ನವದೆಹಲಿ: ಸಾಮಾಜಿಕ ಜಾಲತಾಣಗಳಲ್ಲಿ ಕಳೆದ ಕೆಲವು ದಿನಗಳಿಂದ ಭಾರೀ ಚರ್ಚೆಗೆ ಕಾರಣವಾಗಿದ್ದ ‘ಕಾಕ್ರೋಚ್ ಜನತಾ ಪಕ್ಷ’ದ ಎಕ್ಸ್ (ಹಳೆ ಟ್ವಿಟರ್) ಖಾತೆಯನ್ನು ಭಾರತದಲ್ಲಿ ತಡೆಹಿಡಿದ ಬೆನ್ನಲ್ಲೇ, ಅದರ ತಂಡ ಹೊಸ ಖಾತೆಯನ್ನು ಪ್ರಾರಂಭಿಸಿ ಮತ್ತೆ ಸಾಮಾಜಿಕ ಜಾಲತಾಣಗಳಲ್ಲಿ ಸದ್ದು ಮಾಡುತ್ತಿದೆ. ‘ಕಾಕ್ರೋಚ್ ಈಸ್ ಬ್ಯಾಕ್’ ಎಂಬ ಹೆಸರಿನ ಹೊಸ ಹ್ಯಾಂಡಲ್ ಆರಂಭವಾದ ಕೆಲವೇ ಗಂಟೆಗಳಲ್ಲಿ ಸಾವಿರಾರು ಅನುಯಾಯಿಗಳನ್ನು ಸೆಳೆಯುವ ಮೂಲಕ ಮತ್ತೆ ವೈರಲ್ ಆಗಿದೆ.
ಗುರುವಾರ ಬೆಳಿಗ್ಗೆ ‘ಕಾಕ್ರೋಚ್ ಜನತಾ ಪಕ್ಷ’ ಖಾತೆಯನ್ನು ಭಾರತದಲ್ಲಿ ನಿರ್ಬಂಧಿಸಲಾಗಿತ್ತು. ಇದಾದ ಕೆಲವೇ ಸಮಯದಲ್ಲಿ ಸಂಸ್ಥಾಪಕ ಅಭಿಜೀತ್ ದಿಪ್ಕೆ ಹೊಸ ಎಕ್ಸ್ ಖಾತೆ ಆರಂಭಿಸಿರುವುದಾಗಿ ಘೋಷಿಸಿದರು. “ನಿನ್ನೆ ಖಾತೆಯನ್ನು ಹ್ಯಾಕ್ ಮಾಡಲು ಯತ್ನಗಳು ನಡೆದಿದ್ದವು. ಆದರೆ ಇದು ಸರ್ಕಾರದ ಸ್ವಯಂ ಗುರಿಯಾಗಿದೆ ಎಂದು ನಾವು ನಂಬುತ್ತಿದ್ದೇವೆ” ಎಂದು ಅವರು ಆರೋಪಿಸಿದರು.
ಅವರು ಮುಂದುವರೆದು, “ನಾನು ಈಗ ‘ಕಾಕ್ರೋಚ್ ಈಸ್ ಬ್ಯಾಕ್’ ಎಂಬ ಹೊಸ ಖಾತೆಯನ್ನು ಆರಂಭಿಸಿದ್ದೇನೆ. ಈ ವಿಚಾರವನ್ನು ಕಾನೂನುಬದ್ಧವಾಗಿ ಎದುರಿಸುತ್ತೇವೆ” ಎಂದು ಹೇಳಿದರು. ಮಧ್ಯಾಹ್ನದ ವೇಳೆಗೆ ಹೊಸ ಖಾತೆ ಸಾವಿರಾರು ಫಾಲೋವರ್ಸ್ಗಳನ್ನು ಪಡೆದು ವೇಗವಾಗಿ ವೈರಲ್ ಆಗ್ತಿದೆ.
ಮೇ 15ರಂದು ಭಾರತದ ಮುಖ್ಯ ನ್ಯಾಯಮೂರ್ತಿಗಳು ಯುವಕರ ಬಗ್ಗೆ ನೀಡಿದ ಹೇಳಿಕೆಗಳ ನಂತರ ‘ಕಾಕ್ರೋಚ್ ಜನತಾ ಪಕ್ಷ’ ಎಂಬ ಮೀಮ್ ಆಧಾರಿತ ಡಿಜಿಟಲ್ ಚಳುವಳಿ ಹುಟ್ಟಿಕೊಂಡಿತ್ತು. ರಾಜಕೀಯ ವ್ಯಂಗ್ಯ, ಸಾಮಾಜಿಕ ಟೀಕೆ ಮತ್ತು ಯುವಕರ ಸಮಸ್ಯೆಗಳ ಕುರಿತ ಮೀಮ್ಗಳ ಮೂಲಕ ಈ ವೇದಿಕೆ ತಕ್ಷಣವೇ ಜನಪ್ರಿಯತೆಯನ್ನು ಗಳಿಸಿತು.
ನಿರುದ್ಯೋಗ, ಪರೀಕ್ಷಾ ಪತ್ರಿಕೆ ಸೋರಿಕೆ, ಶಿಕ್ಷಣ ವ್ಯವಸ್ಥೆಯ ದೌರ್ಬಲ್ಯ ಮತ್ತು ಯುವಜನರ ನಿರಾಶೆ ಇತ್ಯಾದಿ ವಿಷಯಗಳನ್ನು ಹಾಸ್ಯ ಮತ್ತು ವ್ಯಂಗ್ಯದ ಮೂಲಕ ಈ ವೇದಿಕೆ ಜನರಿಗೆ ತಲುಪಿಸಿತು. ಗ್ರಾಫಿಕ್ಸ್, ಅನಿಮೇಷನ್ ಹಾಗೂ ಪ್ರಣಾಳಿಕೆ ಶೈಲಿಯ ಪೋಸ್ಟ್ಗಳು ಯುವಕರನ್ನು ಹೆಚ್ಚು ಆಕರ್ಷಿಸಿವೆ.
ಎಕ್ಸ್ನಲ್ಲಿ ಖಾತೆ ತಡೆಹಿಡಿದರೂ, ಇನ್ಸ್ಟಾಗ್ರಾಂನಲ್ಲಿ ಈ ವೇದಿಕೆಯ ಪ್ರಭಾವ ಇನ್ನೂ ಹೆಚ್ಚಾಗುತ್ತಿದೆ. ವರದಿಗಳ ಪ್ರಕಾರ, ಅದರ ಇನ್ಸ್ಟಾಗ್ರಾಂ ಪುಟಕ್ಕೆ ಲಕ್ಷಾಂತರ ಅನುಯಾಯಿಗಳಿದ್ದು, ಪ್ರತಿದಿನ ಹೊಸ ಬಳಕೆದಾರರು ಸೇರುತ್ತಿದ್ದಾರೆ. ಕೆಲವು ಪೋಸ್ಟ್ಗಳಲ್ಲಿ ರಾಷ್ಟ್ರೀಯ ರಾಜಕೀಯ ಪಕ್ಷಗಳ ಅಧಿಕೃತ ಖಾತೆಗಳೊಂದಿಗೆ ಹೋಲಿಕೆ ಮಾಡಲಾಗುತ್ತಿದ್ದು, ಇದು ಸಾಮಾಜಿಕ ಮಾಧ್ಯಮಗಳಲ್ಲಿ ಮತ್ತಷ್ಟು ಚರ್ಚೆಗೆ ಕಾರಣವಾಗಿದೆ.
ಅಭಿಜೀತ್ ದಿಪ್ಕೆ ಅವರ ಪ್ರಕಾರ, ಈ ವೇದಿಕೆಯ ವೇಗದ ಬೆಳವಣಿಗೆಯೇ ಅಧಿಕಾರ ವಲಯಗಳಲ್ಲಿ ಆತಂಕಕ್ಕೆ ಕಾರಣವಾಗಿದೆ. “ಪ್ರತಿದಿನ ಸಾವಿರಾರು ಜನ ನಮ್ಮನ್ನು ಅನುಸರಿಸುತ್ತಿದ್ದರು. ಬಹುಶಃ ಅದೇ ಸರ್ಕಾರವನ್ನು ಹೆದರಿಸಿರಬಹುದು” ಎಂದು ಅವರು ಹೇಳಿದ್ದಾರೆ.
ಇದೀಗ ‘Cockroach’ ಹೆಸರಿನ ಹಲವು ಹೊಸ ಖಾತೆಗಳು ಎಕ್ಸ್ನಲ್ಲಿ ಕಾಣಿಸಿಕೊಳ್ಳುತ್ತಿವೆ. ‘The Cockroach Youth’, ‘Cockroach News’, ‘IAmCockroach’, ‘Cockroach Party of India’ ಮತ್ತು ‘Cockroach Janata Party Gen Z’ ಸೇರಿದಂತೆ ಹಲವು ಖಾತೆಗಳು ಸಕ್ರಿಯವಾಗಿದ್ದು, ಮೀಮ್ ಸಂಸ್ಕೃತಿಯ ಮೂಲಕ ರಾಜಕೀಯ ವ್ಯಂಗ್ಯವನ್ನು ಮುಂದುವರೆಸುತ್ತಿವೆ.
