ನಮ್ಮ ಯಶ್ ಹಾಗೂ ರಣ್ಬೀರ್ ಕಪೂರ್ ಕಾಂಬೋನ ರಾಮಾಯಣ ಸಿನಿಮಾದ ರಿಲೀಸ್ ಡೇಟ್ ಹತ್ತಿರ ಆಗ್ತಿದ್ದಂತೆ ಒಂದೊಂದೇ ಹಾಡುಗಳು ಹೊರಬರ್ತಿವೆ. ಒಂದಕ್ಕಿಂತ ಒಂದು ಕಲರ್‌‌ಫುಲ್ ಹಾಗೂ ವೈಭವೋಪೇತವಾಗಿದ್ದು, ಮಹಾದೃಶ್ಯಕಾವ್ಯದ ಸಾರವನ್ನು ಇಂದಿನ ಜನರೇಷನ್‌ಗೆ ಸಾರುತ್ತಿವೆ. ಸದ್ಯ ಸೀತಾರಾಮ ಕಲ್ಯಾಣದ ಕುರಿತ ಮಂಗಳ ಸಂಗಮ ಗೀತೆ ಎಲ್ಲರ ಮನಸೂರೆಗೊಂಡಿದೆ. ಆ ಝಲಕ್‌ನ ನೀವೊಮ್ಮೆ ಕಣ್ತುಂಬಿಕೊಳ್ಳಿ.
- ಪ್ರೇಮದ ಸಂಗಮ.. ಮಂಗಳ ಸಂಗಮ.. ಈ ಸೀತಾರಾಮ ಕಲ್ಯಾಣ
- ಅಯೋಧ್ಯೆಯ ಶ್ರೀರಾಮ & ಮಿಥಿಲೆಯ ಜಾನಕಿ ಮುಖಾಮುಖಿ..!
- ಸ್ವಯಂವರ.. ಶಿವ ಧನಸ್ಸು.. ಮಹಾದೃಶ್ಯಕಾವ್ಯದ ಮಹಾಪರ್ವವಿದು
- ನ-5ರ ದೀಪಾವಳಿಗೆ ಯಶ್-ರಣ್ಬೀರ್-ಸಾಯಿ ರಾಮಾಯಣ ತೆರೆಗೆ
ರಾಮಾಯಣ.. ಗ್ಲೋಬಲ್ ವೇದಿಕೆ ಮೂಲಕ ವಿಶ್ವದ ಮೂಲೆ ಮೂಲೆಗೆ ತಲುಪಲು ಸಜ್ಜಾಗಿರೋ ನಮ್ಮ ಮಹಾದೃಶ್ಯಕಾವ್ಯಗಳಲ್ಲೊಂದು. ಸುಮಾರು 4 ಸಾವಿರ ಕೋಟಿ ಬಿಗ್ ಬಜೆಟ್‌‌ನಲ್ಲಿ ಎರಡೆರಡು ಭಾಗಗಳಲ್ಲಿ ನಮಿತ್ ಮಲ್ಹೋತ್ರಾ ಹಾಗೂ ಹೆಮ್ಮೆಯ ಕನ್ನಡಿಗ ಯಶ್ ಈ ಸಿನಿಮಾನ ನಿರ್ಮಾಣ ಮಾಡಿದ್ದು, ಮೊದಲ ಭಾಗ ಇದೇ ನವೆಂಬರ್ 5ರಂದು ದೀಪಾವಳಿ ವಿಶೇಷ ಬೆಳ್ಳಿತೆರೆ ಬೆಳಗಲು ಸಜ್ಜಾಗ್ತಿದೆ. ದಂಗಲ್ ಡೈರೆಕ್ಟರ್ ನಿತೇಶ್ ತಿವಾರಿ ನಿರ್ದೇಶನದ ಈ ಸಿನಿಮಾ ಟೀಸರ್, ಟ್ರೈಲರ್ ಹಾಗೂ ಸಾಂಗ್ಸ್‌‌ನಿಂದ ನೋಡುಗರ ನಾಡಿಮಿಡಿತ ಹೆಚ್ಚಿಸಿದೆ.
ಸುಮಾರು 8 ಆಸ್ಕರ್ ಪ್ರಶಸ್ತಿಗಳನ್ನ ಪಡೆದಂತಹ ವಿಶ್ವದ ಬೆಸ್ಟ್ ವಿಎಫ್‌‌‌ಎಕ್ಸ್ ಕಂಪನಿ DNEGಯ ಅತ್ಯದ್ಭುತ ಟೆಕ್ನಿಷಿಯನ್ಸ್‌‌ನಿಂದ ತಯಾರಾಗ್ತಿರೋ ರಾಮಾಯಣ ಮಕ್ಕಳಿಂದ ಮುದುಕರ ವರೆಗೆ ಕ್ಯೂರಿಯಾಸಿಟಿ ಹೆಚ್ಚಿಸಿದೆ. ಅದ್ರಲ್ಲೂ ನಮ್ಮ ಹೆಮ್ಮೆಯ ಕನ್ನಡಿಗ ಯಶ್ ರಾವಣನಾಗಿ ನೆಗೆಟಿವ್ ಶೇಡ್‌‌ನಲ್ಲಿ ಅಬ್ಬರಿಸಿ, ಬೊಬ್ಬಿರಿಯಲಿದ್ದು, ಶ್ರೀರಾಮನಾಗಿ ರಣ್ಬೀರ್ ಕಪೂರ್ ಹಾಗೂ ಸೀತೆಯಾಗಿ ಸಾಯಿ ಪಲ್ಲವಿ ಕಾಣಸಿಗಲಿದ್ದಾರೆ.
ಎ ಆರ್ ರೆಹಮಾನ್ ಸಂಗೀತ ಸಂಯೋಜನೆಯ ಹಾಡುಗಳು ಒಂದಕ್ಕಿಂತ ಒಂದು ಅದ್ಭುತ ಅನಿಸಿದ್ದು, ಈಗಾಗ್ಲೇ ಜೈ ಜೈ ರಾಮ್ ಹಾಗೂ ರಾವಣ ತಾಂಡವಂ ಗೀತೆಗಳು ಎಲ್ಲರ ದಿಲ್ ದೋಚಿದ್ದವು. ಇದೀಗ ಮೂರನೇ ಹಾಡು ಹೊರಬಿದ್ದಿದೆ. ಮಂಗಳ ಸಂಗಮ ಅನ್ನೋ ಈ ಗೀತೆ ಸೀತಾರಾಮರ ಕಲ್ಯಾಣದ ಕುರಿತಾದ ಗೀತೆಯಾಗಿದ್ದು, ಅಯೋಧ್ಯೆಯ ರಾಮ, ಮಿಥಿಲೆಯ ಸೀತೆ ಸತಿ-ಪತಿಯಾಗೋ ಪ್ರಸಂಗವನ್ನು ಹೇಳುತ್ತಿದೆ.
ಹೌದು… ಜನಕ ಮಹಾರಾಜ ತನ್ನ ಮಗಳು ಸೀತೆಯ ಕಲ್ಯಾಣಕ್ಕಾಗಿ ಸ್ವಯಂವರ ಏರ್ಪಡಿಸುತ್ತಾರೆ. ಮಿಥಿಲೆಯ ರಾಜನಿಗೆ ದೇವತೆಗಳು ನೀಡಿದ್ದ ಪಿನಾಕ ಅನ್ನೋ ಶಿವ ಧನಸ್ಸನ್ನು ಸುಲಭವಾಗಿ ಮೇಲಕ್ಕೆ ಎತ್ತಿದ ರಾಜಕುಮಾರನಿಗೆ ಸೀತೆಯನ್ನ ಕೊಟ್ಟು ಮದುವೆ ಮಾಡಲು ನಿರ್ಧರಿಸಿಲಾಗಿರುತ್ತದೆ. ಆಗ ಶ್ರೀರಾಮ ಬಹಳ ಸುಲಭವಾಗಿ ಆ ಧನಸ್ಸನ್ನು ಮೇಲಕ್ಕೆ ಎತ್ತಿ, ಎರಡು ತುಂಡಾಗಿಸ್ತಾರೆ. ಆ ಮೂಲಕ ಸೀತೆ ಶ್ರೀರಾಮನ ಪತ್ನಿಯಾಗಿ ಅಯೋಧ್ಯೆಗೆ ಬರ್ತಾರೆ. ಆ ಕಂಪ್ಲೀಟ್ ಪ್ರಸಂಗವನ್ನ ಪ್ರತಿನಿಧಿಸೋ ಈ ಗೀತೆ ನೋಡುಗರ ಕಣ್ಣಿಗೆ ಪರಮಾನಂದ ನೀಡ್ತಿದೆ.
ಕಾರ್ತಿಕ್ ಸರಗೂರ್ ಸಾಹಿತ್ಯ ರಚನೆಯ ಈ ಗೀತೆಗೆ ಸಂಗೀತ ಮಾಂತ್ರಿಕ ರೆಹಮಾನ್ ಸಂಗೀತ ವ್ಹಾವ್ ಫೀಲ್ ತರಿಸುವಂತಿದ್ದು, ಅಷ್ಟೇ ಸೊಗಸಾಗಿ ಅದನ್ನ ಅರ್ಮಾನ್ ಮಲಿಕ್ ತಮ್ಮ ಕಂಠದಲ್ಲಿ ಹಾಡುವ ಮೂಲಕ ಜೀವ ತುಂಬಿದ್ದಾರೆ. ಒಟ್ಟಾರೆ ರಾಮಾಯಣ ಸಿನಿಮಾ ಎಲ್ಲೆಡೆ ಇವೆಂಟ್ಸ್ ಮೂಲಕ ರಂಗೇರುತ್ತಿದ್ದು, ಇಡೀ ತಂಡ ನಮ್ಮ ನೆಲದ ಕಥೆಯನ್ನ ಜಗದಗಲಕ್ಕೆ ಕೊಂಡೊಯ್ಯುತ್ತಿರೋದಕ್ಕೆ ಬಹಳ ಉತ್ಸುಕವಾಗಿದೆ.
ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್
