ದಳಪತಿ ವಿಜಯ್ ದಾಂಪತ್ಯದಲ್ಲಿ ಬಿರುಕು: 600 ಕೋಟಿ ಆಸ್ತಿಯಲ್ಲಿ ಸಂಗೀತಾಗೆ ಸಿಗುತ್ತಾ ಅರ್ಧ ಪಾಲು ?

ತಮಿಳು ಚಿತ್ರರಂಗದ ಖ್ಯಾತ ನಟ ದಳಪತಿ ವಿಜಯ್ ಮತ್ತು ಅವರ ಪತ್ನಿ ಸಂಗೀತಾ ಅವರ ದಾಂಪತ್ಯ ಜೀವನದಲ್ಲಿ ಬಿರುಕು ಮೂಡಿದೆ ಎಂಬ ಸುದ್ದಿಗಳು ಕಾಲಿವುಡ್‌ನಲ್ಲಿ ಸಂಚಲನ ಮೂಡಿಸಿವೆ. ಸಂಗೀತಾ ಅವರು ತಮಿಳುನಾಡಿನ ಚೆಂಗಲ್ಪಟ್ಟು ಕುಟುಂಬ ನ್ಯಾಯಾಲಯದಲ್ಲಿ ವಿಚ್ಛೇದನಕ್ಕಾಗಿ ಅರ್ಜಿ ಸಲ್ಲಿಸಿದ್ದಾರೆ ಎನ್ನಲಾಗಿದ್ದು, ವಿಜಯ್ ವಿವಾಹೇತರ ಸಂಬಂಧ ಹೊಂದಿದ್ದಾರೆ ಎಂಬ ಗಂಭೀರ ಆರೋಪವನ್ನು ಮಾಡಿದ್ದಾರೆ. ಈ ಬೆನ್ನಲ್ಲೇ, ವಿಜಯ್ ಅವರ ಸಾವಿರಾರು ಕೋಟಿ ಮೌಲ್ಯದ ಆಸ್ತಿಯಲ್ಲಿ ಪತ್ನಿಗೆ ಎಷ್ಟು ಪಾಲು ಸಿಗಲಿದೆ ಎಂಬ ಕುತೂಹಲ ಸಾರ್ವಜನಿಕರಲ್ಲಿ ಮನೆಮಾಡಿದೆ.

ಪಾಶ್ಚಿಮಾತ್ಯ ದೇಶಗಳಲ್ಲಿ ವಿಚ್ಛೇದನದ ಸಮಯದಲ್ಲಿ ಪತಿಗೆ ಸೇರಿದ ಆಸ್ತಿಯಲ್ಲಿ ಶೇ. 50ರಷ್ಟು ಪಾಲನ್ನು ಪತ್ನಿಗೆ ನೀಡುವ ’50-50 ಮಾಡೆಲ್’ ಚಾಲ್ತಿಯಲ್ಲಿದೆ. ಆದರೆ ಭಾರತೀಯ ಕಾನೂನು ಈ ವಿಷಯದಲ್ಲಿ ಭಿನ್ನವಾಗಿದೆ. ಭಾರತದಲ್ಲಿ ವಿಚ್ಛೇದನದ ನಂತರ ಪತ್ನಿ ತನ್ನ ಗಂಡನ ಒಟ್ಟು ಆಸ್ತಿಯಲ್ಲಿ ಅರ್ಧದಷ್ಟು ಭಾಗವನ್ನು ಪಡೆಯುವುದು ಕಡ್ಡಾಯವಲ್ಲ.

ನ್ಯಾಯಾಲಯವು ವಿಚ್ಛೇದನದ ನಂತರ ನೀಡುವ ಜೀವನಾಂಶ (Alimony) ಅನ್ನು ನಿರ್ಧರಿಸುವಾಗ ಈ ಅಂಶಗಳನ್ನು ಪರಿಗಣಿಸುತ್ತದೆ. ಅದರಂತೆ ಪತಿಯ ಮಾಸಿಕ ಮತ್ತು ವಾರ್ಷಿಕ ಆದಾಯ ಎಷ್ಟು ? ಸಮಾಜದಲ್ಲಿ ಆತನ ಸ್ಥಾನಮಾನವೇನು ?, ಪತ್ನಿ ಸ್ವತಂತ್ರವಾಗಿ ಜೀವನ ನಡೆಸಲು ಸಮರ್ಥಳೇ ? ಆಕೆಗೆ ಇರುವ ಆದಾಯದ ಮೂಲಗಳೇನು ?, ಮಕ್ಕಳಿದ್ದರೆ ಅವರ ಶಿಕ್ಷಣ ಮತ್ತು ಜೀವನ ನಿರ್ವಹಣೆಗೆ ಎಷ್ಟು ಖರ್ಚಾಗುತ್ತದೆ ?, ದಂಪತಿಗಳು ಮದುವೆಯಾಗಿದ್ದಾಗ ಅನುಭವಿಸುತ್ತಿದ್ದ ಜೀವನಮಟ್ಟವನ್ನು ಪತ್ನಿ ಮುಂದೆಯೂ ಮುಂದುವರಿಸಲು ಅಗತ್ಯವಿರುವ ಹಣವೆಷ್ಟು? ಎಂಬ ವಿವಿದ ಅಂಶಗಳನ್ನ ಪರಿಗಣಿಸುತ್ತದೆ.

ವಿಜಯ್ ಆಸ್ತಿಯ ಲೆಕ್ಕಾಚಾರ

ವರದಿಗಳ ಪ್ರಕಾರ ದಳಪತಿ ವಿಜಯ್ ಅವರ ಒಟ್ಟು ಆಸ್ತಿ ಸರಿಸುಮಾರು 600 ಕೋಟಿ ರೂಪಾಯಿ. ಇದರಲ್ಲಿ ವಿಜಯ್ ಸ್ವಯಾರ್ಜಿತವಾಗಿ ಗಳಿಸಿದ ಆಸ್ತಿ ಎಷ್ಟು ಮತ್ತು ಅವರ ತಂದೆ ಎಸ್‌ಎ ಚಂದ್ರಶೇಖರ್ ಅವರಿಂದ ಬಂದ ಪಿತ್ರಾರ್ಜಿತ ಆಸ್ತಿ ಎಷ್ಟು ಎಂಬುದು ಮುಖ್ಯವಾಗುತ್ತದೆ. ಸಾಮಾನ್ಯವಾಗಿ ಪಿತ್ರಾರ್ಜಿತ ಆಸ್ತಿಯಲ್ಲಿ ಪತ್ನಿಗೆ ಪಾಲನ್ನು ಪಡೆಯುವುದು ಕಷ್ಟಕರವಾದರೂ, ಸ್ವಯಾರ್ಜಿತ ಆಸ್ತಿಯ ಆಧಾರದ ಮೇಲೆ ದೊಡ್ಡ ಮೊತ್ತದ ಜೀವನಾಂಶವನ್ನು ಸಂಗೀತಾ ಅವರು ಪಡೆಯುವ ಸಾಧ್ಯತೆಯಿದೆ.

ದುಬಾರಿ ವಿಚ್ಛೇದನಗಳ ಉದಾಹರಣೆ

ಹಿಂದೆ ಬಾಲಿವುಡ್ ನಟ ಹೃತಿಕ್ ರೋಷನ್ ಮತ್ತು ಸುಸಾನೆ ಖಾನ್ ವಿಚ್ಛೇದನ ಪಡೆದಾಗ, ಸುಮಾರು 380 ಕೋಟಿ ರೂಪಾಯಿಗಳ ಆಸ್ತಿಯನ್ನು ನೀಡಲಾಗಿತ್ತು ಎಂಬ ಸುದ್ದಿಯಿತ್ತು. ವಿಜಯ್ ಅವರ ಪ್ರಕರಣದಲ್ಲಿಯೂ ಅಷ್ಟೇ ದೊಡ್ಡ ಮೊತ್ತದ ವ್ಯವಹಾರ ನಡೆಯಬಹುದೇ ಎಂಬ ಚರ್ಚೆ ನಡೆಯುತ್ತಿದೆ. ಆದರೆ, ಇವೆಲ್ಲವೂ ನ್ಯಾಯಾಲಯದ ತೀರ್ಪು ಅಥವಾ ದಂಪತಿಗಳ ನಡುವೆ ನಡೆಯುವ ಪರಸ್ಪರ ಒಪ್ಪಂದದ (Mutual Consent) ಮೇಲೆ ಅವಲಂಬಿತವಾಗಿರುತ್ತದೆ.

ಸದ್ಯಕ್ಕೆ ವಿಜಯ್ ರಾಜಕೀಯ ಪ್ರವೇಶದ (ಟಿವಿಕೆ ಪಕ್ಷ) ಹೊಸ್ತಿಲಲ್ಲಿರುವಾಗಲೇ ಇಂತಹ ವೈಯಕ್ತಿಕ ಬಿಕ್ಕಟ್ಟು ಎದುರಾಗಿರುವುದು ಅವರ ಅಭಿಮಾನಿಗಳಿಗೆ ಬೇಸರ ತಂದಿದೆ. ಕೋರ್ಟ್ ಯಾವ ರೀತಿಯ ಆದೇಶ ನೀಡಲಿದೆ ಎಂಬುದು ಇಡೀ ಕಾಲಿವುಡ್‌ನ ಗಮನ ಸೆಳೆದಿದೆ.