ಬಿಗ್ ಬಾಸ್ ಖ್ಯಾತಿಯ ಭವ್ಯಾ ಗೌಡ ಸಹೋದರಿಗೆ ಮದುವೆ ಫಿಕ್ಸ್: ಹುಡುಗ ಯಾರು ಗೊತ್ತೇ?

ಬೆಂಗಳೂರು, ಜೂನ್ 21: ‘ಗೀತಾ’ ಧಾರಾವಾಹಿಯ ಮೂಲಕ ಕನ್ನಡಿಗರ ಮನೆಮಾತಾದ ನಟಿ ಭವ್ಯಾ ಗೌಡ ಅವರ ಸಹೋದರಿ ದಿವ್ಯಾ ಗೌಡ ಅವರು ಶೀಘ್ರದಲ್ಲೇ ದಾಂಪತ್ಯ ಜೀವನಕ್ಕೆ ಕಾಲಿಡಲು ಸಿದ್ಧರಾಗಿದ್ದಾರೆ. ಈಗಾಗಲೇ ಮನೆಯಲ್ಲಿ ಹೂವು ಮುಡಿಸೋ ಶಾಸ್ತ್ರವು ಸರಳವಾಗಿ ನೆರವೇರಿದ್ದು, ಮದುವೆಯ ಮುಹೂರ್ತಕ್ಕೆ ಕುಟುಂಬದವರು ಸಿದ್ಧತೆ ನಡೆಸುತ್ತಿದ್ದಾರೆ. ದಿವ್ಯಾ ಗೌಡ ಅವರ ಭಾವಿ ಪತಿ ಹೇಮಂತ್ ಕುಮಾರ್ ಅವರು ಪ್ರತಿಷ್ಠಿತ ‘ಎಂಡಮೋಲ್ ಶೈನ್’ ಕಂಪನಿಯಲ್ಲಿ ಮತ್ತು ‘ಬಿಗ್ ಬಾಸ್’ ಶೋನಲ್ಲಿ ಕಾಸ್ಟಿಂಗ್ ಡೈರೆಕ್ಟರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.

ಹೂವು ಮುಡಿಸೋ ಶಾಸ್ತ್ರದ ಸಿಂಪಲ್ ಸಂಭ್ರಮ

ದಿವ್ಯಾ ಗೌಡ ಅವರ ಮನೆಯಲ್ಲಿ ಮದುವೆಯ ಪೂರ್ವಭಾವಿ ಸಮಾರಂಭವಾದ ಹೂವು ಮುಡಿಸೋ ಶಾಸ್ತ್ರವು ಅತ್ಯಂತ ಸರಳ ಮತ್ತು ಅದ್ದೂರಿಯಿಲ್ಲದೆ ನೆರವೇರಿತು. ಈ ಸಮಾರಂಭದ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದ್ದು, ಅಭಿಮಾನಿಗಳು ದಿವ್ಯಾ ಮತ್ತು ಹೇಮಂತ್ ಜೋಡಿಗೆ ಶುಭ ಹಾರೈಸುತ್ತಿದ್ದಾರೆ. 

ಸಾಂಪ್ರದಾಯಿಕ ಪದ್ಧತಿಗಳಂತೆ ನಡೆದ ಈ ಕಾರ್ಯಕ್ರಮದಲ್ಲಿ ಆಪ್ತರು ಮತ್ತು ಕುಟುಂಬದವರು ಭಾಗವಹಿಸಿದ್ದರು. ದಿವ್ಯಾ ಅವರು ತಮ್ಮ ಭಾವಿ ಪತಿಯ ಜೊತೆಗಿನ ಮುದ್ದಾದ ಫೋಟೋಗಳನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡು, “ನಮ್ಮ ಬದುಕಿನ ಮುಂದಿನ ಅಧ್ಯಾಯ ಅದಾಗಲೇ ನನಗೆ ಫೇವರಿಟ್ ಆಗಿದೆ” ಎಂದು ಬರೆದುಕೊಂಡಿದ್ದಾರೆ.

ದಿವ್ಯಾ–ಹೇಮಂತ್ ಪ್ರೀತಿಯ ಹಿನ್ನೆಲೆ

ದಿವ್ಯಾ ಗೌಡ ಮತ್ತು ಹೇಮಂತ್ ಕುಮಾರ್ ಅವರ ಪ್ರೀತಿಯ ಹಿನ್ನೆಲೆಯಲ್ಲಿ ಬಿಗ್ ಬಾಸ್ ಶೋ ಪ್ರಮುಖ ಪಾತ್ರವಹಿಸಿದೆ. ಭವ್ಯಾ ಗೌಡ ‘ಬಿಗ್ ಬಾಸ್ ಕನ್ನಡ 11’ ನಲ್ಲಿ ಸ್ಪರ್ಧಿಯಾಗಿದ್ದಾಗ, ದಿವ್ಯಾ ಅವರು ಫ್ಯಾಮಿಲಿ ವೀಕ್‌ಗಾಗಿ ಬಿಗ್ ಬಾಸ್ ಮನೆಗೆ ಭೇಟಿ ನೀಡಿದ್ದರು. ಆ ಸಮಯದಲ್ಲಿ ಅವರು ಸ್ಪರ್ಧಿ ಹನುಮಂತು ಜೊತೆ ‘ಹೇಳು ಬೇ.. ಕೇಳಬೇ..’ ಎಂದು ಕೌಂಟರ್ ನೀಡಿ ಒಂದೇ ದಿನಕ್ಕೆ ಸಖತ್ ಫೇಮಸ್ ಆಗಿದ್ದರು. ಈ ಸಂದರ್ಭದಲ್ಲಿ ಕಾಸ್ಟಿಂಗ್ ಡೈರೆಕ್ಟರ್ ಹೇಮಂತ್ ಮತ್ತು ದಿವ್ಯಾ ನಡುವೆ ಪರಿಚಯವಾಗಿ, ಕ್ರಮೇಣ ಅದು ಪ್ರೀತಿಗೆ ತಿರುಗಿತ್ತು ಎನ್ನಲಾಗಿದೆ. ಹೇಮಂತ್ ಅವರು ಸಾಮಾಜಿಕ ಜಾಲತಾಣದಲ್ಲಿ ದಿವ್ಯಾ ಅವರ ಫೋಟೋವನ್ನು ಹಂಚಿಕೊಂಡು, “ಇವಳೇ… ಅವಳು… ಕನಸಲಿ ಬಂದವಳು..” ಎಂದು ಪೋಸ್ಟ್ ಮಾಡಿದ್ದು, ಇದೀಗ ವೈರಲ್ ಆಗಿದೆ.

ಸಾಮಾಜಿಕ ಜಾಲತಾಣದ ಪ್ರತಿಕ್ರಿಯೆಗಳು

ದಿವ್ಯಾ–ಹೇಮಂತ್ ಮದುವೆ ಸುದ್ದಿಗೆ ಸಾಮಾಜಿಕ ಜಾಲತಾಣಗಳಲ್ಲಿ ಶುಭಾಶಯಗಳ ಮಹಾಪೂರವೇ ಹರಿಯುತ್ತಿದೆ. ಬಿಗ್ ಬಾಸ್ ವಿನ್ನರ್ ಕಾರ್ತಿಕ್ ಮಹೇಶ್ ಅವರು ಹೇಮಂತ್ ಅವರ ಪೋಸ್ಟ್‌ಗೆ “ಅಬ್ಬಬ್ಬಾ… ನಿಮಗೋಸ್ಕರ ರೆಡಿ ಇದ್ದಾರೆ” ಎಂದು ತಮಾಷೆಯಾಗಿ ಕಮೆಂಟ್ ಮಾಡಿದ್ದಾರೆ. ಅಭಿಮಾನಿಗಳು ಮತ್ತು ರಂಗಸ್ಥಳದ ಸ್ನೇಹಿತರು ಸಹ ಈ ಜೋಡಿಗೆ ಶುಭಾಶಯಗಳನ್ನು ಸಲ್ಲಿಸಿದ್ದಾರೆ. ದಿವ್ಯಾ ಅವರು ‘ಬಿಗ್ ಬಾಸ್’ ಫ್ಯಾಮಿಲಿ ವೀಕ್‌ನಲ್ಲಿ ತಮ್ಮ ನೇರ ಮಾತು ಮತ್ತು ವ್ಯಕ್ತಿತ್ವದಿಂದ ಎಲ್ಲರ ಮನ ಗೆದ್ದಿದ್ದರು. ಅಂದಿನಿಂದಲೇ ಅವರಿಗೆ ಸಾಕಷ್ಟು ಅಭಿಮಾನಿಗಳಿದ್ದು, ಅವರ ಮದುವೆ ಸುದ್ದಿ ಕೇಳಿ ಅಭಿಮಾನಿಗಳು ಸಂತಸ ವ್ಯಕ್ತಪಡಿಸಿದ್ದಾರೆ.