ಬೆಂಗಳೂರು: ಬಿಗ್ ಬಾಸ್ ಕನ್ನಡ ಸೀಸನ್ 12ರ ಫ್ಯಾಮಿಲಿ ವೀಕ್ ಆರಂಭವಾಗಿದೆ. ಬಿಗ್ ಬಾಸ್ ಮನೆಯ ಬಿಗುವಿನ ವಾತಾವರಣವನ್ನು ತಿಳಿಗೊಳಿಸಲು ಸ್ಪರ್ಧಿಗಳ ಕುಟುಂಬಸ್ಥರು ಒಬ್ಬೊಬ್ಬರಾಗಿ ಎಂಟ್ರಿ ಕೊಡುತ್ತಿದ್ದಾರೆ. ಇಂದಿನ ಸಂಚಿಕೆಯಲ್ಲಿ ರಕ್ಷಿತಾ ಶೆಟ್ಟಿ ಅವರ ತಾಯಿ ಬಿಗ್ ಮನೆಗೆ ಆಗಮಿಸುವ ಮೂಲಕ ಮನೆಗೆ ಹೊಸ ಮೆರುಗು ತಂದಿದ್ದಾರೆ.
ವಾಹಿನಿ ಬಿಡುಗಡೆ ಮಾಡಿರುವ ಹೊಸ ಪ್ರೋಮೋದಲ್ಲಿ, ರಕ್ಷಿತಾ ಅವರ ತಾಯಿ ಮನೆಯ ಒಳಗೆ ಪ್ರವೇಶಿಸುತ್ತಿದ್ದಂತೆ ಬಿಗ್ ಬಾಸ್ ಎಲ್ಲರಿಗೂ ‘Pause’ ಆಗಲು ಸೂಚಿಸುತ್ತಾರೆ. ತನ್ನ ತಾಯಿಯನ್ನು ನೋಡಿದ ತಕ್ಷಣ ರಕ್ಷಿತಾ ಅಕ್ಷರಶಃ ಭಾವುಕರಾಗುತ್ತಾರೆ. ಬಿಗ್ ಬಾಸ್ ‘Release’ ಎನ್ನುತ್ತಿದ್ದಂತೆ ಓಡಿ ಹೋಗಿ ತಾಯಿಯನ್ನು ಬಿಗಿದಪ್ಪಿಕೊಂಡು ಕಣ್ಣೀರು ಹಾಕುತ್ತಾರೆ. ಕಳೆದ ಹಲವು ವಾರಗಳಿಂದ ಮನೆಯವರಿಂದ ದೂರವಿದ್ದ ರಕ್ಷಿತಾ ಅವರಿಗೆ ತಾಯಿಯ ಭೇಟಿ ಹೊಸ ಚೈತನ್ಯ ನೀಡಿದೆ.
ಮನೆಗೆ ಬಂದ ರಕ್ಷಿತಾ ತಾಯಿ, ಮಗಳಿಗೆ ಪ್ರೀತಿಯಿಂದ ತಲೆ ಬಾಚುತ್ತಾ ಕೆಲವು ಖಡಕ್ ಬುದ್ಧಿಮಾತುಗಳನ್ನು ಹೇಳಿದ್ದಾರೆ. ಯಾರ ಜೊತೆಗೂ ಜಗಳ ಮಾಡಬೇಡ, ನಿನಗೆ ಯಾರೂ ಏನೂ ಹೇಳಬಾರದು. ನೀನು ತುಂಬಾ ಜಗಳಗಂಟಿ ಆಗಿದ್ದೀಯಾ ಎಂದು ತಮಾಷೆಯಾಗಿ ಮಗಳ ಕಾಲೆಳೆದಿದ್ದಾರೆ. ಮನೆಯವರನ್ನು ಕಂಡರೆ ರಕ್ಷಿತಾ ಎಷ್ಟೇ ಸಿಟ್ಟಾಗುತ್ತಿದ್ದರೂ, ಅಮ್ಮನ ಮುಂದೆ ಮೌನಿಯಾಗಿ ಬುದ್ಧಿಮಾತು ಕೇಳಿಸಿಕೊಂಡಿದ್ದಾರೆ.
ರಕ್ಷಿತಾ ಮತ್ತು ಧ್ರುವಂತ ನಡುವೆ ಮನೆಯೊಳಗೆ ಹಲವು ಬಾರಿ ವೈಮನಸ್ಸು ಮತ್ತು ಜಗಳಗಳು ನಡೆದಿದ್ದವು. ಈ ಹಿನ್ನೆಲೆಯಲ್ಲಿ, ರಕ್ಷಿತಾ ಅಮ್ಮನನ್ನು ನೋಡಿದ ಧ್ರುವಂತ ನೇರವಾಗಿ ಹೋಗಿ ಅವರ ಕಾಲಿಗೆ ಬಿದ್ದು ಕ್ಷಮೆ ಕೇಳಿದ್ದಾರೆ. ಏನಾದರೂ ತಪ್ಪಾಗಿದ್ದರೆ ಕ್ಷಮಿಸಿ ಎಂದು ಧ್ರವಂತ್ ಮನವಿ ಮನವಿ ಮಾಡುತ್ತಾನೆ.
ಇದೇ ವೇಳೆ ರಕ್ಷಿತಾ ಅವರಿಗೆ ಬಿಗ್ ಬಾಸ್ ವಿಶೇಷ ಟಾಸ್ಕ್ ಒಂದನ್ನು ನೀಡಿದ್ದಾರೆ. ಸ್ಟೋರ್ ರೂಂನಲ್ಲಿ ಮೀನು ಮತ್ತು ಕ್ಯಾಮೆರಾವನ್ನು ಕಳುಹಿಸಿ ವ್ಲಾಗಿಂಗ್ ಮಾಡಲು ಸೂಚಿಸಿದ್ದಾರೆ. ರಕ್ಷಿತಾ ತನ್ನ ಎಂದಿನ ವ್ಲಾಗರ್ ಶೈಲಿಯಲ್ಲಿ ಹಾಯ್ ಗಾಯ್ಸ್ ಎಂದು ಶುರು ಮಾಡಿ, ಅಮ್ಮನ ಸಮ್ಮುಖದಲ್ಲೇ ಮೀನು ಮಸಾಲೆಯನ್ನು ರೆಡಿ ಮಾಡಿ ಫಿಶ್ ಫ್ರೈ ರೆಸಿಪಿಯನ್ನು ಇತರ ಸ್ಪರ್ಧಿಗಳಿಗೆ ಮತ್ತು ವೀಕ್ಷಕರಿಗೆ ವಿವರಿಸಿದ್ದಾರೆ.
ಫ್ಯಾಮಿಲಿ ವೀಕ್ ಇರುವುದರಿಂದ ಮನೆಯಲ್ಲಿ ಸದ್ಯಕ್ಕೆ ಜಗಳಗಳು ಬದಿಗೆ ಸರಿದು, ಸಧ್ಯ ಎಲ್ಲರ ಮುಖದಲ್ಲು ಸಂತಸ ವ್ಯಕ್ತವಾಗಿದೆ.
