ಬೆಂಗಳೂರು ಆ. 21: ‘ರಾಕಿಂಗ್ ಸ್ಟಾರ್’ ಯಶ್ ಹಾಗೂ ನಿರ್ದೇಶಕಿ ಗೀತು ಮೋಹನ್ದಾಸ್ ಕಾಂಬಿನೇಷನ್ನ ಬಹುನಿರೀಕ್ಷಿತ ‘ಟಾಕ್ಸಿಕ್’ ಸಿನಿಮಾದ ಕ್ರೇಜ್ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಚಿತ್ರದ ಹಿಂದಿ ಡಬ್ ಆವೃತ್ತಿಯ ಅಡ್ವಾನ್ಸ್ ಬುಕಿಂಗ್ ಆರಂಭವಾದ ಕೆಲವೇ ಗಂಟೆಗಳಲ್ಲಿ ಭರ್ಜರಿ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಬಾಕ್ಸ್ ಆಫೀಸ್ನಲ್ಲಿ ಹೊಸ ದಾಖಲೆ ಬರೆಯುವ ಸೂಚನೆ ನೀಡಿದೆ.
ಇಂದು ಶುಕ್ರವಾರ (ಆಗಸ್ಟ್ 21) ಬೆಳಗ್ಗೆ 8 ಗಂಟೆಗೆ ‘ಟಾಕ್ಸಿಕ್’ ಹಿಂದಿ ಆವೃತ್ತಿಯ ಅಡ್ವಾನ್ಸ್ ಬುಕಿಂಗ್ ಆರಂಭವಾಗಿತ್ತು. ಬುಕಿಂಗ್ ಆರಂಭವಾದ ಕೇವಲ 6 ಗಂಟೆಗಳಲ್ಲೇ ಪಿವಿಆರ್-ಐನಾಕ್ಸ್ ಮತ್ತು ಸಿನಿಪೊಲಿಸ್ನಂತಹ ಪ್ರಮುಖ ಮಲ್ಟಿಪ್ಲೆಕ್ಸ್ಗಳಲ್ಲಿ 30 ಸಾವಿರಕ್ಕೂ ಹೆಚ್ಚು ಟಿಕೆಟ್ಗಳು ಮಾರಾಟವಾಗಿವೆ ಎಂದು ವರದಿಯಾಗಿದೆ.
ಮೊದಲ ದಿನವೇ 50 ಕೋಟಿ ರೂ. ಗುರಿ?
ಅಡ್ವಾನ್ಸ್ ಬುಕಿಂಗ್ಗೆ ಸಿಗುತ್ತಿರುವ ಭರ್ಜರಿ ಪ್ರತಿಕ್ರಿಯೆಯನ್ನು ಗಮನಿಸಿದರೆ, ‘ಟಾಕ್ಸಿಕ್’ ಹಿಂದಿ ಆವೃತ್ತಿಯೊಂದೇ ಮೊದಲ ದಿನ ರೂ. 45 ಕೋಟಿಯಿಂದ 55 ಕೋಟಿ ರೂ. ಗಳಿಸುವ ಸಾಧ್ಯತೆ ಇದೆ ಎಂಬ ಬಾಕ್ಸ್ ಆಫೀಸ್ ಅಂದಾಜುಗಳು ಕೇಳಿಬರುತ್ತಿವೆ.
ಬಿಗ್ ಬಜೆಟ್ ಸಿನಿಮಾಗಳಿಗೆ ಸಮಾನವಾಗಿ ಟಿಕೆಟ್ ದರ ನಿಗದಿಪಡಿಸಿದ್ದರೂ ಯಶ್ ಅಭಿಮಾನಿಗಳ ಉತ್ಸಾಹದಲ್ಲಿ ಯಾವುದೇ ಇಳಿಕೆಯಾಗಿಲ್ಲ. ಮಲ್ಟಿಪ್ಲೆಕ್ಸ್ಗಳ ಜೊತೆಗೆ ಸಿಂಗಲ್ ಸ್ಕ್ರೀನ್ ಚಿತ್ರಮಂದಿರಗಳಲ್ಲೂ ಹಲವು ಶೋಗಳು ವೇಗವಾಗಿ ಭರ್ತಿಯಾಗುತ್ತಿವೆ.
ದೊಡ್ಡ ಸಿನಿಮಾಗಳ ದಾಖಲೆಗಳಿಗೆ ಟಕ್ಕರ್
ಅಡ್ವಾನ್ಸ್ ಬುಕಿಂಗ್ ಆರಂಭವಾದ ಮೊದಲ 6 ಗಂಟೆಗಳ ಟಿಕೆಟ್ ಮಾರಾಟದ ವೇಗವನ್ನು ಗಮನಿಸಿದರೆ, ‘ಟಾಕ್ಸಿಕ್’ ಸಿನಿಮಾ ‘ಅನಿಮಲ್’, ‘ಧುರಂಧರ್’, ‘ಟೈಗರ್ 3’ ಹಾಗೂ ‘ಸ್ಪೈಡರ್ಮ್ಯಾನ್’ನಂತಹ ಸಿನಿಮಾಗಳ ಆರಂಭಿಕ ಬುಕಿಂಗ್ ದಾಖಲೆಗಳಿಗೆ ಟಕ್ಕರ್ ನೀಡುತ್ತಿದೆ.
2026ರಲ್ಲಿ ‘ಧುರಂಧರ್ 2’ ನಂತರ ಅತ್ಯಂತ ವೇಗವಾಗಿ ಅಡ್ವಾನ್ಸ್ ಬುಕಿಂಗ್ ನಡೆಯುತ್ತಿರುವ ಸಿನಿಮಾಗಳ ಪೈಕಿ ‘ಟಾಕ್ಸಿಕ್’ ಪ್ರಮುಖ ಸ್ಥಾನ ಪಡೆದಿದೆ. ವಿಶೇಷವೆಂದರೆ, ‘ಧುರಂಧರ್ 2’ ಸೀಕ್ವೆಲ್ ಆಗಿದ್ದರೆ, ‘ಟಾಕ್ಸಿಕ್’ ಕನ್ನಡದ ಸ್ಟ್ಯಾಂಡ್ಅಲೋ ಸಿನಿಮಾ.
ಬುಕ್ಮೈಶೋದಲ್ಲೂ ಭರ್ಜರಿ ಕ್ರೇಜ್
ಚಿತ್ರದ ಅಡ್ವಾನ್ಸ್ ಬುಕಿಂಗ್ ಆರಂಭಕ್ಕೂ ಮುನ್ನವೇ ಬುಕ್ಮೈಶೋನಲ್ಲಿ 12 ಲಕ್ಷಕ್ಕೂ ಅಧಿಕ ಮಂದಿ ‘ಟಾಕ್ಸಿಕ್’ ಸಿನಿಮಾ ಬಗ್ಗೆ ಆಸಕ್ತಿ ತೋರಿಸಿದ್ದರು ಎಂದು ವರದಿಯಾಗಿದೆ. ಇಂಗ್ಲಿಷ್ ವರ್ಷನ್ ಟ್ರೇಲರ್ ಬಿಡುಗಡೆಯಾದ ಬಳಿಕ ವಿದೇಶಗಳಲ್ಲೂ ಚಿತ್ರದ ಮೇಲಿನ ನಿರೀಕ್ಷೆ ಮತ್ತಷ್ಟು ಹೆಚ್ಚಾಗಿದೆ.
ಯಶ್ ಅವರ ಪ್ಯಾನ್ ಇಂಡಿಯಾ ಜನಪ್ರಿಯತೆ, ಗೀತು ಮೋಹನ್ದಾಸ್ ಅವರ ನಿರ್ದೇಶನ ಹಾಗೂ ಚಿತ್ರದ ಭರ್ಜರಿ ಪ್ರಚಾರದಿಂದಾಗಿ ‘ಟಾಕ್ಸಿಕ್’ ಬಾಕ್ಸ್ ಆಫೀಸ್ನಲ್ಲಿ ಯಾವ ಮಟ್ಟದ ದಾಖಲೆ ಬರೆಯಲಿದೆ ಎಂಬ ಕುತೂಹಲ ಈಗ ಹೆಚ್ಚಾಗಿದೆ.
