ನವದೆಹಲಿ: ಆರೋಗ್ಯಕ್ಕೆ ಮೊಟ್ಟೆ ಅಮೃತವಿದ್ದಂತೆ. ಪ್ರೊಟೀನ್, ಕ್ಯಾಲ್ಸಿಯಂ, ವಿಟಮಿನ್ ಮತ್ತು ಅಮೈನೋ ಆಸಿಡ್ಗಳ ಪ್ರಮಾಣ ಅಧಿಕವಾಗಿರುವುದರಿಂದ ಮೊಟ್ಟೆಯನ್ನು ದಿನಕ್ಕೊಂದು ಸೇವಿಸುವುದು ಉತ್ತಮ ಎಂದು ವೈದ್ಯರು ಸಲಹೆ ನೀಡುತ್ತಾರೆ. ಇದೇ ಕಾರಣಕ್ಕೆ ಹೆಚ್ಚಿನವರು ಒಂದೇ ಬಾರಿಗೆ ಡಜನ್ ಗಟ್ಟಲೆ ಮೊಟ್ಟೆಗಳನ್ನು ಖರೀದಿಸಿ ಮನೆಯಲ್ಲಿ ಸಂಗ್ರಹಿಸಿಡುತ್ತಾರೆ. ಆದರೆ, ಸರಿಯಾಗಿ ಸಂಗ್ರಹಿಸದಿದ್ದರೆ ಅಥವಾ ದಿನಗಳು ಕಳೆದಂತೆ ಮೊಟ್ಟೆಗಳು ಹಾಳಾಗುವ ಸಾಧ್ಯತೆ ಇರುತ್ತದೆ. ಕೆಟ್ಟ ಮೊಟ್ಟೆಗಳನ್ನು ಸೇವಿಸುವುದರಿಂದ ಸಾಲ್ಮೊನೆಲ್ಲಾ ಬ್ಯಾಕ್ಟೀರಿಯಾದ ಪ್ರಭಾವಕ್ಕೆ ಒಳಗಾಗಿ ಆಹಾರ ವಿಷವಾಗುವ ಅಪಾಯವಿರುತ್ತದೆ.
ಬಾಹ್ಯವಾಗಿ ಮೊಟ್ಟೆ ಚೆನ್ನಾಗಿ ಕಂಡರೂ, ಒಳಗಿನಿಂದ ಅದು ಹಾಳಾಗಿದೆಯೇ ಎಂದು ತಿಳಿಯುವುದು ಹೇಗೆ ? ಇಲ್ಲಿದೆ ಕೆಲವು ಸರಳ ಮನೆಮದ್ದುಗಳು.
1. ನೀರಿನ ಪರೀಕ್ಷೆ
ಇದು ಅತ್ಯಂತ ಹಳೆಯ ಮತ್ತು ನಂಬಿಕಸ್ತ ವಿಧಾನವಾಗಿದೆ. ಒಂದು ದೊಡ್ಡ ಬೌಲ್ನಲ್ಲಿ ತಣ್ಣೀರನ್ನು ತುಂಬಿಸಿ, ಅದರಲ್ಲಿ ಮೊಟ್ಟೆಯನ್ನು ನಿಧಾನವಾಗಿ ಇಳಿಸಿ.
-
ತಾಜಾ ಮೊಟ್ಟೆ: ಮೊಟ್ಟೆ ಕೆಳಗೆ ಹೋಗಿ ಅಡ್ಡವಾಗಿ ಮಲಗಿದರೆ ಅದು ಅತ್ಯಂತ ತಾಜಾವಾಗಿದೆ ಎಂದರ್ಥ.
-
ಸ್ವಲ್ಪ ಹಳೆಯ ಮೊಟ್ಟೆ: ಮೊಟ್ಟೆ ನೀರಿನ ತಳದಲ್ಲೇ ಇದ್ದು, ಒಂದು ಬದಿ ಸ್ವಲ್ಪ ಮೇಲಕ್ಕೆ ಎದ್ದಂತೆ ಕಂಡರೆ ಅದು ಕೆಲವು ದಿನಗಳ ಹಳೆಯದು. ಆದರೆ ತಿನ್ನಲು ಯೋಗ್ಯವಾಗಿರುತ್ತದೆ.
-
ಹಾಳಾದ ಮೊಟ್ಟೆ: ಮೊಟ್ಟೆ ನೀರಿನ ಮೇಲೆ ತೇಲಲು ಆರಂಭಿಸಿದರೆ, ಅದು ಖಂಡಿತವಾಗಿಯೂ ಕೊಳೆತಿದೆ ಎಂದರ್ಥ. ಇಂತಹ ಮೊಟ್ಟೆಯನ್ನು ಸೇವಿಸಬಾರದು.
2. ಬೆಳಕಿನ ಪರೀಕ್ಷೆ
ಈ ವಿಧಾನವನ್ನು ವಾಣಿಜ್ಯ ಮಟ್ಟದಲ್ಲಿ ಹೆಚ್ಚಾಗಿ ಬಳಸಲಾಗುತ್ತದೆ. ಕತ್ತಲೆಯ ಕೋಣೆಯಲ್ಲಿ ಮೊಬೈಲ್ ಫೋನ್ನ ಫ್ಲ್ಯಾಶ್ಲೈಟ್ ಆನ್ ಮಾಡಿ, ಅದರ ಮೇಲೆ ಮೊಟ್ಟೆಯನ್ನು ಇರಿಸಿ.
-
ಬೆಳಕು ಮೊಟ್ಟೆಯ ಚಿಪ್ಪಿನ ಮೂಲಕ ಹಾದುಹೋಗಿ ಒಳಗೆ ಸ್ಪಷ್ಟವಾದ ಹಳದಿ ಬಣ್ಣ ಗೋಚರಿಸಿದರೆ ಅದು ತಾಜಾ ಮೊಟ್ಟೆ.
-
ಒಳಭಾಗವು ಗಾಢವಾಗಿ ಅಥವಾ ಬಿಳಿ ಬಣ್ಣದಲ್ಲಿ ಅಸ್ಪಷ್ಟವಾಗಿ ಕಂಡರೆ, ಆ ಮೊಟ್ಟೆ ಹಾಳಾಗಿದೆ ಎಂದರ್ಥವಾಗಿದೆ ಹೀಘಾಗಿ ಅದು ತಿನ್ನಲು ಸೂಕ್ತವಲ್ಲ.
3. ವಾಸನೆ ಮತ್ತು ಶಬ್ದದ ಪರೀಕ್ಷೆ
ಮೊಟ್ಟೆಯನ್ನು ಒಡೆಯುವ ಮೊದಲೇ ಅದನ್ನು ಕಿವಿಯ ಹತ್ತಿರ ಹಿಡಿದು ಮೆಲ್ಲನೆ ಅಲುಗಾಡಿಸಿ. ಯಾವುದೇ ಶಬ್ದ ಬರದಿದ್ದರೆ ಅದು ತಾಜಾವಾಗಿದೆ. ಆದರೆ ಒಳಗೆ ದ್ರವ ಅಲ್ಲಾಡುವ ಶಬ್ದ ಕೇಳಿಸಿದರೆ ಅದು ಹಳೆಯದಾಗಿದೆ ಎಂದರ್ಥ. ಇನ್ನು ಅತ್ಯಂತ ಸುಲಭ ಮಾರ್ಗವೆಂದರೆ ವಾಸನೆ ನೋಡುವುದು. ಮೊಟ್ಟೆ ಕೆಟ್ಟಿದ್ದರೆ ಅದರಿಂದ ಒಂದು ರೀತಿಯ ಗಂಧಕದ (Sulphur) ಕೆಟ್ಟ ವಾಸನೆ ಬರುತ್ತದೆ.
ನೆನಪಿರಲಿ: ಮೊಟ್ಟೆಗಳನ್ನು ಯಾವಾಗಲೂ ಫ್ರಿಡ್ಜ್ನಲ್ಲಿ ಅಥವಾ ತಂಪಾದ ಜಾಗದಲ್ಲಿ ಸಂಗ್ರಹಿಸಿಡುವುದು ಅದರ ಜೀವಿತಾವಧಿಯನ್ನು ಹೆಚ್ಚಿಸುತ್ತದೆ.
