ಬಾತುಕೋಳಿ ಹೊಟ್ಟೆಯಲ್ಲಿ ಸಿಕ್ಕಿತು ಲಕ್ಷಾಂತರ ರೂಪಾಯಿ ಮೌಲ್ಯದ ಚಿನ್ನ!

ಬೀಜಿಂಗ್: ಬಾತುಕೋಳಿ ಚಿನ್ನದ ಮೊಟ್ಟೆ ಇಟ್ಟ ಕಥೆಯನ್ನು ನಾವು ಕೇಳಿದ್ದೇವೆ. ಆದರೆ ಚೀನಾದಲ್ಲಿ ಬಾತುಕೋಳಿಯೊಂದು ತನ್ನ ಹೊಟ್ಟೆಯಲ್ಲೇ ಅಪ್ಪಟ ಚಿನ್ನವನ್ನು ಇಟ್ಟುಕೊಂಡು ಮಾಲೀಕನಿಗೆ ಬಂಪರ್ ಲಾಟರಿ ಹೊಡೆಸಿದೆ. ಚೀನಾದ ಹುನಾನ್ ಪ್ರಾಂತ್ಯದ ಗ್ರಾಮವೊಂದರಲ್ಲಿ ನಡೆದ ಈ ಅಚ್ಚರಿಯ ಘಟನೆ ಈಗ ಜಾಗತಿಕ ಮಟ್ಟದಲ್ಲಿ ಸುದ್ದಿಯಾಗುತ್ತಿದೆ.

ಏನಿದು ಘಟನೆ ?

ಮಧ್ಯ ಚೀನಾದ ಲಾಂಗ್‌ಹುಯಿ ಕೌಂಟಿಯ ಲಿಯು ಎಂಬ ಹೆಸರಿನ ಗ್ರಾಮಸ್ಥರೊಬ್ಬರು ಹಬ್ಬದ ತಯಾರಿಗಾಗಿ ತಮ್ಮ ಮನೆಯಲ್ಲಿದ್ದ ಬಾತುಕೋಳಿಯನ್ನು ಕತ್ತರಿ, ಆಡುಗೆ ತಯಾರಿಸಲು ಸಿದ್ಧತೆ ನಡೆಸಿದ್ದರು. ಅದರಂತೆ ಬಾತುಕೋಳಿಯನ್ನು ಕತ್ತರಿಸಿ ಅದರ ಹೊಟ್ಟೆಯನ್ನು ಸ್ವಚ್ಛಗೊಳಿಸುವಾಗ ಲಿಯು ಅವರಿಗೆ ಮಣ್ಣಿನ ನಡುವೆ ಹೊಳೆಯುವ ಸಣ್ಣ ಹಳದಿ ಕಣಗಳು ಕಂಡುಬಂದವು. ಕುತೂಹಲದಿಂದ ಅವುಗಳನ್ನು ಸಂಗ್ರಹಿಸಿ ಪರೀಕ್ಷಿಸಿದಾಗ ಅವು ಸಾಮಾನ್ಯ ಕಲ್ಲುಗಳಲ್ಲ, ಬದಲಿಗೆ ಅಪ್ಪಟ ಚಿನ್ನದ ಕಣಗಳು ಎಂಬುದು ದೃಢಪಟ್ಟಿದೆ.

ಚಿನ್ನದ ಮೌಲ್ಯ ಎಷ್ಟು?

ವರದಿಗಳ ಪ್ರಕಾರ, ಬಾತುಕೋಳಿಯ ಹೊಟ್ಟೆಯಲ್ಲಿ ಸರಿಸುಮಾರು 10 ಗ್ರಾಂ ತೂಕದ ಚಿನ್ನದ ಕಣಗಳು ಪತ್ತೆಯಾಗಿವೆ. ಇವುಗಳ ಇಂದಿನ ಮಾರುಕಟ್ಟೆ ಮೌಲ್ಯ ಸುಮಾರು 12,000 ಯುವಾನ್, ಅಂದರೆ ಭಾರತೀಯ ರೂಪಾಯಿಗಳಲ್ಲಿ ಸುಮಾರು 1,65,821 ರೂ. ಲಿಯು ಅವರ ಕುಟುಂಬದ ಪಾಲಿಗೆ ಇದೊಂದು ಅನಿರೀಕ್ಷಿತ ಅದೃಷ್ಟದ ಮಳೆಯೇ ಸರಿ. ಅವರ ತಂದೆ ಈ ಆವಿಷ್ಕಾರವನ್ನು ಮುಂಬರುವ ವರ್ಷದ ಶುಭ ಸಂಕೇತ ಎಂದು ಸಂಭ್ರಮಿಸಿದ್ದಾರೆ.

ಲಿಯು ವಾಸಿಸುವ ಗ್ರಾಮದ ಸಮೀಪದಲ್ಲೇ ಚೆನ್ಶುಯಿ ಎಂಬ ನದಿ ಹರಿಯುತ್ತದೆ. ಈ ನದಿಯು 1970 ರಿಂದ 1990 ರವರೆಗೆ ಚಿನ್ನದ ನಿಕ್ಷೇಪಗಳಿಗೆ ಹೆಸರುವಾಸಿಯಾಗಿತ್ತು. ಲಿಯು ಸಾಕುಪ್ರಾಣಿಗಳನ್ನು ಹೊರಾಂಗಣದಲ್ಲೇ ಬಿಡುತ್ತಿದ್ದರು. ಈ ಬಾತುಕೋಳಿಗಳು ನದಿಯ ದಡಕ್ಕೆ ಹೋಗಿ ಆಹಾರಕ್ಕಾಗಿ ಮಣ್ಣನ್ನು ಕೆದಕುವಾಗ, ಮಣ್ಣಿನಲ್ಲಿದ್ದ ಸಣ್ಣ ಚಿನ್ನದ ಕಣಗಳನ್ನು ಆಹಾರದೊಂದಿಗೆ ನುಂಗಿರಬಹುದು ಎಂದು ಅಂದಾಜಿಸಲಾಗಿದೆ.

ವಿಜ್ಞಾನಿಗಳ ಪ್ರಕಾರ, ಪ್ರಾಣಿಗಳ ಜೀರ್ಣಾಂಗ ವ್ಯವಸ್ಥೆಯು ಚಿನ್ನವನ್ನು ಜೀರ್ಣಿಸಿಕೊಳ್ಳಲು ಸಾಧ್ಯವಿಲ್ಲ. ಹೀಗಾಗಿ, ಅದು ವರ್ಷಗಳ ಕಾಲ ಬಾತುಕೋಳಿಯ ಹೊಟ್ಟೆಯಲ್ಲೇ ಉಳಿದುಕೊಂಡಿದೆ.

ಈ ಘಟನೆಯು ಚೀನಾದ ಇತಿಹಾಸದಲ್ಲಿ ಪ್ರಸಿದ್ಧವಾದ ಟ್ಯಾಂಗ್ ರಾಜವಂಶದ (ಕ್ರಿ.ಶ. 618-907) ಕಾಲದ ಪದ್ಧತಿಯೊಂದನ್ನು ನೆನಪಿಸಿದೆ. ಆ ಕಾಲದಲ್ಲಿ ರೈತರು ನದಿ ತೀರದ ಚಿನ್ನ ಮಿಶ್ರಿತ ಮಣ್ಣನ್ನು ನುಂಗಿದ ಬಾತುಕೋಳಿ ಮತ್ತು ಹೆಬ್ಬಾತುಗಳ ಹಿಕ್ಕೆಗಳನ್ನು (ಲದ್ದಿ) ಸಂಗ್ರಹಿಸಿ, ಅದರಿಂದ ಚಿನ್ನದ ಕಣಗಳನ್ನು ಬೇರ್ಪಡಿಸುತ್ತಿದ್ದ ಹಿಂದಿನ ಕತೆ ಇದೆ.

ಕಾನೂನು ಕ್ರಮವೇನು ?

ಚೀನಾದ ಕಾನೂನಿನ ಪ್ರಕಾರ, ಭೂಮಿಯ ಅಡಿಯಲ್ಲಿ ಸಿಗುವ ಖನಿಜ ಸಂಪತ್ತು ಸರ್ಕಾರದ ಆಸ್ತಿಯಾಗಿರುತ್ತದೆ. ಆದರೆ, ಬಾತುಕೋಳಿಯ ಹೊಟ್ಟೆಯಲ್ಲಿ ಸಿಕ್ಕ ಚಿನ್ನವು ಯಾರಿಗೆ ಸೇರಬೇಕು ಎಂಬ ಗೊಂದಲ ಅಧಿಕಾರಿಗಳಲ್ಲಿದೆ. ಈ ಬಗ್ಗೆ ನೈಸರ್ಗಿಕ ಸಂಪನ್ಮೂಲ ಬ್ಯೂರೋ ತನಿಖೆ ನಡೆಸುತ್ತಿದ್ದು, ಈ ಪ್ರದೇಶದಲ್ಲಿ ಇಂದಿಗೂ ಸಣ್ಣ ಪ್ರಮಾಣದ ಚಿನ್ನದ ನಿಕ್ಷೇಪಗಳು ಇರುವ ಸಾಧ್ಯತೆಯನ್ನು ಅವರು ಖಚಿತಪಡಿಸಿದ್ದಾರೆ.