ಬಿಗ್ ಬಾಸ್ ಕನ್ನಡ ಸೀಸನ್ 12 ಈಗ ತನ್ನ ಅತ್ಯಂತ ಉದ್ವಿಗ್ನ ಹಂತಕ್ಕೆ ಬಂದು ನಿಂತಿದೆ. ಮನೆಯೊಳಗೆ ಸ್ಪರ್ಧಿಗಳೇ ತಾವಾಗಿಯೇ “ನಾನು ಹೊರಗೆ ಹೋಗ್ತೀನಿ” ಎಂದು ಹೇಳಿ ಡ್ರಾಮಾ ಸೃಷ್ಟಿಸುತ್ತಿದ್ದಾರೆ. ಇದೀಗ ಧ್ರುವಂತ್ ಕಿಚ್ಚ ಸುದೀಪ್ ಅವರ ಮುಂದೆಯೇ “ಈ ಶೋನಿಂದ ಹೊರ ಹೋಗ್ತೀನಿ” ಎಂದು ಘೋಷಿಸಿ ಎಲ್ಲರನ್ನೂ ಬೆಚ್ಚಿ ಬೀಳಿಸಿದ್ದಾರೆ.
ನವೆಂಬರ್ 30ರಂದು ಬರುವ ‘ಸೂಪರ್ ಸಂಡೇ ವಿತ್ ಕಿಚ್ಚ ಸುದೀಪ್’ ಸಂಚಿಕೆಯ ಹೊಸ ಪ್ರೋಮೋವನ್ನು ಕಲರ್ಸ್ ಕನ್ನಡ ಬಿಡುಗಡೆ ಮಾಡಿದೆ. ಆ ಪ್ರೋಮೋದಲ್ಲಿ ಧ್ರುವಂತ್ ಅವರ ಆವೇಶ ಮತ್ತು ನಿರಾಶೆ ಸ್ಪಷ್ಟವಾಗಿ ಕಂಡುಬರುತ್ತಿದೆ.
ಕಿಚ್ಚ ಸುದೀಪ್ ಅವರು ಸ್ಪರ್ಧಿಗಳಿಗೆ ಒಂದೊಂದು ಪ್ರಾಣಿ-ಪಕ್ಷಿಯ ಫೋಟೋ ಕೊಟ್ಟು, “ಯಾರಿಗೆ ಯಾವ ಅನಿಮಲ್ ಸೂಟ್ ಆಗುತ್ತದೆ ಎಂದು ನಿಮ್ಮ ಅನಿಸಿಕೆ ನೀಡಿ” ಎಂದು ಹೇಳಿದ್ದರು. ನರಿ, ಕೋಣ, ಚೇಳು, ಪಾರಿವಾಳ, ಕೋತಿ, ಗಿಳಿ ಹೀಗೆ ವಿವಿಧ ಚಿತ್ರಗಳಿದ್ದವು. ಆದರೆ ಧ್ರುವಂತ್ ಅವರಿಗೆ ಬಂದದ್ದು ಹೆಚ್ಚಿಗೆ ‘ನರಿ’ ಮತ್ತು ‘ಪಾರಿವಾಳ’ ಚಿತ್ರಗಳೇ!. ಇದು ಅವರಿಗೆ ತೀವ್ರ ನೋವು ಉಂಟುಮಾಡಿತು.
ಧನುಷ್ ಅವರು ಪಾರಿವಾಳದ ಬೋರ್ಡ್ ನೀಡುತ್ತಾ, “ಇಲ್ಲಿ ಏನಿದೆಯೋ ಅದು ಇನ್ನೊಂದೆಡೆ ಹೋಗುತ್ತದೆ, ಅಲ್ಲಿರುವುದು ಇಲ್ಲಿಗೆ ಬರುತ್ತದೆ” ಎಂದು ಧ್ರುವಂತ್ ಅವರನ್ನು ಗಾಸಿಪ್ ಮಾಡುವವರು ಎಂದು ಹೇಳಿದರು. ಮಾಳು ನಿಪನಾಳ್ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ, “ಒಳ್ಳೆಯ ಮನುಷ್ಯನನ್ನೇ ಹಾಳು ಮಾಡುವುದು ಇವರ ಉದ್ದೇಶ. ತಮ್ಮ ಅನಿಸಿಕೆಯನ್ನು ಹೇಳಿ ಹೇಳಿ ಇನ್ನೊಬ್ಬರ ಮನಸ್ಸು ಕೆಡಿಸುತ್ತಾರೆ” ಎಂದು ನೇರವಾಗಿ ಆರೋಪ ಮಾಡಿದರು. ಇದರಿಂದ ಧ್ರುವಂತ್ ಮನಸ್ಸು ನೊಂದುಹೋಯಿತು.
ನಿಯಮದಂತೆ ಯಾರಿಗೆ ಯಾವ ಬೋರ್ಡ್ ಕೊಟ್ಟರೂ ಅದನ್ನು ಕುತ್ತಿಗೆಗೆ ಹಾಕಿಕೊಂಡು ಧರಿಸಬೇಕಿತ್ತು. ಆದರೆ ಧ್ರುವಂತ್ ಅವರು ಎಲ್ಲ ಬೋರ್ಡ್ಗಳನ್ನೂ ಕೈಯಲ್ಲೇ ಹಿಡಿದುಕೊಂಡು ನಿಂತಿದ್ದರು. ಇದನ್ನು ಗಮನಿಸಿದ ಕಿಚ್ಚ ಸುದೀಪ್, “ಧ್ರುವ, ಕುತ್ತಿಗೆಗೆ ಹಾಕಿಕೊಳ್ಳಿ” ಎಂದು ಹೇಳಿದರು.
ಅಷ್ಟರಲ್ಲಿ ಧ್ರುವಂತ್ ಒಳಗಿನ ಅಗ್ನಿ ಹೊರಬಂದಿತು. “I would rather leave the show than wear this around my neck” (ಇದನ್ನು ಕುತ್ತಿಗೆಗೆ ಹಾಕಿಕೊಂಡು ಇರುವುದಕ್ಕಿಂತ ಈ ಶೋನಿಂದ ಹೊರಗೆ ಹೋಗುವುದೇ ಒಳ್ಳೆಯದು) ಎಂದು ದೃಢವಾಗಿ ಹೇಳಿದರು. ಸ್ಟುಡಿಯೋದಲ್ಲಿ ಮೂರು ಸೆಕೆಂಡು ನಿಶ್ಶಬ್ದದಿಂದ ಕೂಡಿತ್ತು.
ಇಂದು (ನವೆಂಬರ್ 30) ಸಂಜೆಯ ಸೂಪರ್ ಸಂಡೇ ಸಂಚಿಕೆಯಲ್ಲಿ ಕಿಚ್ಚ ಸುದೀಪ್ ಅವರು ಧ್ರುವಂತ್ಗೆ ಏನು ಉತ್ತರ ಕೊಡುತ್ತಾರೆ? ಧ್ರುವಂತ್ ನಿಜವಾಗೂ ಮನೆ ಬಿಟ್ಟು ಹೊರಕ್ಕೆ ಬರುತ್ತಾರಾ? ಅಥವಾ ಈ ವಾರದ ಎಲಿಮಿನೇಷನ್ನಲ್ಲಿ ಅವರೇ ಹೊರಹೋಗುತ್ತಾರಾ? ಎಲ್ಲ ಪ್ರಶ್ನೆಗಳಿಗೆ ಉತ್ತರ ಸಿಗಲಿದೆ.
