ಇಡೀ ವಿಶ್ವದ ಗಮನ ಈಗ ಇರಾನ್-ಇಸ್ರೇಲ್ ಯುದ್ಧದ ಮೇಲಿರುವಾಗಲೇ, ಅತ್ತ ಪೂರ್ವ ಚೀನಾ ಸಮುದ್ರದಲ್ಲಿ ಚೀನಾ ಅತ್ಯಂತ ನಿಗೂಢ ಕಾರ್ಯ ನಡೆಸುತ್ತಿದೆ. ಸಾವಿರಾರು ಮೀನುಗಾರಿಕಾ ದೋಣಿಗಳು ಸಮುದ್ರದ ಮಧ್ಯೆ ಜ್ಯಾಮಿತೀಯ ಆಕಾರಗಳಲ್ಲಿ (Geometric Formations) ಒಟ್ಟುಗೂಡುತ್ತಿರುವುದು ಜಾಗತಿಕ ರಕ್ಷಣಾ ತಜ್ಞರಲ್ಲಿ ನಡುಕ ಹುಟ್ಟಿಸಿದೆ.
ಉಪಗ್ರಹ ಚಿತ್ರಗಳಲ್ಲಿ ಬಯಲಾದ ರಹಸ್ಯ
ತೈವಾನ್ನ ಈಶಾನ್ಯಕ್ಕೆ ಸುಮಾರು 300 ಕಿಲೋಮೀಟರ್ ದೂರದಲ್ಲಿ ಈ ಚಟುವಟಿಕೆಗಳು ಪತ್ತೆಯಾಗಿವೆ. ಉಪಗ್ರಹ ಚಿತ್ರಣ ವಿಶ್ಲೇಷಕ ವಾಂಗ್ ಅವರ ಪ್ರಕಾರ, ಸುಮಾರು 2,000 ಮೀನುಗಾರಿಕಾ ದೋಣಿಗಳು ಸಮುದ್ರದಲ್ಲಿ ಅತ್ಯಂತ ನಿಖರವಾದ ರೇಖೆಗಳಲ್ಲಿ ಮತ್ತು ಆಯತಾಕಾರದಲ್ಲಿ ಜೋಡಿಸಲ್ಪಟ್ಟಿವೆ. ಸಾಮಾನ್ಯವಾಗಿ ಮೀನುಗಾರರು ಪರಸ್ಪರ ಇಷ್ಟು ಹತ್ತಿರದಲ್ಲಿ ಅಥವಾ ಇಂತಹ ಕ್ರಮಬದ್ಧ ಸಾಲುಗಳಲ್ಲಿ ದೋಣಿಗಳನ್ನು ನಿಲ್ಲಿಸುವುದಿಲ್ಲ. ಅಚ್ಚರಿಯೆಂದರೆ, ಬಿರುಗಾಳಿಯ ಗಾಳಿಯ ನಡುವೆಯೂ ಈ ದೋಣಿಗಳು ಸುಮಾರು 30 ಗಂಟೆಗಳ ಕಾಲ ತಮ್ಮ ಸ್ಥಾನವನ್ನು ಬದಲಿಸದೆ ಒಂದೇ ಕಡೆ ನಿಂತಿದ್ದವು ಎಂದು ತಿಳಿದುಬಂದಿದೆ.
ಇದು ಮೀನುಗಾರಿಕೆಯಲ್ಲ, ‘ಮಿಲಿಟರಿ ರಿಹರ್ಸಲ್’!
ಈ ದೋಣಿಗಳು ಮೀನು ಹಿಡಿಯಲು ಅಲ್ಲಿ ಸೇರಿಲ್ಲ ಎಂಬುದು ತಜ್ಞರ ಖಚಿತ ಅಭಿಪ್ರಾಯ. ಈ ಬಗ್ಗೆ ಮಾತನಾಡಿರುವ ವಾಷಿಂಗ್ಟನ್ನ ತಜ್ಙರು ,ಇದು ಚೀನಾದ ‘ಕಡಲ ಸೇನೆ’ (Maritime Militia) ನಡೆಸುತ್ತಿರುವ ಶಕ್ತಿ ಪ್ರದರ್ಶನ. ತೈವಾನ್ ಮೇಲೆ ಆಕ್ರಮಣ ಮಾಡುವಾಗ ಅಥವಾ ಜಪಾನ್ನೊಂದಿಗೆ ಸಂಘರ್ಷ ಉಂಟಾದಾಗ ಈ ಸಾವಿರಾರು ನಾಗರಿಕ ಹಡಗುಗಳನ್ನು ಯುದ್ಧದ ಉದ್ದೇಶಕ್ಕೆ ಹೇಗೆ ಬಳಸಿಕೊಳ್ಳಬಹುದು ಎಂಬುದನ್ನು ಚೀನಾ ಪರೀಕ್ಷಿಸುತ್ತಿದೆ ಎಂದು ತಿಳಿಸಿದ್ದಾರೆ.
ಅಮೆರಿಕದ ರಕ್ಷಣಾ ಇಲಾಖೆಯ ವರದಿಯಂತೆ, ಚೀನಾ 2027ರ ವೇಳೆಗೆ ತೈವಾನ್ ಮೇಲೆ ಜಯ ಸಾಧಿಸಲು ತನ್ನ ಸೇನೆಯನ್ನು ಸನ್ನದ್ಧಗೊಳಿಸುತ್ತಿದೆ. ಚೀನಾದ ನೌಕಾಪಡೆಯ ಬಳಿ ಸೈನ್ಯವನ್ನು ಸಾಗಿಸಲು ಸಾಕಾಗುವಷ್ಟು ಯುದ್ಧನೌಕೆಗಳಿಲ್ಲ. ಈ ಕೊರತೆಯನ್ನು ನೀಗಿಸಲು ಚೀನಾ ತನ್ನ ಬೃಹತ್ ನಾಗರಿಕ ನೌಕಾಪಡೆಯನ್ನು (ಮೀನುಗಾರಿಕಾ ದೋಣಿಗಳು ಮತ್ತು ಸರಕು ಹಡಗುಗಳು) ಬಳಸಿಕೊಳ್ಳಲು ಸಂಚು ರೂಪಿಸಿದೆ.
ಕಡಲ ಸೇನೆಯ ಅಪಾಯಕಾರಿ ಪಾತ್ರ
ಈ ಮೀನುಗಾರಿಕಾ ದೋಣಿಗಳು ಯುದ್ಧದ ಸಮಯದಲ್ಲಿ ಈ ಕೆಳಗಿನ ಕೆಲಸಗಳನ್ನು ಮಾಡಬಲ್ಲವು:
-
ದಿಗ್ಬಂಧನ: ತೈವಾನ್ ಸುತ್ತಲೂ ಹಡಗುಗಳ ತಡೆಗೋಡೆ ನಿರ್ಮಿಸಿ ಆಹಾರ ಮತ್ತು ಇಂಧನ ಪೂರೈಕೆ ಸ್ಥಗಿತಗೊಳಿಸುವುದು.
-
ಕ್ಷಿಪಣಿ ಹಾದಿ ತಪ್ಪಿಸುವುದು: ಎದುರಾಳಿಗಳು ಹಾರಿಸುವ ಕ್ಷಿಪಣಿಗಳಿಗೆ ಈ ದೋಣಿಗಳು ‘ಡಿಕಾಯ್’ ಅಥವಾ ಮೋಸದ ಗುರಿಗಳಾಗಿ ಕೆಲಸ ಮಾಡುತ್ತವೆ.
-
ಸೈನ್ಯ ಸಾಗಣೆ: ಸಾವಿರಾರು ಸೈನಿಕರನ್ನು ತೈವಾನ್ ಕರಾವಳಿಗೆ ಸದ್ದಿಲ್ಲದೆ ತಲುಪಿಸುವುದು.
ಈ ದೋಣಿಗಳಲ್ಲಿ ಹೆಚ್ಚಿನವು ಚೀನಾದ ಝಜಿಯಾಂಗ್ ಪ್ರಾಂತ್ಯದ ಸೇನಾ ಬಂದರುಗಳಿಂದ ಬಂದಿವೆ ಎಂದು ಎಐಎಸ್ (AIS) ದತ್ತಾಂಶ ತೋರಿಸಿದೆ. ಇದು ರಾಜ್ಯ ಪ್ರಾಯೋಜಿತ ಕಾರ್ಯಾಚರಣೆ ಎಂಬುದಕ್ಕೆ ಪುಷ್ಟಿ ನೀಡುತ್ತದೆ.
ಪೂರ್ವ ಚೀನಾ ಸಮುದ್ರದಲ್ಲಿ ನಡೆಯುತ್ತಿರುವ ಈ ಬೂದು ವಲಯದ (Grey Zone) ಚಟುವಟಿಕೆಗಳು ಜಪಾನ್ ಮತ್ತು ಫಿಲಿಪೈನ್ಸ್ಗೂ ಆತಂಕ ತಂದಿವೆ. ಚೀನಾದ ಈ ನಿಗೂಢ ಸಿದ್ಧತೆ ಏಷ್ಯಾದಲ್ಲಿ ಮತ್ತೊಂದು ದೊಡ್ಡ ಯುದ್ಧಕ್ಕೆ ಮುನ್ನುಡಿ ಬರೆಯಲಿದೆಯೇ ಎಂಬುದು ಈಗಿನ ದೊಡ್ಡ ಪ್ರಶ್ನೆ.
