2 ಕೋಟಿ ದಾಖಲೆ ಮೊತ್ತಕ್ಕೆ ‘ಅಯೋಗ್ಯ-2’ ಆಡಿಯೋ

ಅಯೋಗ್ಯ ಸೀಕ್ವೆಲ್ ಸಿನಿಮಾದ ಶೂಟಿಂಗ್ ಕಂಪ್ಲೀಟ್ ಆಗಿದ್ದು, ಬೆಳ್ಳಿತೆರೆ ಬೆಳಗೋಕೆ ತುದಿಗಾಲಲ್ಲಿ ನಿಂತಿದೆ ಅಯೋಗ್ಯ-2. ನೀನಾಸಂ ಸತೀಶ್-ರಚಿತಾ ರಾಮ್ ಜೋಡಿ ಮತ್ತೊಮ್ಮೆ ಮೋಡಿ ಮಾಡೋಕೆ ಸಜ್ಜಾಗಿದ್ದು, ಆಡಿಯೋ ರೈಟ್ಸ್ ದಾಖಲೆ ಮೊತ್ತಕ್ಕೆ ಸೋಲ್ಡ್ ಔಟ್ ಆಗಿದೆ. ಅಯೋಗ್ಯ ಚಿತ್ರಕ್ಕಿಂತ 20 ಪಟ್ಟು ಹೆಚ್ಚುವರಿ ಮೊತ್ತಕ್ಕೆ ಅಯೋಗ್ಯ-2 ಆಡಿಯೋ ಹಕ್ಕುಗಳು ಮಾರಾಟವಾಗಿರೋದು ಹೊಸ ಇತಿಹಾಸ.

• 2 ಕೋಟಿ ದಾಖಲೆ ಮೊತ್ತಕ್ಕೆ ‘ಅಯೋಗ್ಯ-2’ ಆಡಿಯೋ
• ಅಯೋಗ್ಯಗಿಂತ 20 ಪಟ್ಟು ಹೆಚ್ಚು ಬೆಲೆಗೆ ರೈಟ್ಸ್ ಮಾರಾಟ
• ರಚಿತಾ-ಸತೀಶ್ ‘ಏನಮ್ಮಿ’ ಜೋಡಿ ಬಹಳ ಜೋರೈತಮ್ಮಿ
• ಮತ್ತೆ ಆನಂದ್ ಆಡಿಯೋ ಮುಡಿಗೆ ಅಯೋಗ್ಯ ಸೀಕ್ವೆಲ್

ಅಯೋಗ್ಯ.. 2018ರಲ್ಲಿ ತೆರೆಕಂಡ ಹಳ್ಳಿ ಸೊಗಡು, ಸೊಬಗಿನ ಚಿತ್ರ. ಅಭಿನಯ ಚತುರ ನೀನಾಸಂ ಸತೀಶ್ ಹಾಗೂ ಸ್ಯಾಂಡಲ್‌‌ವುಡ್‌ನ ಲೇಡಿ ಸೂಪರ್ ಸ್ಟಾರ್ ರಚಿತಾ ರಾಮ್ ಜೋಡಿ ಎಂಟು ವರ್ಷಗಳ ಹಿಂದೆ ದೊಡ್ಡ ಮಟ್ಟಕ್ಕೆ ಮೋಡಿ ಮಾಡಿತ್ತು. ಭಟ್ರ ಗರಡಿಯಲ್ಲಿ ಪಳಗಿದ್ದ ಮಹೇಶ್ ಕುಮಾರ್ ಅನ್ನೋ ಯುವ ಪ್ರತಿಭೆ ಚೊಚ್ಚಲ ನಿರ್ದೇಶನದಲ್ಲೇ ಬಿಗ್ಗೆಸ್ಟ್ ಬೌಂಡರಿ ಬಾರಿಸಿದ್ದರು.

ಅದ್ರಲ್ಲೂ ಅರ್ಜುನ್ ಜನ್ಯ ಮ್ಯೂಸಿಕ್ ಕಂಪೋಸ್ ಮಾಡಿದ್ದ ಏನಮ್ಮಿ ಸಾಂಗ್ ಅಂತೂ 100 ಮಿಲಿಯನ್ ವೀವ್ಸ್ ಪಡೆದ ಮೊದಲ ಕನ್ನಡ ಸಾಂಗ್ ಅನಿಸಿಕೊಂಡಿತ್ತು. ಇಂದಿಗೂ 150 ಮಿಲಿಯನ್ ಅಂದ್ರೆ 15 ಕೋಟಿ ವೀವ್ಸ್ ಮೂಲಕ ಯೂಟ್ಯೂಬ್‌ನಲ್ಲಿ ರಾರಾಜಿಸ್ತಿದೆ ಅಯೋಗ್ಯ ಚಿತ್ರದ ಏನಮ್ಮಿ ಸಾಂಗ್. ಆದ್ರೀಗ ಅಯೋಗ್ಯ-2 ಬೆಳ್ಳಿತೆರೆ ಬೆಳಗುವ ಸಮಯ. ಯೆಸ್.. ಮುನೇಗೌಡ ನಿರ್ಮಾಣದಲ್ಲಿ ಮತ್ತದೇ ರಚ್ಚು-ಸತೀಶ್ ಜೋಡಿಯೊಂದಿಗೆ ಮಹೇಶ್ ಕುಮಾರ್ ಅಯೋಗ್ಯ-2 ತೆರೆಗೆ ತರ್ತಿದ್ದಾರೆ.

ಈ ಬಾರಿಯೂ ಸಹ ಮಂಡ್ಯದ ಸುತ್ತಮುತ್ತ ಶೂಟಿಂಗ್ ನಡೆದಿದ್ದು, ಪಕ್ಕಾ ಹಳ್ಳಿ ಫೀಲ್ ಕೊಡುವ ಟಿಪಿಕಲ್ ನಾಟಿ ಸ್ಟೈಲ್ ಸಿನಿಮಾ ಆಗಲಿದೆ ಅಯೋಗ್ಯ ಪಾರ್ಟ್-2. ಶೂಟಿಂಗ್ ಮುಗಿಸಿ, ಪೋಸ್ಟ್ ಪ್ರೊಡಕ್ಷನ್ ಕೆಲಸ ಕಾರ್ಯಗಳು ಕೂಡ ಬಹುತೇಕ ಕಂಪ್ಲೀಟ್ ಆಗಿದೆ. ಸದ್ಯದಲ್ಲೇ ಚಿತ್ರತಂಡ ಸೆನ್ಸಾರ್ ಪರೀಕ್ಷೆಗೆ ತೆರಳಲಿದ್ದು, ಎಲ್ಲಾ ಅಂದುಕೊಂಡಂತೆ ಆದ್ರೆ ಜೂನ್ ಎಂಡ್‌ಗೆ ಪ್ರೇಕ್ಷಕರ ಮುಂದೆ ಬರುವ ಪ್ಲ್ಯಾನ್‌‌‌ನಲ್ಲಿದೆ.

ಅಯೋಗ್ಯ-2 ಚಿತ್ರದ ಆಡಿಯೋ ರೈಟ್ಸ್ ದಾಖಲೆ ಮೊತ್ತಕ್ಕೆ ಮಾರಾಟವಾಗಿದ್ದು, ಚಿತ್ರತಂಡಕ್ಕೆ ಇದೇ ಬಿಗ್ಗೆಸ್ಟ್ ವಿಕ್ಟರಿ ಆಗಿದೆ. ಹೌದು.. ಆನಂದ್ ಆಡಿಯೋ ಈ ಬಾರಿ ಬರೋಬ್ಬರಿ 2 ಕೋಟಿ ಬೃಹತ್ ಮೊತ್ತ ನೀಡಿ ಅಯೋಗ್ಯ-2 ಚಿತ್ರದ ಮ್ಯೂಸಿಕ್ ಹಕ್ಕುಗಳನ್ನ ಖರೀದಿ ಮಾಡಿದೆ. ಅದೇ ಅರ್ಜುನ್ ಜನ್ಯ ಸಂಗೀತ, ಬಹದ್ದೂರ್ ಚೇತನ್ ಸಾಹಿತ್ಯ ಈ ಆಲ್ಬಮ್‌‌ಗೆ ಇದೆ. ಅಯೋಗ್ಯ-2ನಲ್ಲಿ ಒಟ್ಟು ಐದು ಹಾಡುಗಳಿದ್ದು, ಸದ್ಯದಲ್ಲೇ ಒಂದೊಂದಾಗಿ ರಿಲೀಸ್ ಆಗಲಿವೆಯಂತೆ.

ಅಂದಹಾಗೆ ಅಯೋಗ್ಯ ಚಿತ್ರದ ಆಡಿಯೋ 8 ವರ್ಷಗಳ ಹಿಂದೆ ಕೇವಲ 9 ಲಕ್ಷ ರೂಪಾಯಿಗೆ ಆನಂದ್ ಆಡಿಯೋ ಖರೀದಿಸಿತ್ತು. ಆದ್ರೆ 250 ಮಿಲಿಯನ್‌ಗೂ ಅಧಿಕ ವೀವ್ಸ್‌‌ನಿಂದ ಅಯೋಗ್ಯ ಚಿತ್ರದ ಆಡಿಯೋದಿಂದ ಕೋಟ್ಯಂತರ ರೂಪಾಯಿ ಹಣ ದುಡಿದುಕೊಂಡಿತ್ತು ಆನಂದ್ ಆಡಿಯೋ. ಹಾಗಾಗಿಯೇ ಅಯೋಗ್ಯ-2 ಸಾಂಗ್ಸ್ ನೋಡಿ ಹಾಗೂ ಕೇಳಿ, ತಮ್ಮದೇ ಕಂಪನಿ ಮೂಲಕ ಅದ್ರ ಹಕ್ಕುಗಳನ್ನ ಖರೀದಿಸಿದ್ದಾರೆ ಆನಂದ್ ಆಡಿಯೋ ಶ್ಯಾಮ್. ಅಲ್ಲಿಗೆ ಅಯೋಗ್ಯ ಚಿತ್ರಕ್ಕಿಂತ ಸುಮಾರು 20 ಪಟ್ಟು ಹೆಚ್ಚಿನ ದರಕ್ಕೆ ಅಯೋಗ್ಯ-2 ಆಡಿಯೋ ರೈಟ್ಸ್ ಖರೀದಿಸಿದೆ.

ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್