ರಾತ್ರಿ ಸ್ವೆಟರ್ ಧರಿಸಿ ಮಲಗುತ್ತೀರಾ? ನಿಮ್ಮ ಆರೋಗ್ಯಕ್ಕೆ ಇದು ಅಪಾಯಕಾರಿ!

ಚಳಿಗಾಲ ಬಂದರೆ ಚಳಿಯ ತೀವ್ರತೆ ಅನೇಕ ಜನರನ್ನು ಕಾಡುತ್ತದೆ. ವಿಶೇಷವಾಗಿ ರಾತ್ರಿ ಸಮಯದಲ್ಲಿ ಚಳಿ ಹೆಚ್ಚಾಗುವುದರಿಂದ ಹಲವರು ಸ್ವೆಟರ್ ಅಥವಾ ಅತಿಯಾಗಿ ಬೆಚ್ಚಗಿನ ಬಟ್ಟೆಗಳನ್ನು ಧರಿಸಿ ಮಲಗುವ ಅಭ್ಯಾಸ ಹೊಂದಿರುತ್ತಾರೆ. “ಚಳಿ ತಪ್ಪಿಸಲು ಇದು ಒಳ್ಳೆಯದೇ” ಎಂಬ ಭಾವನೆ ಬಹುಮಂದಿಯಲ್ಲಿದೆ. ಆದರೆ ಆರೋಗ್ಯ ತಜ್ಞರ ಪ್ರಕಾರ, ರಾತ್ರಿ ಸಮಯದಲ್ಲಿ ಸ್ವೆಟರ್ ಅಥವಾ ಅತಿಯಾಗಿ ಬೆಚ್ಚಗಿನ ಬಟ್ಟೆ ಧರಿಸಿ ಮಲಗುವುದು ಆರೋಗ್ಯದ ದೃಷ್ಟಿಯಿಂದ ಸೂಕ್ತವಲ್ಲ ಎಂದು ಹೇಳಿದ್ದಾರೆ.

ದೇಹದ ತಾಪಮಾನ ನಿಯಂತ್ರಣಕ್ಕೆ ಅಡ್ಡಿ

ನಿದ್ರೆಯ ಸಮಯದಲ್ಲಿ ನಮ್ಮ ದೇಹವು ಸಹಜವಾಗಿ ತನ್ನ ತಾಪಮಾನವನ್ನು ಸ್ವಲ್ಪ ಕಡಿಮೆ ಮಾಡಿಕೊಳ್ಳುತ್ತದೆ. ಇದರಿಂದ ಆಳವಾದ ಹಾಗೂ ಗುಣಮಟ್ಟದ ನಿದ್ರೆ ಸಾಧ್ಯವಾಗುತ್ತದೆ. ಆದರೆ ಸ್ವೆಟರ್ ಅಥವಾ ದಪ್ಪ ಬಟ್ಟೆಗಳನ್ನು ಧರಿಸಿ ಮಲಗುವುದರಿಂದ ದೇಹದ ಉಷ್ಣತೆ ಕಡಿಮೆಯಾಗುವ ಈ ಪ್ರಕ್ರಿಯೆಗೆ ಅಡ್ಡಿಯಾಗುತ್ತದೆ. ಪರಿಣಾಮವಾಗಿ, ನಿದ್ರೆ ಭಂಗವಾಗುವುದು, ಎಚ್ಚರಗೊಳ್ಳುವುದು ಮತ್ತು ಬೆಳಿಗ್ಗೆ ದಣಿವಿನ ಅನುಭವ ಉಂಟಾಗಬಹುದು.

ಅತಿಯಾದ ಸೆಖೆ ಮತ್ತು ಬೆವರು

ರಾತ್ರಿ ಬೆಚ್ಚಗಿನ ಬಟ್ಟೆಗಳಲ್ಲಿ ಮಲಗಿದಾಗ ದೇಹದಲ್ಲಿ ಸೆಖೆ ಹೆಚ್ಚಾಗುತ್ತದೆ. ದೇಹವು ತಣ್ಣಗಾಗಲು ಬೆವರುವ ಮೂಲಕ ಪ್ರಯತ್ನಿಸುತ್ತದೆ. ಇದರಿಂದ ರಾತ್ರಿ ಸಮಯದಲ್ಲಿ ಹೆಚ್ಚಾಗಿ ಬೆವರುವುದು ಸಾಮಾನ್ಯ. ಈ ಹೆಚ್ಚುವರಿ ಬೆವರು ದೇಹದ ನೀರಿನ ಮಟ್ಟವನ್ನು ಕಡಿಮೆ ಮಾಡಿ ನಿರ್ಜಲೀಕರಣ (Dehydration) ಗೆ ಕಾರಣವಾಗಬಹುದು. ಬೆಳಿಗ್ಗೆ ಎದ್ದಾಗ ಬಾಯಾರಿಕೆ, ಬಾಯಿ ಒಣಗುವುದು, ತಲೆನೋವು ಕಾಣಿಸಿಕೊಳ್ಳಬಹುದು.

ಚರ್ಮದ ಸಮಸ್ಯೆಗಳು

ಬೆವರು ಮತ್ತು ತೇವಾಂಶ ಹೆಚ್ಚಾದಾಗ ಚರ್ಮದ ಮೇಲೆ ದುಷ್ಪರಿಣಾಮಗಳು ಕಾಣಿಸಿಕೊಳ್ಳುತ್ತವೆ. ಸ್ವೆಟರ್ ಧರಿಸಿ ಮಲಗುವವರಲ್ಲಿ ಚರ್ಮದ ದದ್ದುಗಳು, ತುರಿಕೆ, ಚರ್ಮ ಕೆಂಪಾಗುವುದು ಹಾಗೂ ಕೆಲವರಿಗೆ ಫಂಗಲ್ ಸೋಂಕುಗಳಿಗೂ ಕಾರಣವಾಗಬಹುದು.

ರಕ್ತ ಪರಿಚಲನೆ ಮೇಲೆ ಪರಿಣಾಮ

ಅತಿಯಾಗಿ ಬಿಗಿಯಾದ ಅಥವಾ ದಪ್ಪ ಬಟ್ಟೆಗಳನ್ನು ಧರಿಸಿ ಮಲಗುವುದರಿಂದ ದೇಹದ ಕೆಲವು ಭಾಗಗಳಲ್ಲಿ ರಕ್ತ ಪರಿಚಲನೆ ಸರಾಗವಾಗದೇ ಸಮಸ್ಯೆ ಉಂಟಾಗಬಹುದು. ಇದು ಕಾಲುಗಳಲ್ಲಿ ಮುರುಕು, ಕೈಕಾಲು ಸುಮ್ಮನಾಗುವ ಅನುಭವಕ್ಕೆ ಕಾರಣವಾಗಬಹುದು.

ನಿದ್ರೆಯ ಗುಣಮಟ್ಟ ಹಾಳಾಗುತ್ತದೆ

ಸರಿ ಇಲ್ಲದ ದೇಹದ ತಾಪಮಾನ ನಿದ್ರೆಯ ಮೇಲೆ ನೇರ ಪರಿಣಾಮ ಬೀರುತ್ತದೆ. ಅತಿಯಾಗಿ ಬೆಚ್ಚಗಾದ ದೇಹದಲ್ಲಿ ಆಳವಾದ ನಿದ್ರೆ (Deep Sleep) ಕಡಿಮೆಯಾಗುತ್ತದೆ. ಇದರಿಂದ ಮಾನಸಿಕ ಒತ್ತಡ, ಏಕಾಗ್ರತೆಯ ಕೊರತೆ, ದಿನವಿಡೀ ಆಯಾಸ ಅನುಭವಿಸುವ ಸಾಧ್ಯತೆ ಹೆಚ್ಚುತ್ತದೆ.

ಹಾಗಾದರೆ ಏನು ಮಾಡಬೇಕು?

ಆರೋಗ್ಯ ತಜ್ಞರ ಸಲಹೆಯಂತೆ

• ಹಗುರವಾದ, ಉಸಿರಾಡುವ ಕಾಟನ್ ಬಟ್ಟೆಗಳನ್ನು ಧರಿಸಿ ಮಲಗುವುದು ಉತ್ತಮ

• ಸ್ವೆಟರ್ ಬದಲು ಹಗುರವಾದ ಕಂಬಳಿ ಬಳಸಬಹುದು

• ಕೊಠಡಿಯ ತಾಪಮಾನವನ್ನು ಸಮತೋಲನದಲ್ಲಿಡಬೇಕು

• ಬೆವರು ಹೆಚ್ಚು ಬರುತ್ತಿದ್ದರೆ ತಕ್ಷಣ ಬಟ್ಟೆ ಬದಲಿಸುವುದು ಅಗತ್ಯ

ಚಳಿಗಾಲದಲ್ಲಿ ಚಳಿಯಿಂದ ರಕ್ಷಿಸಿಕೊಳ್ಳುವುದು ಮುಖ್ಯವೇ ಸರಿ. ಆದರೆ ಅದಕ್ಕಾಗಿ ಅತಿಯಾಗಿ ಬೆಚ್ಚಗಿನ ಬಟ್ಟೆ ಧರಿಸಿ ಮಲಗುವುದು ಆರೋಗ್ಯಕ್ಕೆ ಹಾನಿಕಾರಕವಾಗಬಹುದು. ಚಳಿಗೆ ಭಯಪಟ್ಟು ತಪ್ಪು ಅಭ್ಯಾಸಗಳನ್ನು ರೂಢಿಸಿಕೊಳ್ಳುವ ಬದಲು, ವಿಜ್ಞಾನಾಧಾರಿತ ಆರೋಗ್ಯಕರ ಆಯ್ಕೆಯನ್ನು ಮಾಡಿ.