ಹೈದರಾಬಾದ್: ರಾಜೀವ್ ಗಾಂಧಿ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ (Rajiv Gandhi International Airport) ಜುಲೈ 30ರಂದು ನಾರ್ಕೋಟಿಕ್ಸ್ ಕಂಟ್ರೋಲ್ ಬ್ಯೂರೋ (ಎನ್ಸಿಬಿ) ಗುಪ್ತಚರ ಮಾಹಿತಿಯ ಆಧಾರದಲ್ಲಿ ಮಹಿಳಾ ಪ್ರಯಾಣಿಕರೊಬ್ಬರನ್ನು ತಡೆದು, ಆಕೆಯ ಎರಡು ಚೆಕ್-ಇನ್ ಲಗೇಜ್ಗಳಿಂದ 40.2 ಕೆಜಿ ಹೈಡ್ರೋಪೋನಿಕ್ ಗಾಂಜಾವನ್ನು ವಶಪಡಿಸಿಕೊಂಡಿದೆ. ಈ ಗಾಂಜಾದ ಮೌಲ್ಯವು ಅಕ್ರಮ ಮಾರುಕಟ್ಟೆಯಲ್ಲಿ ಸುಮಾರು 14 ಕೋಟಿ ರೂ. ಎಂದು ಅಂದಾಜಿಸಲಾಗಿದೆ.
ಆರೋಪಿಯಾದ ಮಹಿಳೆ ಬ್ಯಾಂಕಾಕ್ನಿಂದ ಈ ಉನ್ನತ ದರ್ಜೆಯ ಗಾಂಜಾವನ್ನು ಕಳ್ಳಸಾಗಣೆ ಮಾಡಿದ್ದು, ಅನುಮಾನ ತಪ್ಪಿಸಲು ದುಬೈ ಮೂಲಕ ಹೈದರಾಬಾದ್ಗೆ ಪ್ರಯಾಣಿಸಿದ್ದಾಳೆ. ಬ್ಯಾಂಕಾಕ್ನಿಂದ ಭಾರತಕ್ಕೆ ನೇರವಾಗಿ ಬರುವ ಪ್ರಯಾಣಿಕರಿಂದ ಈ ರೀತಿಯ ಗಾಂಜಾ ವಶಪಡಿಸಿಕೊಂಡಿರುವ ಹಲವು ಘಟನೆಗಳಿರುವುದರಿಂದ ಆಕೆ ಈ ಮಾರ್ಗವನ್ನು ಆಯ್ಕೆ ಮಾಡಿಕೊಂಡಿದ್ದಾಳೆ ಎಂದು ಎನ್ಸಿಬಿ ಹೇಳಿದೆ.
ಎನ್ಸಿಬಿಯ ಹೈದರಾಬಾದ್ ಘಟಕವು ಈ ಪ್ರಕರಣದಲ್ಲಿ ಥೈಲ್ಯಾಂಡ್ನಲ್ಲಿ ಆಕೆಗಿರುವ ಹಿಂದಿನ ಸಂಪರ್ಕಗಳು ಮತ್ತು ಭಾರತದಲ್ಲಿ ಆಕೆಯ ಒಡನಾಡಿಗಳ ಬಗ್ಗೆ ತನಿಖೆಯನ್ನು ತೀವ್ರಗೊಳಿಸಿದೆ. “ನಾವು ಈ ಡ್ರಗ್ ಜಾಲವನ್ನು ಸಂಪೂರ್ಣವಾಗಿ ಭೇದಿಸಲು ಪ್ರಯತ್ನಿಸುತ್ತಿದ್ದೇವೆ,” ಎಂದು ಎನ್ಸಿಬಿ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಸಾರ್ವಜನಿಕರು ಡ್ರಗ್ಸ್ ವಿರುದ್ಧದ ಹೋರಾಟಕ್ಕೆ ಸಹಕಾರ ನೀಡಲು, ಯಾವುದೇ ಅನುಮಾನಾಸ್ಪದ ಚಟುವಟಿಕೆಗಳ ಬಗ್ಗೆ ರಾಷ್ಟ್ರೀಯ ನಾರ್ಕೋಟಿಕ್ಸ್ ಸಹಾಯವಾಣಿ (MANAS) ಸಂಖ್ಯೆ 1933 ಮೂಲಕ ಮಾಹಿತಿ ನೀಡಬಹುದು. ಕರೆ ಮಾಡುವವರ ಗುರುತನ್ನು ಗೌಪ್ಯವಾಗಿರಿಸಲಾಗುವುದು ಎಂದು ಎನ್ಸಿಬಿ ಭರವಸೆ ನೀಡಿದೆ.
