ಕಂಕಣ ಸೂರ್ಯಗ್ರಹಣದ ಅದ್ಭುತ: ಹಗಲಿನಲ್ಲೇ ಆವರಿಸಿದ ಕತ್ತಲ ದೃಶ್ಯ ಸೆರೆಹಿಡಿದ ಸ್ಯಾಟಲೈಟ್

2026ರ ಮೊದಲ ಖಗೋಳ ವಿಸ್ಮಯ ‘ಕಂಕಣ ಸೂರ್ಯಗ್ರಹಣ’ ಫೆಬ್ರವರಿ 17ರಂದು ಜರುಗಿದೆ. ಸೂರ್ಯನ ಮಧ್ಯಭಾಗವನ್ನು ಚಂದ್ರನು ಮುಚ್ಚಿದಾಗ ಸೃಷ್ಟಿಯಾದ ‘ಬೆಂಕಿಯ ಉಂಗುರ’ (Ring of Fire) ಜಗತ್ತಿನ ವಿಜ್ಞಾನಿಗಳು ಮತ್ತು ಆಕಾಶ ಪ್ರಿಯರ ಗಮನ ಸೆಳೆದಿದೆ. ಈ ಅಪರೂಪದ ವಿದ್ಯಮಾನದ ವೇಳೆ ಭೂಮಿಯ ಮೇಲೆ ಚಂದ್ರನ ನೆರಳು ಹಾದುಹೋದ ಅದ್ಭುತ ದೃಶ್ಯವನ್ನು ಸ್ಯಾಟಲೈಟ್ ಸೆರೆಹಿಡಿದಿದೆ.

59 ನಿಮಿಷಗಳ ಕಾಲ ಭೂಮಿ ಮೇಲೆ ಕತ್ತಲ ಸಂಚಾರ

ದಕ್ಷಿಣ ಕೊರಿಯಾದ GEO-KOMPSAT-2A ಎಂಬ ಹವಾಮಾನ ಉಪಗ್ರಹವು ಈ ಕಂಕಣ ಸೂರ್ಯಗ್ರಹಣದ ವಿಸ್ಮಯಕಾರಿ ವಿಡಿಯೋವನ್ನು ಬಿಡುಗಡೆ ಮಾಡಿದೆ. ಸೂರ್ಯನ ಬೆಳಕಿನಲ್ಲಿ ಬಿಳಿಯಾಗಿ ಹೊಳೆಯುತ್ತಿದ್ದ ಅಂಟಾರ್ಕ್ಟಿಕಾ ಖಂಡದ ಮೇಲೆ ಚಂದ್ರನ ದಟ್ಟ ನೆರಳು ಸುಮಾರು 59 ನಿಮಿಷಗಳ ಕಾಲ ವೇಗವಾಗಿ ಚಲಿಸಿತು. ಈ ಸಮಯದಲ್ಲಿ ಅಂಟಾರ್ಕ್ಟಿಕಾದಲ್ಲಿ ಹಗಲಿನ ಹೊತ್ತೇ ಸಂಪೂರ್ಣ ಕತ್ತಲು ಆವರಿಸಿತ್ತು. ಸ್ಯಾಟಲೈಟ್ ಕ್ಯಾಮೆರಾದಲ್ಲಿ ಸೆರೆಯಾಗಿರುವ ಈ ದೃಶ್ಯದಲ್ಲಿ ಬಿಳಿ ಹಿಮದ ಮೇಲೆ ಕಪ್ಪು ನೆರಳು ಹಾದುಹೋಗುವ ದೃಶ್ಯ ಆಕರ್ಷಕವಾಗಿ ಕಾಣುತ್ತಿದೆ.

You’ll want to see this without a shadow of a doubt!

South Korea’s GEO-KOMPSAT-2A geostationary satellite caught the #AnnularEclipse that passed over Antarctica this morning. 🌔 In this animation, you can see the moon’s dark shadow quickly passing across the bottom left of the… pic.twitter.com/rAOU6gHyQ1

— NOAA Satellites (@NOAASatellites) February 17, 2026

ಭಾರತದಲ್ಲಿ ಗೋಚರಿಸದ ‘ರಿಂಗ್ ಆಫ್ ಫೈರ್’

ಈ ಬಾರಿಯ ಕಂಕಣ ಸೂರ್ಯಗ್ರಹಣವು ಭಾರತ ಸೇರಿದಂತೆ ಸಂಪೂರ್ಣ ಏಷ್ಯಾ ಖಂಡದಲ್ಲಿ ಗೋಚರಿಸಲಿಲ್ಲ. ಕಂಕಣದ ಪೂರ್ಣ ಸ್ವರೂಪವು ಕೇವಲ ಅಂಟಾರ್ಕ್ಟಿಕಾದಲ್ಲಿ ಮಾತ್ರ ಸ್ಪಷ್ಟವಾಗಿ ಕಂಡುಬಂದಿದೆ. ಇನ್ನುಳಿದಂತೆ ದಕ್ಷಿಣ ಆಫ್ರಿಕಾ ಮತ್ತು ದಕ್ಷಿಣ ಅಮೆರಿಕದ ದಕ್ಷಿಣದ ತುದಿಗಳಲ್ಲಿ ಭಾಗಶಃ ಸೂರ್ಯಗ್ರಹಣ ಗೋಚರಿಸಿತು. ಚಂದ್ರನು ಸೂರ್ಯನ ಅತಿ ಹತ್ತಿರದಲ್ಲಿರದ ಕಾರಣ, ಸೂರ್ಯನ ಅಂಚುಗಳು ಚಿನ್ನದ ಉಂಗುರದಂತೆ ಹೊಳೆಯುತ್ತಿದ್ದವು.

ಸೂರ್ಯಗ್ರಹಣ ಮುಕ್ತಾಯವಾದ ಬೆನ್ನಲ್ಲೇ ಇದೀಗ ಮತ್ತೊಂದು ಖಗೋಳ ಕೌತುಕಕ್ಕೆ ವಿಜ್ಞಾನಿಗಳು ಸಜ್ಜಾಗಿದ್ದಾರೆ. ಮುಂದಿನ ತಿಂಗಳು, ಅಂದರೆ ಮಾರ್ಚ್ 3ರಂದು ಪೂರ್ಣ ಚಂದ್ರಗ್ರಹಣ ಸಂಭವಿಸಲಿದೆ. ಈ ದಿನ ಚಂದ್ರನು ಕೆಂಪು ಬಣ್ಣದಲ್ಲಿ ಕಂಗೊಳಿಸುವುದರಿಂದ ಇದನ್ನು ‘ಬ್ಲಡ್ ಮೂನ್’ (Blood Moon) ಎಂದು ಕರೆಯಲಾಗುತ್ತದೆ. ಫೆಬ್ರವರಿಯ ಸೂರ್ಯಗ್ರಹಣ ಮಿಸ್ ಮಾಡಿಕೊಂಡವರಿಗೆ ಮಾರ್ಚ್‌ನ ಚಂದ್ರಗ್ರಹಣವು ಕಣ್ಣಿಗೆ ಹಬ್ಬವಾಗಲಿದೆ.