ಕನ್ನಡ, ಹಿಂದಿ ಮತ್ತು ಮರಾಠಿ ಈ ಮೂರೂ ಭಾಷೆಗಳಲ್ಲಿ ಏಕಕಾಲಕ್ಕೆ ಬಿಡುಗಡೆಯಾಗಲಿರುವ ಮಹತ್ವಾಕಾಂಕ್ಷಿ ಚಿತ್ರ ‘ಆಪರೇಷನ್ ಲಂಡನ್ ಕೆಫೆ’ (ಓಎಲ್ಸಿ) ಮೊದಲ ಸಿಂಗಲ್ ಹಾಡು ‘ರೈ ರೈ ರೈ’ ಬಿಡುಗಡೆಯಾಗಿ ಸೋಷಿಯಲ್ ಮೀಡಿಯಾದಲ್ಲಿ ಭಾರಿ ಸದ್ದು ಮಾಡುತ್ತಿದೆ. ನವೆಂಬರ್ 28 ರಂದು ಬಿಡುಗಡೆಯಾಗಲಿರುವ ಚಿತ್ರದ ಈ ಹಾಡು, ನಟಿ ಮೇಘಾ ಶೆಟ್ಟಿ ಅವರ ಡಾನ್ಸ್ ಕಂಡು ಹುಬ್ಬೇರಿಸಿದ್ದಾರೆ.ಹಾಡಿನಲ್ಲಿ ಮೇಘಾ ಶೆಟ್ಟಿ ಅವರು ತರ್ಲೆ-ತುಂಟ ಲಂಗದಾವಣಿ ತೊಟ್ಟು, ಅಪ್ಪಟ ಬಜಾರಿ ಬಾಯಿ ಮತ್ತು ಬಡಕಿ ಹಳ್ಳಿ ಹುಡುಗಿಯ ರೂಪದಲ್ಲಿ ಕಾಣಿಸಿಕೊಂಡಿದ್ದಾರೆ. ‘ರೈ ರೈ ರೈ ಈ ಪ್ರೀತಿ ಶ್ಯಾನೆ ಮಜವಾಗುತೈತಿ, ಮನಸಾಗ ಎಲಿಯಡಿಕಿ ಆಗಿಯಾಕತೈತಿ’ ಎಂಬ ಸಾಲುಗಳನ್ನು ಹಾಡುತ್ತಾ, ಅವರು ಪ್ರಕೃತಿಯ ಸೊಬಗಿನ ಮಧ್ಯೆ ನೃತ್ಯ ಮಾಡುವ ದೃಶ್ಯಗಳು ಅಭಿಮಾನಿಗಳ ಹೃದಯವನ್ನು ಕದಲಿಸಿವೆ.
ಹಾಡು ಚಿತ್ರದ ಕಥಾಹಂದರಕ್ಕೆ ಸುಳಿವು ನೀಡುತ್ತದೆ. ‘ನಕ್ಸಲೈಟ್ ಗೆಟಪ್ಪ’ ಚಿತ್ರದ ಖದರ್ ಧರಿಸಿದ, ಮೀಸೆ ತಿರುವಿದ ನಟ ಕವೀಶ್ ಶೆಟ್ಟಿ (ಸಿದ್ಧಾಂತ) ಚಿತ್ರದಲ್ಲಿ ಒಂದು ಬಿಗುಮಾನದ ಪಾತ್ರದಲ್ಲಿದ್ದಾರೆ. ಹಾಡಿನಲ್ಲಿ ಮೇಘಾ ಶೆಟ್ಟಿ ಅವರು ಈ ಬಿಗುಮಾನವನ್ನು ಅಣಕಿಸಿ, ಗೋಳು ಹುಯ್ದುಕೊಂಡು, ಪ್ರಕೃತಿ ಮತ್ತು ಮಾನವೀಯ ಪ್ರೇಮ ಸಂಬಂಧಗಳನ್ನು ಸುಂದರವಾಗಿ ಚಿತ್ರಿಸುವ ದೃಶ್ಯಗಳಿವೆ. ಚಿತ್ರದುದ್ದಕ್ಕೂ ಇಂತಹ ತರಲೇ-ತಂಟೆ ಮತ್ತು ತಕರಾರಿನ ದೃಶ್ಯಗಳಿರುವುದಾಗಿ ತಿಳಿದುಬಂದಿದೆ.ಇದೇ ಮೊದಲ ಬಾರಿಗೆ ಮೇಘಾ ಶೆಟ್ಟಿ ಅವರು ಮರಾಠಿ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದ್ದಾರೆ. ಕನ್ನಡ ಮತ್ತು ಮರಾಠಿ ಎರಡೂ ಭಾಷೆಗಳಲ್ಲಿ ನೇರವಾಗಿ ಚಿತ್ರೀಕರಣಗೊಂಡಿರುವ ಈ ಚಿತ್ರವು ಅವರ ವೃತ್ತಿಜೀವನದಲ್ಲಿ ಒಂದು ಮಹತ್ವದ ಮೈಲುಗಲ್ಲಾಗಿದೆ.
ಚಿತ್ರವನ್ನು ಸಡಗರ ರಾಘವೇಂದ್ರ ಅವರು ನಿರ್ದೇಶಿಸಿದ್ದಾರೆ ಮತ್ತು ಈ ಹಾಡಿನ ಸಾಹಿತ್ಯವನ್ನೂ ಬರೆದಿದ್ದಾರೆ. ಛಾಯಾಗ್ರಾಹಕ ಆರ್. ಡಿ. ನಾಗಾರ್ಜುನ್ ಅವರು ಹಾಡಿಗೆ ತಕ್ಕಂತೆ ಪ್ರಕೃತಿಯ ಸುಂದರ ದೃಶ್ಯಗಳನ್ನು ತಮ್ಮ ಕ್ಯಾಮೆರಾದಲ್ಲಿ ಅದ್ಭುತವಾಗಿ ಸೆರೆಹಿಡಿದಿದ್ದಾರೆ. ‘ಜಿಲ್ಕಾ’ ಚಿತ್ರದ ನಂತರ ಎರಡನೇ ಬಾರಿಗೆ ಕನ್ನಡ ಚಿತ್ರರಂಗಕ್ಕೆ ಸಂಗೀತ ನೀಡಿರುವ ಪ್ರಾಂಶು ಝಾ ಅವರ ಸಂಗೀತ ಸಂಯೋಜನೆ ಹಾಡಿಗೆ ಜೀವ ತುಂಬಿದೆ. ಹಾಡಗೆ ಮಾದಕ ಮತ್ತು ಮೋಹಕ ಕಂಠದ ಗಾಯಕಿ ಐಶ್ವರ್ಯ ರಂಗರಾಜನ್ ಧ್ವನಿ ನೀಡಿದ್ದಾರೆ.ಈ ಚಿತ್ರವನ್ನು ಇಂಡಿಯನ್ ಫಿಲಂ ಫ್ಯಾಕ್ಟರಿ ಮತ್ತು ದೀಪಕ್ ರಾಣೆ ಫಿಲಂಸ್ ಸಂಸ್ಥೆಯಿಂದ ವಿಜಯ್ ಕುಮಾರ್ ಶೆಟ್ಟಿ, ರಮೇಶ್ ಕೊಠಾರಿ, ದೀಪಕ್ ರಾಣೆ ಮತ್ತು ವಿಜಯ್ ಪ್ರಕಾಶ್ ಅವರು ಅದ್ಧೂರಿಯಾಗಿ ನಿರ್ಮಾಣ ಮಾಡಿದ್ದಾರೆ. ಮೊದಲೇ ಮಾಸ್ ಆಕ್ಷನ್ ಪೋಸ್ಟರ್ಗಳ ಮೂಲಕ ಗಮನ ಸೆಳೆದಿದ್ದ ಚಿತ್ರ, ಈಗ ‘ರೈ ರೈ ರೈ’ ಹಾಡಿನ ಮೂಲಕ ಪ್ರೇಕ್ಷಕರಲ್ಲಿ ಇನ್ನೂ ಹೆಚ್ಚಿನ ಕುತೂಹಲ ಮೂಡಿಸಿದೆ.
