ಮ್ಯಾಡ್ರಿಡ್: ಸೂರ್ಯ ಉದಯಿಸಿದಾಗ ಬೆಳಕು ಹರಿಯುತ್ತದೆ, ಸೂರ್ಯಾಸ್ತಮಾನದಿಂದ ಕತ್ತಲಾಗುತ್ತದೆ. ಇದು ಸಹಜ ಪ್ರಕ್ರಿಯೆ. ಆದರೆ ಇದೀಗ ಸ್ಪೇನ್ ದೇಶದ ಪುಟ್ಟ ಹಳ್ಳಿಯೊಂದು ಅಪರೂಪದ ಖಗೋಳ ವಿಸ್ಮಯಕ್ಕೆ ಸಾಕ್ಷಿಯಾಗಲಿದೆ. ಆಗಸ್ಟ್ 12ರಂದು ಒಂದೇ ದಿನ ಎರಡು ಸೂರ್ಯಾಸ್ತಗಳು ಸಂಭವಿಸಲಿವೆ. ಜೊತೆಗೆ ರಾತ್ರಿ ಆಕಾಶದಲ್ಲಿ ಉಲ್ಕಾಪಾತಗಳೂ ನಡೆಯಲಿವೆ.
ಎಲ್ಲಿ ಈ ಅಪರೂಪದ ದೃಶ್ಯ?
ಸ್ಪೇನ್ ದೇಶದ ಬರ್ಗೋಸ್ ಪ್ರಾಂತ್ಯದಲ್ಲಿರುವ ಅವೆಲನೋಸಾ ಡಿ ಮುಣೋ (Avelanosa de Muñó) ಎಂಬ ಪುಟ್ಟ ಹಳ್ಳಿಯಲ್ಲಿ ಈ ಅಪರೂಪದ ಘಟನೆ ನಡೆಯಲಿದೆ. ಕೇವಲ 10 ಖಾಯಂ ನಿವಾಸಗಳನ್ನು ಹೊಂದಿರುವ ಈ ಸಣ್ಣ ಹಳ್ಳಿಯಲ್ಲಿ ಯಾವುದೇ ಹೋಟೆಲ್, ರೆಸ್ಟೋರೆಂಟ್ ಅಥವಾ ದೊಡ್ಡ ಕಟ್ಟಡಗಳಿಲ್ಲ. ಆದರೆ ಇದೀಗ ಖಗೋಳ ವಿಸ್ಮಯದಿಂದ ಈ ಹಳ್ಳಿ ವಿಶ್ವದ ಗಮನ ಸೆಳೆದಿದೆ.
114 ವರ್ಷಗಳ ಬಳಿಕ ಸ್ಪೇನ್ನಲ್ಲಿ ಸಂಪೂರ್ಣ ಸೂರ್ಯಗ್ರಹಣ
ಆಗಸ್ಟ್ 12 ರಂದು ಸ್ಪೇನ್ನಲ್ಲಿ ಸಂಪೂರ್ಣ ಸೂರ್ಯಗ್ರಹಣ (Total Solar Eclipse) ಸಂಭವಿಸುತ್ತಿದೆ. ಬರೋಬ್ಬರಿ 114 ವರ್ಷಗಳ ಬಳಿಕ ಸ್ಪೇನ್ನಲ್ಲಿ ಸಂಪೂರ್ಣ ಸೂರ್ಯಗ್ರಹಣ ನಡೆಯುತ್ತಿದೆ. ಸಂಜೆ ವೇಳೆಗೆ ಈ ಸೂರ್ಯಗ್ರಹಣ ಘಟಿಸಲಿದ್ದು, ಈ ವೇಳೆ ಸಂಪೂರ್ಣ ಕತ್ತಲು ಆವರಿಸಲಿದೆ.
ಸೂರ್ಯಗ್ರಹಣದ ಅವಧಿ ಮುಗಿದ ಬಳಿಕ ಸೂರ್ಯ ಮತ್ತೆ ಬೆಳಕು ಚೆಲ್ಲಿ ಹೊರಬರಲಿದ್ದಾನೆ. ಆದರೆ ಕೆಲವೇ ನಿಮಿಷಗಳಲ್ಲಿ ಸೂರ್ಯಾಸ್ತ ಸಂಭವಿಸಲಿದೆ. ಹೀಗಾಗಿ ಇಲ್ಲಿನ ಗ್ರಾಮಸ್ಥರು ಮತ್ತು ಪ್ರವಾಸಿಗರು ಕೆಲವೇ ನಿಮಿಷಗಳ ಅಂತರದಲ್ಲಿ ಎರಡು ಬಾರಿ ಸೂರ್ಯಾಸ್ತ ವನ್ನು ವೀಕ್ಷಿಸಲಿದ್ದಾರೆ.
ಎರಡು ಸೂರ್ಯಾಸ್ತ ಹೇಗೆ?
ಸೂರ್ಯಗ್ರಹಣದ ಸಮಯದಲ್ಲಿ ಸಂಪೂರ್ಣ ಕತ್ತಲು ಆವರಿಸುತ್ತದೆ (ಮೊದಲ ಸೂರ್ಯಾಸ್ತದ ಅನುಭವ). ಸೂರ್ಯಗ್ರಹಣ ಮುಗಿದ ಬಳಿಕ ಸೂರ್ಯನ ಬೆಳಕು ಮತ್ತೆ ಹರಿಯುತ್ತದೆ. ಕೆಲವೇ ನಿಮಿಷಗಳ ತರುವಾಯ ಎಂದಿನಂತೆ ಸೂರ್ಯಾಸ್ತಮಾನವಾಗಲಿದೆ (ಎರಡನೇ ಸೂರ್ಯಾಸ್ತ). ಈ ಅಪರೂಪದ ದೃಶ್ಯಕ್ಕಾಗಿ ಈಗಾಗಲೇ ವಿಜ್ಞಾನಿಗಳು, ಖಗೋಳ ಪ್ರೇಮಿಗಳು ಮತ್ತು ಪ್ರವಾಸಿಗರು ಅವೆಲನೋಸಾ ಡಿ ಮುಣೋ ಗ್ರಾಮಕ್ಕೆ ಧಾವಿಸುತ್ತಿದ್ದಾರೆ.
ರಾತ್ರಿಯ ಆಕಾಶದಲ್ಲಿ ಪರ್ಸೀಡ್ಸ್ ಉಲ್ಕಾಪಾತ
ಎರಡು ಸೂರ್ಯಾಸ್ತಗಳ ದೃಶ್ಯವನ್ನು ಅನುಭವಿಸಿದ ಬಳಿಕ, ರಾತ್ರಿ ಆಕಾಶದಲ್ಲಿ ಪರ್ಸೀಡ್ಸ್ ಉಲ್ಕಾಪಾತ (Perseids Meteor Shower) ಆರಂಭವಾಗಲಿದೆ. ಆಕಾಶದಲ್ಲಿ ನಕ್ಷತ್ರಗಳು ಕೆಳಕ್ಕೆ ಬಿದ್ದಂತೆ ಕೋಟಿ ಕೋಟಿ ಬೆಳಕಿನ ಕಿಡಿಗಳು ಚಿಮ್ಮುವ ಉಲ್ಕಾಪಾತ ದೃಶ್ಯಗಳು ಗೋಚರಿಸಲಿವೆ. ಸೂರ್ಯಾಸ್ತ ಹಾಗೂ ಉಲ್ಕಾಪಾತವು ಒಂದೇ ದಿನ, ಒಂದೇ ಸ್ಥಳದಲ್ಲಿ ನಡೆಯುವುದು ಇನ್ನಷ್ಟು ವಿಶೇಷವಾಗಿದೆ.
ಹಳ್ಳಿಯ ಸರಳತೆ ಮತ್ತು ಸೌಂದರ್ಯ
ಅವೆಲನೋಸಾ ಡಿ ಮುಣೋ ಗ್ರಾಮವು ಅತ್ಯಂತ ಪುಟ್ಟ ಹಳ್ಳಿಯಾಗಿದ್ದು, ಕೇವಲ 10 ಖಾಯಂ ನಿವಾಸಗಳಿವೆ. ಇಲ್ಲಿನ ಜೀವನ ಸರಳ, ಶಾಂತ ಮತ್ತು ಸುಂದರ. ಯಾವುದೇ ಹೊಟೆಲ್, ರೆಸ್ಟೋರೆಂಟ್ ಅಥವಾ ದೊಡ್ಡ ಕಟ್ಟಡಗಳಿಲ್ಲದಿರುವುದು ಈ ಹಳ್ಳಿಯ ವಿಶೇಷ. ಆದರೆ ಇದೀಗ ಖಗೋಳ ವಿಸ್ಮಯದಿಂದಾಗಿ ಈ ಸಣ್ಣ ಹಳ್ಳಿ ವಿಶ್ವಾದ್ಯಂತ ಪ್ರಸಿದ್ಧವಾಗಿದೆ.
ಈ ಅಪರೂಪದ ಘಟನೆಯನ್ನು ಅಧ್ಯಯನ ಮಾಡಲು ವಿಶ್ವದಾದ್ಯಂತದ ಖಗೋಳ ವಿಜ್ಞಾನಿಗಳು ಈಗಾಗಲೇ ಅವೆಲನೋಸಾ ಡಿ ಮುಣೋಗೆ ಧಾವಿಸುತ್ತಿದ್ದಾರೆ. ಸೂರ್ಯಗ್ರಹಣ, ಎರಡು ಸೂರ್ಯಾಸ್ತ ಮತ್ತು ಉಲ್ಕಾಪಾತವನ್ನು ಒಂದೇ ಸ್ಥಳದಲ್ಲಿ ಅಧ್ಯಯನ ಮಾಡಲು ಇದು ಅದ್ಭುತ ಅವಕಾಶವಾಗಿದೆ.
