ಬಿಗ್ ಬಾಸ್ ಕನ್ನಡ ಸೀಸನ್ 12ರ ಮನೆಯಲ್ಲಿ ರಕ್ಷಿತಾ ಶೆಟ್ಟಿ ಮತ್ತು ಗಿಲ್ಲಿ ನಟ ನಡುವಿನ ಬಾಂಡಿಂಗ್ ಈಗ ಚರ್ಚೆಯ ವಿಷಯವಾಗಿದೆ. ಮನೆಯೊಳಗೆ ರಕ್ಷಿತಾ ಅವರು ಗಿಲ್ಲಿ ಅವರ ಹಾಸ್ಯಪ್ರಜ್ಞೆ ಮತ್ತು ಕಿತಾಪತಿ ಸ್ವಭಾವಕ್ಕೆ ಫಿದಾ ಆಗಿದ್ದಾರೆ ಎಂಬ ಚರ್ಚೆ ಜೋರಾಗಿದೆ. ಇತ್ತೀಚಿನ ಎಪಿಸೋಡ್‌ನಲ್ಲಿ ಕಿಚ್ಚ ಸುದೀಪ್ ಅವರು ಈ ವಿಷಯವನ್ನು ನೇರವಾಗಿ ರಕ್ಷಿತಾ ಅವರನ್ನು ನಾಚಿಸಿದ್ದಾರೆ. ಇದರಿಂದ ಗಿಲ್ಲಿ ಅವರಿಗೆ ಸ್ವಲ್ಪ ನಡುಕ ಶುರುವಾಗಿದೆ ಎಂದು ಕಾಣುತ್ತಿದೆ
ಯೆಸ್ ಆರ್ ನೋ ಸೆಷನ್ ವೇಳೆ ಸುದೀಪ್ ಅವರು ರಕ್ಷಿತಾ ಶೆಟ್ಟಿ ಅವರನ್ನು ಉದ್ದೇಶಿಸಿ, “ಕಿತಾಪತಿ ಮಾಡುವ ಹುಡುಗರು ನಿಮಗೆ ತುಂಬಾ ಇಷ್ಟವೇ?” ಎಂದು ಪ್ರಶ್ನಿಸಿದರು. ಈ ಪ್ರಶ್ನೆಗೆ ರಕ್ಷಿತಾ ನಾಚಿಕೊಂಡು ನೀರಾಗಿ ಹೋದರು. ನಂತರ ಅವರು, “ಗಿಲ್ಲಿ ಈ ಮನೆಯಲ್ಲಿ ಹೆಚ್ಚು ಕಿತಾಪತಿ ಮಾಡುತ್ತಾರೆ. ಅವರು ಯಾವಾಗಲೂ ಗಂಭೀರವಾಗಿರುವುದಿಲ್ಲ. ಅದಕ್ಕೆ ಗಿಲ್ಲಿ ನನಗೆ ಇಷ್ಟ” ಎಂದು ಒಪ್ಪಿಕೊಂಡರು. ಇದಲ್ಲದೇ, “ಜಾಸ್ತಿ ಯೋಚಿಸದೇ ಇರುವ, ಸೆನ್ಸ್ ಆಫ್ ಹ್ಯೂಮರ್ ಇರುವವರು ಇಷ್ಟ ಆಗುತ್ತಾರೆ. ಹೀಗಾಗಿ ಗಿಲ್ಲಿ ನನಗೆ ಇಷ್ಟ” ಎಂದು ಮನಸ್ಸಿನ ಮಾತು ಹೊರಹಾಕಿದರು. ಈ ಹಿಂದೆಯೂ ರಕ್ಷಿತಾ “ಗಿಲ್ಲಿ ರೀತಿಯ ಹುಡುಗ ಬೇಕು” ಎಂದು ಹೇಳಿದ್ದರು.
ಈ ಮಾತುಗಳು ಗಿಲ್ಲಿ ಅವರಿಗೆ ತಲುಪಿದ ನಂತರ ಅವರ ಮುಖ ಗಂಭೀರವಾಗಿತ್ತು. “ಜೀವನದಲ್ಲಿ ರಾಂಗ್ ಕನೆಕ್ಷನ್ ಆಗಿದೆ ಎಂದು ಅನಿಸುತ್ತಿದೆ” ಎಂದು ಗಿಲ್ಲಿ ಹೇಳಿದರು. ಸ್ಪಂದನಾ ಅವರು “ಗಿಲ್ಲಿ ಮೊದಲ ಬಾರಿಗೆ ನಗುತ್ತಾ ಇಲ್ಲ” ಎಂದು ಕಾಮೆಂಟ್ ಮಾಡಿದರು. ಗಿಲ್ಲಿ ಅವರು ಭಯದಿಂದ ಕುಳಿತಿದ್ದ ದೃಶ್ಯ ಮನೆಯವರನ್ನು ನಗಿಸಿತ್ತು. “ಬೆಳಿಗ್ಗೆಯಿಂದ ಏಕೋ ಮಿಸ್ ಹೊಡೆಯುತ್ತಿದೆ” ಎಂದು ಗಿಲ್ಲಿ ತಮಾಷೆಯಾಗಿ ಹೇಳಿದರು.
ಬಿಗ್ ಬಾಸ್ ಮನೆಯಲ್ಲಿ ಮೊದಲಿನಿಂದಲೂ ಗಿಲ್ಲಿ ಅವರು ರಕ್ಷಿತಾ ಅವರ ಪರವಾಗಿ ನಿಂತುಕೊಂಡಿದ್ದರು. ಇದಕ್ಕಾಗಿ ಸುದೀಪ್ ಅವರಿಂದ ಚಪ್ಪಾಳೆ ಕೂಡ ಸಿಕ್ಕಿತ್ತು. ಈಗ ಇಬ್ಬರ ನಡುವಿನ ಉತ್ತಮ ಬಾಂಡಿಂಗ್ ಅಭಿಮಾನಿಗಳ ಗಮನ ಸೆಳೆದಿದೆ. ರಕ್ಷಿತಾ ಅವರ ಮಾತುಗಳಿಂದ ಗಿಲ್ಲಿಗೆ ಸೀಕ್ರೆಟ್ ಲವ್ ಭಯ ಶುರುವಾಗಿದೆಯೇ ಎಂಬ ಚರ್ಚೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ.
ಬಿಗ್ ಬಾಸ್ ಮನೆಯಿಂದ ಹೊರಬಂದ ನಂತರವೂ ರಕ್ಷಿತಾ ಮತ್ತು ಗಿಲ್ಲಿ ಅವರ ಬಾಂಡ್ ಮುಂದುವರಿಯುತ್ತದೆಯೇ ಎಂಬುದು ಸದ್ಯದ ಕುತೂಹಲ. ಸೀಸನ್ 12ರಲ್ಲಿ ಇಬ್ಬರ ಕೆಮಿಸ್ಟ್ರಿ ಮನರಂಜನೆ ನೀಡುತ್ತಿದ್ದು, ಅಭಿಮಾನಿಗಳು ಈ ಜೋಡಿಯನ್ನು ಆನಂದಿಸುತ್ತಿದ್ದಾರೆ.
