ಕೀರ್ತಿ ಪಾಟೀಲ್, ಫಿಲಂ ಬ್ಯೂರೋ, ಗ್ಯಾರಂಟಿ ನ್ಯೂಸ್
ಸ್ಯಾಂಡಲ್‌ವುಡ್‌ನ ಅಂಗಳದಲ್ಲಿ ಈಗ ‘ಗೋಲ್ಡನ್’ ಸಂಚಲನ ಶುರುವಾಗಿದೆ. ಹೌದು, ದಶಕದ ಹಿಂದೆ ‘ಮಳೆಯಲಿ ಜೊತೆಯಲಿ’ ಅಂತ ಪ್ರೇಕ್ಷಕರ ಮನಸ್ಸಿಗೆ ಲಗ್ಗೆ ಇಟ್ಟಿದ್ದ ಗೋಲ್ಡನ್ ಮೂವೀಸ್ ಸಂಸ್ಥೆ ಈಗ ಲಾಂಗ್ ಗ್ಯಾಪ್ ಬಳಿಕ ಸಖತ್ ಸೌಂಡ್ ಮಾಡ್ತಿದೆ. ಗೋಲ್ಡನ್ ಸ್ಟಾರ್ ಗಣೇಶ್ ಅವರ ಪತ್ನಿ ಶಿಲ್ಪಾ ಗಣೇಶ್ ಮತ್ತೆ ನಿರ್ಮಾಪಕಿಯಾಗಿ ಕಲಾವಿದರಿಗೆ ಅನ್ನದಾತೆ ಆಗಿದ್ದಾರೆ. ಅಷ್ಟಕ್ಕೂ ಈ ಬಾರಿ ಅವರು ತಂದಿರೋ ‘ಪಿಚ್ಚರ್’ ಹೇಗಿದೆ? ಮೊದಲ ಹಾಡಿನಲ್ಲೇ ತಮಿಳಿನ ‘ಗೋಲ್ಡನ್ ಸ್ಪ್ಯಾರೋ’ ವೈಬ್ಸ್ ಕಾಣಿಸ್ತಿರೋದು ಯಾಕೆ? ಈ ಕುರಿತ ಕಂಪ್ಲೀಟ್ ಸ್ಟೋರಿ ಇಲ್ಲಿದೆ ನೋಡಿ.
- ಅಂದು ಕೂಲ್.. ಇಂದು ಪಿಚ್ಚರ್.. ಶಿಲ್ಪಾ ಗಣೇಶ್ ಈಸ್ ಬ್ಯಾಕ್
- 15 ವರ್ಷಗಳ ನಂತರ ಮತ್ತೆ ನಿರ್ಮಾಣಕ್ಕೆ ಇಳಿದ ಶಿಲ್ಪಾ ಗಣೇಶ್..!
- ನಿತ್ಯಪ್ರಕಾಶ್ ಎನರ್ಜಿಟಿಕ್ ಸ್ಟೆಪ್ಸ್..ತುಳು-ಕನ್ನಡದ ಜುಗಲ್‌ಬಂದಿ
- ಗೋಲ್ಡನ್ ಸ್ಪ್ಯಾರೋ ಸ್ಟೈಲ್..ಕಲರ್ ಫುಲ್ ವೆಡ್ಡಿಂಗ್ ಸಾಂಗ್
ಸ್ಯಾಂಡಲ್‌ವುಡ್‌ನ ಪವರ್‌ಫುಲ್ ಕಪಲ್ಸ್ ಪೈಕಿ ಗಣೇಶ್ ಮತ್ತು ಶಿಲ್ಪಾ ಜೋಡಿ ಸದಾ ಮುಂಚೂಣಿಯಲ್ಲಿ ಇರುತ್ತಾರೆ. ಶಿಲ್ಪಾ ಗಣೇಶ್ ಕೇವಲ ಗಣೇಶ್ ಅವರ ಪತ್ನಿಯಾಗಿ ಮಾತ್ರವಲ್ಲದೆ, ‘ಮಳೆಯಲಿ ಜೊತೆಯಲಿ’ ಮತ್ತು ‘ಕೂಲ್’ ಅಂತಹ ಹಿಟ್ ಸಿನಿಮಾಗಳನ್ನು ನೀಡಿ ಯಶಸ್ವಿ ನಿರ್ಮಾಪಕಿಯಾಗಿಯೂ ಗುರುತಿಸಿಕೊಂಡವರು. ಈಗ ಹಲವು ವರ್ಷಗಳ ಗ್ಯಾಪ್ ನಂತರ ಶಿಲ್ಪಾ ಅವರು ಮತ್ತೆ ಸಿನಿಮಾ ನಿರ್ಮಾಣಕ್ಕಿಳಿದಿರುವುದು ಗಾಂಧಿನಗರದ ಮಂದಿಗೆ ಖುಷಿ ತಂದಿದೆ. ಈ ಬಾರಿ ಅವರು ಕೈ ಹಾಕಿರೋ ಪ್ರಾಜೆಕ್ಟ್ ಹೆಸರೇ ‘ಪಿಚ್ಚರ್’. ಹೆಸರೇ ಡಿಫರೆಂಟ್ ಆಗಿರೋ ಈ ಸಿನಿಮಾ ಈಗ ಸೋಷಿಯಲ್ ಮೀಡಿಯಾದಲ್ಲಿ ಹಾಟ್ ಟಾಪಿಕ್ ಆಗಿದೆ.
ಪಿಚ್ಚರ್ ಸಿನಿಮಾದ ಮೊದಲ ಹಾಡು ‘ತಕ ತಕ ಕುಣಿಸಕ..’ ಇತ್ತೀಚೆಗಷ್ಟೇ ರಿಲೀಸ್ ಆಗಿ ಧೂಳೆಬ್ಬಿಸುತ್ತಿದೆ. ಈ ಹಾಡಿನಲ್ಲಿ ನಾಯಕ ನಿತ್ಯಪ್ರಕಾಶ್ ಬಂಟ್ವಾಳ ಅವರ ಎನರ್ಜಿಟಿಕ್ ಸ್ಟೆಪ್ಸ್ ನೋಡಿ ಫ್ಯಾನ್ಸ್ ಫಿದಾ ಆಗಿದ್ದಾರೆ. ಇಂಟೆರೆಸ್ಟಿಂಗ್ ಅಂದ್ರೆ, ಈ ಸಾಂಗ್ ಕೇಳುತ್ತಿದ್ದರೆ ಇತ್ತೀಚೆಗಷ್ಟೇ ತಮಿಳಿನಲ್ಲಿ ಅಬ್ಬರಿಸಿದ್ದ ಧನುಷ್ ಅಭಿನಯದ ‘ಗೋಲ್ಡನ್ ಸ್ಪ್ಯಾರೋ’ ಹಾಡಿನ ವೈಬ್ಸ್ ನೆನಪಾಗುತ್ತಿದೆ. ಅದೇ ರೀತಿಯ ಕಲರ್‌ಫುಲ್ ವೆಡ್ಡಿಂಗ್ ಸೆಟ್, ಸಖತ್ ಮಜಾ ಕೊಡೋ ಮ್ಯೂಸಿಕ್ ಹಾಗೂ ಹಳ್ಳಿಯ ಸೊಗಡಿನ ವೈಬ್ಸ್ ಈ ಹಾಡಿನಲ್ಲಿ ಮೇಳೈಸಿದೆ. ಆನಂದ್ ಆಡಿಯೋ ಮೂಲಕ ಬಿಡುಗಡೆಯಾಗಿರೋ ಈ ಸಾಂಗ್ ಈಗ ಫ್ಯಾಮಿಲಿ ಪಾರ್ಟಿ ಲಿಸ್ಟ್‌ಗೆ ಸೇರಿಕೊಂಡಿದೆ.
ಯಾವುದೇ ಸಿನಿಮಾ ಯಶಸ್ಸಿನ ಹಿಂದೆ ಒಬ್ಬ ನಿರ್ದೇಶಕನ ವರ್ಷಗಳ ಕಷ್ಟವಿರುತ್ತದೆ. ಸುಮಾರು 15 ವರ್ಷಗಳ ಕಾಲ ಸಹಾಯಕ ಮತ್ತು ಸಹ ನಿರ್ದೇಶಕರಾಗಿ ಕೆಲಸ ಮಾಡಿದ್ದ ಸಂದೀಪ್ ಬೆದ್ರ, ಈಗ ಸ್ವತಂತ್ರ ನಿರ್ದೇಶಕರಾಗಿ ‘ಪಿಚ್ಚರ್’ ಚಿತ್ರದ ಮೂಲಕ ಅದೃಷ್ಟ ಪರೀಕ್ಷೆಗೆ ಇಳಿದಿದ್ದಾರೆ. ಮಂಗಳೂರಿನಿಂದ ಕಾಶ್ಮೀರದವರೆಗೂ ಸುಂದರ ಲೋಕೇಶನ್‌ಗಳಲ್ಲಿ ಚಿತ್ರೀಕರಣ ನಡೆಸಿರುವ ತಂಡ, ಸದ್ಯ ಪೋಸ್ಟ್ ಪ್ರೊಡಕ್ಷನ್ ಕೆಲಸದಲ್ಲಿ ಬ್ಯುಸಿಯಾಗಿದೆ. ಕೌಟುಂಬಿಕ ಕಥೆಯ ಜೊತೆಗೆ ಹೊಟ್ಟೆ ಹುಣ್ಣಾಗಿಸುವ ಕಾಮಿಡಿ ಕೂಡ ಈ ಸಿನಿಮಾದಲ್ಲಿ ಪ್ರಧಾನವಾಗಿದೆ ಎಂದು ಚಿತ್ರತಂಡ ಭರವಸೆ ನೀಡಿದೆ.
ನಿರ್ದೇಶಕ ಸಂದೀಪ ಬೆದ್ರ ಈ ಸಿನಿಮಾವನ್ನು ಕೇವಲ ಕನ್ನಡಕ್ಕಷ್ಟೇ ಸೀಮಿತ ಮಾಡಿಲ್ಲ, ಕರಾವಳಿಯ ತುಳು ಭಾಷೆಯಲ್ಲೂ ಈ ಚಿತ್ರ ಸಿದ್ಧವಾಗಿದೆ. ಹಾಗಾಗಿಯೇ ಈ ಸಿನಿಮಾದ ಹಾಡುಗಳಿಗೆ ಇಬ್ಬರು ಘಟಾನುಘಟಿಗಳು ಸಾಹಿತ್ಯ ಬರೆದಿದ್ದಾರೆ. ಕನ್ನಡದಲ್ಲಿ ಚೇತನ್ ಕುಮಾರ್ ಅವರು ಸಾಹಿತ್ಯ ಬರೆದಿದ್ದರೆ, ತುಳುವಿನಲ್ಲಿ ಖ್ಯಾತ ನಿರ್ದೇಶಕ ಅನೂಪ್ ಭಂಡಾರಿ ಅವರು ಲೇಖನಿ ಹರಿಸಿದ್ದಾರೆ. ಸ್ಯಾಮುಯೆಲ್ ಅಭಿ ಅವರ ಮ್ಯೂಸಿಕ್ ಕಂಪೋಸಿಷನ್ ಹಾಡಿನ ಕಿಕ್ ಅನ್ನು ಡಬಲ್ ಮಾಡಿದೆ. ಒಟ್ಟು ನಾಲ್ಕು ಹಾಡುಗಳ ಪೈಕಿ ಮೊದಲನೆಯದ್ದೇ ಇಷ್ಟು ಸೌಂಡ್ ಮಾಡ್ತಿರೋದು ತಂಡಕ್ಕೆ ಹೊಸ ಚೈತನ್ಯ ನೀಡಿದೆ.
ಪಿಚ್ಚರ್ ಸಿನಿಮಾದ ಮತ್ತೊಂದು ಹೈಲೈಟ್ ಅಂದ್ರೆ ಅದರ ತಾರಾಬಳಗ. ಇಲ್ಲಿ ಕೇವಲ ನಿತ್ಯಪ್ರಕಾಶ್ ಬಂಟ್ವಾಳ ಮತ್ತು ಅಮೃತ ಸುದು ಮಾತ್ರವಲ್ಲದೆ, ತುಳು ಚಿತ್ರರಂಗದ ಸಕಲ ಕಾಮಿಡಿ ಕಿಂಗ್‌ಗಳು ಹಾಜರಿದ್ದಾರೆ. ದೇವದಾಸ್ ಕಾಪಿಕಾಡ್, ನವೀನ್ ಡಿ ಪಡೀಲ್, ಅರವಿಂದ್ ಬೋಳಾರ್ ಹಾಗೂ ಭೋಜರಾಜ್ ವಾಮಂಜೂರ್ ಅವರಂತಹ ದಿಗ್ಗಜರು ಒಂದೇ ಸಿನಿಮಾದಲ್ಲಿ ಇರೋದ್ರಿಂದ ನಗುವಿನ ಅಲೆ ಎದ್ದೇಳುವುದು ಗ್ಯಾರಂಟಿ. ಸಂತೋಷ್ ರೈ ಪಾತಾಜೆ ಅವರ ಅದ್ಭುತ ಛಾಯಾಗ್ರಹಣ ಮತ್ತು ಥ್ರಿಲ್ಲರ್ ಮಂಜು ಅವರ ಸಾಹಸ ಈ ‘ಪಿಚ್ಚರ್’ ಅನ್ನು ಕಂಪ್ಲೀಟ್ ಎಂಟರ್‌ಟೈನ್‌ಮೆಂಟ್ ಪ್ಯಾಕೇಜ್ ಮಾಡಿದೆ.
ಸದ್ಯಕ್ಕೆ ಈ ಸಿನಿಮಾ ಪೋಸ್ಟ್ ಪ್ರೊಡಕ್ಷನ್ ಹಂತದಲ್ಲಿದ್ದು, ಶೀಘ್ರದಲ್ಲೇ ಬೆಳ್ಳಿಪರದೆಯ ಮೇಲೆ ಬರಲಿದೆ. ಗೋಲ್ಡನ್ ಸ್ಟಾರ್ ಪತ್ನಿಯ ‘ಪಿಚ್ಚರ್’ ಬಾಕ್ಸಾಫೀಸ್‌ನಲ್ಲಿ ಎಷ್ಟು ಗೋಲ್ಡ್ ಕಲೆಕ್ಷನ್ ಮಾಡಲಿದೆ ಅಂತ ಕಾದು ನೋಡಬೇಕಿದೆ.
| Reported by: ಕೀರ್ತಿ ಪಾಟೀಲ್, ಫಿಲ್ಮ್ ಬ್ಯೂರೋ, ಗ್ಯಾರಂಟಿ ನ್ಯೂಸ್
