ಇತ್ತೀಚೆಗೆ ಲೇಖಕಿಯೊಬ್ಬರು ನೀಡಿದ ಹೇಳಿಕೆಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದ್ದು, ಈ ಹೇಳಿಕೆ ಟೀಕೆಗೆ ಗುರಿಯಾಗಿದೆ. ಇದೀಗ ಅವರ ಹೆಸರು ಟ್ರೇಡಿಂಗ್‌ನಲ್ಲಿದ್ದು, ಅವರೇ ಸೀಮಾ ಆನಂದ್. ಲಂಡನ್‌ ನಿವಾಸಿಯಾದ ಈ ಲೇಖಕಿ, ಪುರಾಣತಜ್ಞೆ ಮತ್ತು ಲೈಂಗಿಕ ಶಿಕ್ಷಕಿಯಾಗಿದ್ದಾರೆ.
ಶುಭಂಕರ್ ಮಿಶ್ರಾ ಅವರೊಂದಿಗಿನ ಸಂದರ್ಶನದಲ್ಲಿ, 63 ವರ್ಷದ ವಯಸ್ಸಿನ ಇವರಿಗೆ 15 ವರ್ಷದ ಹುಡುಗನೊಬ್ಬ ತನ್ನ ಬಳಿ ಬಂದು “ಅತ್ಯಂತ ಅಶ್ಲೀಲ ಭಾಷೆಯಲ್ಲಿ” ಪ್ರಪೋಸ್ ಮಾಡಿದ ಅನುಭವವನ್ನು ಸೀಮಾ ಆನಂದ್ ಹಂಚಿಕೊಂಡಿದ್ದರು. ಈ ಹೇಳಿಕೆ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿದ್ದು, ವಯಸ್ಸು, ಲೈಂಗಿಕ ಭಾಷೆ ಮತ್ತು ಸಾರ್ವಜನಿಕವಾಗಿ ಇಂತಹ ವಿಷಯಗಳನ್ನು ಚರ್ಚಿಸುವ ಅಗತ್ಯ-ಅನಗತ್ಯಗಳ ಕುರಿತು ಚರ್ಚೆಗೆ ಕಾರಣವಾಗಿದೆ.
ಸೀಮಾ ಆನಂದ್ ಯಾರು?
ಸೀಮಾ ಆನಂದ್ ಅವರು ಲಂಡನ್‌ ಮೂಲದ ಕಥೆಗಾರ್ತಿ, ಪುರಾಣಶಾಸ್ತ್ರಜ್ಞೆ, ಲೇಖಕಿ ಮತ್ತು ಲೈಂಗಿಕ ಶಿಕ್ಷಣ ತಜ್ಞೆ. ಅವರು ಭಾರತೀಯ ಪುರಾಣಗಳು, ಕಾಮಸೂತ್ರ, ತಾಂತ್ರಿಕ ತತ್ತ್ವಶಾಸ್ತ್ರ, ಮಹಾಭಾರತ ಮತ್ತು ಭಗವದ್ಗೀತೆಗಳನ್ನು ವಿವರಿಸುವುದರಲ್ಲಿ ಪ್ರಸಿದ್ಧರಾಗಿದ್ದಾರೆ. ಭಾರತೀಯ ಮೌಖಿಕ ಪರಂಪರೆಗಳನ್ನು ಪುನರುಜ್ಜೀವನಗೊಳಿಸುವ ಯುನೆಸ್ಕೋ ಸಂಬಂಧಿತ ಯೋಜನೆಗಳಲ್ಲೂ ಅವರು ಕೆಲಸ ಮಾಡಿದ್ದಾರೆ.
ಭಾರತೀಯ ಸಮಾಜದಲ್ಲಿ ಲೈಂಗಿಕತೆಯನ್ನು ಇನ್ನೂ ನಾಚಿಕೆಯ ವಿಷಯವಾಗಿ ನೋಡುವ ಮನಸ್ಥಿತಿಯಿದೆ. ಆದರೆ ಸೀಮಾ ಆನಂದ್ ಈ ಧೋರಣೆಯನ್ನು ಪ್ರಶ್ನಿಸಿದ್ದು, ಲೈಂಗಿಕತೆ ಅಶ್ಲೀಲವಲ್ಲ, ಅದು ಮಾನವ ಜೀವನದ ಸಹಜ ಹಾಗೂ ಪವಿತ್ರ ಭಾಗ. ಚಿಂತನೆ ಮತ್ತು ಸಾಮಾಜಿಕ ಒತ್ತಡಗಳಿಂದಾಗಿ ಭಾರತದಲ್ಲಿ ಲೈಂಗಿಕತೆಯ ಬಗ್ಗೆ ತಪ್ಪು ಭಾವನೆ ರೂಪುಗೊಂಡಿದೆ ಎಂದು ಅವರು ಹೇಳಿದ್ದಾರೆ.
ಕಾಮಸೂತ್ರವನ್ನು ಕೇವಲ ಲೈಂಗಿಕ ಗ್ರಂಥವಾಗಿ ನೋಡಬಾರದು, ಅದನ್ನು ಪ್ರಜ್ಞೆ, ಶಕ್ತಿ ಮತ್ತು ಸಂಬಂಧಗಳ ಶಾಸ್ತ್ರವಾಗಿ ಅರ್ಥಮಾಡಿಕೊಳ್ಳಬೇಕು ಎಂಬುದು ಅವರ ವಾದವಾಗಿದೆ. ಈ ನೇರ ಮತ್ತು ಮುಕ್ತ ಹೇಳಿಕೆಗಳ ಕಾರಣದಿಂದಲೇ ಕೆಲವರು ಅವರನ್ನು ಟೀಕಿಸಿದರೆ, ಇನ್ನೂ ಕೆಲವರು ಅವರನ್ನು ಧೈರ್ಯವನ್ನು ಬೆಂಬಲಿಸುತ್ತಿದ್ದಾರೆ.
ಸೀಮಾ ಆನಂದ್ ಅವರು “The Art of Seduction” ಮತ್ತು “Speak Easy: A Field Guide to Love, Longing and Intimacy” ಸೇರಿದಂತೆ ಪ್ರಮುಖ ಪುಸ್ತಕಗಳನ್ನು ಬರೆದಿದ್ದಾರೆ.
ಸಾಮಾಜಿಕ ಮಾಧ್ಯಮದಲ್ಲಿ ಸೀಮಾ ಆನಂದ್ ಕುರಿತಂತೆ ಪರ-ವಿರೋಧಗಳು ಕೇಳಿ ಬರುತ್ತಿದೆ. ಕೆಲವರು ಅವರನ್ನು “ನಾಚಿಕೆಯಿಲ್ಲದೆ ಮಾತನಾಡುವ ಮಹಿಳೆ” ಎಂದು ಟೀಕಿಸುತ್ತಿದ್ದರೆ, ಇನ್ನು ಹಲವರು ಸಮಾಜದ ಮೌನವನ್ನು ಪ್ರಶ್ನಿಸುತ್ತಿದ್ದಾರೆ ಎಂದು ಬೆಂಬಲ ವ್ಯಕ್ತಪಡಿಸುತ್ತಿದ್ದಾರೆ. ಫೇಸ್‌ಬುಕ್‌ನಲ್ಲಿ ಒಬ್ಬ ಬಳಕೆದಾರರು, “ಲೈಂಗಿಕತೆಯ ಬಗ್ಗೆ ಮಾತನಾಡುವುದೇ ಸಮಸ್ಯೆಯಲ್ಲ, ಅದನ್ನು ನಾಚಿಕೆಯಿಲ್ಲದೆ ಮಾತನಾಡುವುದೇ ಸಮಾಜಕ್ಕೆ ಅಸಹಜವಾಗಿದೆ” ಎಂದು ಬರೆದಿದ್ದಾರೆ.
