ನವದೆಹಲಿ, (ಜುಲೈ 28): ಭಾರತ ಅಂಚೆ ಇಲಾಖೆ (India Post) ಮೊದಲ ಬಾರಿಗೆ ‘ದಾಖಲೆ’ (Document) ಎಂಬ ಪದಕ್ಕೆ ಅಧಿಕೃತ ವ್ಯಾಖ್ಯಾನ ನೀಡಿದ್ದು, ಸ್ಪೀಡ್ ಪೋಸ್ಟ್ ಸೇವೆಯಲ್ಲಿ ಮಹತ್ವದ ಬದಲಾವಣೆಗಳನ್ನು ಪ್ರಕಟಿಸಿದೆ. ಹೊಸ ಅಧಿಸೂಚನೆಯ ಪ್ರಕಾರ, ಪತ್ರಗಳು, ಮುದ್ರಿತ ದಾಖಲೆಗಳು ಹಾಗೂ ಮರುಮಾರಾಟ ಮೌಲ್ಯವಿಲ್ಲದ ಉಚಿತ (Complimentary) ವಸ್ತುಗಳನ್ನು ಮಾತ್ರ ‘ದಾಖಲೆ’ ವಿಭಾಗಕ್ಕೆ ಸೇರಿಸಲಾಗುತ್ತದೆ. ಉಳಿದ ಎಲ್ಲಾ ವಸ್ತುಗಳನ್ನು ಇನ್ನು ಮುಂದೆ ‘ಪಾರ್ಸೆಲ್’ (Parcel) ವಿಭಾಗದಲ್ಲಿ ಸಾಗಿಸಲಾಗುತ್ತದೆ.
ಈ ಹೊಸ ವ್ಯವಸ್ಥೆಯೊಂದಿಗೆ ಅಂಚೆ ಇಲಾಖೆ ಚಿಲ್ಲರೆ (Retail) ಹಾಗೂ ಸಗಟು (Wholesale) ಗ್ರಾಹಕರಿಗಾಗಿ 24 ಗಂಟೆ ಮತ್ತು 48 ಗಂಟೆಗಳ ಸ್ಪೀಡ್ ಪೋಸ್ಟ್ ಸೇವೆಗಳ ಹೊಸ ದರಗಳನ್ನು ಸಹ ಪ್ರಕಟಿಸಿದೆ. ಹೊಸ ದರಗಳು ಆಗಸ್ಟ್ 1ರಿಂದ ಜಾರಿಗೆ ಬರಲಿವೆ.
ಹೊಸ ನಿಯಮದ ಪ್ರಕಾರ, ಬ್ಯಾಂಕಿಂಗ್, ಹಣಕಾಸು ಸೇವೆಗಳು ಮತ್ತು ವಿಮೆ (BFSI) ಕ್ಷೇತ್ರಕ್ಕೆ ಸಂಬಂಧಿಸಿದ ವೆಲ್ಕಮ್ ಕಿಟ್ಗಳು, ಪತ್ರಗಳು, ಪಾಸ್ಬುಕ್, ಚೆಕ್ಬುಕ್, ಬ್ಯಾಂಕ್ ದಾಖಲೆಗಳು, ಡೆಬಿಟ್ ಹಾಗೂ ಕ್ರೆಡಿಟ್ ಕಾರ್ಡ್ಗಳು, ಪ್ಯಾನ್ ಕಾರ್ಡ್, ಆಧಾರ್ ಕಾರ್ಡ್, ಮತದಾರರ ಗುರುತಿನ ಚೀಟಿ, ಪಾಸ್ಪೋರ್ಟ್ ಹಾಗೂ ಚಾಲನಾ ಪರವಾನಗಿ ಸೇರಿದಂತೆ ಹಲವು ದಾಖಲೆಗಳನ್ನು ‘ಡಾಕ್ಯುಮೆಂಟ್’ ಎಂದು ಪರಿಗಣಿಸಲಾಗುತ್ತದೆ.
ಇದರ ಜೊತೆಗೆ, 500 ಗ್ರಾಂವರೆಗೆ ತೂಕವಿರುವ ವಾಣಿಜ್ಯೇತರ ರಾಖಿ ಕವರ್ಗಳು, ಶುಭಾಶಯ ಪತ್ರಗಳು ಹಾಗೂ ಉಚಿತ ಉಡುಗೊರೆ ಪ್ಯಾಕೆಟ್ಗಳು ಕೂಡ ದಾಖಲೆ ವಿಭಾಗದಲ್ಲೇ ಸಾಗಾಟವಾಗಲಿವೆ. ಆದರೆ, ಇವುಗಳನ್ನು ಹೊರತುಪಡಿಸಿ ಉಳಿದ ಎಲ್ಲಾ ವಸ್ತುಗಳನ್ನು ಪಾರ್ಸೆಲ್ ವಿಭಾಗದಲ್ಲಿ ವರ್ಗೀಕರಿಸಲಾಗುತ್ತದೆ.
ಚಿಲ್ಲರೆ ಗ್ರಾಹಕರಿಗೆ ಈಗಿರುವ ಮೂಲ ದರಗಳಲ್ಲಿ ಯಾವುದೇ ಬದಲಾವಣೆ ಮಾಡಿಲ್ಲ. ಆದರೆ, ಹೊಸ ವರ್ಗೀಕರಣದಂತೆ 50 ಗ್ರಾಂವರೆಗೆ ತೂಕದ ದಾಖಲೆಗಳಿಗೆ ಸ್ಥಳೀಯವಾಗಿ ರೂ. 38 ಹಾಗೂ ದೇಶದ ಇತರೆ ಭಾಗಗಳಿಗೆ 94 ರೂ. (ಜಿಎಸ್ಟಿ ಹೆಚ್ಚುವರಿ) ಶುಲ್ಕ ವಿಧಿಸಲಾಗುತ್ತದೆ. 51ರಿಂದ 250 ಗ್ರಾಂ ತೂಕದ ಪ್ಯಾಕೆಟ್ಗಳಿಗೆ 118 ರೂ. ರಿಂದ 154 ರೂ., ಹಾಗೂ 251ರಿಂದ 500 ಗ್ರಾಂ ತೂಕದ ದಾಖಲೆಗಳಿಗೆ 140 ರೂ. ರಿಂದ 186 ರೂ. ವರೆಗೆ ಶುಲ್ಕ ನಿಗದಿಯಾಗಿದೆ.
ಸಗಟು ಗ್ರಾಹಕರಿಗೆ 24 ಗಂಟೆಗಳ ಸ್ಪೀಡ್ ಪೋಸ್ಟ್ ಸೇವೆಗೆ 38ರೂ. ರಿಂದ 100 ರೂ. ಹಾಗೂ 48 ಗಂಟೆಗಳ ಸೇವೆಗೆ 48ರೂ. ರಿಂದ 72ರೂ. ವರೆಗೆ ದರ ನಿಗದಿಪಡಿಸಲಾಗಿದೆ. 48 ಗಂಟೆಗಳ ಸ್ಪೀಡ್ ಪೋಸ್ಟ್ ಸೇವೆಯಲ್ಲಿ ಚಿಲ್ಲರೆ ಗ್ರಾಹಕರು 61 ರೂ. ರಿಂದ 121 ರೂ. ವರೆಗೆ ಶುಲ್ಕ ಪಾವತಿಸಬೇಕಾಗುತ್ತದೆ.
ಪ್ರಸ್ತುತ ಈ ವಿಶೇಷ 24 ಗಂಟೆ ಮತ್ತು 48 ಗಂಟೆಗಳ ಸ್ಪೀಡ್ ಪೋಸ್ಟ್ ಸೇವೆಗಳು ದೆಹಲಿ, ಮುಂಬೈ, ಚೆನ್ನೈ, ಕೊಲ್ಕತ್ತಾ, ಬೆಂಗಳೂರು ಮತ್ತು ಹೈದರಾಬಾದ್ ನಗರಗಳಲ್ಲಿ ಮಾತ್ರ ಲಭ್ಯವಿದ್ದು, ಮುಂದಿನ ದಿನಗಳಲ್ಲಿ ಇತರೆ ನಗರಗಳಿಗೂ ವಿಸ್ತರಣೆ ಮಾಡುವ ಸಾಧ್ಯತೆ ಇದೆ.
