ಆಶಾ ಭೋಸ್ಲೆ ಶ್ರದ್ಧಾಂಜಲಿಯಲ್ಲಿ ಭಾರತೀಯ ಹಾಡು ಪ್ರಸಾರ: ಪಾಕ್‌ನಲ್ಲಿ ಮೀಡಿಯಾಗಳಿಗೆ ನೋಟಿಸ್‌

ಇಸ್ಲಾಮಾಬಾದ್/ಮುಂಬೈ, ಏಪ್ರಿಲ್ 14: ಭಾರತದ ಗಾನ ಕೋಗಿಲೆ ಆಶಾ ಭೋಸ್ಲೆ (Asha Bhosle) ಅವರ ನಿಧನದ ಕುರಿತು ವರದಿ ಮಾಡುವಾಗ, ಅವರ ಹಾಡುಗಳು ಮತ್ತು ಸಿನಿಮಾ ದೃಶ್ಯಗಳನ್ನು ಬಳಸಿದ್ದಕ್ಕಾಗಿ ಪಾಕಿಸ್ತಾನದ ಪ್ರಮುಖ ಸುದ್ದಿ ವಾಹಿನಿ ‘ಜಿಯೋ ನ್ಯೂಸ್’ (Geo News) ಸಂಕಷ್ಟಕ್ಕೆ ಸಿಲುಕಿದೆ.

ಪಾಕಿಸ್ತಾನ ಎಲೆಕ್ಟ್ರಾನಿಕ್ ಮೀಡಿಯಾ ರೆಗ್ಯುಲೇಟರಿ ಅಥಾರಿಟಿ (PEMRA) ಚಾನೆಲ್‌ಗೆ ಶೋಕಾಸ್ ನೋಟಿಸ್ ಜಾರಿ ಮಾಡಿದೆ. 2018ರಿಂದ ಪಾಕಿಸ್ತಾನದಲ್ಲಿ ಭಾರತೀಯ ಕಂಟೆಂಟ್‌ ಪ್ರಸಾರಕ್ಕೆ ನಿಷೇಧವಿದ್ದು, ಈ ನಿಯಮವನ್ನು ಉಲ್ಲಂಘಿಸಲಾಗಿದೆ ಎಂದು ಪ್ರಾಧಿಕಾರ ಆರೋಪಿಸಿದೆ.

ಘಟನೆಯ ಹಿನ್ನೆಲೆ

ಏಪ್ರಿಲ್ 12 ರಂದು ತಮ್ಮ 92ನೇ ವಯಸ್ಸಿನಲ್ಲಿ ಮುಂಬೈನಲ್ಲಿ ನಿಧನರಾದ ಆಶಾ ಭೋಸ್ಲೆ ಅವರ ಜೀವನ ಮತ್ತು ಸಾಧನೆಗಳ ಕುರಿತ ವರದಿಯನ್ನು ಜಿಯೋ ನ್ಯೂಸ್ ಪ್ರಸಾರ ಮಾಡಿತ್ತು. ಶ್ರದ್ಧಾಂಜಲಿ ಸಮಯದಲ್ಲಿ ಅವರ ಅಮರ ಹಾಡುಗಳಾದ ‘ಈ ಮೇಲ್ ಸಂಜೆ’, ‘ಪಿಯಾ ತೂ ಅಬ್ ತೋ ಆಜಾ’, ‘ದಮ್ ಮಾರೋ ದಮ್’ ಸೇರಿದಂತೆ ಹಲವು ಗೀತೆಗಳನ್ನು ತೋರಿಸಲಾಗಿತ್ತು. ಇದು ಪಾಕಿಸ್ತಾನದ ಸುಪ್ರೀಂ ಕೋರ್ಟ್ ಆದೇಶದ ಸ್ಪಷ್ಟ ಉಲ್ಲಂಘನೆ ಎಂದು PEMRA ಹೇಳಿದೆ.

PEMRA ನೋಟಿಸ್ 

ಪ್ರಾಧಿಕಾರವು ಜಿಯೋ ನ್ಯೂಸ್ ಸಿಇಒ ಅವರನ್ನು ಏಪ್ರಿಲ್ 27 ರಂದು ವಿಚಾರಣೆಗೆ ಹಾಜರಾಗುವಂತೆ ಸೂಚಿಸಿದೆ. ಈ ತಪ್ಪಿಗಾಗಿ ಚಾನೆಲ್‌ಗೆ ಭಾರಿ ದಂಡ, ಪ್ರಸಾರ ಸ್ಥಗಿತ ಅಥವಾ ಪರವಾನಗಿ ರದ್ದತಿಯಂತಹ ಕಠಿಣ ಕ್ರಮಗಳನ್ನು ಎದುರಿಸಬೇಕಾಗಬಹುದು ಎಂದು ಎಚ್ಚರಿಕೆ ನೀಡಲಾಗಿದೆ. “ಪಾಕಿಸ್ತಾನದಲ್ಲಿ ಭಾರತೀಯ ಸಿನೆಮಾ, ಸಂಗೀತ ಮತ್ತು ದೃಶ್ಯಾವಳಿಗಳ ಪ್ರಸಾರವನ್ನು ನಿಷೇಧಿಸಲಾಗಿದೆ. ಜಿಯೋ ನ್ಯೂಸ್ ಈ ನಿಯಮವನ್ನು ಮುಕ್ತವಾಗಿ ಉಲ್ಲಂಘಿಸಿದೆ” ಎಂದು PEMRA ಹೇಳಿಕೆಯಲ್ಲಿ ತಿಳಿಸಿದೆ.

ಜಿಯೋ ನ್ಯೂಸ್ ವ್ಯವಸ್ಥಾಪಕ ನಿರ್ದೇಶಕರ ಪ್ರತಿಕ್ರಿಯೆ

ಆದರೆ, ಪ್ರಾಧಿಕಾರದ ಈ ಕ್ರಮಕ್ಕೆ ಜಿಯೋ ನ್ಯೂಸ್‌ನ ವ್ಯವಸ್ಥಾಪಕ ನಿರ್ದೇಶಕ ಅಜರ್ ಅಬ್ಬಾಸ್ (Azhar Abbas) ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ್ದಾರೆ. ‘ಎಕ್ಸ್’ ಸಾಮಾಜಿಕ ಜಾಲತಾಣದಲ್ಲಿ ಅವರು ಬರೆದಿದ್ದಾರೆ.

“ಒಬ್ಬ ಶ್ರೇಷ್ಠ ಕಲಾವಿದೆಯ ನಿಧನದ ಬಗ್ಗೆ ವರದಿ ಮಾಡುವಾಗ, ಅವರ ಸಾಧನೆಗಳನ್ನು ಮೆಲುಕು ಹಾಕುವುದು ಮಾಧ್ಯಮದ ಕರ್ತವ್ಯ. ಕಲೆ, ಜ್ಞಾನ ಮತ್ತು ಮಾನವೀಯತೆ ಇಡೀ ಮನುಕುಲದ ಆಸ್ತಿ. ಅವನ್ನು ಗಡಿಗಳಲ್ಲಿ ಕಟ್ಟಿಹಾಕಲು ಸಾಧ್ಯವಿಲ್ಲ. ಆಶಾ ಭೋಸ್ಲೆ ಅವರು ಪಾಕಿಸ್ತಾನವನ್ನು ತುಂಬಾ ಪ್ರೀತಿಸುತ್ತಿದ್ದರು, ನುಸ್ರತ್ ಫತೇ ಅಲಿ ಖಾನ್ ಅವರೊಂದಿಗೆ ಆತ್ಮೀಯ ಸ್ನೇಹ ಹೊಂದಿದ್ದರು. ಅವರ ನಿಧನಕ್ಕೆ ನಾವು ಗೌರವ ಸಲ್ಲಿಸುವಾಗ, ಅವರ ಸಂಗೀತವನ್ನು ಕೇಳುವುದು ಸಹಜ.”

ಅಜರ್ ಅಬ್ಬಾಸ್ ಅವರ ಈ ಹೇಳಿಕೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಅನೇಕ ಕಲಾಭಿಮಾನಿಗಳು ಬೆಂಬಲ ವ್ಯಕ್ತಪಡಿಸಿದ್ದಾರೆ.

ರಾಜಕೀಯ ಮತ್ತು ಸಾರ್ವಜನಿಕ ಪ್ರತಿಕ್ರಿಯೆ

ಪಾಕಿಸ್ತಾನ್ ಪೀಪಲ್ಸ್ ಪಾರ್ಟಿಯ ಸೆನೆಟರ್ ಶೆರ್ರಿ ರೆಹಮಾನ್ (Sherry Rehman) ಸೇರಿದಂತೆ ಹಲವು ರಾಜಕೀಯ ನಾಯಕರು ಕೂಡ PEMRA ಕ್ರಮವನ್ನು ತೀವ್ರವಾಗಿ ಟೀಕಿಸಿದ್ದಾರೆ. “ಕಲೆಗೆ ಯಾವುದೇ ಗಡಿಗಳಿಲ್ಲ. ಒಬ್ಬ ದಂತಕತೆಯ ನಿಧನಕ್ಕೆ ಶ್ರದ್ಧಾಂಜಲಿ ಸಲ್ಲಿಸುವುದು ಮಾನವೀಯ ಕರ್ತವ್ಯ. ಇಂತಹ ಸಂದರ್ಭದಲ್ಲಿ ಕಟ್ಟುನಿಟ್ಟಿನ ನಿಯಮಗಳನ್ನು ಜಾರಿಗೊಳಿಸುವುದು ಸೂಕ್ತವಲ್ಲ” ಎಂದು ಅವರು ಹೇಳಿದ್ದಾರೆ.

ಪಾಕಿಸ್ತಾನದ ಹಲವು ಪತ್ರಕರ್ತರು ಮತ್ತು ಕಲಾವಿದರು ಕೂಡ ಜಿಯೋ ನ್ಯೂಸ್ ಪರ ವಕಾಲತ್ತು ಎತ್ತಿದ್ದಾರೆ. “ಆಶಾ ಭೋಸ್ಲೆ ಅವರು ಕೇವಲ ಭಾರತೀಯರಲ್ಲ, ಅವರು ಉಪಖಂಡದ ಸಂಸ್ಕೃತಿಯ ಸಂಕೇತ” ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.

ಆಶಾ ಭೋಸ್ಲೆ ಅಂತಿಮ ದರ್ಶನ

ಏಪ್ರಿಲ್ 13 ರಂದು ಮುಂಬೈನ ಶಿವಾಜಿ ಪಾರ್ಕ್‌ನಲ್ಲಿ ಆಶಾ ಭೋಸ್ಲೆ ಅವರ ಅಂತ್ಯಕ್ರಿಯೆಯನ್ನು ಸಂಪೂರ್ಣ ಸರ್ಕಾರಿ ಗೌರವಗಳೊಂದಿಗೆ ನೆರವೇರಿಸಲಾಯಿತು. ನಟ ಅಮೀರ್ ಖಾನ್, ಜಾಕಿ ಶ್ರಾಫ್, ರಣಬೀರ್ ಕಪೂರ್ ಸೇರಿದಂತೆ ಸಾವಿರಾರು ಅಭಿಮಾನಿಗಳು ಮತ್ತು ಬಾಲಿವುಡ್ ಗಣ್ಯರು ತಮ್ಮ ನೆಚ್ಚಿನ ಗಾಯಕಿಗೆ ಅಂತಿಮ ವಿದಾಯ ಹೇಳಿದರು. ಪ್ರಧಾನಿ ನರೇಂದ್ರ ಮೋದಿ, ರಾಹುಲ್ ಗಾಂಧಿ ಸೇರಿದಂತೆ ರಾಷ್ಟ್ರೀಯ ಮುಖಂಡರು ಸಂತಾಪ ಸೂಚಿಸಿದ್ದರು.