ಬೀಜಿಂಗ್: ಭ್ರಷ್ಟಾಚಾರದ ವಿರುದ್ಧ ಚೀನಾ ವಿಶ್ವದಲ್ಲೇ ಅತ್ಯಂತ ಕಠಿಣ ಶೂನ್ಯ ಸಹಿಷ್ಣುತಾ ನೀತಿ (Zero Tolerance Policy) ಹೊಂದಿದೆ ಎಂಬ ಮಾತಿದೆ. ಆದರೆ, ಇತ್ತೀಚೆಗೆ ಬೆಳಕಿಗೆ ಬಂದಿರುವ ಒಂದು ಪ್ರಕರಣ ಈ ಮಾತನ್ನೇ ಅಣಕಿಸುವಂತಿದೆ. ಚೀನಾದ ಹೈಕೌ ನಗರದ ಮಾಜಿ ಮೇಯರ್ ಒಬ್ಬರ ಮನೆಯಲ್ಲಿ ಪತ್ತೆಯಾದ ಸಂಪತ್ತು ಇಡೀ ವಿಶ್ವವನ್ನೇ ಬೆಚ್ಚಿಬೀಳಿಸಿದೆ. ಕೆಜಿಗಟ್ಟಲೆ ಅಲ್ಲ, ಬದಲಿಗೆ ಟನ್ಗಟ್ಟಲೆ ಚಿನ್ನ ಮತ್ತು ನಗದು ಪತ್ತೆಯಾಗಿರುವುದು ಅಚ್ಚರಿಗೆ ಕಾರಣವಾಗಿದೆ.
ತನಿಖಾ ತಂಡಕ್ಕೆ ಕಾದಿತ್ತು ಅಚ್ಚರಿ
ಭ್ರಷ್ಟಾಚಾರದ ಆರೋಪದ ಮೇಲೆ ಹೈಕೌ ನಗರದ ಮಾಜಿ ಮೇಯರ್ ಜಾಂಗ್ ಕ್ವಿ ಅವರ ನಿವಾಸದ ಮೇಲೆ ಚೀನಾದ ತನಿಖಾ ಸಂಸ್ಥೆಗಳು ದಾಳಿ ನಡೆಸಿದ್ದಾರೆ. ಮನೆಯ ನೆಲಮಳಿಗೆಯಲ್ಲಿ ಕಪಾಟುಗಳ ತುಂಬಾ ಇಟ್ಟಿದ್ದ ಚಿನ್ನದ ಗಟ್ಟಿಗಳನ್ನು ನೋಡಿ ಅಧಿಕಾರಿಗಳೇ ದಂಗಾಗಿದ್ದಾರೆ. ಒಟ್ಟು 13.5 ಟನ್ ಚಿನ್ನ ಇಲ್ಲಿ ಪತ್ತೆಯಾಗಿದೆ. ಇದರ ಮೌಲ್ಯ ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ನೂರಾರು ಕೋಟಿ ರೂಪಾಯಿಗಳಿಗೂ ಅಧಿಕ.
🔴 In China, a search of the house of a mayor accused of corruption uncovered 13.5 tons of gold, 23 tons of cash, and numerous luxury vehicles.
The mayor was sentenced to death for corruption.pic.twitter.com/cUwSDZXW3y
— China pulse 🇨🇳 (@Eng_china5) January 29, 2026
ಹಣ ಎಣಿಸಲು ಸಾಧ್ಯವಾಗದೆ ತೂಕ ಮಾಡಿದ ಅಧಿಕಾರಿಗಳು
ಚಿನ್ನದ ಜೊತೆಗೆ ಮನೆಯಲ್ಲಿ ಪತ್ತೆಯಾದ ನಗದಿನ ಪ್ರಮಾಣ ಇನ್ನೂ ಹೆಚ್ಚಾಗಿತ್ತು. ಈ ಬಗ್ಗೆ ಅಧಿಕಾರಿಗಳು ತಿಳಿಸಿದಂತೆ, ಸುಮಾರು 23 ಟನ್ ತೂಕದ ನಗದು ಹಣ ಸಿಕ್ಕಿದೆ. ನೋಟುಗಳನ್ನು ಎಣಿಸಲು ಸಾಧ್ಯವಾಗದ ಕಾರಣ, ಅವುಗಳನ್ನು ತೂಕದ ಮೂಲಕ ಅಂದಾಜಿಸಲಾಗಿದೆ. ಈ ನಗದು ಚೀನಾ ಮತ್ತು ವಿದೇಶಿ ಕರೆನ್ಸಿಗಳ ರೂಪದಲ್ಲಿತ್ತು. ಇದರೊಂದಿಗೆ ಡಜನ್ಗಟ್ಟಲೆ ಐಷಾರಾಮಿ ಕಾರುಗಳು, ಚೀನಾ ಸೇರಿದಂತೆ ವಿದೇಶಗಳಲ್ಲಿರುವ ದುಬಾರಿ ಹೋಟೆಲ್ಗಳು ಮತ್ತು ವಿಲ್ಲಾಗಳ ದಾಖಲೆಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಇವುಗಳ ಒಟ್ಟು ಮೌಲ್ಯ ಶತಕೋಟಿ ಡಾಲರ್ಗಳಿಗೂ ಹೆಚ್ಚು ಎಂದು ಅಂದಾಜಿಸಲಾಗಿದೆ.
ಹತ್ತು ವರ್ಷಗಳ ವ್ಯವಸ್ಥಿತ ಲೂಟಿ
ವರದಿಗಳ ಪ್ರಕಾರ, ಈ ಮೇಯರ್ ತನ್ನ 10 ವರ್ಷಗಳ ಅಧಿಕಾರಾವಧಿಯಲ್ಲಿ ಪ್ರತಿ ಸರ್ಕಾರಿ ಕೆಲಸಕ್ಕೂ ಲಂಚ ಪಡೆಯುತ್ತಿದ್ದರು. ಸರ್ಕಾರಿ ಒಪ್ಪಂದಗಳು, ಭೂ ವ್ಯವಹಾರಗಳು ಮತ್ತು ಬೃಹತ್ ನಿರ್ಮಾಣ ಯೋಜನೆಗಳಲ್ಲಿ ಕೈಹಾಕಿ ಅಕ್ರಮವಾಗಿ ಹಣ ಗಳಿಸಿದ್ದರು. ಈ ಕಪ್ಪು ಹಣವನ್ನು ವಿದೇಶಿ ಬ್ಯಾಂಕ್ ಖಾತೆಗಳು ಮತ್ತು ಶೆಲ್ ಕಂಪನಿಗಳ ಮೂಲಕ ಸಾಗಿಸಿರುವುದು ತನಿಖೆಯಲ್ಲಿ ದೃಢಪಟ್ಟಿದೆ.
ಚೀನಾದಲ್ಲಿ ಭ್ರಷ್ಟಾಚಾರಕ್ಕೆ ಕ್ಷಮೆಯೇ ಇಲ್ಲ ಎಂಬ ನಿಯಮದಂತೆ, ನ್ಯಾಯಾಲಯವು ಈ ಪ್ರಕರಣವನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸಿದೆ. ಅಧಿಕಾರ ದುರುಪಯೋಗ ಮತ್ತು ಸಾರ್ವಜನಿಕ ನಿಧಿಯ ಲೂಟಿ ಮಾಡಿದ ಆರೋಪದ ಮೇಲೆ ಹೈಕೌನ ಈ ಮಾಜಿ ಮೇಯರ್ಗೆ ನ್ಯಾಯಾಲಯವು ಮರಣದಂಡನೆ ಶಿಕ್ಷೆಯನ್ನು ವಿಧಿಸಿದೆ. ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಈ ದಾಳಿಯ ವಿಡಿಯೋಗಳು ಸಖತ್ ವೈರಲ್ ಆಗುತ್ತಿದೆ.
