ಬೆಂಗಳೂರು ಸೆ .25: ಭಾರತದಲ್ಲಿ ಮಧುಮೇಹ ಸಮಸ್ಯೆಯಿಂದ ಬಳಲುತ್ತಿರುವವರಲ್ಲಿ ಅತಿಯಾದ ಕಾರ್ಬೋಹೈಡ್ರೇಟ್ ಸೇವನೆ, ಹೊಟ್ಟೆಯ ಭಾಗದ ಬೊಜ್ಜು (ಸೆಂಟ್ರಲ್ ಒಬೆಸಿಟಿ), ದೇಹದಲ್ಲಿ ಇನ್ಸುಲಿನ್ ಸರಿಯಾಗಿ ಕೆಲಸ ಮಾಡದಿರುವುದು (ಇನ್ಸುಲಿನ್ ರೆಸಿಸ್ಟೆನ್ಸ್) ಹಾಗೂ ಪ್ರೋಟೀನ್ ಕೊರತೆ ಪ್ರಮುಖ ಲಕ್ಷಣಗಳಾಗಿ ಕಂಡುಬರುತ್ತಿವೆ ಎಂದು ನೂತನ ವೈದ್ಯಕೀಯ ಅಧ್ಯಯನವೊಂದು ಎಚ್ಚರಿಸಿದೆ.
‘ಡಾ. ರೆಡ್ಡೀಸ್ – ನೆಸ್ಲೆ ಹೆಲ್ತ್ ಸೈನ್ಸ್’ ಸಂಸ್ಥೆ ನಡೆಸಿರುವ ಈ ಸಮಗ್ರ ಅಧ್ಯಯನವು ‘ಡಯಾಬಿಟಿಸ್, ಮೆಟಾಬಾಲಿಕ್ ಸಿಂಡ್ರೋಮ್ ಆ್ಯಂಡ್ ಒಬೆಸಿಟಿ’ ಎಂಬ ಪ್ರಖ್ಯಾತ ಅಂತಾರಾಷ್ಟ್ರೀಯ ಜರ್ನಲ್‌ನಲ್ಲಿ ಪ್ರಕಟವಾಗಿದೆ. ಈ ಸಂಶೋಧನೆಗಾಗಿ ಭಾರತದ 60 ಪ್ರಮುಖ ಮಧುಮೇಹ ಮತ್ತು ಎಂಡೋಕ್ರೈನಾಲಜಿ ತಜ್ಞರ ಅಭಿಪ್ರಾಯ ಹಾಗೂ ರೋಗಿಗಳ ಸ್ಥಿತಿಗತಿಗಳನ್ನು ಅಧ್ಯಯನ ಮಾಡಲಾಗಿದೆ.
ಮಧುಮೇಹಿಗಳಲ್ಲಿ ಕಂಡುಬಂದ ಪ್ರಮುಖ ಲಕ್ಷಣಗಳೇನು?
ಸಮೀಕ್ಷೆಯಲ್ಲಿ ಭಾಗವಹಿಸಿದ ವೈದ್ಯರ ಪ್ರಕಾರ, ಭಾರತೀಯ ರೋಗಿಗಳಲ್ಲಿ ಈ ಕೆಳಗಿನ ಅಂಶಗಳು ಹೆಚ್ಚಾಗಿ ಕಂಡುಬಂದಿವೆ.
ಶೇ. 82 ರೋಗಿಗಳಲ್ಲಿ ಅತಿಯಾದ ಕಾರ್ಬೋಹೈಡ್ರೇಟ್ ಸೇವನೆ (ಅಕ್ಕಿ, ಗೋಧಿ ಮುಂತಾದ ಪಿಷ್ಟ ಪದಾರ್ಥಗಳು), ಶೇ. 78 ರೋಗಿಗಳಲ್ಲಿ ಹೊಟ್ಟೆಯ ಭಾಗದಲ್ಲಿ ಮಾತ್ರ ಕೊಬ್ಬು ಶೇಖರಣೆಯಾಗುವುದು (ಸೆಂಟ್ರಲ್ ಒಬೆಸಿಟಿ), ಶೇ. 76 ರೋಗಿಗಳಲ್ಲಿ ಇನ್ಸುಲಿನ್ ರೆಸಿಸ್ಟೆನ್ಸ್ (ಇನ್ಸುಲಿನ್ ಉತ್ಪತ್ತಿಯಾದರೂ ದೇಹ ಅದನ್ನು ಬಳಸಿಕೊಳ್ಳಲು ವಿಫಲವಾಗುವುದು) ಕಂಡುಬಂದಿದೆ.
ಶೇ. 75 ರೋಗಿಗಳ ಆಹಾರದಲ್ಲಿ ಪ್ರೋಟೀನ್ ಕೊರತೆ ದಾಖಲಾಗಿದ್ದರೆ, ಶೇ. 69 ರೋಗಿಗಳ ದೇಹದಲ್ಲಿ ಸ್ನಾಯುಗಳ ಪ್ರಮಾಣ (ಲೀನ್ ಮಸಲ್ ಮಾಸ್) ಕಡಿಮೆ ಇರುವುದು. ಶೇ. 67 ರೋಗಿಗಳಲ್ಲಿ ವಂಶಪಾರಂಪರ್ಯವಾಗಿ (ಆನುವಂಶಿಕ) ಮಧುಮೇಹ ಬರುವ ಪ್ರವೃತ್ತಿ ಅಧ್ಯಯನದ ವೇಳೆ ಪತ್ತೆಯಾಗಿದೆ.
ಶೇ. 98 ರಷ್ಟು ತಜ್ಞರ ಪ್ರಕಾರ, ಭಾರತೀಯ ಮಧುಮೇಹಿಗಳ ದೇಹ ಪ್ರಕೃತಿ ಮತ್ತು ಮೆಟಾಬಾಲಿಸಂ ಪಾಶ್ಚಿಮಾತ್ಯ ದೇಶಗಳ ರೋಗಿಗಳಿಗಿಂತ ಸಂಪೂರ್ಣ ಭಿನ್ನವಾಗಿದೆ. ಆದ್ದರಿಂದ ಇವರಿಗೆ ಚಿಕಿತ್ಸೆ ನೀಡುವಾಗ ಭಾರತೀಯ ಜೀವನಶೈಲಿಗೆ ತಕ್ಕಂತೆ ಪ್ರತ್ಯೇಕ ಪೌಷ್ಟಿಕಾಂಶ ಕ್ರಮಗಳನ್ನು ರೂಪಿಸುವುದು ಅತ್ಯಗತ್ಯ ಎಂದು ಶೇ. 86 ರಷ್ಟು ವೈದ್ಯರು ಪ್ರತಿಪಾದಿಸಿದ್ದಾರೆ.
ಹೆಚ್ಚುತ್ತಿದೆ ‘ಡಯಾಬೆಸಿಟಿ’ ಆತಂಕ
ಮಧುಮೇಹ (ಡಯಾಬಿಟಿಸ್) ಮತ್ತು ಬೊಜ್ಜು (ಒಬೆಸಿಟಿ) ಎರಡೂ ಒಟ್ಟಿಗೆ ಕಾಣಿಸಿಕೊಳ್ಳುವ ಸ್ಥಿತಿಯನ್ನು ವೈದ್ಯಕೀಯ ಲೋಕದಲ್ಲಿ ‘ಡಯಾಬೆಸಿಟಿ’ ಎಂದು ಕರೆಯಲಾಗುತ್ತದೆ. ಅಧ್ಯಯನದ ಪ್ರಕಾರ, ಶೇ. 61ರಷ್ಟು ವೈದ್ಯರ ಬಳಿಗೆ ಬರುವ ಮಧುಮೇಹಿಗಳಲ್ಲಿ ಅರ್ಧಕ್ಕಿಂತ ಹೆಚ್ಚು ಜನರು ಅತಿಯಾದ ತೂಕ ಅಥವಾ ಬೊಜ್ಜಿನಿಂದ ಬಳಲುತ್ತಿದ್ದಾರೆ. ಆದರೆ, ಇವರಲ್ಲಿ ಹೆಚ್ಚಿನ ರೋಗಿಗಳು ವೈದ್ಯರು ಸೂಚಿಸುವ ಕಟ್ಟುನಿಟ್ಟಿನ ಆಹಾರ ಪದ್ಧತಿಯನ್ನು 6 ತಿಂಗಳಿಗಿಂತ ಹೆಚ್ಚು ಕಾಲ ನಿರಂತರವಾಗಿ ಪಾಲಿಸಲು ವಿಫಲರಾಗುತ್ತಿದ್ದಾರೆ ಎಂಬ ಆತಂಕಕಾರಿ ವಿಷಯ ಬೆಳಕಿಗೆ ಬಂದಿದೆ.
ತಪಾಸಣೆಯಲ್ಲಿ ಆಗುತ್ತಿರುವ ಲೋಪವೇನು?
ರೋಗಿಗಳನ್ನು ಪರೀಕ್ಷಿಸುವಾಗ ಶೇ. 80ರಷ್ಟು ವೈದ್ಯರು ಕೇವಲ ದೇಹದ ತೂಕ ಮತ್ತು ಎತ್ತರದ ಅನುಪಾತವನ್ನು ಅಳೆಯುವ ಬಿಎಂಐ ಮೇಲೆ ಮಾತ್ರ ಅವಲಂಬಿತರಾಗಿದ್ದರೆ, ಶೇ. 62 ರಷ್ಟು ಮಂದಿ ದಿನನಿತ್ಯದ ಆಹಾರ ಕ್ರಮವನ್ನು ಪರಿಶೀಲಿಸುತ್ತಾರೆ.
ಆದರೆ, ರೋಗಿಯ ದೇಹದಲ್ಲಿ ಕೊಬ್ಬು ಎಷ್ಟಿದೆ ಮತ್ತು ಸ್ನಾಯುಗಳ ಪ್ರಮಾಣ ಎಷ್ಟಿದೆ ಎಂಬುದನ್ನು ಪರೀಕ್ಷಿಸುತ್ತಿರುವುದು ಕೇವಲ ಶೇ. 34 ರಷ್ಟು ವೈದ್ಯರು ಮಾತ್ರ ಎಂದು ವರದಿ ತಿಳಿಸಿದೆ.
ತಜ್ಞ ವೈದ್ಯರ ಸಲಹೆಗಳೇನು?
ಡಯಾಬಿಟಿಸ್ ಇಂಡಿಯಾದ ಗೌರವ ಕಾರ್ಯದರ್ಶಿ ಡಾ. ಬನ್ಶಿ ಸಾಬೂ ಅವರು, “ರೋಗಿಗಳಿಗೆ ಕೇವಲ ಆಹಾರ ತ್ಯಜಿಸುವಂತೆ ಕಠಿಣ ನಿರ್ಬಂಧಗಳನ್ನು ವಿಧಿಸುವುದರಿಂದ ಪ್ರಯೋಜನವಿಲ್ಲ. ಬದಲಿಗೆ ಅವರು ತಮ್ಮ ಇಡೀ ಜೀವನದುದ್ದಕ್ಕೂ ಸುಲಭವಾಗಿ ಅಳವಡಿಸಿಕೊಳ್ಳಬಹುದಾದ ಸರಳ ಆಹಾರ ಬದಲಾವಣೆಗಳಿಗೆ ಒತ್ತು ನೀಡಬೇಕು,” ಎಂದು ಹೇಳಿದ್ದಾರೆ.
ಡಾ. ರೆಡ್ಡೀಸ್ – ನೆಸ್ಲೆ ಹೆಲ್ತ್ ಸೈನ್ಸ್‌ನ ಮೆಡಿಕಲ್ ಅಫೇರ್ಸ್ ಮುಖ್ಯಸ್ಥ ಡಾ. ನಂದನ್ ಜೋಶಿ ಅವರು, “ರಕ್ತದಲ್ಲಿನ ಸಕ್ಕರೆ ಮಟ್ಟ ನಿಯಂತ್ರಿಸುವುದರ ಜೊತೆಗೆ ತೂಕ ನಿಯಂತ್ರಣ, ಸ್ನಾಯುಗಳ ಆರೋಗ್ಯ ಮತ್ತು ದೀರ್ಘಕಾಲದ ಮೆಟಾಬಾಲಿಕ್ ಆರೋಗ್ಯಕ್ಕೂ ಸಮಾನ ಆದ್ಯತೆ ನೀಡಬೇಕು,” ಎಂದು ತಿಳಿಸಿದ್ದಾರೆ.
ಮಧುಮೇಹಿಗಳು ತಮ್ಮ ಆಹಾರದಲ್ಲಿ ಪ್ರೋಟೀನ್ ಪ್ರಮಾಣವನ್ನು ಹೆಚ್ಚಿಸಬೇಕು, ನಾರಿನಂಶ ಹೆಚ್ಚಿರುವ ಹಾಗೂ ಕಡಿಮೆ ಗ್ಲೈಸೆಮಿಕ್ ಇಂಡೆಕ್ಸ್ ಹೊಂದಿರುವ ಸಮತೋಲಿತ ಆಹಾರಕ್ಕೆ ಮೊದಲ ಆದ್ಯತೆ ನೀಡಬೇಕು ಎಂದು ತಜ್ಞರು ಕಿವಿಮಾತು ಹೇಳಿದ್ದಾರೆ
