ಋತುಚಕ್ರದ ನಂತರ ಮಹಿಳೆಯರಲ್ಲಿ ಬಿಳಿ ವಿಸರ್ಜನೆ ಅಥವಾ ಬಿಳಿ ಸ್ರಾವ ಕಾಣಿಸಿಕೊಳ್ಳುವುದು ಸಾಮಾನ್ಯ. ಇದು ದೇಹದ ಸ್ವಾಭಾವಿಕ ಶುದ್ಧೀಕರಣ ಪ್ರಕ್ರಿಯೆಯ ಭಾಗವಾಗಿದೆ. ಯೋನಿಯೊಳಗಿನ ಕಸದ ಅಂಶಗಳು ಮತ್ತು ಮೃತಕೋಶಗಳು ಹೊರಹಾಕುವಾಗ ಬಿಳಿ ವಿಸರ್ಜನೆ ಕಾಣಿಸಿಕೊಳ್ಳುತ್ತದೆ. ಆದಾಗ್ಯೂ ಕೆಲವರಲ್ಲಿ ಇದು ಅತಿಯಾಗಿ ಆಗುವುದು ಅಥವಾ ದುರ್ವಾಸನೆ ಕಾಣಿಸಿಕೊಳ್ಳುವುದು ಆರೋಗ್ಯದ ಎಚ್ಚರಿಕೆಯ ಸಂಕೇತವಾಗಬಹುದು.
ಸ್ತ್ರೀರೋಗ ತಜ್ಞರ ಪ್ರಕಾರ, ಋತುಚಕ್ರದ ನಂತರ ದೇಹದಲ್ಲಿ ಈಸ್ಟ್ರೊಜೆನ್ ಹಾರ್ಮೋನ್ ಮಟ್ಟಗಳು ಹೆಚ್ಚಾಗುತ್ತವೆ. ಈ ಹಾರ್ಮೋನ್ ಗರ್ಭಕಂಠದಲ್ಲಿ (Cervix) ಲೋಳೆ ಉತ್ಪಾದನೆಯನ್ನು ಹೆಚ್ಚಿಸಿ, ಯೋನಿಯನ್ನು ತೇವಯುಕ್ತವಾಗಿಡಲು ಸಹಕಾರಿಸುತ್ತದೆ. ಇದರಿಂದ ಬಿಳಿ ಅಥವಾ ಪಾಚ ಬಣ್ಣದ ಸ್ರಾವ ಉಂಟಾಗುವುದು ಸಹಜ. ಆದರೆ ಈ ಸ್ರಾವದ ಪ್ರಮಾಣ ಹೆಚ್ಚು ಆಗುವುದು, ದುರ್ವಾಸನೆ ಬರುವುದು, ಅಥವಾ ತುರಿಕೆ ಕಾಣಿಸಿಕೊಳ್ಳುವುದು. ಇವು ಸೋಂಕಿನ ಲಕ್ಷಣವಾಗಬಹುದು. ಈ ರೀತಿಯ ಸ್ಥಿತಿಯನ್ನು ನಿರ್ಲಕ್ಷ್ಯ ಮಾಡುವುದು ಸರಿಯಲ್ಲ.
ಬಿಳಿ ವಿಸರ್ಜನೆ ಅತಿಯಾದಾಗ ಕಂಡುಬರುವ ಸಾಮಾನ್ಯ ಲಕ್ಷಣಗಳು
-
ದುರ್ವಾಸನೆ ಅಥವಾ ಕೆಟ್ಟ ವಾಸನೆ
-
ತುರಿಕೆ ಅಥವಾ ಸುಡುವ ಭಾವನೆ
-
ಕೆಳ ಹೊಟ್ಟೆ ನೋವು
-
ಸ್ರಾವದ ಬಣ್ಣ ಬದಲಾಗುವುದು (ಹಳದಿ, ಹಸಿರು ಅಥವಾ ಬೂದು ಬಣ್ಣದಂತೆ)
ಈ ಲಕ್ಷಣಗಳು ಕಂಡುಬಂದರೆ, ತಕ್ಷಣ ವೈದ್ಯರನ್ನು ಸಂಪರ್ಕಿಸುವುದು ಅತ್ಯಂತ ಅಗತ್ಯ.
ಬಿಳಿ ಸ್ರಾವ ಹೆಚ್ಚಾಗಲು ಸಾಧ್ಯವಾದ ಕಾರಣಗಳು
-
ಬ್ಯಾಕ್ಟೀರಿಯಾ ಅಥವಾ ಫಂಗಲ್ ಇನ್‌ಫೆಕ್ಷನ್ : ಯೋನಿಯೊಳಗಿನ ಬ್ಯಾಕ್ಟೀರಿಯ ಸಮತೋಲನ ಹಾಳಾದಾಗ ಇಂತಹ ಸೋಂಕು ಉಂಟಾಗಬಹುದು.
-
ಹಾರ್ಮೋನ್ ಅಸಮತೋಲನ : ಈಸ್ಟ್ರೊಜೆನ್ ಮಟ್ಟದಲ್ಲಿ ಏರಿಳಿತವಾದರೂ ಬಿಳಿ ಸ್ರಾವ ಹೆಚ್ಚಾಗಬಹುದು.
-
ಸ್ವಚ್ಛತೆಗೆ ಕೊರತೆ : ಅಸಮರ್ಪಕ ನೈರ್ಮಲ್ಯ ಅಥವಾ ತೇವಯುಕ್ತ ಉಡುಪುಗಳು ಸೋಂಕಿಗೆ ದಾರಿ ಮಾಡುತ್ತವೆ.
-
ಮಾನಸಿಕ ಒತ್ತಡ : ದೇಹದ ಹಾರ್ಮೋನ್ ಬದಲಾವಣೆಗಳಲ್ಲಿ ಒತ್ತಡವೂ ಪ್ರಮುಖ ಪಾತ್ರ ವಹಿಸುತ್ತದೆ.
ಈ ಸಮಸ್ಯೆ ತಡೆಯಲು ಪಾಲಿಸಬೇಕಾದ ನೈರ್ಮಲ್ಯ ಅಭ್ಯಾಸಗಳು
-
ಪ್ರತಿದಿನ ಯೋನಿಯ ಭಾಗವನ್ನು ಸ್ವಚ್ಛ ಮತ್ತು ಒಣವಾಗಿಡಿ.
-
ಹತ್ತಿಯಿಂದ ಮಾಡಿದ ಒಳ ಉಡುಪು ಧರಿಸಿ. ಸಿಂಥಟಿಕ್ ಬಟ್ಟೆಗಳನ್ನು ತಪ್ಪಿಸಿ.
-
ಒಳ ಉಡುಪುಗಳನ್ನು ದಿನವೂ ಬದಲಾಯಿಸಿ ಮತ್ತು ಸೂರ್ಯನ ಬೆಳಕಿನಲ್ಲಿ ಒಣಗಿಸಿ.
-
ಸಾಬೂನು ಅಥವಾ ಕಾಸ್ಮೆಟಿಕ್ ವಾಶ್‌ಗಳನ್ನು ನೇರವಾಗಿ ಯೋನಿಯೊಳಗೆ ಬಳಸಬೇಡಿ.
-
ಋತುಚಕ್ರದ ಸಮಯದಲ್ಲಿ ಪ್ಯಾಡ್‌ಗಳನ್ನು 4-5 ಗಂಟೆಗೆ ಒಮ್ಮೆ ಬದಲಾಯಿಸಿ.
ಮನೆಮದ್ದುಗಳು ಮತ್ತು ಆಹಾರ ಸಲಹೆಗಳು
-
ಅಂಜೂರ (Fig): ನಾರಿನಂಶ ಮತ್ತು ಖನಿಜಗಳಿಂದ ಸಮೃದ್ಧವಾಗಿರುವ ಅಂಜೂರ ದೇಹದ ವಿಷಕಾರಕ ಅಂಶಗಳನ್ನು ಹೊರಹಾಕಿ, ಹಾರ್ಮೋನ್ ಸಮತೋಲನಕ್ಕೆ ಸಹಾಯ ಮಾಡುತ್ತದೆ.
-
ಮೆಂತ್ಯೆ ಬೀಜ (Fenugreek): ನೀರಿನಲ್ಲಿ ನೆನೆಸಿ ಬೆಳಿಗ್ಗೆ ಸೇವಿಸುವುದರಿಂದ ದೇಹದ ಹಾರ್ಮೋನ್ ನಿಯಂತ್ರಣಕ್ಕೆ ಸಹಕಾರಿ.
-
ಹಾಲು ಮತ್ತು ಹಾಲು ಉತ್ಪನ್ನಗಳು: ಕ್ಯಾಲ್ಸಿಯಂ ಮತ್ತು ಪ್ರೋಬೈಯೋಟಿಕ್ ಅಂಶಗಳಿಂದ ದೇಹದ ರೋಗನಿರೋಧಕ ಶಕ್ತಿ ಹೆಚ್ಚುತ್ತದೆ.
-
ಹಸಿರು ತರಕಾರಿಗಳು ಮತ್ತು ಹಣ್ಣುಗಳು: ವಿಟಮಿನ್ ಸಿ ಹಾಗೂ ಬಿ ಕಾಂಪ್ಲೆಕ್ಸ್ ವಿಟಮಿನ್‌ಗಳು ದೇಹದ ರಕ್ತಪ್ರಸರಣ ಸುಧಾರಿಸುತ್ತವೆ.
ಋತುಚಕ್ರದ ನಂತರ ಸ್ವಲ್ಪ ಬಿಳಿ ಸ್ರಾವ ಕಾಣಿಸಿಕೊಳ್ಳುವುದು ಸಹಜ. ಆದರೆ ಅದು ದುರ್ವಾಸನೆ, ತುರಿಕೆ ಅಥವಾ ಅಸಹನೆ ಜೊತೆ ಕಾಣಿಸಿಕೊಂಡರೆ ವೈದ್ಯರನ್ನು ಸಂಪರ್ಕಿಸುವುದು ಸೂಕ್ತ. ನೈರ್ಮಲ್ಯ ಕಾಪಾಡಿಕೊಳ್ಳುವುದು ಮತ್ತು ಸರಿಯಾದ ಆಹಾರ ಕ್ರಮ ಪಾಲಿಸುವುದರಿಂದ ಈ ಸಮಸ್ಯೆಯನ್ನು ಸುಲಭವಾಗಿ ನಿಯಂತ್ರಿಸಬಹುದು.
