ಮಲಯಾಳಂ ಚಿತ್ರರಂಗ ಇತ್ತೀಚೆಗೆ ಒಳ್ಳೆಯ ಸಿನಿಮಾಗಳಿಗೆ ಮಾತ್ರವಲ್ಲದೆ, ವಿವಾದಗಳಿಗೆ ಕಾರಣವಾಗುತ್ತಿದೆ. ಮಾದಕ ವಸ್ತುಗಳ ಬಳಕೆ ಮತ್ತು ಅನಧಿಕೃತ ವನ್ಯಜೀವಿ ವಸ್ತುಗಳ ಹಸ್ತಾಂತರ ಪ್ರಕರಣಗಳು ಈಗ ಮಾಲಿವುಡ್ ನಲ್ಲಿ ಹರಿದಾಡುತ್ತಿವೆ. ಇದೀಗ ರ್ಯಾಪರ್ ವೇಡನ್ ಮನೆಯಲ್ಲಿ ಮಾದಕ ವಸ್ತು ಹಾಗೂ ಚಿರತೆ ಹಲ್ಲು ಪತ್ತೆಯಾಗಿದೆ. ಮಲಯಾಳಂನ ಫೇಮಸ್ ರ್ಯಾಪ್ ಸಿಂಗರ್ ವೇಡನ್ (Rapper Vedan) ಅವರನ್ನು ಕೂಡ ಬಂಧಿಸಲಾಗಿದೆ.
ಪೊಲೀಸರ ದಾಳಿ ಮತ್ತು ಗಾಂಜಾ ಪತ್ತೆ
ಪೊಲೀಸರ ಶಂಕೆಯ ಪ್ರಕಾರ, ವೇಡನ್ ಮಾದಕ ವಸ್ತುಗಳ ಬಳಕೆ ಮಾಡುತ್ತಿರುವ ಬಗ್ಗೆ ಖಚಿತ ಮಾಹಿತಿ ದೊರಕಿದ ಹಿನ್ನೆಲೆಯಲ್ಲಿ, ಅವರು ವಾಸಿಸುತ್ತಿದ್ದ ಅಪಾರ್ಟ್ಮೆಂಟ್ ಮೇಲೆ ದಾಳಿ ನಡೆಸಲಾಯಿತು. ದಾಳಿಯ ವೇಳೆ ಸುಮಾರು 5 ಗ್ರಾಂ ಗಾಂಜಾ ಹಾಗೂ ಅದನ್ನು ಸೇವಿಸಲು ಬಳಸುವ ಪರಿಕರಗಳು ಸಿಕ್ಕಿಬಿದ್ದವು. ಈ ವೇಳೆ ವೇಡನ್ ಜೊತೆ ಇದ್ದ ಇನ್ನೂ ಎಂಟು ಮಂದಿಯನ್ನು ಸಹ ಬಂಧಿಸಲಾಗಿದೆ.
ಪೊಲೀಸರ ಪ್ರಾಥಮಿಕ ತನಿಖೆಯ ನಂತರ, ವೇಡನ್ ಅವರನ್ನು ಸ್ಟೇಷನ್ ಬೇಲ್ ಮೇಲೆ ಬಿಡುಗಡೆ ಮಾಡಲಾಯಿತು. ಆದಾಗ್ಯೂ, ತನಿಖೆ ಇನ್ನೂ ಮುಂದುವರೆದಿದೆ. ಅವರು ಈ ವಸ್ತುಗಳನ್ನು ಎಲ್ಲಿಂದ ಪಡೆದುಕೊಂಡರು, ಇದಕ್ಕೆ ಹಿನ್ನಲೆಯಲ್ಲಿ ಯಾರ್ಯಾರು ಸೇರಿದ್ದಾರೆ ಎಂಬುದನ್ನು ತಿಳಿದುಕೊಳ್ಳಲು ಪೊಲೀಸರು ಹರಸಾಹಸಪಡುವಂತಾಗಿದೆ.
ಚಿರತೆ ಹಲ್ಲು ಪತ್ತೆ
ದಾಳಿ ವೇಳೆ ವೇಡನ್ ಅವರ ಮನೆಯಲ್ಲಿ ಚಿರತೆಯ ಹಲ್ಲು ಪತ್ತೆಯಾಗಿದ್ದು. ಇದು ಕಾನೂನುಬಾಹ್ಯ ವನ್ಯಜೀವಿ ವಸ್ತುಗಳಲ್ಲಿ ಒಂದಾಗಿ ಲೆಕ್ಕಹಾಕಲ್ಪಟ್ಟಿದ್ದು, ಇದರ ಮಾಲೀಕತ್ವವು ಅರಣ್ಯ ಕಾಯಿದೆಗಳಿಗೆ ವಿರುದ್ಧವಾಗಿದೆ. ಈ ವಿಚಾರಕ್ಕೆ ಸಂಬಂಧಿಸಿದಂತೆ ಕೇರಳ ಅರಣ್ಯ ಇಲಾಖೆ ಕೂಡ ತನಿಖೆ ಆರಂಭಿಸಿದೆ.
ಅರಣ್ಯಾಧಿಕಾರಿಗಳ ಪ್ರಕಾರ, ವೇಡನ್ ಈ ಹಲ್ಲು ತನ್ನ ಬಳಿ ಹೇಗೆ ಬಂದಿತು ಎಂಬುದರ ಕುರಿತು ಹೇಳಿಕೆ ನೀಡಿದ್ದಾರೆ. ಮೊದಲಿಗೆ ಅವರು ಇದನ್ನು ಥೈಲ್ಯಾಂಡ್ನಲ್ಲಿ ಖರೀದಿಸಿದ್ದಾಗಿ ಹೇಳಿದರು. ನಂತರ, ತಮ್ಮ ಅಭಿಮಾನಿಗಳು ಈ ಹಲ್ಲು ಅನ್ನು ಉಡುಗೊರೆಯಾಗಿ ನೀಡಿದ್ದರು ಎಂದು ಬದಲಾದ ಉತ್ತರ ನೀಡಿದರು. ಈ ಭಿನ್ನ ಹೇಳಿಕೆಗಳು ಅಧಿಕಾರಿಗಳ ಶಂಕೆಗೆ ಗುರಿಯಾಗಿದ್ದು, ಅವರ ವಿರುದ್ಧ ಗಂಭೀರ ತನಿಖೆಮುಂದುವರೆದಿದೆ.
ವೇಡನ್ ವಿರುದ್ಧ ಈ ಮೊದಲು ಕೂಡ ಮಾದಕ ವಸ್ತು ಸಂಬಂಧಿತ ಆರೋಪಗಳು ಕೇಳಿಬಂದಿದ್ದರಿಂದ, ಅಧಿಕಾರಿಗಳು ಅವರ ಮೇಲೆ ಈಗಾಗಲೇ ನಿಗಾ ಇಟ್ಟುಕೊಂಡಿದ್ದರು. ಈಗ ಚಿರತೆ ಹಲ್ಲು ಪ್ರಕರಣ ಕೂಡ ಸೇರಿಕೊಂಡಿದ್ದು, ಅವರಿಗೆ ಇನ್ನೂ ಸಂಕಷ್ಟ ತಂದೊಡ್ಡಿದೆ.
ಅರಣ್ಯ ಇಲಾಖೆ ಈ ಕುರಿತು ವರದಿ ಸಿದ್ಧಪಡಿಸಿ ಕೋರ್ಟ್ಗೆ ಸಲ್ಲಿಸಲು ತಯಾರಿ ನಡೆಸುತ್ತಿದೆ. ಕೋರ್ಟ್ ನೀಡುವ ತೀರ್ಪಿನ ಆಧಾರದ ಮೇಲೆ ವೇಡನ್ ಭವಿಷ್ಯ ನಿರ್ಧಾರವಾಗಲಿದೆ.
