ಪ್ರೇಮಿಗಳ ದಿನವೆಂದರೆ ಯುವ ಮನಸ್ಸುಗಳ ಹಬ್ಬವೆಂದು ಕೆಲವರು ಭಾವಿಸುತ್ತಾರೆ. ಆದರೆ ಪ್ರೀತಿ ಎನ್ನುವುದು ಕೇವಲ ಕಾಲೇಜು ದಿನಗಳ ನೆನಪು ಅಥವಾ ಯೌವನದ ಉಲ್ಲಾಸ ಮಾತ್ರವಲ್ಲ. ಒಮ್ಮೆ ಪ್ರೇಮಿಗಳಾಗಿ, ನಂತರ ಸಪ್ತಪದಿ ತುಳಿದು ದಾಂಪತ್ಯ ಜೀವನಕ್ಕೆ ಕಾಲಿಟ್ಟವರು ಕೂಡ ಈ ದಿನದ ಮಹತ್ವವನ್ನು ಮರೆಯಬಾರದು. “ಮದುವೆಯಾಗಿದೆ, ಈಗ ಅದೇನಿಗೆ?” ಎಂಬ ಉಡಾಫೆ ತೋರದೆ, ನಿಮ್ಮ ಜೀವನ ಸಂಗಾತಿಗೆ ಒಂದು ಗುಲಾಬಿ ಹೂ ನೀಡಿ, ಮೃದುವಾಗಿ ‘ಐ ಲವ್ ಯೂ’ ಎಂದು ಹೇಳಿ. ಆ ಒಂದು ಕ್ಷಣ ಅವರ ಮುಖದಲ್ಲಿ ಮೂಡುವ ನಗು ನಿಮ್ಮ ಬದುಕಿಗೆ ಹೊಸ ಉತ್ಸಾಹ ನೀಡುತ್ತದೆ.
ಪ್ರೀತಿ ಎಂದರೆ ಸಾಗರದಂತೆ ವಿಶಾಲವಾದ ಭಾವನೆ. ಇದರಲ್ಲಿ ಗೆದ್ದವರಿದ್ದಾರೆ, ಸೋತವರಿದ್ದಾರೆ. ಪ್ರತಿಯೊಬ್ಬರೂ ತಮ್ಮ ಪ್ರೀತಿಯಲ್ಲಿ ಯಶಸ್ಸು ಕಾಣಬೇಕೆಂದು ಬಯಸುತ್ತಾರೆ. ಆದರೆ ಪ್ರೀತಿಸಿದವರೆಲ್ಲರು ಅದನ್ನು ಸಂಪೂರ್ಣವಾಗಿ ಸಾಧಿಸುತ್ತಾರೆ ಎನ್ನಲು ಸಾಧ್ಯವಿಲ್ಲ. ಕಾರಣ, ಪ್ರೀತಿ ಕೇವಲ ಆಕರ್ಷಣೆ ಅಲ್ಲ, ಅದು ನಂಬಿಕೆ, ಪ್ರಾಮಾಣಿಕತೆ ಮತ್ತು ತ್ಯಾಗದ ಸಂಕಲನ.
ಇಂದಿನ ಆಧುನಿಕ ಜೀವನ ಶೈಲಿಯಲ್ಲಿ ಪ್ರೀತಿಯ ಅರ್ಥವು ಬದಲಾಗುತ್ತಿರುವುದು ಕಾಣಿಸುತ್ತದೆ. ಕೆಲವರು ಪ್ರೀತಿಯನ್ನು ಕೇವಲ ಎಂಜಾಯ್ ಮಾಡುವ ಹಂತವಾಗಿ ಮಾತ್ರ ನೋಡುತ್ತಾರೆ. ಒಳ್ಳೆಯ ಗೆಳೆತನವನ್ನೇ ಪ್ರೀತಿ ಎಂದು ತಪ್ಪಾಗಿ ಅರ್ಥೈಸಿಕೊಳ್ಳುವುದು, ದೈಹಿಕ ಆಕರ್ಷಣೆಯನ್ನು ನಿಜವಾದ ಪ್ರೀತಿ ಎಂದು ನಂಬುವುದು, ಅಥವಾ “ಈಗಿರಲಿ, ಮುಂದೆ ನೋಡೋಣ” ಎಂಬ ಮನೋಭಾವ ಇವೆಲ್ಲವು ಭವಿಷ್ಯದಲ್ಲಿ ನೋವು ತರಬಹುದು. ಪ್ರೀತಿಯ ಹೆಸರಿನಲ್ಲಿ ಮೋಸ ಮಾಡುವ ವಂಚಕ ಮನಸ್ಸುಗಳೂ ಇವೆ. ಇಂತಹ ಘಟನೆಗಳು ನಿಜವಾದ ಪ್ರೀತಿಯ ಮೌಲ್ಯವನ್ನು ಕಡಿಮೆ ಮಾಡುತ್ತವೆ.
ಭಾರತದಂತಹ ಸಂಪ್ರದಾಯಬದ್ಧ ದೇಶದಲ್ಲಿ ಪ್ರೀತಿ ಮತ್ತು ಮದುವೆ ಪರಸ್ಪರ ಸಂಬಂಧ ಹೊಂದಿವೆ. ಮದುವೆ ಎಂಬ ವೇದಿಕೆಗೆ ಪ್ರೀತಿಯೇ ಮೆಟ್ಟಿಲು. ಆದರೆ ಆ ಮೆಟ್ಟಿಲೇರಲು ಧೈರ್ಯ, ಸಹನೆ ಮತ್ತು ಪರಸ್ಪರ ಗೌರವ ಅಗತ್ಯ. ಪ್ರೇಮಿಗಳಾಗಿರುವಾಗ ಜವಾಬ್ದಾರಿ ಕಡಿಮೆ, ಆಕರ್ಷಣೆ ಹೆಚ್ಚು. ಆದರೆ ಮದುವೆಯಾದ ಬಳಿಕ ಬದುಕಿನ ನಿಜಸ್ವರೂಪ ಎದುರಾಗುತ್ತದೆ. ಕುಟುಂಬ, ಮಕ್ಕಳು, ಹೊಣೆಗಾರಿಕೆ ಇವೆಲ್ಲದರ ನಡುವೆ ಕೆಲವೊಮ್ಮೆ ಪ್ರೀತಿಯ ಸ್ಪರ್ಶ ಮಂಕಾಗುತ್ತದೆ. ಇದಕ್ಕೆ ಕಾರಣ ಪ್ರೀತಿಯ ಕೊರತೆ ಅಲ್ಲ, ಅಭಿವ್ಯಕ್ತಿಯ ಕೊರತೆ.
ಪ್ರೀತಿ ಒಂದು ಸೂಕ್ಷ್ಮ ಸಂವೇದಿ. ಅದಕ್ಕೆ ಜಾತಿ, ಹಣ, ಸ್ಥಾನಮಾನಗಳ ಮಿತಿ ಇಲ್ಲ. ಹೃದಯದಲ್ಲಿ ಅಂಕುರಿಸಿದರೆ ಸಾಕು, ಅದು ಜತೆಯಾಗಿ ಬದುಕುವುದನ್ನಷ್ಟೇ ಬಯಸುತ್ತದೆ. ಆದರೆ ಆ ಪ್ರೀತಿ ಗಟ್ಟಿಯಾಗಬೇಕಾದರೆ ನಂಬಿಕೆ ಮತ್ತು ಪ್ರಾಮಾಣಿಕತೆ ಮುಖ್ಯ. ಇವು ಇಲ್ಲದಿದ್ದರೆ ಪ್ರೀತಿ ದೀರ್ಘಕಾಲ ಉಳಿಯುವುದಿಲ್ಲ.
ಪ್ರೇಮಿಗಳ ದಿನವನ್ನು ಐಷಾರಾಮಿ ಹೋಟೆಲ್‌ಗಳಲ್ಲಿ ಆಚರಿಸುವವರಿದ್ದಾರೆ. ಆದರೆ ನಿಜವಾದ ಪ್ರೀತಿ ಅದ್ದೂರಿ ಆಚರಣೆಯನ್ನು ಬಯಸುವುದಿಲ್ಲ. ಅದು ಬಯಸುವುದು ಮನಸಿನ ಸೌಮ್ಯತೆಯನ್ನು, ಕಾಳಜಿಯನ್ನು, ಪರಸ್ಪರ ಗೌರವವನ್ನು. ಜೀವನದ ಹಾದಿಯಲ್ಲಿ ಎಷ್ಟೇ ಕಷ್ಟಗಳು ಬಂದರೂ, ಖುಷಿಯಾಗಿ ಜತೆಯಾಗಿ ಸಾಗುವುದು ಅದೇ ನಿಜವಾದ ಪ್ರೀತಿಗೆ ಕೊಡುವ ಗೌರವ.
ಆದ್ದರಿಂದ ಈ ವಾಲೆಂಟೈನ್ಸ್ ಡೇಯಂದು, ನಿಮ್ಮ ಸಂಗಾತಿಗೆ ಪ್ರೀತಿಯ ಮಾತುಗಳನ್ನು ಹೇಳಿ. ಒಂದು ಗುಲಾಬಿ, ಒಂದು ಮುದ್ದು, ಒಂದು ಹೃದಯಪೂರ್ವಕ ‘ಐ ಲವ್ ಯೂ’ ಇಷ್ಟೇ ಸಾಕು. ಮದುವೆಯಾದರೂ ಪ್ರೀತಿ ಮಂಕಾಗಬಾರದು. ಪ್ರೀತಿ ಜೀವಂತವಾಗಿರಲಿ, ದಾಂಪತ್ಯದಲ್ಲಿ ಸದಾ ಅರಳುತ್ತಿರಲಿ.
