ಬೆಂಗಳೂರು ಸೆ.18 : ರಸ್ತೆಬದಿ ನಿಲುಗಡೆ ಮಾಡಿ ದೀರ್ಘಕಾಲದಿಂದ ಬಳಕೆಯಾಗದೆ ನಿಂತಿದ್ದ ಬಿಡಾಡಿ ವಾಹನಗಳ ವಿರುದ್ಧ ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA) ಕಠಿಣ ಕ್ರಮ ಕೈಗೊಂಡಿದೆ. ನಗರದಲ್ಲಿ ಗುರುತಿಸಲಾದ ಇಂತಹ ವಾಹನಗಳಿಗೆ ನೋಟಿಸ್ ಅಂಟಿಸಿ, ನಿಯಮಾನುಸಾರ ಟೋಯಿಂಗ್ ಮಾಡುವ ಕಾರ್ಯವನ್ನು ಜಿಬಿಎ ಕೈಗೊಂಡಿದೆ.
ಜಿಬಿಎ ವ್ಯಾಪ್ತಿಯಲ್ಲಿ ಒಟ್ಟು 8,641 ಬಿಡಾಡಿ ವಾಹನಗಳನ್ನು ಅಧಿಕಾರಿಗಳು ಗುರುತಿಸಿದ್ದರು. ಈ ಪೈಕಿ 2,122 ವಾಹನಗಳಿಗೆ ನೋಟಿಸ್ ಅಂಟಿಸಲಾಗಿತ್ತು. ನೋಟಿಸ್ ಪಡೆದ ಬಳಿಕ 1,024 ವಾಹನಗಳ ಮಾಲೀಕರು ತಮ್ಮ ವಾಹನಗಳನ್ನು ಬಿಡಿಸಿಕೊಳ್ಳಲು ಮುಂದಾಗಿದ್ದು, ನಿಗದಿತ ದಂಡವನ್ನು ಪಾವತಿಸಿದ್ದಾರೆ.
ಬಿಡಾಡಿ ವಾಹನಗಳಿಗೆ ಜಿಬಿಎ ಪ್ರತಿ ವಾಹನಕ್ಕೆ ರೂ. 500 ದಂಡ ನಿಗದಿಪಡಿಸಿತ್ತು. ಅದರಂತೆ 1,024 ವಾಹನಗಳ ಮಾಲೀಕರಿಂದ ಒಟ್ಟು ರೂ. 5.45 ಲಕ್ಷ ದಂಡ ವಸೂಲಿ ಮಾಡಲಾಗಿದೆ ಎಂದು ತಿಳಿಸಲಾಗಿದೆ.
ರಸ್ತೆಬದಿ ಹಾಗೂ ಸಾರ್ವಜನಿಕ ಸ್ಥಳಗಳಲ್ಲಿ ದೀರ್ಘಕಾಲದಿಂದ ನಿಂತಿರುವ ಬಳಕೆಯಾಗದ ವಾಹನಗಳಿಂದ ಸಂಚಾರಕ್ಕೆ ಅಡಚಣೆ ಉಂಟಾಗುವುದರ ಜೊತೆಗೆ ಸಾರ್ವಜನಿಕ ಸ್ಥಳದ ಬಳಕೆಯ ಮೇಲೂ ಪರಿಣಾಮ ಬೀರುವ ಹಿನ್ನೆಲೆಯಲ್ಲಿ ಜಿಬಿಎ ಈ ಕ್ರಮ ಕೈಗೊಂಡಿದೆ.
ನೋಟಿಸ್ ಅಂಟಿಸಿದ ನಂತರವೂ ವಾಹನವನ್ನು ತೆರವುಗೊಳಿಸದ ಪ್ರಕರಣಗಳಲ್ಲಿ ಟೋಯಿಂಗ್ ಸೇರಿದಂತೆ ಮುಂದಿನ ಕ್ರಮ ಕೈಗೊಳ್ಳಲಾಗುತ್ತಿದೆ. ಈಗಾಗಲೇ ಗುರುತಿಸಲಾಗಿರುವ ಇನ್ನುಳಿದ ಬಿಡಾಡಿ ವಾಹನಗಳು ನಿಗದಿತ ಸ್ಥಳಗಳಲ್ಲಿ ಇರಿಸಲಾಗಿದ್ದು, ಸಂಬಂಧಪಟ್ಟ ವಾಹನ ಮಾಲೀಕರು ದಂಡ ಪಾವತಿಸಿ ತಮ್ಮ ವಾಹನಗಳನ್ನು ಬಿಡಿಸಿಕೊಳ್ಳಬಹುದು ಎಂದು ಜಿಬಿಎ ತಿಳಿಸಿದೆ.
ನಗರದಲ್ಲಿ ರಸ್ತೆಬದಿ ನಿಂತಿರುವ ಹಳೆಯ ಹಾಗೂ ಬಳಕೆಯಾಗದ ವಾಹನಗಳನ್ನು ತೆರವುಗೊಳಿಸುವ ಮೂಲಕ ಸಾರ್ವಜನಿಕರಿಗೆ ಸುಗಮ ಸಂಚಾರ ವ್ಯವಸ್ಥೆ ಕಲ್ಪಿಸುವ ಉದ್ದೇಶದಿಂದ ಈ ಕಾರ್ಯಾಚರಣೆ ಮುಂದುವರಿಯಲಿದೆ.
