ಉತ್ತರ ಪ್ರದೇಶದ ಉನ್ನಾವೋದ ಬದರ್ಕಾ ಪ್ರದೇಶದ ತುರ್ಕಿಹಾ ಬದರ್ಕಾ ಗ್ರಾಮದಲ್ಲಿ ದಿಗಿಲುಗೊಳಿಸುವ ಕೊಲೆ ಪ್ರಕರಣವೊಂದು ಬೆಳಕಿಗೆ ಬಂದಿದೆ. ಇಮ್ರಾನ್ ಎಂಬ ವ್ಯಕ್ತಿಯನ್ನು ಆತನ ಪತ್ನಿ ಶೀಬಾ, ಆಕೆಯ ಪ್ರಿಯಕರ ಫರ್ಮನ್ (ಚುನ್ನಾ ಎಂದೂ ಕರೆಯಲಾಗುತ್ತದೆ), ಮತ್ತು ಫರ್ಮನ್ನ ಸ್ನೇಹಿತ ರಫೀಕ್ ಸೇರಿ ಕೊಲೆಗೈದಿದ್ದಾರೆ. ಈ ಘಟನೆಯಲ್ಲಿ ಶೀಬಾ ಮತ್ತು ಫರ್ಮನ್ ಕಳೆದ ಮೂರು ವರ್ಷಗಳಿಂದ ಅಕ್ರಮ ಸಂಬಂಧದಲ್ಲಿದ್ದರು. ಪೊಲೀಸರು ಶೀಬಾ ಮತ್ತು ಫರ್ಮನ್ನನ್ನು ಬಂಧಿಸಿದ್ದಾರೆ, ಆದರೆ ರಫೀಕ್ ತಲೆಮರೆಸಿಕೊಂಡಿದ್ದಾನೆ.
ಇಮ್ರಾನ್ಗೆ ಮದ್ಯಪಾನದ ಚಟವಿತ್ತು, ಮತ್ತು ಆತ ಪ್ರತಿದಿನ ಕುಡಿದು ಬಂದು ಶೀಬಾಳೊಂದಿಗೆ ಜಗಳವಾಡುತ್ತಿದ್ದ. ಇದರಿಂದ ಅಸಮಾಧಾನಗೊಂಡ ಶೀಬಾ, ತನ್ನ ಆಸೆಗಳು ಈಡೇರುತ್ತಿಲ್ಲ ಎಂದು ಭಾವಿಸಿದ್ದಳು. ಫರ್ಮನ್ ವಿದೇಶದಿಂದ 25 ದಿನಗಳ ಹಿಂದೆ ವಾಪಸ್ಸಾದ ನಂತರ, ಶೀಬಾ ಆತನೊಂದಿಗೆ ಆಗಾಗ ಭೇಟಿಯಾಗುತ್ತಿದ್ದಳು. ಆದರೆ, ಇವರ ಸಂಬಂಧದ ಬಗ್ಗೆ ಇಮ್ರಾನ್ಗೆ ತಿಳಿದು, ಆತ ಶೀಬಾಳನ್ನು ಥಳಿಸಿ ಮನೆಯಿಂದ ಹೊರಗೆ ಹೋಗದಂತೆ ತಡೆದಿದ್ದ. ಇದರಿಂದ ಕೆರಳಿದ ಶೀಬಾ, ಫರ್ಮನ್ನೊಂದಿಗೆ ಸೇರಿ ಇಮ್ರಾನ್ನನ್ನು ಕೊಲೆ ಮಾಡಲು ಸಂಚು ರೂಪಿಸಿದ್ದಾಳೆ. ಈ ಯೋಜನೆಗೆ ರಫೀಕ್ ಕೂಡ ನೆರವಾಗಿದ್ದಾನೆ.
ಅಪರಾಧಿಗಳು ಮೊದಲು ಇಮ್ರಾನ್ಗೆ ಮದ್ಯ ಕುಡಿಸಿ ಮತ್ತಿನಲ್ಲಿರಿಸಿದ್ದಾರೆ. ನಂತರ ಆತನನ್ನು ಬೈಕ್ನಲ್ಲಿ ಕರೆದುಕೊಂಡು ಹೋಗಿ, ಚಾಕುವಿನಿಂದ ತಲೆಯನ್ನು ದೇಹದಿಂದ ಬೇರ್ಪಡಿಸಿ ಬರ್ಬರವಾಗಿ ಕೊಲೆ ಮಾಡಿದ್ದಾರೆ. ಕೊಲೆಯ ನಂತರ, ತಲೆಯಿಲ್ಲದ ದೇಹವನ್ನು ಕಂಚನ್ಖೇಡಾ ಬಳಿಯ ಚರಂಡಿಯ ಚೌಗು ಪ್ರದೇಶಕ್ಕೆ ಎಸೆದು ತಲೆಮರೆಸಿಕೊಂಡಿದ್ದಾರೆ.
ಕಂಚನ್ಖೇಡಾ ಬಳಿಯ ಚರಂಡಿಯಲ್ಲಿ ಇಮ್ರಾನ್ನ ತಲೆ ಕತ್ತರಿಸಿದ ದೇಹ ಪತ್ತೆಯಾದ ನಂತರ, ಅಚಲಗಂಜ್ ಠಾಣೆಯ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದರು. ಮಂಗಳವಾರ (ಜುಲೈ) ಈ ಪ್ರಕರಣವನ್ನು ಬೇಧಿಸಿದ ಪೊಲೀಸರು, ಶೀಬಾ ಮತ್ತು ಫರ್ಮನ್ನನ್ನು ಬಂಧಿಸಿದ್ದಾರೆ. ರಫೀಕ್ನ ಪತ್ತೆಗಾಗಿ ಪೊಲೀಸರು ಕಾರ್ಯಾಚರಣೆ ಮುಂದುವರಿಸಿದ್ದಾರೆ. ಬಿಘಾಪುರ್ ಸರ್ಕಲ್ ಆಫೀಸರ್ ರಿಷಿಕಾಂತ್ ಶುಕ್ಲಾ ಅವರು, ಶೀಬಾ ಮತ್ತು ಫರ್ಮನ್ನ ದೀರ್ಘಕಾಲದ ಸಂಬಂಧ ಮತ್ತು ಇಮ್ರಾನ್ನೊಂದಿಗಿನ ಜಗಳಗಳೇ ಕೊಲೆಗೆ ಕಾರಣ ಎಂದು ದೃಢಪಡಿಸಿದ್ದಾರೆ.
