ಟೀಂ ಇಂಡಿಯಾದ ಮಾಜಿ ಕ್ರಿಕೆಟಿಗ ಮತ್ತು ಐಪಿಎಲ್ ವೀಕ್ಷಕ ವಿವರಣೆಗಾರ ಸಂಜಯ್ ಬಂಗಾರ್ ಅವರ ಮಗಳು ಅನನ್ಯಾ ಬಂಗಾರ್, ಕೆಲವು ಭಾರತೀಯ ಕ್ರಿಕೆಟಿಗರ ಮೇಲೆ ಲೈಂಗಿಕ ಕಿರುಕುಳದ ಗಂಭೀರ ಆರೋಪಗಳನ್ನು ಮಾಡಿದ್ದಾರೆ. ಖಾಸಗಿ ಮಾಧ್ಯಮಕ್ಕೆ ನೀಡಿದ ಸಂದರ್ಶನದಲ್ಲಿ ಅನನ್ಯಾ, ಕೆಲ ಕ್ರಿಕೆಟಿಗರು ತಮಗೆ ಅಶ್ಲೀಲ ಚಿತ್ರಗಳನ್ನು ಕಳುಹಿಸಿದ್ದು, ಅನುಚಿತ ವರ್ತನೆ ತೋರಿದ್ದಾರೆ ಎಂದು ಆರೋಪಿಸಿದ್ದಾರೆ. ಈ ಸಂದರ್ಶನ ಇದೀಗ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದು, ಕ್ರಿಕೆಟ್ ಜಗತ್ತಿನಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ.
ಅನನ್ಯಾ ಬಂಗಾರ್ ತಮ್ಮ ಸಂದರ್ಶನದಲ್ಲಿ ತಾವು ಎದುರಿಸಿದ ಮಾನಸಿಕ ವೇದನೆಯನ್ನು ವಿವರಿಸಿದ್ದಾರೆ. “ಕೆಲ ಕ್ರಿಕೆಟಿಗರು ತಮ್ಮ ಖಾಸಗಿ ಅಂಗಾಂಗಳ ಚಿತ್ರಗಳನ್ನು ನನಗೆ ಕಳುಹಿಸುತ್ತಿದ್ದರು. ಇನ್ನು ಕೆಲವರು, ‘ಬಾ, ಕಾರಿನಲ್ಲಿ ಹೋಗೋಣ ಮಾಡೋಣ’ ಎಂದು ಹೇಳುತ್ತಿದ್ದರು. ಕೆಲವರು ಎಲ್ಲರ ಮುಂದೆ ನನ್ನನ್ನು ನಿಂದಿಸಿ, ನಂತರ ಫೋಟೋ ಕೇಳುತ್ತಿದ್ದರು,” ಎಂದು ಅವರು ಆರೋಪಿಸಿದ್ದಾರೆ. ಒಬ್ಬ ಸ್ಟಾರ್ ಕ್ರಿಕೆಟಿಗ ತಮ್ಮೊಂದಿಗೆ ಸಂಬಂಧ ಬಯಸಿದ್ದ ಎಂದೂ ಅನನ್ಯಾ ತಿಳಿಸಿದ್ದಾರೆ.
ಅನನ್ಯಾ ಬಂಗಾರ್ ತಾವು ಲಿಂಗ ಬದಲಾವಣೆ (ಟ್ರಾನ್ಸ್ಜೆಂಡರ್) ಮಾಡಿಕೊಂಡಿರುವ ಬಗ್ಗೆಯೂ ಮಾತನಾಡಿದ್ದಾರೆ. ಈ ಮೊದಲು ಹುಡುಗನಾಗಿದ್ದ ಅನನ್ಯಾ, ಈಗ ಹುಡುಗಿಯಾಗಿ ಬದಲಾಗಿದ್ದಾರೆ. ದೀರ್ಘಕಾಲ ಲಂಡನ್ನಲ್ಲಿ ವಾಸವಾಗಿದ್ದ ಅವರು, ಇತ್ತೀಚೆಗೆ ಭಾರತಕ್ಕೆ ಮರಳಿದ್ದಾರೆ. “ನಾನು 8-9 ವರ್ಷದವಳಿದ್ದಾಗ, ತಾಯಿಯ ಬಟ್ಟೆಗಳನ್ನು ಧರಿಸುತ್ತಿದ್ದೆ. ನನಗೆ ಯಾವಾಗಲೂ ನಾನು ಹುಡುಗಿಯೇ ಎಂದು ಅನಿಸುತ್ತಿತ್ತು,” ಎಂದು ಅವರು ಹೇಳಿದ್ದಾರೆ. ಲಿಂಗ ಬದಲಾವಣೆಯ ನಿರ್ಧಾರದ ಬಗ್ಗೆ ತಂದೆ ಸಂಜಯ್ ಬಂಗಾರ್ರ ಆತಂಕವನ್ನೂ ಅನನ್ಯಾ ಉಲ್ಲೇಖಿಸಿದ್ದಾರೆ. “ನೀನು ಲಿಂಗ ಬದಲಾಯಿಸಿದರೆ ಕ್ರಿಕೆಟ್ ಬಿಡಬೇಕಾಗುತ್ತದೆ, ಜನ ನಮ್ಮ ಬಗ್ಗೆ ಏನೆಲ್ಲ ಮಾತನಾಡುತ್ತಾರೆ ಎಂದು ತಂದೆ ಹೇಳಿದ್ದರು,” ಎಂದು ಅವರು ತಿಳಿಸಿದ್ದಾರೆ.
ಕ್ರಿಕೆಟ್ನಲ್ಲಿ ಸಕ್ರಿಯವಾಗಿದ್ದ ಅನನ್ಯಾ, ಐಪಿಎಲ್ನಲ್ಲಿ ಇಂದು ಖ್ಯಾತರಾಗಿರುವ ಕೆಲ ಆಟಗಾರರೊಂದಿಗೆ ಆಡಿದ್ದಾರೆ. 14 ವರ್ಷದೊಳಗಿನ ಕ್ರಿಕೆಟ್ನಲ್ಲಿ ಮುಶೀರ್ ಖಾನ್ ಜೊತೆ ಆಡಿದ್ದ ಅವರು, ಸರ್ಫರಾಜ್ ಖಾನ್ ಮತ್ತು ಯಶಸ್ವಿ ಜೈಸ್ವಾಲ್ ಅವರೊಂದಿಗೂ ವಯೋಮಾನದ ಕ್ರಿಕೆಟ್ನಲ್ಲಿ ಭಾಗವಹಿಸಿದ್ದಾರೆ.
ಲಿಂಗ ಬದಲಾವಣೆಯ ನಂತರ ಕ್ರಿಕೆಟ್ನಲ್ಲಿ ತಮ್ಮ ಸ್ಥಾನದ ಬಗ್ಗೆ ಬೇಸರ ವ್ಯಕ್ತಪಡಿಸಿರುವ ಅನನ್ಯಾ, “ನನ್ನ ಟೆಸ್ಟೋಸ್ಟೆರಾನ್ ಮಟ್ಟವು ಸಾಮಾನ್ಯ ಮಹಿಳೆಯಂತೆ ಇದೆ. ಆದರೂ ಟ್ರಾನ್ಸ್ಜೆಂಡರ್ಗಳಿಗೆ ಮಹಿಳಾ ಕ್ರಿಕೆಟ್ನಲ್ಲಿ ಆಡಲು ಅವಕಾಶ ನೀಡದಿರುವುದು ನಿರಾಸೆ ತಂದಿದೆ,” ಎಂದಿದ್ದಾರೆ. ಮಹಿಳಾ ಕ್ರಿಕೆಟ್ನಲ್ಲಿ ಆಡಲು ಅವಕಾಶ ನೀಡಬೇಕೆಂಬ ಬೇಡಿಕೆಯನ್ನು ಅವರು ಮುಂದಿಟ್ಟಿದ್ದಾರೆ, ಇದು ಕ್ರೀಡಾ ನೀತಿಗಳ ಕುರಿತು ಹೊಸ ಚರ್ಚೆಗೆ ದಾರಿ ಮಾಡಿಕೊಟ್ಟಿದೆ.
