ವೈದ್ಯಕೀಯ ಸಹಾಯವಿಲ್ಲದೆ ಸಮುದ್ರ ತೀರದಲ್ಲಿ ಮಗುವಿಗೆ ಜನ್ಮ ನೀಡಿದ ಮಹಿಳೆಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಜರ್ಮನಿ ಮೂಲದ ಜೋಸಿ ಪ್ಯೂಕರ್ಟ್ ಅವರು ನಿಕರಾಗುವಾದ ಪ್ಲಾಯಾ ಮಜಾಗುಯಾಲ್ ಬೀಚ್ನಲ್ಲಿ ಪತಿ ಬೆನ್ನಿ ಕಾರ್ನೆಲಿಯಸ್ ಅವರ ನೆರವಿನೊಂದಿಗೆ ಆರೋಗ್ಯವಂತ ಗಂಡು ಮಗುವನ್ನು ಹೆತ್ತಿದ್ದಾರೆ.
ಹಿಂದಿನ ಕಾಲದಲ್ಲಿ ಮಹಿಳೆಯರು ಆಸ್ಪತ್ರೆ ಅಥವಾ ವೈದ್ಯರ ಸಹಾಯವಿಲ್ಲದೆ ಸಹಜವಾಗಿ ಹಲವು ಮಕ್ಕಳನ್ನು ಹೆತ್ತಿದ್ದರು. ನಮ್ಮ ಅಜ್ಜಿ-ಮುತ್ತಜ್ಜಿಯರ ಕಾಲದಲ್ಲಿ ಇದು ಸಾಮಾನ್ಯವಾಗಿತ್ತು. ಇಂದಿಗೂ ಕಟ್ಟಡ ಕಾರ್ಮಿಕರು, ಕೂಲಿ ಕಾರ್ಮಿಕ ಮಹಿಳೆಯರು ಕೆಲವೊಮ್ಮೆ ಕೆಲಸದ ನಡುವೆಯೇ ಹೆರಿಗೆ ಮಾಡಿಕೊಂಡು ಮುಂದುವರಿಯುತ್ತಾರೆ. ಅಂತಹ ಮಕ್ಕಳು ನೈಸರ್ಗಿಕವಾಗಿ ಬಲಿಷ್ಠರಾಗಿ ಬೆಳೆಯುತ್ತಾರೆ ಎಂಬುದು ಅನೇಕರ ಅನುಭವ.
ಆದರೆ ಆಧುನಿಕ ಕಾಲದಲ್ಲಿ ಸಹಜ ಹೆರಿಗೆ ಮರೀಚಿಕೆಯಂತಾಗಿದೆ. ಹಲವು ಆಸ್ಪತ್ರೆಗಳಲ್ಲಿ ಹಣಕಾಸಿನ ಲಾಭಕ್ಕಾಗಿ ಸಿಸೇರಿಯನ್ ಶಸ್ತ್ರಚಿಕಿತ್ಸೆಯನ್ನು ಶಿಫಾರಸು ಮಾಡುತ್ತಾರೆ. ಕೆಲವೊಮ್ಮೆ ಮಹಿಳೆಯರಲ್ಲಿ ಹೆರಿಗೆಯ ಭಯವನ್ನು ಹುಟ್ಟಿಸಿ ಶಸ್ತ್ರಚಿಕಿತ್ಸೆಗೆ ಒತ್ತಾಯಿಸುತ್ತಾರೆ. ಇದರಿಂದ ಹೆರಿಗೆಯ ಬಗ್ಗೆ ಭಯ ಹುಟ್ಟಿ, ಮದುವೆಯೇ ಬೇಡ ಅಥವಾ ಮಕ್ಕಳೇ ಬೇಡ ಎನ್ನುವ ಯುವತಿಯರು ಹೆಚ್ಚಾಗುತ್ತಿದ್ದಾರೆ.
ಈ ಎಲ್ಲದಕ್ಕೂ ಸೆಡ್ಡು ಹೊಡೆದಂತೆ ಜೋಸಿ ಪ್ಯೂಕರ್ಟ್ ಅವರು ಸಾಗರ ತೀರದಲ್ಲಿ ಸಹಜ ಹೆರಿಗೆ ಮಾಡಿಕೊಂಡಿದ್ದಾರೆ. 37 ವರ್ಷದ ಜೋಸಿ ಮತ್ತು ಅವರ ಪತಿ ಬೆನ್ನಿ ಅವರು ನಿಕರಾಗುವಾದಲ್ಲಿ ವಾಸಿಸುತ್ತಾರೆ. ಸಹಜ ಹೆರಿಗೆಯ ಕನಸು ನನಸಾಗಿಸಲು ಅವರು ಬೀಚ್ಗೆ ತೆರಳಿದ್ದರು. ಹೆರಿಗೆಗೆ ಅಗತ್ಯವಾದ ಟವೆಲ್ಗಳು, ಪ್ಲಾಸೆಂಟಾ ಸೀವ್ ಹಿಡಿಯುವ ಬೌಲ್, ಗಾಜ್ ಮತ್ತು ಟಿಶ್ಯೂ ಪೇಪರ್ಗಳನ್ನು ಮಾತ್ರ ತೆಗೆದುಕೊಂಡು ಹೋಗಿದ್ದರು.
ಜೋಸಿ ಅವರು ಹೇಳಿಕೆಯಲ್ಲಿ, “ನನ್ನ ದೇಹದ ಮೇಲೆ ನಂಬಿಕೆ ಇತ್ತು. ಸಾಗರದ ಅಲೆಗಳು ನನ್ನ ನೋವಿನೊಂದಿಗೆ ರಿದಂ ಹಿಡಿದಿದ್ದವು. ಅದು ನನಗೆ ಶಾಂತಿ ನೀಡಿತು. ಹೆರಿಗೆ ನಂತರ ಸಾಗರ ನೀರಿನಲ್ಲಿ ನಾನು ಮತ್ತು ಮಗುವನ್ನು ತೊಳೆದುಕೊಂಡೆವು” ಎಂದಿದ್ದಾರೆ. ಮಗುವಿಗೆ ಬೋಧಿ ಅಮೋರ್ ಓಷನ್ ಕಾರ್ನೆಲಿಯಸ್ ಎಂದು ಹೆಸರಿಟ್ಟಿದ್ದಾರೆ. ಮಗು 3.5 ಕೆ.ಜಿ ತೂಕದೊಂದಿಗೆ ಆರೋಗ್ಯವಾಗಿ ಹುಟ್ಟಿದೆ.
ಈ ವಿಡಿಯೋ ಇನ್ಸ್ಟಾಗ್ರಾಮ್ನಲ್ಲಿ ಪೋಸ್ಟ್ ಆದ ಬಳಿಕ ಲಕ್ಷಾಂತರ ವೀಕ್ಷಣೆಗಳನ್ನು ಪಡೆದಿದೆ. ಕೆಲವರು ಜೋಸಿ ಅವರ ಧೈರ್ಯವನ್ನು ಮೆಚ್ಚಿದ್ದಾರೆ, ಇನ್ನು ಕೆಲವರು ಸಾಗರ ನೀರಿನಲ್ಲಿ ಬ್ಯಾಕ್ಟೀರಿಯಾ ಅಪಾಯ, ಸುರಕ್ಷತೆಯ ಕೊರತೆಯ ಬಗ್ಗೆ ಆತಂಕ ವ್ಯಕ್ತಪಡಿಸಿದ್ದಾರೆ. ವೈದ್ಯರು ಇಂತಹ “ಫ್ರೀ ಬರ್ತ್” ಅಪಾಯಕಾರಿ ಎಂದು ಎಚ್ಚರಿಕೆ ನೀಡುತ್ತಾರೆ.
ಈ ಘಟನೆ ಸಹಜ ಹೆರಿಗೆಯ ಬಗ್ಗೆ ಮತ್ತೊಮ್ಮೆ ಚರ್ಚೆಗೆ ಕಾರಣವಾಗಿದೆ. ಮಹಿಳೆಯ ದೇಹದ ಸಾಮರ್ಥ್ಯವನ್ನು ನಂಬಿ ಸಹಜ ಹೆರಿಗೆ ಮಾಡುವುದು ಸಾಧ್ಯವೇ? ಅಥವಾ ಆಧುನಿಕ ವೈದ್ಯಕೀಯ ಸಹಾಯ ಅಗತ್ಯವೇ? ಎಂಬ ಪ್ರಶ್ನೆಗಳು ಎದ್ದಿವೆ. ಜೋಸಿ ಅವರ ಸಾಹಸ ನೆಟ್ಟಿಗರನ್ನು ಆಘಾತಗೊಳಿಸಿದೆ.
