ಸಿನಿಮಾ ಸ್ಟೈಲ್‌ನಲ್ಲಿ ನೆಪೋಲಿಯನ್‌ ಕಾಲದ ಚಿನ್ನಾಭರಣ ದರೋಡೆ

ಪ್ಯಾರಿಸ್, ಅಕ್ಟೋಬರ್ 19: ಬಾಲಿವುಡ್ ಮತ್ತು ಹಾಲಿವುಡ್ ಸಿನಿಮಾಗಳಲ್ಲಿ ನಾವು ಹಣ ದರೋಡೆಯ ರೋಮಾಂಚಕ ದೃಶ್ಯಗಳನ್ನು ಹಲವು ಬಾರಿ ನೋಡಿದ್ದೇವೆ. ಆದರೆ ನಿಜ ಜೀವನದಲ್ಲಿ ಅಂತಹ ಘಟನೆಗಳು ನಡೆದರೆ ಅದು ಆಶ್ಚರ್ಯ ಮತ್ತು ಆಘಾತಕಾರಿ. ಫ್ರಾನ್ಸ್‌ನ ರಾಜಧಾನಿ ಪ್ಯಾರಿಸ್‌ನಲ್ಲಿ ಇಂದು ಭಾನುವಾರ ಬೆಳ್ಳಂಬೆಳಗ್ಗೆಯೇ ಒಂದು ಭಾರೀ ಅಮೂಲ್ಯ ವಸ್ತುಗಳ ಕಳ್ಳತನ ನಡೆದಿದೆ.

ವಿಶ್ವದ ಅತಿ ದೊಡ್ಡ ಮತ್ತು ಜನಪ್ರಿಯ ಮ್ಯೂಸಿಯಂಗಳಲ್ಲಿ ಒಂದಾದ ಲೂವ್ರ ಮ್ಯೂಸಿಯಂನಲ್ಲಿ (Louvre Museum) ನೆಪೋಲಿಯನ್ ದೊರೆಯ ಕುಟುಂಬಕ್ಕೆ ಸೇರಿದ ಕೆಲವು ಆಭರಣಗಳನ್ನು ಕಳ್ಳರು ಕದ್ದೊಯ್ದಿದ್ದಾರೆ. ಕೇವಲ ಏಳು ನಿಮಿಷಗಳೊಳಗೆ ಈ ಕಳ್ಳರ ಕರಾಮತ್ತು ನಡೆದುಹೋಗಿದೆ, ಇದು ಇಡೀ ಪ್ರಪಂಚವನ್ನು ಬೆಚ್ಚಿ ಬೀಳಿಸಿದೆ.

ಲೂವ್ರ ಮ್ಯೂಸಿಯಂ ಎಂದರೆ ಕೇವಲ ಒಂದು ಮ್ಯೂಸಿಯಂ ಅಲ್ಲ, ಅದು ಇತಿಹಾಸದ ಜೀವಂತ ಸಾಕ್ಷಿ. ಪ್ಯಾರಿಸ್‌ನ ಹೃದಯಭಾಗದಲ್ಲಿ ಸ್ಥಿತವಾಗಿರುವ ಈ ಮ್ಯೂಸಿಯಂ ವಿಶ್ವದಾದ್ಯಂತದಿಂದ ಪ್ರತಿ ವರ್ಷ ಲಕ್ಷಾಂತರ ಪ್ರವಾಸಿಗರನ್ನು ಆಕರ್ಷಿಸುತ್ತದೆ. ಮೋನಾಲಿಸಾ ಚಿತ್ರದಿಂದ ಹಿಡಿದು ಪ್ರಾಚೀನ ಈಜಿಪ್ಟ್ ನ ಮಮ್ಮಿಗಳವರೆಗೆ ಅಸಂಖ್ಯ ಅಮೂಲ್ಯ ವಸ್ತುಗಳು ಇಲ್ಲಿವೆ. ಆದರೆ ಇದರ ಭದ್ರತಾ ವ್ಯವಸ್ಥೆಯು ಅತ್ಯಾಧುನಿಕವಾಗಿದ್ದರೂ, ಕಳ್ಳರು ಅದನ್ನು ಸುಲಭವಾಗಿ ಭೇದಿಸಿ ದರೋಡೆ ಮಾಡಿರುವುದು ಎಲ್ಲರನ್ನೂ ಆಶ್ಚರ್ಯಕ್ಕೀಡು ಮಾಡಿದೆ.

ವರದಿಗಳ ಪ್ರಕಾರ, ಮೂರು ಅಥವಾ ನಾಲ್ಕು ವ್ಯಕ್ತಿಗಳ ತಂಡವು ಈ ಕೆಲಸವನ್ನು ನಿರ್ವಹಿಸಿದೆ. ಅವರು ಡಿಸ್ಕ್ ಕಟ್ಟರ್, ಚೆರಿ ಪಿಕರ್ (ಬ್ಯಾಸ್ಕೆಟ್ ಲಿಫ್ಟ್) ಮುಂತಾದ ಸಾಧನಗಳನ್ನು ಬಳಸಿ ಮ್ಯೂಸಿಯಂನ ಒಳಗೆ ಪ್ರವೇಶಿಸಿದ್ದಾರೆ.

ಮ್ಯೂಸಿಯಂನ ಅಪೋಲೋ ಗ್ಯಾಲರಿ (Apollo’s Gallery) ಇದರಲ್ಲಿ ಪ್ರಮುಖ ಸ್ಥಾನ ಪಡೆದಿದೆ. ಇಲ್ಲಿ ನೆಪೋಲಿಯನ್ ಬೊನಪಾರ್ಟ್ ಮತ್ತು ಅವರ ಕುಟುಂಬಕ್ಕೆ ಸೇರಿದ ಆಭರಣಗಳು, ರತ್ನಗಳು ಮತ್ತು ಇತರ ಅಮೂಲ್ಯ ವಸ್ತುಗಳನ್ನು ಪ್ರದರ್ಶಿಸಲಾಗಿದೆ. ನೆಪೋಲಿಯನ್ ಯುಗದ ಈ ಆಭರಣಗಳು ಫ್ರಾನ್ಸ್‌ನ ರಾಜಕೀಯ ಮತ್ತು ಸಾಂಸ್ಕೃತಿಕ ಇತಿಹಾಸದ ಸಾಕ್ಷಿಗಳು.

ಉದಾಹರಣೆಗೆ, ಫ್ರೆಂಚ್ ಮಹಾರಾಣಿ ಯುಜೀನೀಯ ಮುಕುಟಮಣಿಗಳು ಅತ್ಯಂತ ಅಪರೂಪದವು. ಈ ಗ್ಯಾಲರಿಯಲ್ಲಿ ಕಟ್ಟಡ ನಿರ್ಮಾಣ ಕಾರ್ಯ ನಡೆಯುತ್ತಿರುವುದನ್ನು ಬಳಸಿಕೊಂಡು ಕಳ್ಳರು ಸ್ಕೂಟರ್ಗಳಲ್ಲಿ ಬಂದು ಲಿಫ್ಟ್ ಮೂಲಕ ಗ್ಯಾಲರಿಯನ್ನು ತಲುಪಿದ್ದಾರೆ. ಡಿಸ್ಕ್ ಕಟ್ಟರ್‌ಗಳ ಸಹಾಯದಿಂದ ಕಿಟಕಿಯನ್ನು ಒಳಗೆ ನುಗ್ಗಿದ ಅವರು, ಒಂಬತ್ತು ಆಭರಣ ಭಾಗಗಳನ್ನು ಕದ್ದುಕೊಂಡು ಹೊರಟುಹೋಗಿದ್ದಾರೆ. ಇಡೀ ಘಟನೆ ಹತ್ತು ನಿಮಿಷಗಳೊಳಗೆ ಮುಗಿದಿದೆ ಎಂದು ಅಂದಾಜಿಸಲಾಗಿದೆ.

ಘಟನೆಯ ನಂತರ ಮ್ಯೂಸಿಯಂ ಹೊರಗೆ ಒಂದು ಆಭರಣ ಭಾಗ ಸಿಕ್ಕಿದೆ. ಅದು ಯುಜೀನೀಯ ಮುಕುಟಮಣಿಯ ಮುರಿದ ಭಾಗವೆಂದು ಗುರುತಿಸಲಾಗಿದೆ. ಇದು ಕಳ್ಳರು ಆತುರದಲ್ಲಿ ಬಿಟ್ಟುಹೋಗಿರುವುದು ಅಥವಾ ಉದ್ದೇಶಪೂರ್ವಕವೇ ಎಂಬುದು ತನಿಖೆಯಲ್ಲಿ ತಿಳಿಯಬೇಕಿದೆ. ಪ್ಯಾರಿಸ್ ಪೊಲೀಸರು ತಕ್ಷಣ ತನಿಖೆ ಆರಂಭಿಸಿದ್ದು, ಸಿಸಿಟಿವಿ ದೃಶ್ಯಗಳನ್ನು ಪರಿಶೀಲಿಸುತ್ತಿದ್ದಾರೆ. ಆದರೆ ಕಳ್ಳರು ಮುಖಕ್ಕೆ ಮಾಸ್ಕ್ ಧರಿಸಿದ್ದರಿಂದ ಗುರುತಿಸುವುದು ಕಷ್ಟವಾಗಿದೆ.