ನಮ್ಮ ಅಜ್ಜಿ-ತಾತಂದಿರ ಕಾಲದಿಂದಲೂ ಈ ಸಂಪ್ರದಾಯ ಇದೆ. ರಾತ್ರಿ ಮಲಗುವ ಮುಂಚೆ ಒಂದು ಗ್ಲಾಸ್ ಬೆಚ್ಚಗಿನ ಹಾಲಿನಲ್ಲಿ ಒಂದು ಚಮಚ ಶುದ್ಧ ತುಪ್ಪ ಬೆರೆಸಿ ಕುಡಿಯುವುದು. ಇದನ್ನು ಕೇವಲ ಸಂಪ್ರದಾಯ ಎಂದುಕೊಂಡಿದ್ದೀರಾ? ಇದರ ಹಿಂದೆ ಆಯುರ್ವೇದ ಮತ್ತು ಆಧುನಿಕ ವಿಜ್ಞಾನದ ದೊಡ್ಡ ರಹಸ್ಯಗಳಿವೆ. ಈ ಸಾಧಾರಣ ಪಾನೀಯ ದೇಹಕ್ಕೆ ಅಪಾರ ಪ್ರಯೋಜನಗಳನ್ನು ನೀಡುತ್ತದೆ. ಯಾವೆಲ್ಲ ಪ್ರಯೋಜನಗಳು ಗೊತ್ತಾ?
ಜೀರ್ಣಕ್ರಿಯೆ ಆರೋಗ್ಯಕ್ಕೆ ವರದಾನ
ತುಪ್ಪದಲ್ಲಿ ಸಮೃದ್ಧವಾಗಿ ಸಿಗುವ ಬ್ಯುಟಿರಿಕ್ ಆಮ್ಲ (Butyric acid) ಕರುಳಿನ ಒಳಗಿನ ಉರಿಯೂತವನ್ನು ಕಡಿಮೆ ಮಾಡುತ್ತದೆ. ಒಳ್ಳೆಯ ಬ್ಯಾಕ್ಟೀರಿಯಾಗಳ ಬೆಳವಣಿಗೆಗೆ ಸಹಾಯ ಮಾಡುತ್ತದೆ ಮತ್ತು ಆಹಾರ ಸರಾಗವಾಗಿ ಜೀರ್ಣವಾಗಲು ನೆರವಾಗುತ್ತದೆ. ದಿನಾಲು ಮಲಬದ್ಧತೆ, ಹೊಟ್ಟೆ ಉಬ್ಬರ, ಗ್ಯಾಸ್ ಸಮಸ್ಯೆ ಇರುವವರು ಈ ಪಾನೀಯವನ್ನು 15-20 ದಿನಗಳ ಕಾಲ ಸತತವಾಗಿ ಕುಡಿದರೆ ಬದಲಾವಣೆ ಕಾಣುತ್ತದೆ.
ಚರ್ಮಕ್ಕೆ ನೈಸರ್ಗಿಕ ಗ್ಲೋ
ತುಪ್ಪ ಎ, ಡಿ, ಇ, ಕೆ ಈ ನಾಲ್ಕೂ ಕೊಬ್ಬಿನಲ್ಲಿ ಕರಗುವ ವಿಟಮಿನ್ಗಳ ಒಡತಿಯಾಗಿದೆ. ಇವು ಚರ್ಮದ ಒಳಗಿನ ಪದರಗಳಿಗೆ ತಲುಪಿ ಆಳವಾದ ಪೋಷಣೆ ನೀಡುತ್ತವೆ. ಒಣ ಚರ್ಮ, ಮೊಡವೆ, ಕಪ್ಪು ಕಲೆಗಳ ಸಮಸ್ಯೆ ಇರುವವರು ರಾತ್ರಿ ಈ ಪಾನೀಯ ಕುಡಿದು 1 ತಿಂಗಳು ನೋಡಿ. ಚರ್ಮದ ಹೊಳಪು ಮತ್ತು ಮೃದುತ್ವ ಎರಡೂ ಹೆಚ್ಚಾಗುತ್ತವೆ.
ಚಯಾಪಚಯ ಕ್ರಿಯೆ ವೇಗಗೊಳ್ಳುತ್ತದೆ
ತುಪ್ಪದಲ್ಲಿ ಇರುವ ಮಧ್ಯಮ ಸರಪಳಿ ಟ್ರೈಗ್ಲಿಸರೈಡ್ಗಳು (MCTs) ದೇಹದಲ್ಲಿ ತ್ವರಿತ ಶಕ್ತಿಯಾಗಿ ಪರಿವರ್ತನೆಯಾಗುತ್ತವೆ ಮತ್ತು ಚಯಾಪಚಯ ದರವನ್ನು ಹೆಚ್ಚಿಸುತ್ತವೆ. ತೂಕ ಇಳಿಸಲು ಪ್ರಯತ್ನಿಸುತ್ತಿರುವವರಿಗೂ ಇದು ಒಳ್ಳೆಯ ಆಯ್ಕೆ. ಜತೆಗೆ ದೇಹದಲ್ಲಿರುವ ವಿಷಕಾರಿ ತ್ಯಾಜ್ಯಗಳನ್ನು ಹೊರಹಾಕಲು ಸಹಾಯ ಮಾಡುತ್ತದೆ.
ಗಾಢ ನಿದ್ರೆಯ ಗ್ಯಾರಂಟಿ
ಹಾಲು ಮತ್ತು ತುಪ್ಪ ಎರಡರಲ್ಲೂ ಟ್ರಿಪ್ಟೊಫಾನ್ (Tryptophan) ಎಂಬ ಅಮೈನೋ ಆಮ್ಲ ಇದೆ. ಇದು ಮೆದುಳಿನಲ್ಲಿ ಸೆರೊಟೋನಿನ್ ಮತ್ತು ಮೆಲಟೋನಿನ್ ಹಾರ್ಮೋನುಗಳ ಉತ್ಪಾದನೆಯನ್ನು ಹೆಚ್ಚಿಸಿ ಆಳವಾದ ನಿದ್ರೆ ನೀಡುತ್ತದೆ.
ಕೀಲು-ಮೂಳೆ ನೋವಿಗೆ ನೈಸರ್ಗಿಕ ನಿವಾರಣೆ
ತುಪ್ಪದಲ್ಲಿ ಇರುವ ಒಮೆಗಾ-3, ವಿಟಮಿನ್ ಕೆ2 (MK-4) ಮತ್ತು ಉತ್ಕರ್ಷಣ ನಿರೋಧಕ ಗುಣಗಳು ಕೀಲುಗಳ ಸುತ್ತಲಿನ ಉರಿಯೂತವನ್ನು ಕಡಿಮೆ ಮಾಡುತ್ತವೆ. ಆರ್ಥ್ರೈಟಿಸ್, ಸಂಧಿವಾತ ಅಥವಾ ಕಾಲು-ಕೈ ನೋವು ಇರುವವರು ರಾತ್ರಿ ಈ ಪಾನೀಯವನ್ನು ಕುಡಿದರೆ ಬೆಳಗ್ಗೆ ದೇಹದಲ್ಲಿ ಸಡಿಲತೆ ಮತ್ತು ನೋವು ಕಡಿಮೆಯಾಗುತ್ತದೆ.
ಯಾವ ರೀತಿ ತಯಾರಿಸಬೇಕು?
- 1 ಗ್ಲಾಸ್ ಹಾಲು
- 1 ಚಮಚ ಶುದ್ಧ ತುಪ್ಪ
- ಸ್ವಲ್ಪ ಜಜ್ಜಿದ ಶುಂಠಿ ಪುಡಿ ಅಥವಾ ಅರಿಶಿನ – ಇನ್ನಷ್ಟು ಪ್ರಯೋಜನಕ್ಕಾಗಿ
ಹಾಲನ್ನು ಬೆಚ್ಚಗೆ ಬಿಸಿ ಮಾಡಿ (ಕುದಿಯದಂತೆ), ತುಪ್ಪ ಹಾಕಿ ಚೆನ್ನಾಗಿ ಬೆರೆಸಿ, ನಿಧಾನವಾಗಿ ಕುಡಿಯಿರಿ. ರಾತ್ರಿ ಊಟ ಮುಗಿಸಿ ಕನಿಷ್ಠ 1 ಗಂಟೆ ಬಿಟ್ಟು ಕುಡಿಯುವುದು ಉತ್ತಮ.
