ರಾತ್ರಿ ಸರಿಯಾದ ನಿದ್ರೆ ಮಾಡದಿದ್ದರೆ ದೇಹದ ರೋಗನಿರೋಧಕ ಶಕ್ತಿ ಕುಗ್ಗುವುದಲ್ಲದೆ, ಮಾನಸಿಕ ಆರೋಗ್ಯದ ಮೇಲೂ ದುಷ್ಪರಿಣಾಮ ಬೀರುತ್ತದೆ. ಅನೇಕರು ನಿದ್ರೆಗಾಗಿ ಮಾತ್ರೆಗಳನ್ನು ಅವಲಂಬಿಸುತ್ತಾರೆ, ಆದರೆ ಜೀವನಶೈಲಿಯಲ್ಲಿ ಸಣ್ಣ ಬದಲಾವಣೆ ಮಾಡಿಕೊಳ್ಳುವ ಮೂಲಕ ನೈಸರ್ಗಿಕವಾಗಿ ಸುಖ ನಿದ್ರೆ ಪಡೆಯಬಹುದು.
1. ಬೆಚ್ಚಗಿನ ನೀರಿನ ಸ್ನಾನ (Warm Shower): ಮಲಗುವ ಸುಮಾರು ಒಂದು ಗಂಟೆ ಮುನ್ನ ಬೆಚ್ಚಗಿನ ನೀರಿನಲ್ಲಿ ಸ್ನಾನ ಮಾಡುವುದು ತುಂಬಾ ಪ್ರಯೋಜನಕಾರಿ. ಇದು ದೇಹದ ಉಷ್ಣತೆಯನ್ನು ನಿಯಂತ್ರಿಸಲು ಸಹಾಯ ಮಾಡುತ್ತದೆ. ಸ್ನಾನದ ನಂತರ ದೇಹದಿಂದ ಬಿಡುಗಡೆಯಾಗುವ ಶಾಖವು, ನಿದ್ರೆಯ ಸಮಯದಲ್ಲಿ ಸಂಭವಿಸುವ ನೈಸರ್ಗಿಕ ತಾಪಮಾನ ಕುಸಿತವನ್ನು ಅನುಕರಿಸುತ್ತದೆ. ಇದು ಮೆದುಳಿಗೆ ವಿಶ್ರಾಂತಿ ಪಡೆಯುವ ಸಮಯ ಎಂದು ಸಂಕೇತಿಸುತ್ತದೆ, ಇದರಿಂದ ನೀವು ಬೇಗನೆ ನಿದ್ರೆಗೆ ಜಾರುತ್ತೀರಿ.
2. ಮಲಗುವಾಗ ಸಾಕ್ಸ್ ಧರಿಸಿ (Wearing Socks): ಇದು ಸ್ವಲ್ಪ ವಿಚಿತ್ರ ಎನಿಸಿದರೂ, ಪಾದಗಳನ್ನು ಬೆಚ್ಚಗಿಡುವುದರಿಂದ ರಕ್ತನಾಳಗಳು ಹಿಗ್ಗುತ್ತವೆ (Vasodilation). ಇದರಿಂದ ರಕ್ತ ಪರಿಚಲನೆ ಸುಧಾರಿಸಿ ದೇಹದ ಒಟ್ಟಾರೆ ತಾಪಮಾನ ಸಮತೋಲನಕ್ಕೆ ಬರುತ್ತದೆ. ಪಾದಗಳು ಬೆಚ್ಚಗಿದ್ದಾಗ ಮೆದುಳು ವಿಶ್ರಾಂತ ಸ್ಥಿತಿಗೆ ತಲುಪುತ್ತದೆ, ಇದು ವೇಗವಾಗಿ ನಿದ್ರಿಸಲು ಸಹಾಯ ಮಾಡುತ್ತದೆ ಎಂದು ಸಂಶೋಧನೆಗಳು ತಿಳಿಸಿವೆ.
3. ಬೆಳಗ್ಗಿನ ಸೂರ್ಯನ ಬೆಳಕು (Morning Sunlight): ರಾತ್ರಿ ನಿದ್ದೆ ಸರಿಯಾಗಿ ಬರಬೇಕಾದರೆ ನೀವು ಬೆಳಗ್ಗೆ ಎದ್ದ ತಕ್ಷಣ ಸೂರ್ಯನ ಬೆಳಕಿಗೆ ಮೈ ಒಡ್ಡಿಕೊಳ್ಳಬೇಕು. ಇದು ದೇಹದ ‘ಸಿರ್ಕಾಡಿಯನ್ ಲಯ’ವನ್ನು (Circadian Rhythm) ಅಂದರೆ ನೈಸರ್ಗಿಕ ನಿದ್ರೆ-ಎಚ್ಚರದ ಚಕ್ರವನ್ನು ನಿಯಂತ್ರಿಸುತ್ತದೆ. ಬೆಳಗ್ಗಿನ ಬಿಸಿಲು ದೇಹದಲ್ಲಿ ಮೆಲಟೋನಿನ್ ಹಾರ್ಮೋನ್ ಉತ್ಪಾದನೆಯನ್ನು ರಾತ್ರಿಯ ಹೊತ್ತು ಸರಿಯಾದ ಸಮಯಕ್ಕೆ ಆಗುವಂತೆ ಪ್ರೇರೇಪಿಸುತ್ತದೆ.
4. ಭಾರವಾದ ಕಂಬಳಿ ಬಳಸಿ (Weighted Blanket): ಒತ್ತಡ ಮತ್ತು ಆತಂಕದಿಂದ ನಿದ್ದೆ ಬಾರದಿರುವವರಿಗೆ ಇದು ರಾಮಬಾಣ. ಭಾರವಾದ ಕಂಬಳಿಯನ್ನು ಹೊದ್ದು ಮಲಗುವುದರಿಂದ ‘ಡೀಪ್ ಪ್ರೆಶರ್ ಸ್ಟಿಮ್ಯುಲೇಶನ್’ ಎಂಬ ತಂತ್ರ ಕೆಲಸ ಮಾಡುತ್ತದೆ. ಇದು ದೇಹದಲ್ಲಿ ಸಿರೊಟೋನಿನ್ (ಹ್ಯಾಪಿ ಹಾರ್ಮೋನ್) ಹೆಚ್ಚಿಸಿ, ಒತ್ತಡದ ಹಾರ್ಮೋನ್ ಆದ ಕಾರ್ಟಿಸೋಲ್ ಅನ್ನು ಕಡಿಮೆ ಮಾಡುತ್ತದೆ. ಇದು ತಾಯಿ ಮಗುವನ್ನು ಅಪ್ಪಿಕೊಂಡಂತೆ ಭಾಸವಾಗಿ ಮನಸ್ಸಿಗೆ ಶಾಂತಿ ನೀಡುತ್ತದೆ.
ಈ ಸರಳ ಬದಲಾವಣೆಗಳನ್ನು ನಿಮ್ಮ ದಿನಚರಿಯಲ್ಲಿ ಅಳವಡಿಸಿಕೊಳ್ಳುವ ಮೂಲಕ ನೀವು ನಿದ್ರಾಹೀನತೆಯಿಂದ ಮುಕ್ತಿ ಪಡೆಯಬಹುದು.
