ಮೈಸೂರಿನ ಹೆಚ್.ಡಿ. ಕೋಟೆ ತಾಲೂಕಿನ ಬೂದನೂರು ಗ್ರಾಮದಲ್ಲಿ ನಡೆದ ಒಂದು ದುಃಖದ ಘಟನೆ ಇಡೀ ಗ್ರಾಮವನ್ನೇ ಕಣ್ಣೀರಿನಲ್ಲಿ ಮುಳುಗಿಸಿದೆ. ಒಂದೇ ಕುಟುಂಬದ ಮೂವರು ಮಹದೇವಸ್ವಾಮಿ (45), ಅವರ ಪತ್ನಿ ಮಂಜುಳಾ (40), ಮತ್ತು ಅವರ ಕಿರಿಯ ಮಗಳು ಹರ್ಷಿತಾ (18) ತಮ್ಮ ಹಿರಿಯ ಮಗಳು ಅರ್ಪಿತಾ (22) ಪ್ರೀತಿಸಿ ಯುವಕನ ಜೊತೆ ಮನೆ ಬಿಟ್ಟು ಓಡಿಹೋದ ಕಾರಣ, ಮಾನಕ್ಕೆ ಅಂಜಿ ಕೆರೆಗೆ ಹಾರಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ಬೆಳಗಿನ ಜಾವ 4 ಗಂಟೆ ಸುಮಾರಿಗೆ, ಮಹದೇವಸ್ವಾಮಿ, ಮಂಜುಳಾ, ಮತ್ತು ಹರ್ಷಿತಾ ತಮ್ಮ ಗ್ರಾಮದ ಸಮೀಪದ ಕೆರೆಗೆ ಹಾರಿ ಜೀವ ಕಳೆದುಕೊಂಡಿದ್ದಾರೆ. ಈ ಘಟನೆಗೆ ಕಾರಣವೆಂದರೆ, ಅವರ ಹಿರಿಯ ಮಗಳು ಅರ್ಪಿತಾ, ತಾನು ಪ್ರೀತಿಸಿದ ಯುವಕನ ಜೊತೆ ಮನೆ ತೊರೆದು ಹೋಗಿದ್ದಾಳೆ ಎಂಬ ದುಃಖ ಮತ್ತು ಸಾಮಾಜಿಕ ಒತ್ತಡ. ಈ ವಿಷಯವು ಕುಟುಂಬದ ಮಾನಕ್ಕೆ ಧಕ್ಕೆ ತಂದಿದೆ ಎಂದು ಭಾವಿಸಿದ ಮಹದೇವಸ್ವಾಮಿ ಕುಟುಂಬವು ಈ ದುಃಸ್ಥಿತಿಯನ್ನು ತಡೆದುಕೊಳ್ಳಲಾಗದೆ ಆತ್ಮಹತ್ಯೆಗೆ ಶರಣಾಗಿದ್ದಾರೆ.
ಡೆತ್ ನೋಟ್ ಬರೆದಿಟ್ಟು ಆತ್ಮಹತ್ಯೆ
ಮೃತರು ತಮ್ಮ ಆತ್ಮಹತ್ಯೆಗೆ ಮುನ್ನ ನಾಲ್ಕು ಪುಟಗಳ ಡೆತ್ ನೋಟ್ ಬರೆದಿದ್ದಾರೆ, ಇದು ಪೊಲೀಸರಿಗೆ ಸಿಕ್ಕಿದೆ. ಈ ಡೆತ್ ನೋಟ್ನಲ್ಲಿ ಅವರು ತಮ್ಮ ದುಃಖವನ್ನು ವಿವರಿಸಿದ್ದಾರೆ: “ನಮ್ಮನ್ನ ಹುಳಬೇಡಿ, ಅಗ್ನಿ ಸ್ಪರ್ಶ ಮಾಡಿ. ನಮ್ಮ ಸಾವಿಗೆ ನಾವೇ ಕಾರಣ. ಬೆಳಗಿನ ಜಾವ 4 ಗಂಟೆಗೆ ನಿದ್ದೆ ಬರದೆ ಒದ್ದಾಡಿ ಈ ನಿರ್ಧಾರ ತೆಗೆದುಕೊಂಡಿದ್ದೇವೆ. ನನ್ನ ಮಗಳು ಅರ್ಪಿತಾ ನಮಗೆಲ್ಲ ಮೋಸ ಮಾಡಿದಳು. ಜಗತ್ತಿನಲ್ಲಿ ಯಾರಿಗೂ ಈ ಪರಿಸ್ಥಿತಿ ಬರಬಾರದು. ನಮ್ಮ ಆಸ್ತಿ ಒಂದು ರೂಪಾಯಿಯೂ ಅವಳಿಗೆ ಸಿಗಬಾರದು. ಮನೆ, ಸೈಟ್, ಮತ್ತು ಎರಡುವರೆ ಲಕ್ಷ ರೂಪಾಯಿಗಳನ್ನು ಚಿಕ್ಕಪ್ಪನಿಗೆ ನೀಡಿ. ಚಿಕ್ಕಪ್ಪನ ಹೆಂಡತಿ ಸೌಮ್ಯಗೂ ಯಾವುದೇ ಆಸ್ತಿ ಸಿಗಬಾರದು.” ಈ ಡೆತ್ ನೋಟ್ನಿಂದ ಕುಟುಂಬದ ಮಾನಸಿಕ ಸ್ಥಿತಿಯ ತೀವ್ರತೆಯನ್ನು ಅರ್ಥಮಾಡಿಕೊಳ್ಳಬಹುದು.
ಗ್ರಾಮಸ್ಥರ ಆಕ್ರೋಶ
ಮಳೆಯ ನಡುವೆಯೇ ಬೂದನೂರು ಗ್ರಾಮದಲ್ಲಿ ಮೂವರ ಅಂತ್ಯಕ್ರಿಯೆಯನ್ನು ಗ್ರಾಮಸ್ಥರು ಶೋಕಾಚರಣೆಯೊಂದಿಗೆ ನೆರವೇರಿಸಿದರು. ಆದರೆ, ಮನೆ ತೊರೆದು ಓಡಿಹೋದ ಅರ್ಪಿತಾ ಅಂತ್ಯಕ್ರಿಯೆಗೂ ಆಗಮಿಸದಿರುವುದು ಗ್ರಾಮಸ್ಥರ ಆಕ್ರೋಶಕ್ಕೆ ಕಾರಣವಾಗಿದೆ. “ತನ್ನ ಕುಟುಂಬವನ್ನೇ ಈ ಸ್ಥಿತಿಗೆ ತಂದಿಟ್ಟು, ಅಂತಿಮ ವಿದಾಯಕ್ಕೂ ಬರದ ಆಕೆಗೆ ಶಾಪವಾಗಲಿ” ಎಂದು ಕೆಲವರು ಹಿಡಿಶಾಪ ಹಾಕಿದ್ದಾರೆ. ಗ್ರಾಮದ ಜನರು ಮೃತರನ್ನು ನೆನೆದು ಕಣ್ಣೀರಿಟ್ಟಿದ್ದಾರೆ.
