ಮೊರಾದಾಬಾದ್: ಉತ್ತರ ಪ್ರದೇಶದ ಮೊರಾದಾಬಾದ್ನಲ್ಲಿ ವೈದ್ಯಕೀಯ ಲೋಕವನ್ನೇ ಅಚ್ಚರಿ ಪಡಿಸುವ ಅಪರೂಪದ ಘಟನೆ ಬೆಳಕಿಗೆ ಬಂದಿದೆ. ಮಹಿಳೆಯೊಬ್ಬರು ಐದು ದಿನಗಳ ಅಂತರದಲ್ಲಿ ನಾಲ್ಕು ಮಕ್ಕಳಿಗೆ ಜನ್ಮ ನೀಡಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ. ಇದರಲ್ಲಿ ಇಬ್ಬರು ಗಂಡು ಮಕ್ಕಳು ಹಾಗೂ ಇಬ್ಬರು ಹೆಣ್ಣು ಮಕ್ಕಳು ಸೇರಿದ್ದಾರೆ. ಈ ನಾಲ್ಕೂ ಮಕ್ಕಳ ಜನನ ನಾರ್ಮಲ್ ಡೆಲಿವರಿ ಮೂಲಕ ನಡೆದಿರುವುದು ವೈದ್ಯರನ್ನೇ ಆಶ್ಚರ್ಯಚಕಿತರನ್ನಾಗಿಸಿದೆ.
ಸಂಭಲ್ ಜಿಲ್ಲೆಯ ಓವರಿ ಗ್ರಾಮದ ನಿವಾಸಿಯಾಗಿರುವ ಅಮಿನಾ ಎಂಬ ಮಹಿಳೆ ಹೆರಿಗೆಗಾಗಿ ಮೊರಾದಾಬಾದ್ನ ಲೋಧಿಪುರ ಪ್ರದೇಶದಲ್ಲಿರುವ ತೀರ್ಥಂಕರ ಮಹಾವೀರ್ ವಿಶ್ವವಿದ್ಯಾಲಯ ಆಸ್ಪತ್ರೆಗೆ ದಾಖಲಾಗಿದ್ದರು. ಮೇ 9ರಂದು ಅಮಿನಾ ಮೊದಲ ಮಗುವಿಗೆ ಜನ್ಮ ನೀಡಿದರು. ಆದರೆ ವೈದ್ಯರು ನಡೆಸಿದ ಪರಿಶೀಲನೆ ವೇಳೆ ಇನ್ನೂ ಭ್ರೂಣಗಳು ಗರ್ಭದಲ್ಲಿರುವುದು ಪತ್ತೆಯಾಯಿತು. ಬಳಿಕ ಮೇ 14ರಂದು ಉಳಿದ ಮೂವರು ಮಕ್ಕಳೂ ಜನಿಸಿದರು.
ಒಟ್ಟು ಐದು ದಿನಗಳ ಅಂತರದಲ್ಲಿ ನಾಲ್ಕು ಮಕ್ಕಳಿಗೆ ಜನ್ಮ ನೀಡಿದ್ದಾರೆ. ಇದು ವೈದ್ಯಕೀಯ ಕ್ಷೇತ್ರದಲ್ಲಿ ಅಪರೂಪದ ಪ್ರಕರಣವೆಂದು ಹೇಳಲಾಗುತ್ತಿದೆ. ಸಾಮಾನ್ಯವಾಗಿ ಇಂತಹ ಬಹುಭ್ರೂಣ ಗರ್ಭಧಾರಣೆಗಳಲ್ಲಿ ಸಿಜೇರಿಯನ್ ಮೂಲಕ ಹೆರಿಗೆ ನಡೆಸಲಾಗುತ್ತದೆ. ಆದರೆ ಈ ಪ್ರಕರಣದಲ್ಲಿ ಯಾವುದೇ ಶಸ್ತ್ರಚಿಕಿತ್ಸೆ ಮಾಡದೇ ಸಹಜ ಹೆರಿಗೆಯ ಮೂಲಕ ಮಕ್ಕಳನ್ನು ಹೊರತೆಗೆದಿರುವುದು ವೈದ್ಯರ ಸಾಧನೆ ಎಂದು ಮೆಚ್ಚುಗೆ ವ್ಯಕ್ತವಾಗಿದೆ.
ಈ ಹೆರಿಗೆಯ ನೇತೃತ್ವ ವಹಿಸಿದ್ದ ಡಾ. ಶುಭ್ರಾ ಅಗರ್ವಾಲ್ ಮಾತನಾಡಿ, “ನಮ್ಮ ಆಸ್ಪತ್ರೆಯ ಇತಿಹಾಸದಲ್ಲೇ ನಾಲ್ಕು ಮಕ್ಕಳನ್ನು ನಾರ್ಮಲ್ ಡೆಲಿವರಿ ಆದ ಮೊದಲ ಘಟನೆ ಇದಾಗಿದೆ. ತಾಯಿ ಮತ್ತು ಮಕ್ಕಳ ಆರೋಗ್ಯವನ್ನು ಗಮನದಲ್ಲಿಟ್ಟುಕೊಂಡು ಪ್ರತಿಯೊಂದು ಹಂತದಲ್ಲೂ ಅತ್ಯಂತ ಜಾಗರೂಕತೆಯಿಂದ ಚಿಕಿತ್ಸೆ ನೀಡಲಾಗಿದೆ” ಎಂದು ತಿಳಿಸಿದ್ದಾರೆ.
ಗರ್ಭಧಾರಣೆಯ ಮೂರನೇ ತಿಂಗಳಲ್ಲೇ ಅಮಿನಾ ಅವರ ಹೊಟ್ಟೆಯಲ್ಲಿ ನಾಲ್ಕು ಭ್ರೂಣಗಳಿರುವುದು ಅಲ್ಟ್ರಾಸೌಂಡ್ ಸ್ಕ್ಯಾನಿಂಗ್ ವೇಳೆ ಪತ್ತೆಯಾಗಿತ್ತು. ಆ ಬಳಿಕ ವೈದ್ಯರ ವಿಶೇಷ ತಂಡ ನಿರಂತರವಾಗಿ ಆರೋಗ್ಯ ತಪಾಸಣೆ ನಡೆಸುತ್ತಿತ್ತು. ಬಹುಭ್ರೂಣ ಗರ್ಭಧಾರಣೆ ತಾಯಿ ಮತ್ತು ಮಕ್ಕಳಿಬ್ಬರಿಗೂ ಅಪಾಯಕಾರಿಯಾಗಿರುವ ಕಾರಣ, ಆರಂಭದಲ್ಲೇ ವೈದ್ಯರು ‘ಫೀಟಲ್ ರಿಡಕ್ಷನ್’ ಮಾಡುವಂತೆ ಕುಟುಂಬಕ್ಕೆ ಸಲಹೆ ನೀಡಿದ್ದರು. ಅಂದರೆ, ಕೆಲವು ಭ್ರೂಣಗಳ ಸಂಖ್ಯೆಯನ್ನು ಕಡಿಮೆ ಮಾಡುವ ಮೂಲಕ ಉಳಿದ ಮಕ್ಕಳ ಮತ್ತು ತಾಯಿಯ ಜೀವಕ್ಕೆ ಅಪಾಯ ತಪ್ಪಿಸುವ ಪ್ರಯತ್ನ ಮಾಡಬೇಕೆಂದು ವೈದ್ಯರು ತಿಳಿಸಿದ್ದರು.
ಆದರೆ ಅಮಿನಾ ಕುಟುಂಬ ಈ ಅಪಾಯವನ್ನು ಎದುರಿಸಿ ಗರ್ಭಧಾರಣೆಯನ್ನು ಮುಂದುವರಿಸಲು ತೀರ್ಮಾನಿಸಿತು. ಕುಟುಂಬದ ನಿರ್ಧಾರವನ್ನು ಗೌರವಿಸಿದ ವೈದ್ಯರು ಸಂಪೂರ್ಣ ಎಚ್ಚರಿಕೆಯಿಂದ ಚಿಕಿತ್ಸೆ ಮುಂದುವರೆಸಿದರು. ಡಾ. ರೋಲಿ ಅಗರ್ವಾಲ್ ಹಾಗೂ ಡಾ. ಪೂರ್ತಿ ಛನ್ನಾ ಸೇರಿದಂತೆ ಹಲವಾರು ವೈದ್ಯರು ಮತ್ತು ನರ್ಸ್ಗಳ ತಂಡ ಹೆರಿಗೆ ಯಶಸ್ವಿಯಾಗಲು ಶ್ರಮಿಸಿದೆ.
ಸದ್ಯ ನಾಲ್ಕೂ ನವಜಾತ ಶಿಶುಗಳನ್ನು ಮುನ್ನೆಚ್ಚರಿಕಾ ಕ್ರಮವಾಗಿ ವೆಂಟಿಲೇಟರ್ ಸಹಾಯದಲ್ಲಿ ಇರಿಸಲಾಗಿದೆ. ವೈದ್ಯರ ಪ್ರಕಾರ ಮಕ್ಕಳ ಆರೋಗ್ಯ ಸ್ಥಿತಿ ಸ್ಥಿರವಾಗಿದ್ದು, ಯಾವುದೇ ಗಂಭೀರ ಸಮಸ್ಯೆ ಇಲ್ಲ. ತಾಯಿ ಅಮಿನಾ ಕೂಡ ಆರೋಗ್ಯವಾಗಿದ್ದು ವೈದ್ಯರ ಮೇಲ್ವಿಚಾರಣೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಈ ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ವೈದ್ಯರ ತಂಡದ ಕಾರ್ಯಕ್ಕೆ ನೆಟ್ಟಿಗರು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ. ತಮ್ಮ ಮತ್ತು ಮಕ್ಕಳ ಜೀವ ಉಳಿಸಿದ ವೈದ್ಯರಿಗೆ ಅಮಿನಾ ಹಾಗೂ ಅವರ ಪತಿ ಮೊಹಮ್ಮದ್ ಅಲೀಮ್ ಹೃತ್ಪೂರ್ವಕ ಧನ್ಯವಾದಗಳನ್ನು ತಿಳಿಸಿದ್ದಾರೆ.
