ಯಶಸ್ವಿ 12 ವರ್ಷಗಳ ಕರಿಯರ್ನಲ್ಲಿ 37ಕ್ಕೂ ಅಧಿಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ ಸ್ಯಾಂಡಲ್‌ವುಡ್ ಲೇಡಿ ಸೂಪರ್ ಸ್ಟಾರ್ ರಚಿತಾ ರಾಮ್. ಇಲ್ಲಿಯವರೆಗೂ ಆಕೆ ಹೆಸರು ಕೆಡಿಸಿಕೊಂಡ ಟ್ರ್ಯಾಕ್ ರೆಕಾರ್ಡೇ ಇಲ್ಲ. ಆದ್ರೀಗ ರಚ್ಚು ವಿರುದ್ಧ ಫಿಲ್ಮ್ ಚೇಂಬರ್ ಮೆಟ್ಟಿಲೇರಿದೆ ಸಂಜು ವೆಡ್ಸ್ ಗೀತಾ-2 ಟೀಂ. ಅದಕ್ಕೆ ಡಿಂಪಲ್ ಕ್ವೀನ್ ಬದಲಿಗೆ ಆಕೆಯ ಫ್ಯಾನ್ಸ್ ಸೂಪರ್ ಟಕ್ಕರ್ ಕೊಟ್ಟಿದ್ದಾರೆ. ಅದರ ಕಂಪ್ಲೀಟ್ ಕಹಾನಿ ಇಲ್ಲಿದೆ.
- ‘ಸಂಜು’ ಪ್ರಲಾಪ.. ರಚ್ಚು ಫ್ಯಾನ್ಸ್ ಕೊಟ್ರು 100% ಟಕ್ಕರ್..!
- ಪ್ರಮೋಷನ್ಸ್‌ಗೆ ಬರ್ತಿಲ್ಲ ಎಂದ ಡೈರೆಕ್ಟರ್ & ಪ್ರೊಡ್ಯೂಸರ್
- ಅಬ್ಬರ ಪ್ರಚಾರದ ವಿಡಿಯೋ ಶೇರ್ ಮಾಡಿದ ರಚ್ಚು ಫ್ಯಾನ್ಸ್
- ಸಂಜು ರೀ-ರಿಲೀಸ್‌ಗೂ ಡಿಂಪಲ್ ಕ್ವೀನ್ ಸ್ಪೆಷಲ್ ವಿಡಿಯೋ
ಸಂಜು ಮತ್ತು ಗೀತಾ.. ಸೇರಬೇಕು ಅಂತ.. ಅನ್ನೋ ಹಾಡು ರಮ್ಯಾ-ಕಿಟ್ಟಪ್ಪನ ಸಂಜು ವೆಡ್ಸ್ ಗೀತಾ ಚಿತ್ರದಲ್ಲಿತ್ತು. ಆದ್ರೀಗ ಸೀಕ್ವೆಲ್‌‌ನಲ್ಲಿ ಸಂಜು ಮತ್ತು ಗೀತಾ ‘ನೀನೊಂದು ತೀರಾ.. ನಾನೊಂದು ತೀರಾ’ ಅಂತಿದ್ದಾರೆ. ಹೀರೋ ಒಂದ್ಕಡೆ, ಹೀರೋಯಿನ್ ಮತ್ತೊಂದ್ಕಡೆ. ಹೌದು, ಮೈನಾ ನಾಗಶೇಖರ್ ನಿರ್ದೇಶನ ಹಾಗೂ ಛಲವಾದಿ ಕುಮಾರ್ ನಿರ್ಮಾಣದಲ್ಲಿ ತಯಾರಾದ ಸಂಜು ವೆಡ್ಸ್ ಗೀತಾ-2 ಸಿಕ್ಕಾಪಟ್ಟೆ ಹೈರಾಣಾಗಿದೆ.
ಫೈಟ್ಸ್ ಇಲ್ಲದ, ಕ್ರೌರ್ಯದ ನೆರಳೇ ಇಲ್ಲದ ಫೀಲ್ ಗುಡ್ ಮೂವಿ ಮಾಡಿರೋ ನಾಗಶೇಖರ್, ಶಿಡ್ಲಘಟ್ಟ ಟು ಸ್ವಿಟ್ಜರ್ಲೆಂಡ್ ಸಿನಿಮಾದ ಕಥೆಯನ್ನ ರೇಷ್ಮೆ ನೂಲಿನಂತೆ ಬಹಳ ಸೊಗಸಾಗಿ ತೆರೆಗೆ ತಂದಿದ್ದರು. ಕೆಲವೊಮ್ಮೆ ಜನಕ್ಕೆ ಹೊಡಿ, ಬಡಿ, ಕಡಿ ಚಿತ್ರಗಳೇ ಇಷ್ಟವಾಗಿಬಿಡುತ್ತವೆ. ಹಾಗಾಗಿಯೇ ಈ ಅಮೋಘ ಪ್ರೇಮ ದೃಶ್ಯಕಾವ್ಯಕ್ಕೆ ಜನವರಿ 17ರಂದು ರಿಲೀಸ್ ಆದಾಗ ಮಿಶ್ರ ಪ್ರತಿಕ್ರಿಯೆ ನೀಡಿದ್ರು. ನಂತ್ರ ಥಿಯೇಟರ್‌ನಲ್ಲಿ ಕೂಡಲೇ ಅದನ್ನ ಸ್ಥಗಿತಗೊಳಿಸಿ, ಇದೀಗ ಜೂನ್ 5ಕ್ಕೆ ಮತ್ತೆ ರೀ-ರಿಲೀಸ್ ಮಾಡಿದ್ರು.
ರಚಿತಾ ರಾಮ್ ಹಾಗೂ ಶ್ರೀನಗರ ಕಿಟ್ಟಿ ಲೀಡ್‌‌ನಲ್ಲಿರೋ ಸಂಜು ವೆಡ್ಸ್ ಗೀತಾ-2ಗೆ ಒಂದು ಮಟ್ಟಿಗೆ ಒಳ್ಳೆಯ ರೆಸ್ಪಾನ್ಸ್ ಏನೋ ಬಂತು. ಆದ್ರೆ ನಿರ್ದೇಶಕ, ನಿರ್ಮಾಪಕರಿಗೆ ಅದು ತೃಪ್ತಿ ನೀಡಿಲ್ಲ. ಅದರಲ್ಲೂ ರಚಿತಾ ರಾಮ್ ನಮ್ಮ ಚಿತ್ರದ ಪ್ರಮೋಷನ್ಸ್‌ಗೆ ಬಂದಿಲ್ಲ ಅಂತ ಆರೋಪಿಸಿ, ಫಿಲ್ಮ್ ಚೇಂಬರ್‌ಗೆ ದೂರು ನೀಡಿದ್ದಾರೆ. ಕಲಾವಿದರ ಸಂಘದ ರಾಕ್‌ಲೈನ್ ಮೂಲಕ ಹೇಳಿಸಿದ್ರೂ ಪ್ರಯೋಜನ ಆಗಿಲ್ಲ. ಸತತ 45 ದಿನಗಳಿಂದ ನಮ್ಮ ಕೈಗೆ ಸಿಗ್ತಿಲ್ಲ ಅಂತ ಆರೋಪಿಸಿ, ಆಕೆಯ ಮೇಲೆ ಸೂಕ್ತ ಕ್ರಮ ಕೈಗೊಳ್ಳಿ ಅಂತ ಫಿಲ್ಮ್ ಚೇಂಬರ್ ಅಧ್ಯಕ್ಷ ನರಸಿಂಹಲು ಮೊರೆ ಹೋಗಿದೆ ಟೀಂ.
ಇನ್ನು ನಾಯಕ ನಟ ಶ್ರೀನಗರ ಕಿಟ್ಟಿ ಕೂಡ ನಿರ್ದೇಶಕ, ನಿರ್ಮಾಪಕರಿಗೆ ಸಾಥ್ ನೀಡಿದ್ದು, ರಚಿತಾ ಬದಲಿಗೆ ಪ್ರೈಮ್ ಶೋಗಳನ್ನ ನೀಡದ ಮಲ್ಟಿಪ್ಲೆಕ್ಸ್‌‌ಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಿ. ನಮ್ಮೂರಲ್ಲಿ ನಮಗೇ ಅನ್ನ ಇಲ್ಲದಿದ್ರೆ ಹೇಗೆ ಅಂತ ಕಿಡಿಕಾರಿದ್ದಾರೆ.
ಇಷ್ಟೆಲ್ಲಾ ಆದ್ರೂ ಸಹ ರಚಿತಾ ರಾಮ್ ಮಾತ್ರ ಮೌನವಾಗಿದ್ದಾರೆ. ಅಂದಹಾಗೆ ರಚಿತಾ ನಿಜಕ್ಕೂ ಪ್ರಮೋಷನ್ಸ್‌ಗೆ ಹೋಗಿಲ್ವಾ ಅಂದ್ರೆ ನೋ.. ಅದು ಸುಳ್ಳು. ಆಕೆ ಸಿನಿಮಾದ ಪ್ರಮೋಷನ್ಸ್ನಲ್ಲಿ ಭಾಗಿಯಾಗಿದ್ದಾರೆ. ಟೀಸರ್, ಟ್ರೈಲರ್, ಸಾಂಗ್ ಲಾಂಚ್, ಪ್ರೀ ರಿಲೀಸ್ ಇವೆಂಟ್ ಸೇರಿದಂತೆ ಪ್ರತಿಯೊಂದು ಕಾರ್ಯಕ್ರಮದಲ್ಲೂ ಭಾಗಿಯಾಗಿದ್ದಾರೆ. ಆಕೆಯ ಬದಲಿಗೆ ಅವ್ರ ಡೈ ಹಾರ್ಡ್ ಫ್ಯಾನ್ಸ್ ಎಲ್ಲಾ ಪ್ರಮೋಷನ್ಸ್‌ನ ಒಂದು ದೃಶ್ಯಗುಚ್ಚ ತಯಾರಿಸಿ, ಇದೆಲ್ಲವೂ ಪ್ರಮೋಷನ್ಸ್ ಅಲ್ಲದೆ ಮತ್ತೇನು ಅಂತ ಆರೋಪ ಮಾಡಿದ ಟೀಂಗೆ ತಿರುಗೇಟು ನೀಡಿದ್ದಾರೆ.
ಅಂದಹಾಗೆ ಜೂನ್ 5ಕ್ಕೆ ರೀ-ರಿಲೀಸ್ ಆದ ಸಿನಿಮಾನ ವೀಕ್ಷಿಸುವಂತೆ ಜೂನ್ 1ರಂದು ತಮ್ಮ ಇನ್ಸ್‌ಟಾ ಪೇಜ್‌‌ನಲ್ಲಿ ವೈಯಕ್ತಿಕವಾಗಿ ವಿಡಿಯೋ ಪೋಸ್ಟ್ ಮಾಡಿ, ಪ್ರಮೋಷನ್ಸ್ ಮಾಡಿದ್ರು. ಅಲ್ಲದೆ, ರಿಲೀಸ್ ಪ್ರಮೋಷನ್ಸ್ನಲ್ಲಿ ಭಾಗಿಯಾಗಿದ್ದ ನಟಿ ರೀ-ರಿಲೀಸ್‌ನಲ್ಲೂ ಭಾಗಿಯಾಗಲೇ ಬೇಕು ಅಂತೇನಿಲ್ಲ. ಅದು ನಿರ್ದೇಶಕ- ನಿರ್ಮಾಪಕ ಹಾಗೂ ಕಲಾವಿದರ ನಡುವಿನ ಬಾಂಡಿಂಗ್ ಮೇಲೆ ಡಿಪೆಂಡ್ ಆಗುತ್ತೆ. ಅವರ ನಡುವೆ ಒಳ್ಳೆಯ ಬಾಂಧವ್ಯ ಇದ್ರೆ ಕಂಡಿತಾ ಭಾಗಿಯಾಗ್ತಿದ್ರು ಅನಿಸುತ್ತೆ.
ಅಲ್ಲದೆ, ರಚಿತಾ ರಾಮ್ ತಮ್ಮ 12 ವರ್ಷಗಳ ಕರಿಯರ್ನಲ್ಲಿ 37ಕ್ಕೂ ಅಧಿಕ ಚಿತ್ರಗಳನ್ನ ಮಾಡಿದ್ದಾರೆ. ಎಲ್ಲೂ ಕಾಂಟ್ರವರ್ಸಿ ಮಾಡಿಕೊಂಡವರಲ್ಲ. ಸದ್ಯ ಕಿರುತೆರೆ ಹಾಗೂ ಬೆಳ್ಳಿತೆರೆ ಎರಡರಲ್ಲೂ ಬ್ಯುಸಿ ಆಗಿದ್ದಾರೆ. ಶಬರಿ ಸರ್ಚಿಂಗ್ ಫಾರ್ ರಾವಣ, ಲವ್ ಮೀ or ಹೇಟ್ ಮೀ, ಅಯೋಗ್ಯ-2, ಕಲ್ಟ್, ದುನಿಯಾ ವಿಜಯ್ ಜೊತೆಗಿನ ಲ್ಯಾಂಡ್ ಲಾರ್ಡ್.. ಹೀಗೆ ಒಂದಲ್ಲ ಎರಡಲ್ಲ ಐದೈದು ಸಿನಿಮಾಗಳಲ್ಲಿ ಬ್ಯುಸಿ ಆಗಿದ್ದಾರೆ. ಭರ್ಜರಿ ಬ್ಯಾಚುಲರ್ಸ್‌ ಜಡ್ಜ್ ಆಗಿಯೂ ಕಾರ್ಯ ನಿರ್ವಹಿಸುತ್ತಿದ್ದಾರೆ.
ಕಮಲ್ ಹಾಸನ್ ವಿವಾದಕ್ಕೆಲ್ಲಾ ರಿಯಾಕ್ಟ್ ಮಾಡಿದ್ದ ರಚಿತಾ, ತನ್ನದೆ ಸಿನಿಮಾದ ಪ್ರಮೋಷನ್ಸ್‌ಗೆ ಹೋಗಿಲ್ಲ ಅಂದ್ರೆ ಆ ನಿರ್ದೇಶಕ, ನಿರ್ಮಾಪಕರ ಜೊತೆ ಆಕೆಯ ಸ್ನೇಹ, ಸಂಬಂಧ ಸರಿಯಿಲ್ಲ ಅನ್ನೋದು ಕಾತರಿ ಆಗ್ತಿದೆ. ಇದನ್ನು ರಾದ್ಧಾಂತ ಮಾಡಿ, ಆಕೆಯ ಹೆಸರಿಗೆ ಕಪ್ಪು ಚುಕ್ಕೆ ತರೋಕೆ ಮುನ್ನ ಪರಸ್ಪರ ಮಾತುಕತೆ ಮೂಲಕ ಬಗೆಹರಿಸಿಕೊಳ್ಳುವುದು ಆರೋಗ್ಯಕರ ಅನಿಸಿದೆ. ಎಲ್ಲಕ್ಕಿಂತ ಮಿಗಿಲಾಗಿ ಸಿನಿಮಾ ಚೆನ್ನಾಗಿದ್ರೆ ಯಾರೂ ಪ್ರಮೋಷನ್ಸ್ ಮಾಡಬೇಕಿಲ್ಲ. ಜನರೇ ಮೌತ್ ಟಾಕ್ ಮೂಲಕ ಚಿತ್ರವನ್ನು ನೋಡ್ತಾರೆ, ಗೆಲ್ಲಿಸ್ತಾರೆ.
