ಚಾರಿತ್ರ್ಯದ ಮೇಲೆ ಅನುಮಾನ ಪಟ್ಟು ತಂದೆಯೇ ತನ್ನ 17 ವರ್ಷದ ಮಗಳ ಕೈಕಾಲು ಕಟ್ಟಿ ಕಾಲುವೆಗೆ ಎಸೆದು ಕೊಲೆ ಮಾಡಲು ಯತ್ನಿಸಿದ ಘಟನೆ ಸೆಪ್ಟೆಂಬರ್ 29ರಂದು ಪಂಜಾಬ್‌ನ ಫಿರೋಜ್‌ಪುರ ಜಿಲ್ಲೆಯಲ್ಲಿ ನಡೆದಿತ್ತು. ಆದರೆ ಎರಡು ತಿಂಗಳ ಬಳಿಕ ಆ ಬಾಲಕಿ ಬದುಕಿ ಬಂದು ಮಾಧ್ಯಮದ ಮುಂದೆ ನಿಂತಿದ್ದಾಳೆ. ಈ ಸುದ್ದಿ ಬೆಚ್ಚಿ ಬೀಳಿಸಿದೆ.
ತಂದೆ ರಾಜ್ ಕುಮಾರ್ ಎಂಬುವವನು ಮಗಳು ಶಾಲೆ ಬಿಟ್ಟು ಹೋಗುತ್ತಿದ್ದಾಳೆ ಎಂಬ ಅನುಮಾನದಿಂದ ಕೋಪಗೊಂಡು ಆಕೆಯನ್ನು ಎಳೆದೊಯ್ದು ಕೈಕಾಲು ಕಟ್ಟಿ ಕಾಲುವೆಗೆ ತಳ್ಳಿದ್ದ. ಆ ಸಮಯದಲ್ಲಿ ಆತ ಈ ಕೃತ್ಯವನ್ನು ಮೊಬೈಲ್‌ನಲ್ಲಿ ವಿಡಿಯೋ ಕೂಡ ಮಾಡಿಕೊಂಡಿದ್ದ. ಆಕೆಯ ಸಂಬಂಧಿಯೊಬ್ಬ ದೂರು ನೀಡಿದ ಮೇಲೆ ಪೊಲೀಸರು ರಾಜ್ ಕುಮಾರ್ ಅವರನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಕಳುಹಿಸಿದ್ದರು.
ಪೊಲೀಸರು ಹಾಗೂ ಕುಟುಂಬಸ್ಥರು ಆಕೆ ಸತ್ತೇ ಹೋದಳು ಎಂದು ಭಾವಿಸಿದ್ದರು. ಆದರೆ ಎರಡು ತಿಂಗಳ ಬಳಿಕ ಆಕೆ ಸುರಕ್ಷಿತವಾಗಿ ಮನೆಗೆ ಮರಳಿ ಬಂದಿದ್ದಾಳೆ.
ಬದುಕಿ ಬಂದದ್ದು ಹೇಗೆ?
ಆ ದಿನ ಕಾಲುವೆ ಉಕ್ಕಿ ಹರಿಯುತ್ತಿತ್ತು. ಆಕೆಯ ಕೈಗೆ ಕಟ್ಟಿದ್ದ ಹಗ್ಗ ಸಡಿಲಗೊಂಡಿತ್ತು. ತೇಲುತ್ತಾ ಹೋಗುತ್ತಿದ್ದಾಗ ಕಬ್ಬಿಣದ ಸರಳೊಂದಕ್ಕೆ ಡಿಕ್ಕಿ ಹೊಡೆದಳು. ಅದನ್ನು ಗಟ್ಟಿಯಾಗಿ ಹಿಡಿದುಕೊಂಡು ದಡ ಸೇರಿದಳು. ನಂತರ ಮೂವರು ದಾರಿ ಹೋಕರು ಆಕೆಯನ್ನು ಗುರುತಿಸಿ ಸುರಕ್ಷಿತ ಸ್ಥಳಕ್ಕೆ ಕರೆದೊಯ್ದರು. ಅಲ್ಲೇ ಎರಡು ತಿಂಗಳು ಆಶ್ರಯ ಪಡೆದು ಚಿಕಿತ್ಸೆ ಪಡೆದಳು. ಆಕೆ ಅನಾರೋಗ್ಯದಿಂದ ಬಳಲುತ್ತಿದ್ದಳು ಎಂದು ತಿಳಿದುಬಂದಿದೆ.
ಈಗ ಮಾಧ್ಯಮದ ಮುಂದೆ ಬಂದ ಆ ಬಾಲಕಿ ಕಣ್ಣೀರು ಸುರಿಸುತ್ತಾ ತನ್ನ ಕಥೆ ಹೇಳಿದ್ದಾಳೆ. “ನನ್ನ ತಂದೆ ಮದ್ಯ ಕುಡಿದು ಕೋಪದಲ್ಲಿ ಇದನ್ನು ಮಾಡಿದ್ದಾರೆ. ನಾನು ತಪ್ಪು ಮಾಡಿಲ್ಲ. ತಮ್ಮಂದಿರನ್ನು ನೋಡಿಕೊಳ್ಳಲು ಯಾರೂ ಇಲ್ಲ. ದಯವಿಟ್ಟು ನನ್ನ ತಂದೆಯನ್ನು ಬಿಡುಗಡೆ ಮಾಡಿ” ಎಂದು ಪೊಲೀಸರನ್ನು ಕೇಳಿಕೊಂಡಿದ್ದಾಳೆ.
ಪೊಲೀಸರು ಈಗ ಆಕೆಯ ಹೇಳಿಕೆ ಆಧರಿಸಿ ತನಿಖೆ ಮುಂದುವರೆಸಿದ್ದಾರೆ. ಕೊಲೆ ಪ್ರಕರಣವನ್ನು ಕೊಲೆಯತ್ನ ಪ್ರಕರಣಕ್ಕೆ ಇಳಿಸುವ ಸಾಧ್ಯತೆ ಇದೆ. ತಂದೆ ರಾಜ್ ಕುಮಾರ್ ಅವರನ್ನು ಬಿಡುಗಡೆ ಮಾಡುವ ಕುರಿತು ಚರ್ಚೆ ನಡೆಯುತ್ತಿದೆ.
ಈ ಘಟನೆ ಪಂಜಾಬ್‌ನಲ್ಲಿ ದೊಡ್ಡ ಚರ್ಚೆಗೆ ಕಾರಣವಾಗಿದ್ದು, ಮಗಳ ಮೇಲಿನ ಅನುಮಾನದಿಂದ ತಂದೆಯೇ ಇಷ್ಟೊಂದು ದುಸ್ಸಾಹಸ ಮಾಡಿದ್ದಕ್ಕೆ ಎಲ್ಲರೂ ಆಘಾತ ವ್ಯಕ್ತಪಡಿಸುತ್ತಿದ್ದಾರೆ. ಆದರೆ ಬಾಲಕಿಯ ಬದುಕುಳಿದು ಬಂದ ಕಥೆ ಎಲ್ಲರನ್ನೂ ಆಶ್ಚರ್ಯಗೊಳಿಸಿದೆ.
