ಹೈದರಾಬಾದ್: ಎಐಎಂಐಎಂ ಅಧ್ಯಕ್ಷ ಅಸಾದುದ್ದೀನ್ ಓವೈಸಿ ಉತ್ತರ ಪ್ರದೇಶದ ಬರೇಲಿಯಲ್ಲಿ ನಡೆದ ‘ಐ ಲವ್ ಮೊಹಮ್ಮದ್’ ಪೋಸ್ಟರ್ ವಿವಾದವನ್ನು ತೀವ್ರವಾಗಿ ಟೀಕಿಸಿದ್ದಾರೆ. ಭಾರತದಲ್ಲಿ ‘ಐ ಲವ್ ಮೋದಿ’ ಎಂದು ಹೇಳುವುದು ಸುಲಭ ಮತ್ತು ಸ್ವೀಕಾರಾರ್ಹವಾದರೆ, ‘ಐ ಲವ್ ಮೊಹಮ್ಮದ್’ ಎಂದು ಹೇಳುವುದು ಏಕೆ ವಿರೋಧಿಸಲ್ಪಡುತ್ತದೆ ಎಂದು ಪ್ರಶ್ನಿಸಿದ್ದಾರೆ.
ಹೈದರಾಬಾದ್‌ನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಮಾತನಾಡಿದ ಓವೈಸಿ, “ಇಲ್ಲಿ ‘ಐ ಲವ್ ಮೋದಿ’ ಎಂದರೆ ಮೀಡಿಯಾ ಸೇರಿದಂತೆ ಎಲ್ಲರೂ ಸಂತೋಷಪಡುತ್ತಾರೆ. ಆದರೆ ‘ಐ ಲವ್ ಮೊಹಮ್ಮದ್’ ಎಂದರೆ ವಿರೋಧ. ನಾನು ಮುಸ್ಲಿಮ್ ಆಗಿರುವುದು ಮೊಹಮ್ಮದ್ ಪ್ರವಾದಿಯ ಕಾರಣದಿಂದ” ಎಂದರು.
ಸೆಪ್ಟೆಂಬರ್ 9ರಂದು ಕಾನ್ಪುರದಲ್ಲಿ ಬಾರಾವಾಫತ್ ಮೆರವಣಿಗೆಯಲ್ಲಿ ‘ಐ ಲವ್ ಮೊಹಮ್ಮದ್’ ಫಲಕಗಳನ್ನು ಪ್ರದರ್ಶಿಸಿದ್ದಕ್ಕೆ ಎಫ್‌ಐಆರ್ ದಾಖಲಾಗಿ ವಿವಾದ ಉಂಟಾಯಿತು. ಮುಸ್ಲಿಂ ಸಮುದಾಯ ಇದನ್ನು ನಂಬಿಕೆಯ ಸಂಕೇತವೆಂದು ಹೇಳಿತು, ಆದರೆ ಇದು ಉತ್ತರ ಪ್ರದೇಶದಾದ್ಯಂತ ಉದ್ವಿಗ್ನತೆಯನ್ನು ಹುಟ್ಟುಹಾಕಿತು. ಬರೇಲಿಯಲ್ಲಿ ಮೌಲಾನಾ ತೌಕೀರ್ ರಜಾ ಖಾನ್ ಪ್ರತಿಭಟನೆಗೆ ಕರೆ ನೀಡಿದ ನಂತರ, ಕಳೆದ ಶುಕ್ರವಾರ ಪ್ರಾರ್ಥನೆಯ ನಂತರ 2,000ಕ್ಕೂ ಹೆಚ್ಚು ಜನರು ಮಸೀದಿ ಬಳಿ ಜಮಾಯಿಸಿದರು. ಘೋಷಣೆಗಳ ನಡುವೆ ಪರಿಸ್ಥಿತಿ ಹಿಂಸಾತ್ಮಕಗೊಂಡು ಕಲ್ಲುತೂರಾಟ ನಡೆಯಿತು. ಹಲವು ಪೊಲೀಸರು ಗಾಯಗೊಂಡರು, ಲಾಠಿ ಚಾರ್ಜ್ ಮೂಲಕ ಪ್ರತಿಕ್ರಿಯಿಸಲಾಯಿತು. ಇಲ್ಲಿವರಗೆ 81 ಜನರನ್ನು ಬಂಧಿಸಲಾಗಿದೆ.
ವಿವಾದದ ನಂತರ ಬರೇಲಿ ವಿಭಾಗದ ನಾಲ್ಕು ಜಿಲ್ಲೆಗಳಲ್ಲಿ ಇಂಟರ್ನೆಟ್ ಸೇವೆಗಳನ್ನು ಸ್ಥಗಿತಗೊಳಿಸಲಾಯಿತು. ದಸರಾ ಆಚರಣೆಗಳು ಮತ್ತು ಶುಕ್ರವಾರದ ಪ್ರಾರ್ಥನೆಗಳ ಹಿನ್ನೆಲೆಯಲ್ಲಿ ಭಾರೀ ಭದ್ರತಾ ಪಡೆಗಳನ್ನು ನಿಯೋಜಿಸಲಾಯಿತು. ಪಿಎಸಿ, ಆರ್‌ಎಎಫ್ ಸಿಬ್ಬಂದಿ ಬೀದಿಗಳಲ್ಲಿ ಇದ್ದರು, ಡ್ರೋನ್‌ಗಳು ಮೇಲ್ವಿಚಾರಣೆ ನಡೆಸಿದವು. ಬರೇಲಿಯ ಅಲಾ ಹಜರತ್ ದರ್ಗಾದ ಹಿರಿಯ ಧರ್ಮಗುರುಗಳು ಮುಸ್ಲಿಮರನ್ನು ಶಾಂತಿಯುತವಾಗಿ ಮನೆಯತ್ತ ಕಳುಹಿಸುವಂತೆ ಮನವಿ ಮಾಡಿದರು.
ಓವೈಸಿ ಹಿಂಸೆಯನ್ನು ಖಂಡಿಸಿ, ಕಾನೂನು ಚುರುಕುಗೊಳಿಸುವಂತೆ ಸಲಹೆ ನೀಡಿದ್ದಾರೆ. ಪೊಲೀಸರ ನಡೆಗೂ ಓವೈಸಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಈ ವಿವಾದವು ಧಾರ್ಮಿಕ ಸ್ವಾತಂತ್ರ್ಯ ಮತ್ತು ಅಭಿವ್ಯಕ್ತಿ ಸ್ವಾತಂತ್ರ್ಯದ ಬಗ್ಗೆ ಚರ್ಚೆಯನ್ನು ಉಂಟುಮಾಡಿದೆ. ಹೀಗಾಗಿ ಓವೈಸಿ ದೇಶದ 17 ಕೋಟಿ ಮುಸ್ಲಿಮರು ಸ್ವಾತಂತ್ರ್ಯ ಸಂಗ್ರಾಮದಲ್ಲಿ ಪಾಲ್ಗೊಂಡಿದ್ದನ್ನು ನೆನಪಿಸಿ, ನಂಬಿಕೆಯನ್ನು ರಕ್ಷಿಸುವಂತೆ ಕರೆ ನೀಡಿದ್ದಾರೆ. ಈ ಘಟನೆಯು ಉತ್ತರ ಪ್ರದೇಶದಲ್ಲಿ ಉದ್ವಿಗ್ನತೆಯನ್ನು ಹೆಚ್ಚಿಸಿದ್ದು, ಭದ್ರತಾ ಕ್ರಮಗಳು ಮುಂದುವರೆಯುತ್ತಿವೆ.
