ಬೆಂಗಳೂರು, ಏಪ್ರಿಲ್ 6: ಮಧ್ಯಪ್ರಾಚ್ಯದಲ್ಲಿ ಇರಾನ್-ಇಸ್ರೇಲ್-ಅಮೆರಿಕ ಸಂಘರ್ಷದಿಂದಾಗಿ ಕಚ್ಚಾ ತೈಲ ಪೂರೈಕೆ ಸರಪಳಿ ಅಸ್ತವ್ಯಸ್ತಗೊಂಡಿದೆ. ಇದರ ನೇರ ಪರಿಣಾಮ ಬೆಂಗಳೂರು ನಗರದ ಆಟೋ ಮತ್ತು ಸಿಎನ್ಜಿ ಕಾರು ಚಾಲಕರ ಬದುಕಿನ ಮೇಲೆ ಬಿದ್ದಿದೆ. ಕರ್ನಾಟಕದಲ್ಲಿ ಖಾಸಗಿ ಕಂಪನಿಗಳು ನಡೆಸುತ್ತಿದ್ದ 300 ಕ್ಕೂ ಹೆಚ್ಚು ಗ್ಯಾಸ್ ಪಂಪ್ಗಳ ಪೈಕಿ ಶೇಕಡ 80ರಷ್ಟು (ಸುಮಾರು 240 ಪಂಪ್ಗಳು) ಬಾಗಿಲು ಹಾಕಿವೆ. ಪರಿಣಾಮ, ನಗರದಾದ್ಯಂತ ಆಟೋ ಮತ್ತು ಸಿಎನ್ಜಿ ವಾಹನಗಳ ಸರತಿ ಸಾಲುಗಳು ಕಿಲೋಮೀಟರ್ಗಳವರೆಗೆ ನಿಂತಿವೆ.
LPG ಕೊರತೆ: ಕಾರಣವೇನು?
ಹಾರ್ಮುಜ್ ಜಲಸಂಧಿ ಮುಚ್ಚಲಾಗಿದ್ದು, ಜಾಗತಿಕ ಎಲ್ಪಿಜಿ (ಆಟೋ ಗ್ಯಾಸ್) ಪೂರೈಕೆಗೆ ತೀವ್ರ ಏಟು ಬಿದ್ದಿದೆ. ಅಮೆರಿಕ ಮತ್ತು ಇಸ್ರೇಲ್ ನಿರ್ಬಂಧಗಳನ್ನು ಬಿಗಿಗೊಳಿಸಿದ್ದು, ಗಲ್ಫ್ ರಾಷ್ಟ್ರಗಳಿಂದ ಭಾರತಕ್ಕೆ ಸಾಗಣೆ ನಿಧಾನಗೊಂಡಿದೆ. ಬೆಂಗಳೂರಿಗೆ ಪ್ರತಿದಿನ ಬೇಕಾಗುವ ಎಲ್ಪಿಜಿಯ ಸರಿಸುಮಾರು ಅರ್ಧದಷ್ಟು ಪ್ರಮಾಣ ಮಾತ್ರ ಸರಬರಾಜಾಗುತ್ತಿದೆ. ತೈಲ ಮಾರುಕಟ್ಟೆ ಕಂಪನಿಗಳು (OMC ಗಳು) ಮೊದಲು ತಮ್ಮ ಸ್ವಂತ ಬಂಕ್ಗಳಿಗೆ ಆದ್ಯತೆ ನೀಡುತ್ತಿರುವುದರಿಂದ, ಖಾಸಗಿ ಪಂಪ್ಗಳು ಖಾಲಿಯಾಗುತ್ತಿವೆ.
ಕರ್ನಾಟಕದ ಗ್ಯಾಸ್ ಪಂಪ್ಗಳ ಸ್ಥಿತಿ
ಕರ್ನಾಟಕದಲ್ಲಿ ತೈಲ ಮಾರುಕಟ್ಟೆ ಕಂಪನಿಗಳು (IOCL, BPCL, HPCL) ಸೇರಿ ಒಟ್ಟು 72 ಗ್ಯಾಸ್ ಬಂಕ್ಗಳನ್ನು ನಡೆಸುತ್ತಿವೆ. ಇವುಗಳಲ್ಲಿ IOCL (ಇಂಡಿಯನ್ ಆಯಿಲ್) 55 ಕೇಂದ್ರಗಳನ್ನು ಹೊಂದಿದೆ. ಈ ಕಂಪನಿಗಳ ಬಂಕ್ಗಳಲ್ಲಿ ಸೀಮಿತ ಪ್ರಮಾಣದಲ್ಲಿ ಗ್ಯಾಸ್ ಲಭ್ಯವಿದೆ. ಆದರೆ ನಗರದಾದ್ಯಂತ 300 ಕ್ಕೂ ಹೆಚ್ಚು ಖಾಸಗಿ ಬಂಕ್ಗಳು ಕಾರ್ಯನಿರ್ವಹಿಸುತ್ತಿದ್ದವು. ಅವುಗಳಲ್ಲಿ ಶೇ.80ರಷ್ಟು ಈಗ ಮುಚ್ಚಿದ್ದು, ಉಳಿದ 20% ಕೂಡ “ನೋ ಸ್ಟಾಕ್” ಫಲಕ ಹೊತ್ತಿವೆ.
ಚಾಲಕರ ಪರದಾಟ ಮುಂದುವರಿದಿದೆ
ಬಸವೇಶ್ವರ ನಗರ, ಶೇಷಾದ್ರಿಪುರ, ಮೈಸೂರು ರಸ್ತೆ, ಕೆಂಗೇರಿ, ಜಯನಗರ, ಕೆ.ಆರ್ ಪುರಂ ಸೇರಿದಂತೆ ನಗರದ ಬಹುತೇಕ ಗ್ಯಾಸ್ ಬಂಕ್ಗಳ ಎದುರು ನೂರಾರು ಆಟೋಗಳು ಮತ್ತು ಸಿಎನ್ಜಿ ಚಾಲಿತ ಕಾರುಗಳು ಸರತಿ ಸಾಲಿನಲ್ಲಿ ಕಾಣಿಸುತ್ತಿವೆ. ಚಾಲಕರು ಎರಡು-ಮೂರು ಗಂಟೆಗಳ ಕಾಲ ಕಾಯಬೇಕಾಗುತ್ತಿದೆ. ಕೆಲವರು 10-12 ಕಿಲೋಮೀಟರ್ ದೂರದವರೆಗೆ ಅಲೆಯಬೇಕಾಗಿದೆ..
ಬೆಲೆ ವ್ಯತ್ಯಾಸ ಮತ್ತು ದಟ್ಟಣೆ
IOCL ನಂತಹ ಸರ್ಕಾರಿ ಬಂಕ್ಗಳಲ್ಲಿ ಆಟೋ ಗ್ಯಾಸ್ ದರ ₹89.52 ಪ್ರತಿ ಲೀಟರ್ ಆಗಿದೆ. ಆದರೆ ಖಾಸಗಿ ಬಂಕ್ಗಳು ಕೊರತೆಯನ್ನು ಬಂಡವಾಳ ಮಾಡಿಕೊಂಡು ₹99 ರಿಂದ ₹105 ವರೆಗೆ ದರ ನಿಗದಿಪಡಿಸಿವೆ. ಕಡಿಮೆ ದರದ IOCL ಬಂಕ್ಗಳಲ್ಲಿ ದಟ್ಟಣೆ ಅತಿಯಾಗಿದ್ದರೆ, ಹೆಚ್ಚಿನ ದರದ ಖಾಸಗಿ ಬಂಕ್ಗಳಲ್ಲೂ ಸಾಕಷ್ಟು ಸ್ಟಾಕ್ ಇಲ್ಲ.
ಸರ್ಕಾರಿ ಬಂಕ್ಗಳಲ್ಲಿ ಸ್ಟಾಕ್ ಕೂಡ ಒಂದು ವಾರದಲ್ಲಿ ಖಾಲಿಯಾಗುವ ಸಾಧ್ಯತೆ ಇದೆ. ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳಂತೆ ಆಟೋ ಗ್ಯಾಸ್ ಬೆಲೆಯೂ ಶೀಘ್ರದಲ್ಲೇ ಏರುವ ನಿರೀಕ್ಷೆಯಿದೆ. ಚಾಲಕರು ತಮ್ಮ ದೈನಂದಿನ ಪ್ರಯಾಣವನ್ನು ಸಾಧ್ಯವಾದಷ್ಟು ಕಡಿಮೆ ಮಾಡಿಕೊಳ್ಳುವಂತೆ ಸಲಹೆ ನೀಡಲಾಗಿದೆ.
