ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡ ಸತತ ಎರಡನೇ ಬಾರಿಗೆ ಐಪಿಎಲ್ ಟ್ರೋಫಿ ಗೆದ್ದು ಇತಿಹಾಸ ನಿರ್ಮಿಸಿದೆ. ಈ ಐತಿಹಾಸಿಕ ಗೆಲುವಿನ ಬೆನ್ನಲ್ಲೇ ಸಾಮಾಜಿಕ ಜಾಲತಾಣಗಳಲ್ಲಿ ಟ್ರೆಂಡ್ ಆಗುತ್ತಿರುವುದು ಆರ್ಸಿಬಿ ತಂಡದ ಆಟಗಾರರಷ್ಟೇ ಅಲ್ಲ, ನಟಿ ಹಾಗೂ ವಿರಾಟ್ ಕೊಹ್ಲಿ ಪತ್ನಿ ಅನುಷ್ಕಾ ಶರ್ಮಾ (Anushka Sharma)! ಹೌದು, ಆರ್ಸಿಬಿ ಅಭಿಮಾನಿಗಳು ಇದೀಗ ಅನುಷ್ಕಾ ಅವರನ್ನು ತಂಡದ ‘ಲಕ್ಕಿ ಚಾರ್ಮ್’ (Lucky Charm) ಮತ್ತು ‘ಅದೃಷ್ಟ ದೇವತೆ’ ಎಂದು ಕೊಂಡಾಡುತ್ತಿದ್ದಾರೆ.
ಅಂದು ಟ್ರೋಲ್ ಮಾಡಿದವರ ಬಾಯಿ ಮುಚ್ಚಿಸಿದ ಕಾಲಚಕ್ರ!
ಒಂದು ಕಾಲವಿತ್ತು, ವಿರಾಟ್ ಕೊಹ್ಲಿ ಮತ್ತು ಅನುಷ್ಕಾ ಶರ್ಮಾ ಮದುವೆಯಾದ ಆರಂಭದಲ್ಲಿ ಅನುಷ್ಕಾ ಪಂದ್ಯ ವೀಕ್ಷಿಸಲು ಮೈದಾನಕ್ಕೆ ಬಂದಾಗಲೆಲ್ಲಾ, ಕೊಹ್ಲಿ ವಿಫಲರಾದರೆ ಸಾಕು ನೆಟ್ಟಿಗರು ಅನುಷ್ಕಾ ಅವರನ್ನೇ ಗುರಿಮಾಡಿ ತೀವ್ರವಾಗಿ ಟ್ರೋಲ್ ಮಾಡುತ್ತಿದ್ದರು. ಆಕೆ ಮೈದಾನಕ್ಕೆ ಬರುವುದೇ ಆರ್ಸಿಬಿಗೆ ಅಶುಭ ಎಂದು ದೂಷಿಸುತ್ತಿದ್ದರು. ಆದರೆ ಈಗ ಕಾಲ ಬದಲಾಗಿದೆ. ಅಂದು ದೂಷಿಸಿದವರೇ ಇಂದು ಆಕೆಯನ್ನು ಆರ್ಸಿಬಿಯ ಅದೃಷ್ಟದ ದೇವತೆ ಎಂದು ಜೈಕಾರ ಹಾಕುತ್ತಿದ್ದಾರೆ.
ಮೈದಾನದಲ್ಲಿ ಕೊಹ್ಲಿ ‘ಫ್ಲೈಯಿಂಗ್ ಕಿಸ್’, ಗ್ಯಾಲರಿಯಲ್ಲಿ ಅನುಷ್ಕಾ ಸಂಭ್ರಮ!
ಅಹಮದಾಬಾದ್ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಭಾನುವಾರ ನಡೆದ ಹೈವೋಲ್ಟೇಜ್ ಫೈನಲ್ ಪಂದ್ಯದಲ್ಲಿ ಶುಭ್ಮನ್ ಗಿಲ್ ನೇತೃತ್ವದ ಗುಜರಾತ್ ಟೈಟನ್ಸ್ ತಂಡವನ್ನು ಆರ್ಸಿಬಿ ಧೂಳೀಪಟ ಮಾಡಿತು. ಈ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಅದ್ಭುತ ಬ್ಯಾಟಿಂಗ್ ಪ್ರದರ್ಶಿಸಿ ‘ಪ್ಲೇಯರ್ ಆಫ್ ದಿ ಮ್ಯಾಚ್’ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡರು.
ವಮಿಕಾ-ಅಕಾಯ್ ಎಂಟ್ರಿ, ಬದಲಾಯ್ತು ಆರ್ಸಿಬಿ ಅದೃಷ್ಟ!
ಮಕ್ಕಳಾದ ವಮಿಕಾ ಮತ್ತು ಅಕಾಯ್ ಜನನದ ಬಳಿಕ ಅನುಷ್ಕಾ ಶರ್ಮಾ ಸ್ಟೇಡಿಯಂಗೆ ಬರುವುದು ತೀರಾ ಕಡಿಮೆಯಾಗಿತ್ತು. ಆದರೆ, ಈ ಸೀಸನ್ನಲ್ಲಿ ಅವರು ನಿಯಮಿತವಾಗಿ ಪಂದ್ಯ ವೀಕ್ಷಿಸಲು ಮೈದಾನಕ್ಕೆ ಮರಳಿದ್ದಾರೆ. “ಅನುಷ್ಕಾ ಗ್ಯಾಲರಿಯಲ್ಲಿದ್ದರೆ ಸಾಕು ಎದುರಾಳಿ ತಂಡಗಳು ಧೂಳೀಪಟವಾಗುತ್ತವೆ. ಅವರು ಮೈದಾನಕ್ಕೆ ಕಂಬ್ಯಾಕ್ ಮಾಡಿದ ಮೇಲೆಯೇ ಆರ್ಸಿಬಿಯ ಗ್ರಹಚಾರ ಸಂಪೂರ್ಣ ಬದಲಾಗಿ ಸತತ 2 ಬಾರಿ ಕಪ್ ಗೆದ್ದಿದೆ” ಎಂದು ಅಭಿಮಾನಿಗಳು ಟ್ವಿಟರ್ ನಲ್ಲಿ ಪೋಸ್ಟ್ಗಳನ್ನು ಹಾಕುತ್ತಿದ್ದಾರೆ. ಸದ್ಯ ಅನುಷ್ಕಾ ಅವರ ಸೆಲೆಬ್ರೇಷನ್ ಫೋಟೋ ಹಾಗೂ ವಿಡಿಯೋಗಳು ಇಂಟರ್ನೆಟ್ನಲ್ಲಿ ಸಖತ್ ವೈರಲ್ ಆಗುತ್ತಿವೆ.
