ದಕ್ಷಿಣ ಏಷಿಯನ್ ಫೆಡರೇಷನ್ ಬಾಲ್ ಬ್ಯಾಡ್ಮಿಂಟನ್‌ನಲ್ಲಿ ಭಾರತಕ್ಕೆ ಚಿನ್ನದ ಪದಕ

ಬಿಹಾರದ ಪಾಟ್ನಾದಲ್ಲಿ ನಡೆದ ದಕ್ಷಿಣ ಏಷಿಯನ್ ಫೆಡರೇಷನ್ ಬಾಲ್ ಬ್ಯಾಡ್ಮಿಂಟನ್ ಚಾಂಪಿಯನ್ಶಿಪ್‌ನಲ್ಲಿ ಭಾರತವನ್ನು ಪ್ರತಿನಿಧಿಸಿದ ರಾಜ್ಯದ ಜಯಲಕ್ಷ್ಮಿ ಜಿ ಹಾಗೂ ಧೀರಜ್ ರೆಡ್ಡಿ ಚಿನ್ನದ ಪದಕವನ್ನು ಪಡೆದುಕೊಂಡಿದ್ದಾರೆ.

ಏಷಿಯನ್ ಬಾಲ್ ಬ್ಯಾಡ್ಮಿಂಟನ್ ಫೆಡರೇಶನ ಆಶ್ರಯದಲ್ಲಿ ಡಿಸೆಂಬರ್ 27 ರಿಂದ 29 ರವರೆಗೆ ನಡೆದ ಈ ಕೂಟದಲ್ಲಿ ಅತಿಥೇಯ ಭಾರತವು ಸೇರಿದಂತೆ ಶ್ರೀಲಂಕಾ, ಭೂತಾನ್ ಹಾಗೂ ನೇಪಾಲ್ ತಂಡಗಳು ಭಾಗವಹಿಸಿದ್ದವು. ಅತಿಥಿಯ ಭಾರತವು ಲೀಗ್ ಮಾದರಿಯಲ್ಲಿ ನಡೆದ ಪಂದ್ಯದಲ್ಲಿ ಎಲ್ಲಾ ಪಂದ್ಯಗಳನ್ನು ಗೆದ್ದು ಚಾಂಪಿಯನ್ ತಂಡವಾಗಿ ಹೊರಹೊಮ್ಮಿತ್ತು.

ಮಹಿಳಾ ವಿಭಾಗದಲ್ಲಿ ರಾಜ್ಯದ ಜಯಲಕ್ಷ್ಮಿ ಜಿ ಅವರು ತಂಡದ ನಾಯಕಿಯಾಗಿ ಭಾರತ ತಂಡವನ್ನು ಮುನ್ನಡೆಸಿದ್ದರು. ವಿಜೇತ ಭಾರತ ತಂಡದ ಪರವಾಗಿ ರಾಜ್ಯದ ಜಯಲಕ್ಷ್ಮಿ ಹಾಗೂ ಧೀರಜ್ ಪೂರ್ಣ ಟೂರ್ನಿಯಲ್ಲಿ ಅತ್ಯುತ್ತಮ ನಿರ್ವಹಣೆಯನ್ನು ನೀಡಿದ್ದರು. ಇವರ ಸಾಧನೆಗೆ ಬಾಲ್ ಬ್ಯಾಡ್ಮಿಂಟನ್ ಅಸೋಸಿಯೇಷನ್ ಆಫ್ ಕರ್ನಾಟಕ ಅಭಿನಂದನೆ ವ್ಯಕ್ತಪಡಿಸಿದೆ.