ಲಂಡನ್: 20 ಅಥವಾ 50 ರೂಪಾಯಿಗೆ ಸಿಗುವ ಈ ಪಾನಿಪುರಿ ಭಾರತೀಯರ ಅಚ್ಚುಮೆಚ್ಚಿನ ತಿನಿಸು. ಆದರೆ ಇದೇ ಪಾನಿಪೂರಿ ಲಂಡನ್ನಲ್ಲಿ ಬರೋಬ್ಬರಿ 6,000 ರೂಪಾಯಿಗೆ ಮಾರಾಟವಾಗುತ್ತಿದೆ ಎಂದರೆ ನಂಬಲೇಬೇಕು. ಬೆಂಗಳೂರಿನಲ್ಲಿ ಸಾಫ್ಟ್ವೇರ್ ಎಂಜಿನಿಯರ್ ಆಗಿದ್ದ ದಂಪತಿಗಳು ಇಂದು ಲಂಡನ್ನಲ್ಲಿ ಪಾನಿಪೂರಿ ಮಾರಿ ಕೋಟಿಗಟ್ಟಲೆ ಆದಾಯ ಗಳಿಸುತ್ತಿದ್ದಾರೆ.
ಮೂಲತಃ ಉತ್ತರ ಪ್ರದೇಶದ ಅಮನ್ ಕೃಷ್ಣ ಮತ್ತು ಬೆಂಗಳೂರಿನಲ್ಲಿ ಟೆಕ್ಕಿಯಾಗಿದ್ದ ಅಂಕಿತಾ ಖಾಂಟೆ ದಂಪತಿಗಳ ಕಥೆ ನಿಜಕ್ಕೂ ರೋಚಕ. ಅಮನ್ ಕೃಷ್ಣಾಗೆ ಲಂಡನ್ನಲ್ಲಿ ಡೇಟಾ ಸೈಂಟಿಸ್ಟ್ ಆಗಿ ದೊಡ್ಡ ಉದ್ಯೋಗದ ಆಫರ್ ಬಂದಾಗ ಅಂಕಿತಾ ಕೂಡ ತನ್ನ ಬೆಂಗಳೂರಿನ ಕೆಲಸ ಬಿಟ್ಟು ಪತಿಯೊಂದಿಗೆ ಲಂಡನ್ಗೆ ಹಾರಿದರು. ಅಲ್ಲಿಯೂ ಅಂಕಿತಾಗೆ ಸಾಫ್ಟ್ವೇರ್ ಕೆಲಸಕ್ಕೆ ಹಲವು ಅವಕಾಶಗಳಿದ್ದವು, ಆದರೆ ಅವರು ಆರಿಸಿಕೊಂಡ ಹಾದಿಯೇ ಬೇರೆಯಾಗಿತ್ತು.
ಮನೆಯಲ್ಲಿ ಸುಮ್ಮನೆ ಕುಳಿತುಕೊಳ್ಳಲು ಇಷ್ಟಪಡದ ಅಂಕಿತಾಗೆ ಏನಾದರೂ ಹೊಸದಾಗಿ ಆರಂಭಿಸುವ ಛಲವಿತ್ತು. ಲಂಡನ್ನಲ್ಲಿ ಭಾರತೀಯ ಆಹಾರಕ್ಕೆ, ಅದರಲ್ಲೂ ವಿಶೇಷವಾಗಿ ದಕ್ಷಿಣ ಏಷ್ಯಾದ ಚಾಟ್ಸ್ಗಳಿಗೆ ಇರುವ ಬೇಡಿಕೆಯನ್ನು ಅವರು ಗಮನಿಸಿದರು. ಆರಂಭದಲ್ಲಿ ಪತಿ ಅಮನ್ ಈ ಪ್ಲಾನ್ಗೆ ಒಪ್ಪಿರಲಿಲ್ಲ. ಆದರೆ ಅಂಕಿತಾ, ಅವರನ್ನು ಒತ್ತಾಯಿಸಿದ್ದರು ಬಳಿಕ ಅವರೂ ಸಾಥ್ ನೀಡಿದರು.
ತನ್ನ ಭಾರತೀಯ ಗೆಳೆಯರ ಬಳಗಕ್ಕೆ ಮನೆಯಲ್ಲೇ ಪಾನಿಪೂರಿ, ಡೋಕ್ಲಾ ಮತ್ತು ಕಡಿಯಂತಹ ಆಹಾರಗಳನ್ನು ಮಾಡಿ ಕೊಡುತ್ತಿದ್ದ ಅಂಕಿತಾ, ನಂತರ ಇದನ್ನು ವೃತ್ತಿಪರವಾಗಿ ಆರಂಭಿಸಿದರು. ಲಂಡನ್ನ ಪ್ರತಿಷ್ಠಿತ ವಲಯದಲ್ಲಿ ‘ದಿ ಬೌಜಿ ಕ್ಲಬ್’ ಎಂಬ ರೆಸ್ಟೋರೆಂಟ್ ತೆರೆದರು. ಇದು ಕೇವಲ ಹೋಟೆಲ್ ಅಲ್ಲ, ಲಂಡನ್ನಲ್ಲಿರುವ ಭಾರತೀಯರನ್ನು ಒಗ್ಗೂಡಿಸುವ ಒಂದು ಸಾಂಸ್ಕೃತಿಕ ತಾಣವಾಗಿ ಬದಲಾಯಿತು.
ಇಲ್ಲಿ ಪಾನಿಪೂರಿ ಸೇರಿದಂತೆ 7 ಬಗೆಯ ಚಾಟ್ಸ್ಗಳ ಕಾಂಬೋ ಬೆಲೆ ಬರೋಬ್ಬರಿ 6000 ರೂಪಾಯಿ. ಭಾರತದ ಬೆಲೆಗೆ ಹೋಲಿಸಿದರೆ ಇದು ಆಕಾಶಕ್ಕೆ ಏಣಿಯಂತಿದ್ದರೂ, ಲಂಡನ್ನ ಜೀವನಶೈಲಿ ಮತ್ತು ಅಲ್ಲಿ ಸಿಗದ ಆ ಅಪ್ಪಟ ಭಾರತೀಯ ರುಚಿಗಾಗಿ ಜನರು ಮುಗಿಬೀಳುತ್ತಿದ್ದಾರೆ. ಮನೆಮಂದಿಯೆಲ್ಲಾ ಕುಳಿತು ಭಾರತದ ರುಚಿಯನ್ನು ಖುಷಿಯಿಂದ ಸವಿಯುತ್ತಾರೆ ಅಲ್ಲಿನ ಅನಿವಾಸಿ ಭಾರತೀಯರು.
ಇಂದು ಅಂಕಿತಾ ಮತ್ತು ಅಮನ್ ಕೇವಲ ಟೆಕ್ಕಿಗಳಾಗಿ ಉಳಿಯದೆ, ವಿದೇಶಿ ನೆಲದಲ್ಲಿ ಭಾರತೀಯ ಸ್ವಾದವನ್ನು ಪಸರಿಸುತ್ತಿರುವ ಯಶಸ್ವಿ ಉದ್ಯಮಿಗಳಾಗಿ ಹೊರಹೊಮ್ಮಿದ್ದಾರೆ. ಇವರ ಈ ಸಾಹಸದ ಕಥೆ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ವೈರಲ್ ಆಗುತ್ತಿದೆ.
