ಇಂದಿನ ಕಾಲದಲ್ಲಿ ನಿಜವಾದ ಪ್ರೀತಿ ಕಾಣುವುದು ಅಪರೂಪ. ಸಣ್ಣ ವಿಷಯಗಳಿಗೆ ಜಗಳವಾಡಿ ಬೇರೆಯಾಗುವವರು ಹೆಚ್ಚು. ಕೆಲವರು ತಮ್ಮ ದುರದೃಷ್ಟವೆಂದು ಸುಮ್ಮನಿರುತ್ತಾರೆ, ಆದರೆ ಇನ್ನು ಕೆಲವರು ಸೇಡು ತೀರಿಸಿಕೊಳ್ಳಲು ಹೊರಟುಬಿಡುತ್ತಾರೆ. ಆದರೆ, ಇಲ್ಲೊಬ್ಬ ಮಾಜಿ ಪ್ರಿಯಕರ ತನ್ನ ಗೆಳತಿಗೆ ಖರ್ಚು ಮಾಡಿದ ಹಣವನ್ನು ವಾಪಸ್ ಕೊಡುವಂತೆ ಕೇಳಿ ಎಲ್ಲರಿಗೂ ಆಶ್ಚರ್ಯವನ್ನುಂಟುಮಾಡಿದ್ದಾನೆ. ಈ ಘಟನೆಯ ಸಾಮಾಜಿಕ ಜಾಲತಾಣದ ಪೋಸ್ಟ್ ಭಾರೀ ವೈರಲ್ ಆಗಿದ್ದು, ನೆಟ್ಟಿಗರು “ಇಂತಹ ಹುಡುಗಿಯರಿಗೆ ಇಂಥದ್ದೇ ಶಿಕ್ಷೆ ಬೇಕು” ಎಂದು ಕಾಮೆಂಟ್‌ಗಳ ಮೂಲಕ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಪ್ರೀತಿಯ ಆರಂಭದ ದಿನಗಳಲ್ಲಿ ಎಲ್ಲವೂ ಸುಂದರವಾಗಿರುತ್ತದೆ. ಈ ಸಮಯದಲ್ಲಿ ಪ್ರಿಯಕರರು ತಮ್ಮ ಗೆಳತಿಯರಿಗಾಗಿ ಉಡುಗೊರೆಗಳು, ತಿಂಡಿತಿನಿಸುಗಳಿಗೆ ದುಡ್ಡು ಖರ್ಚುಮಾಡುತ್ತಾರೆ. ಆದರೆ ಕೆಲವು ಹುಡುಗಿಯರು ಈ ಖರ್ಚನ್ನು ದುರುಪಯೋಗಪಡಿಸಿಕೊಂಡು, ಕೊನೆಗೆ ಪ್ರಿಯಕರನನ್ನು ಕೈಬಿಡುವುದು ಸಾಮಾನ್ಯ. ಇಂತಹ ಸಂದರ್ಭದಲ್ಲಿ ಕೆಲವು ಹುಡುಗರು ತಮ್ಮ ಮಾಜಿ ಗೆಳತಿಗೆ ಬುದ್ಧಿ ಕಲಿಸಲು ವಿಭಿನ್ನ ರೀತಿಯಲ್ಲಿ ಪ್ರಯತ್ನಿಸುತ್ತಾರೆ. ಆದರೆ ಆರ್ಯನ್ ಎಂಬ ಯುವಕ ತನ್ನ ವಿಶಿಷ್ಟ ಕ್ರಮದಿಂದ ಎಲ್ಲರ ಗಮನ ಸೆಳೆದಿದ್ದಾನೆ.
my ex is asking a refund for the snacks he sent me during our relationship. What stage of the breakup is this? 😭 pic.twitter.com/4ra6pbSUS5
— divya (@certifiedbkl) May 14, 2025
ಆರ್ಯನ್ ತನ್ನ ಮಾಜಿ ಗೆಳತಿ ದಿವ್ಯಾಳಿಗೆ, “ನಿನಗಾಗಿ ಸ್ವಿಗ್ಗಿ, ಇನ್‌ಸ್ಟಾಮಾರ್ಟ್‌ನಲ್ಲಿ ಆರ್ಡರ್ ಮಾಡಿದ ತಿಂಡಿಗಳ ಬಿಲ್‌ನ ಹಣವನ್ನು ವಾಪಸ್ ಕೊಡು” ಎಂದು ವಾಟ್ಸಾಪ್‌ನಲ್ಲಿ ಸಂದೇಶ ಕಳುಹಿಸಿದ್ದಾನೆ. ಈ ಸಂದೇಶದ ಜೊತೆಗೆ, ಮಸಾಲಾ ಚಿಪ್ಸ್, ಸಾಫ್ಟ್ ಡ್ರಿಂಕ್, ಡ್ರೈ ಫ್ರೂಟ್ಸ್ ಸೇರಿದಂತೆ ತಾನು ಖರ್ಚು ಮಾಡಿದ ಎಲ್ಲಾ ಐಟಂಗಳ ಸ್ಕ್ರೀನ್‌ಶಾಟ್‌ಗಳನ್ನೂ ಕಳುಹಿಸಿದ್ದಾನೆ. ಈ ಬಿಲ್‌ಗಳ ಪಟ್ಟಿ ದೊಡ್ಡದಾಗಿದ್ದು, ಒಟ್ಟಾರೆ ಖರ್ಚಿನ ಮೊತ್ತ ಗಮನಾರ್ಹವಾಗಿದೆ.
ದಿವ್ಯಾ ಈ ವಾಟ್ಸಾಪ್ ಚಾಟ್‌ನ ಸ್ಕ್ರೀನ್‌ಶಾಟ್‌ನ್ನು ‘@certifirdbkl’ ಎಂಬ ಎಕ್ಸ್ ಖಾತೆಯಲ್ಲಿ ಶೇರ್ ಮಾಡಿಕೊಂಡಿದ್ದಾಳೆ. “ನನ್ನ ಮಾಜಿ ಪ್ರಿಯಕರ ತಾನು ನನಗಾಗಿ ಖರ್ಚು ಮಾಡಿದ ಹಣವನ್ನು ವಾಪಸ್ ಕೇಳುತ್ತಿದ್ದಾನೆ” ಎಂದು ಬರೆದುಕೊಂಡಿರುವ ಈ ಪೋಸ್ಟ್ ಕ್ಷಣಾರ್ಧದಲ್ಲಿ ವೈರಲ್ ಆಗಿದೆ. ಈಗಾಗಲೇ 1.3 ಮಿಲಿಯನ್‌ಗಿಂತಲೂ ಹೆಚ್ಚು ವೀಕ್ಷಣೆಗಳನ್ನು ಪಡೆದುಕೊಂಡಿರುವ ಈ ಪೋಸ್ಟ್‌ಗೆ ಸಾವಿರಾರು ಲೈಕ್‌ಗಳು ಮತ್ತು ಕಾಮೆಂಟ್‌ಗಳು ಬಂದಿವೆ.
ನೆಟ್ಟಿಗರ ಪ್ರತಿಕ್ರಿಯೆಗಳು ವೈವಿಧ್ಯಮಯವಾಗಿವೆ. ಒಬ್ಬ ಬಳಕೆದಾರ, “ಈ ರೀತಿಯ ಹುಡುಗಿಯರನ್ನು ನಂಬುವುದೇ ಕಷ್ಟ. ಯಾವಾಗ ಕೈಬಿಡುತ್ತಾರೆಂದು ಹೇಳಲಾಗದು” ಎಂದು ಬರೆದಿದ್ದಾರೆ. ಮತ್ತೊಬ್ಬರು, “ಇದು ನಿಜಕ್ಕೂ ಒಳ್ಳೆಯ ಕ್ರಮ. ಈ ಪೋಸ್ಟ್ ನೋಡಿದ ಮೇಲೆ ಯಾವ ಹುಡುಗಿಯೂ ತನ್ನ ಪ್ರಿಯಕರನ ಜೊತೆ ಹಣ ಖರ್ಚು ಮಾಡಿಸಲು ಯೋಚಿಸದು” ಎಂದು ತಮಾಷೆಯಾಗಿ ಕಾಮೆಂಟ್ ಮಾಡಿದ್ದಾರೆ. ಇನ್ನೊಬ್ಬ ಬಳಕೆದಾರ, “ಆರ್ಯನ್, ನಿಮಗೆ ಇಡೀ ಪುರುಷ ಸಮುದಾಯದಿಂದ ಗೌರವ ಸಿಗುತ್ತದೆ” ಎಂದು ತಮ್ಮ ಮೆಚ್ಚುಗೆಯನ್ನು ವ್ಯಕ್ತಪಡಿಸಿದ್ದಾರೆ.
ಈ ಘಟನೆಯಿಂದಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಚರ್ಚೆ ಆರಂಭವಾಗಿದೆ. ಕೆಲವರು ಆರ್ಯನ್‌ನ ಕ್ರಮವನ್ನು ಸಮರ್ಥಿಸಿದರೆ, ಇನ್ನು ಕೆಲವರು ಇದು ಸಣ್ಣ ವಿಷಯಕ್ಕೆ ದೊಡ್ಡದಾಗಿ ಪ್ರತಿಕ್ರಿಯಿಸಿದಂತೆ ಎಂದು ಭಾವಿಸಿದ್ದಾರೆ. ಆದರೆ, ಈ ವಿಷಯವು ಪ್ರೀತಿಯ ಸಂಬಂಧಗಳಲ್ಲಿ ಆರ್ಥಿಕ ವಿಷಯಗಳ ಬಗ್ಗೆ ಎಚ್ಚರಿಕೆಯಿಂದಿರಬೇಕೆಂಬುದನ್ನು ಒತ್ತಿಹೇಳಿದೆ.
