ಟೆಕ್ನಾಲಜಿ ಪ್ರಿಯರಿಗೆ ಒಂದಷ್ಟು ಕೆಟ್ಟ ಸುದ್ದಿಯಿದೆ. ಕೃತಕ ಬುದ್ಧಿಮತ್ತೆ (Artificial Intelligence – AI) ಹೆಚ್ಚಿನ ಬೇಡಿಕೆಯಿಂದಾಗಿ ಮೊಬೈಲ್ ಫೋನ್ ಮತ್ತು ಲ್ಯಾಪ್ಟಾಪ್ಗಳ ಬೆಲೆಗಳಲ್ಲಿ ಭಾರೀ ಏರಿಕೆಯಾಗಲಿದೆ. ಮೆಮೊರಿ ಚಿಪ್ಗಳ ಕೊರತೆ ಮತ್ತು ಎಐ ಡೇಟಾ ಸೆಂಟರ್ಗಳಿಗೆ ಅಧಿಕ ಬೇಡಿಕೆಯಿಂದಾಗಿ ಈ ಬೆಲೆ ಏರಿಕೆಯಾಗುತ್ತಿದ್ದು, ಸಾಮಾನ್ಯ ಗ್ರಾಹಕರಿಗೂ ಇದರ ಪರಿಣಾಮ ಎದುರಾಗಲಿದೆ.
ಏಕೆ ಬೆಲೆ ಏರಿಕೆಯಾಗುತ್ತಿದೆ?
ಇತ್ತೀಚಿನ ದಿನಗಳಲ್ಲಿ ಕೃತಕ ಬುದ್ಧಿಮತ್ತೆಯ ಬೇಡಿಕೆ ಹೆಚ್ಚಾಗಿದೆ. ಎಐಗೆ ಹೆಚ್ಚಿನ ಪ್ರಮಾಣದ ಮೆಮೊರಿ ಚಿಪ್ಗಳು ಬೇಕಾಗುತ್ತವೆ. ಎಐ ಡೇಟಾ ಸೆಂಟರ್ಗಳು ಮತ್ತು ಸರ್ವರ್ಗಳು ದೊಡ್ಡ ಮಟ್ಟದಲ್ಲಿ ಈ ಚಿಪ್ಗಳನ್ನು ಬಳಸುತ್ತಿವೆ. ಇದರಿಂದಾಗಿ ಚಿಪ್ ಮಾರುಕಟ್ಟೆಯಲ್ಲಿ ಬೇಡಿಕೆ ಮತ್ತು ಪೂರೈಕೆಯ ಅಂತರವು ಹೆಚ್ಚುತ್ತಿದೆ. ಹಾಗಾಗಿ ಮೆಮೊರಿ ಚಿಪ್ಗಳ ಬೆಲೆಯಲ್ಲಿ ಭಾರೀ ಏರಿಕೆಯಾಗಿದೆ.
ವರದಿಗಳ ಪ್ರಕಾರ, ಮುಂದಿನ ಕೆಲವೇ ತಿಂಗಳುಗಳಲ್ಲಿ ಈ ಬೆಲೆ ಏರಿಕೆಯ ಪ್ರಭಾವ ನೇರವಾಗಿ ಮೊಬೈಲ್ ಮತ್ತು ಲ್ಯಾಪ್ಟಾಪ್ ಮಾರುಕಟ್ಟೆಯ ಮೇಲೆ ಆಗಲಿದೆ. ಸ್ಮಾರ್ಟ್ಫೋನ್ಗಳು ಮತ್ತು ಲ್ಯಾಪ್ಟಾಪ್ಗಳ ತಯಾರಿಕೆಯಲ್ಲಿ ಬಳಸುವ DRAM ಮತ್ತು NAND ಫ್ಲಾಷ್ ಮೆಮೊರಿ ಚಿಪ್ಗಳು ಈಗಾಗಲೇ ದುಬಾರಿಯಾಗುತ್ತಿವೆ.
ಯಾವ ಕಂಪನಿಗಳಿಗೆ ಪರಿಣಾಮ?
ಆಪಲ್, ಸ್ಯಾಮ್ಸಂಗ್, ಡೆಲ್, ಹೆಚ್ಪಿ, ಲೆನೋವೋ ಸೇರಿದಂತೆ ಪ್ರಮುಖ ಟೆಕ್ ಕಂಪನಿಗಳು ಈಗಾಗಲೇ ತಮ್ಮ ಉತ್ಪನ್ನಗಳ ಬೆಲೆಯನ್ನು ಪರಿಶೀಲಿಸುತ್ತಿವೆ. ವರದಿಗಳ ಪ್ರಕಾರ, ಆಪಲ್ ತನ್ನ ಮುಂಬರುವ ಐಫೋನ್ ಮತ್ತು ಮ್ಯಾಕ್ ಸರಣಿಯ ಬೆಲೆಯನ್ನು ಶೇ. 10-15ರಷ್ಟು ಹೆಚ್ಚಿಸಬಹುದು. ಅಂತೆಯೇ, ಸ್ಯಾಮ್ಸಂಗ್, ಗೂಗಲ್ ಮತ್ತು ಇತರ ಆಂಡ್ರಾಯ್ಡ್ ಫೋನ್ಗಳ ಬೆಲೆಯಲ್ಲೂ ಗಣನೀಯ ಏರಿಕೆ ಆಗುವ ಸಾಧ್ಯತೆಯಿದೆ.
ಲ್ಯಾಪ್ಟಾಪ್ ಮಾರುಕಟ್ಟೆಯಲ್ಲೂ ಇದೇ ಸ್ಥಿತಿ ಎದುರಾಗಲಿದೆ. ಐಮ್ಯಾಕ್, ಮ್ಯಾಕ್ಬುಕ್, ಡೆಲ್ ಇನ್ಸ್ಪೈರಾನ್, ಹೆಚ್ಪಿ ಪ್ಯಾವಿಲಿಯನ್ ಸೇರಿದಂತೆ ಹಲವು ಪಾಪುಲರ್ ಲ್ಯಾಪ್ಟಾಪ್ ಗಳ ಬೆಲೆ ಏರಿಕೆಯಾಗಲಿದೆ ಎಂದು ಮೂಲಗಳು ತಿಳಿಸಿವೆ. ಬಿಡಿಭಾಗಗಳ ಬೆಲೆ ಏರಿಕೆಯು ಸಿದ್ಧ ಉತ್ಪನ್ನಗಳ ಮೇಲೆ ನೇರ ಪರಿಣಾಮ ಬೀರುತ್ತಿದೆ.
RAM ಕಡಿತವೂ ಸಾಧ್ಯತೆ!
ಬೆಲೆ ಏರಿಕೆ ಜೊತೆಗೆ, ಕಡಿಮೆ ಬೆಲೆಯ ಮೊಬೈಲ್ಗಳಲ್ಲಿ RAM (ರ್ಯಾಂಡಮ್ ಆಕ್ಸೆಸ್ ಮೆಮೊರಿ) ಪ್ರಮಾಣವನ್ನು ಕಡಿತ ಮಾಡುವ ಸಾಧ್ಯತೆಯೂ ಇದೆ. ಅಂದರೆ, ನೀವು ಅಗ್ಗದ ದರದಲ್ಲಿ ಫೋನ್ ಖರೀದಿಸಿದರೆ, ಅದರ RAM 4GB ಅಥವಾ 6GBನಿಂದ 3GB ಅಥವಾ 4GBಗೆ ಇಳಿಕೆಯಾಗಬಹುದು. ಇದು ಮೊಬೈಲ್ ಪರ್ಫಾರ್ಮೆನ್ಸ್ನ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿದೆ.
ಗ್ರಾಹಕರಿಗೇನು ಪರಿಣಾಮ?
ಈ ಬೆಲೆ ಏರಿಕೆಯ ಪೂರ್ಣ ಹೊರೆ ಗ್ರಾಹಕರ ಮೇಲೆಯೇ ಬೀಳಲಿದೆ. ನೀವು ಈಗಾಗಲೇ ಹೊಸ ಫೋನ್ ಅಥವಾ ಲ್ಯಾಪ್ಟಾಪ್ ಖರೀದಿಸಲು ಯೋಜಿಸುತ್ತಿದ್ದರೆ, ಸಾಧ್ಯವಾದಷ್ಟು ಬೇಗ ಖರೀದಿಸುವುದು ಉತ್ತಮ. ಮುಂದಿನ ಕೆಲವೇ ತಿಂಗಳುಗಳಲ್ಲಿ ಬೆಲೆಗಳು ಗಣನೀಯವಾಗಿ ಏರಿಕೆಯಾಗುವ ಸಾಧ್ಯತೆಯಿದೆ.
ಟೆಕ್ ಕಂಪನಿಗಳು ಚಿಪ್ ಕೊರತೆಯನ್ನು ನಿವಾರಿಸಲು ಪೂರೈಕೆ ಸರಪಳಿಯನ್ನು ಬಲಪಡಿಸುವತ್ತ ಗಮನಹರಿಸಿದ್ದರೂ, ಎಐಯ ವೇಗದ ಬೆಳವಣಿಗೆಯು ಅದಕ್ಕಿಂತಲೂ ಮುಂಚೆಯೇ ಬೇಡಿಕೆಯನ್ನು ಹೆಚ್ಚಿಸುತ್ತಿದೆ. ಹೀಗಾಗಿ ಕನಿಷ್ಠ ಮುಂದಿನ 1-2 ವರ್ಷಗಳ ವರೆಗೆ ಮೊಬೈಲ್ ಮತ್ತು ಲ್ಯಾಪ್ಟಾಪ್ ದರಗಳು ಕಡಿಮೆಯಾಗುವ ಸಾಧ್ಯತೆ ಕಡಿಮೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
