ಬೆಂಗಳೂರು: ಪ್ಯಾನ್ ಇಂಡಿಯಾ ಸ್ಟಾರ್ ಯಶ್ ಅಭಿನಯದ ಬಹುನಿರೀಕ್ಷಿತ ಚಿತ್ರ ‘ಟಾಕ್ಸಿಕ್’ (Toxic) ಬಿಡುಗಡೆಗೆ ಇಡೀ ವಿಶ್ವವೇ ಕಾಯುತ್ತಿದೆ. ಆದರೆ, ಈಗ ಚಿತ್ರತಂಡದಿಂದ ಕೇಳಿಬಂದಿರುವ ಒಂದು ಸುದ್ದಿ ಅಭಿಮಾನಿಗಳಲ್ಲಿ ತುಸು ಬೇಸರ ಮೂಡಿಸಿದೆ. ಚಿತ್ರವು ಅಂದುಕೊಂಡ ಸಮಯಕ್ಕಿಂತ ಮೂರು ತಿಂಗಳು ತಡವಾಗಿ ತೆರೆಗೆ ಬರಲಿದೆ. ಈ ದಿಢೀರ್ ಬದಲಾವಣೆಯ ಹಿಂದೆ ಕೇವಲ ದಿನಾಂಕದ ಸಮಸ್ಯೆಯಲ್ಲ, ಬದಲಿಗೆ ಚಿತ್ರದ ಗುಣಮಟ್ಟದ ವಿಚಾರದಲ್ಲಿ ನಟ ಯಶ್ ಅವರು ತೆಗೆದುಕೊಂಡಿರುವ ಕಠಿಣ ನಿರ್ಧಾರವೇ ಅಸಲಿ ಕಾರಣ ಎನ್ನಲಾಗುತ್ತಿದೆ.
ಮಾಹಿತಿಯ ಪ್ರಕಾರ, ಮಾರ್ಚ್ 4ರಂದು ಚಿತ್ರತಂಡವು ಸಿನಿಮಾದ ‘ಇಂಟರ್ನಲ್ ಕ್ವಾಲಿಟಿ ಸ್ಕ್ರೀನಿಂಗ್’ (Internal Quality Screening) ಹಮ್ಮಿಕೊಂಡಿತ್ತು. ಈ ಸ್ಕ್ರೀನಿಂಗ್ನಲ್ಲಿ ನಟ ಯಶ್, ನಿರ್ದೇಶಕಿ ಗೀತು ಮೋಹನ್ ದಾಸ್ ಹಾಗೂ ತಾಂತ್ರಿಕ ತಂಡದ ಪ್ರಮುಖ ಸದಸ್ಯರು ಭಾಗವಹಿಸಿದ್ದರು. ಆದರೆ, ಚಿತ್ರದ ಔಟ್ಪುಟ್ ನೋಡಿದ ತಂಡಕ್ಕೆ ಅತೀವ ನಿರಾಸೆಯಾಗಿದೆಯಂತೆ. ಕೆಲವು ಪ್ರಮುಖ ಸನ್ನಿವೇಶಗಳಲ್ಲಿ ಬಳಸಲಾದ VFX (ವಿಶೇಷ ಪರಿಣಾಮಗಳು) ಕೆಲಸವು ನಿರೀಕ್ಷಿತ ಮಟ್ಟದಲ್ಲಿಲ್ಲ ಮತ್ತು ಆಡಿಯೋ ಗುಣಮಟ್ಟ ಕೂಡ ದುರ್ಬಲವಾಗಿದೆ ಎಂಬುದು ಸ್ಕ್ರೀನಿಂಗ್ ವೇಳೆ ತಿಳಿದುಬಂದಿದೆ.
ಈಗಾಗಲೇ ಬಿಡುಗಡೆಯಾಗಿರುವ ‘ಟಾಕ್ಸಿಕ್’ ಸಿನಿಮಾದ ಮೊದಲ ಹಾಡು ‘ತಬಾಹಿ’ ಕೇವಲ ಆಡಿಯೋ ರೂಪದಲ್ಲಿ ಮಾತ್ರ ಹೊರಬಂದಿದೆ. ಅಸಲಿಗೆ ಚಿತ್ರತಂಡವು ಇದನ್ನು ವಿಡಿಯೋ ಸಹಿತ ಅದ್ಧೂರಿಯಾಗಿ ಬಿಡುಗಡೆ ಮಾಡಲು ಪ್ಲಾನ್ ಮಾಡಿತ್ತು. ಆದರೆ, ಎಡಿಟಿಂಗ್ ಮತ್ತು VFX ಗುಣಮಟ್ಟ ತೃಪ್ತಿ ನೀಡದ ಕಾರಣ, ಕೊನೆ ಕ್ಷಣದಲ್ಲಿ ವಿಡಿಯೋ ಬಿಡುಗಡೆಯನ್ನು ಕೈಬಿಡಲಾಗಿತ್ತು. ಈಗ ತಾಂತ್ರಿಕ ತಿದ್ದುಪಡಿಗಳ ನಂತರವೇ ವಿಡಿಯೋ ಸಾಂಗ್ ಬಿಡುಗಡೆ ಮಾಡಲು ಚಿತ್ರತಂಡ ಸಜ್ಜಾಗುತ್ತಿದೆ.
ತಾಂತ್ರಿಕ ದೋಷಗಳನ್ನು ಕಂಡು ನಟ ಯಶ್ ಅಸಮಾಧಾನಗೊಂಡಿದ್ದಾರೆ ಎನ್ನಲಾಗುತ್ತಿದೆ. ‘ಕೆಜಿಎಫ್’ ಸರಣಿಯ ನಂತರ ಜಾಗತಿಕ ಮಟ್ಟದಲ್ಲಿ ಗುರುತಿಸಿಕೊಂಡಿರುವ ಯಶ್, ಗುಣಮಟ್ಟದ ವಿಚಾರದಲ್ಲಿ ಎಳ್ಳಷ್ಟೂ ರಾಜಿ ಮಾಡಿಕೊಳ್ಳಲು ಸಿದ್ಧರಿಲ್ಲ. ಸ್ಕ್ರೀನಿಂಗ್ ಬಳಿಕ ಬಂದ ಫೀಡ್ಬ್ಯಾಕ್ ಆಧಾರದ ಮೇಲೆ, ಈಗ ಇಡೀ ಸಿನಿಮಾವನ್ನು ಮತ್ತೆ ರೀ-ಎಡಿಟಿಂಗ್ ಮಾಡಲು ನಿರ್ಧರಿಸಲಾಗಿದೆ. ಪ್ರೇಕ್ಷಕರಿಗೆ ಇನ್ನಷ್ಟು ಪ್ರಬಲವಾದ ಅನುಭವ ನೀಡಲು ಪ್ರೆಸೆಂಟೇಶನ್ ಪ್ಲಾನ್ ಬದಲಾಗುತ್ತಿದೆ.
ರೀ-ಎಡಿಟಿಂಗ್ ಮತ್ತು ತಾಂತ್ರಿಕ ಸುಧಾರಣೆಗಳಿಗೆ ಹೆಚ್ಚಿನ ಸಮಯ ಬೇಕಾಗಿರುವುದರಿಂದ, ಚಿತ್ರದ ಬಿಡುಗಡೆಯನ್ನು ಅಂದಾಜು ಮೂರು ತಿಂಗಳು ಮುಂದೂಡಲಾಗಿದೆ. ಕೆಲಸವು ಪೂರ್ಣಗೊಂಡ ನಂತರ ಫೈನಲ್ ಔಟ್ಪುಟ್ ಬಗ್ಗೆ ಖಚಿತವಾದ ಮೇಲೆಯೇ ಹೊಸ ಬಿಡುಗಡೆ ದಿನಾಂಕವನ್ನು ಘೋಷಿಸಲು ತಂಡ ನಿರ್ಧರಿಸಿದೆ. ತಡವಾದರೂ ಸರಿ, ಅತ್ಯುತ್ತಮ ಸಿನಿಮಾವನ್ನೇ ಪ್ರೇಕ್ಷಕರಿಗೆ ನೀಡಬೇಕು ಎನ್ನುವುದು ‘ಟಾಕ್ಸಿಕ್’ ತಂಡದ ಉದ್ದೇಶವಾಗಿದೆ.
