾಕಿದರೆ ಅಥವಾ ತೊಂದರೆ ನೀಡಿದರೆ ಭಯಪಡುವ ಅಗತ್ಯವಿಲ್ಲ, 112 ನಿಮ್ಮ ಜೊತೆಗಿದೆ ಎನ್ನುವುದನ್ನು ಈ ಅಭಿಯಾನ ಸಾರಿ ಹೇಳುತ್ತಿದೆ.
