ಅಮೆರಿಕದಲ್ಲಿ ಹಾಲಿವುಡ್ ಸಿನಿಮಾಗಳಲ್ಲಿ ಕಾಣುವಂತಹ ರೋಚಕ ದರೋಡೆ ಘಟನೆ ಒಂದು ನಡೆದಿದ್ದು, ಕೇವಲ ಒಂದು ನಿಮಿಷದಲ್ಲಿ ಕೋಟ್ಯಂತರ ಮೌಲ್ಯದ ಚಿನ್ನಾಭರಣಗಳನ್ನು ಕಳ್ಳರು ದೋಚಿ ಪರಾರಿಯಾಗಿದ್ದಾರೆ.
ಅಮೆರಿಕದ ಕ್ಯಾಲಿಫೋರ್ನಿಯಾ ರಾಜ್ಯದ ಫ್ರೀಮಾಂಟ್ ನಗರದಲ್ಲಿರುವ ಭಾರತೀಯ-ಅಮೆರಿಕನ್ ಕುಟುಂಬದ ಒಡೆತನದ “ಕುಮಾರ್ ಜ್ಯುವೆಲ್ಲರ್ಸ್” ಅಂಗಡಿಯಲ್ಲಿ ಈ ದರೋಡೆ ನಡೆದಿದೆ. ಮುಸುಕುಧಾರಿ ದರೋಡೆಕೋರರ ಗುಂಪೊಂದು ಅಂಗಡಿಗೆ ನುಗ್ಗಿ ಕೇವಲ ಒಂದು ನಿಮಿಷದಲ್ಲೇ ಸುಮಾರು 1.7 ಮಿಲಿಯನ್ ಡಾಲರ್ (ಸುಮಾರು 15.7 ಕೋಟಿ ರೂ.) ಮೌಲ್ಯದ ಚಿನ್ನ ಮತ್ತು ವಜ್ರಾಭರಣಗಳನ್ನು ಕದ್ದುಕೊಂಡು ಪರಾರಿಯಾಗಿದ್ದಾರೆ.
ಕಳೆದ ವರ್ಷದ ಜೂನ್ 18ರಂದು ಈ ಘಟನೆ ನಡೆದಿದೆ. ಅಂಗಡಿಯೊಳಗೆ ಅಚ್ಚರಿಯ ರೀತಿಯಲ್ಲಿ ನುಗ್ಗಿದ ದರೋಡೆಕೋರರು ತಮ್ಮೊಂದಿಗೆ ಸುತ್ತಿಗೆ ಮತ್ತು ಇತರ ಆಯುಧಗಳನ್ನು ಹೊತ್ತೊಯ್ದಿದ್ದರು. ಅಂಗಡಿಯ ಗಾಜಿನ ಶೋಕೆಸ್ಗಳನ್ನು ಕ್ಷಣಾರ್ಧದಲ್ಲಿ ಒಡೆದು, ಅವುಗಳಲ್ಲಿ ಇರಿಸಿದ್ದ ಚಿನ್ನ ಹಾಗೂ ವಜ್ರಾಭರಣಗಳನ್ನು ಚೀಲಗಳಲ್ಲಿ ತುಂಬಿಕೊಂಡು ಪರಾರಿಯಾಗಿದ್ದಾರೆ.
ಈ ದರೋಡೆ ನಡೆದ ಸಮಯದಲ್ಲಿ ಅಂಗಡಿಯ ಬಹುತೇಕ ಸ್ಟಾಕ್ ಕಳೆದುಹೋಗಿದೆ. ವರದಿಗಳ ಪ್ರಕಾರ ಅಂಗಡಿಯಲ್ಲಿದ್ದ ಸುಮಾರು 75 ರಿಂದ 80 ಶೇಕಡಾ ಚಿನ್ನಾಭರಣಗಳನ್ನು ಕಳ್ಳರು ದೋಚಿಕೊಂಡಿದ್ದಾರೆ. ಇದರಿಂದ ಅಂಗಡಿ ಮಾಲೀಕರಿಗೆ ಭಾರೀ ನಷ್ಟ ಉಂಟಾಗಿದೆ.
ಕಳ್ಳರು ಕದ್ದ ಕಾರುಗಳಲ್ಲಿ ಪರಾರಿ
ದರೋಡೆ ಬಳಿಕ ಆರೋಪಿಗಳು ಕದ್ದ ಕಾರುಗಳಲ್ಲಿ ಸ್ಥಳದಿಂದ ಪಾರಿಯಾಗಿದ್ದಾರೆ. ಅವರು ವಿಭಿನ್ನ ದಿಕ್ಕುಗಳಲ್ಲಿ ಓಡಿಹೋಗಿರುವುದರಿಂದ ಪೊಲೀಸರಿಗೆ ಅವರನ್ನು ಬೆನ್ನಟ್ಟುವುದು ಕಷ್ಟವಾಯಿತು. ಪೊಲೀಸರು ಕೇವಲ ಒಂದು ಕಾರನ್ನು ಮಾತ್ರ ಬೆನ್ನಟ್ಟಲು ಸಾಧ್ಯವಾಯಿತು. ಆದರೆ ಉಳಿದವರು ಇನ್ನೂ ತಲೆಮರೆಸಿಕೊಂಡಿದ್ದಾರೆ.
ಘಟನೆಯ ಸಿಸಿಟಿವಿ ದೃಶ್ಯಗಳು ನಂತರ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಕೇವಲ ಕೆಲವೇ ಸೆಕೆಂಡುಗಳಲ್ಲಿ ದರೋಡೆ ನಡೆದಿರುವುದು ಸ್ಪಷ್ಟವಾಗಿ ಕಾಣುತ್ತದೆ. ಇದನ್ನು ಕಂಡು ಹಲವರು ಹಾಲಿವುಡ್ ಸಿನಿಮಾವನ್ನು ನೆನಪಿಸುವ ಘಟನೆ ಎಂದು ಕಾಮೆಂಟ್ ಮಾಡಿದ್ದಾರೆ.
ನಾಲ್ವರು ಶಂಕಿತರು ಬಂಧನ
ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ನಾಲ್ವರು ಶಂಕಿತರನ್ನು ಬಂಧಿಸಿದ್ದಾರೆ. ಬಂಧಿತರಲ್ಲಿ 19 ರಿಂದ 20 ವರ್ಷ ವಯಸ್ಸಿನ ಯುವಕರು ಸೇರಿದ್ದಾರೆ. ಬಂಧಿತರನ್ನು ಅಫತುಪೆಟೈಕಿ ಫಾಸಿಸಿಲಾ, ಜೋಸ್ ಹೆರಾಡಾ-ಅರಾಗೊನ್, ಆಂಡ್ರೆಸ್ ಪ್ಯಾಲೆಸ್ಟಿನೊ ಮತ್ತು ಟಾಮ್ ಪಾರ್ಕರ್ ಡೊನೆಗನ್ ಎಂದು ಗುರುತಿಸಲಾಗಿದೆ.
ಇವರಲ್ಲಿ ಫಾಸಿಸಿಲಾ ಮತ್ತು ಪ್ಯಾಲೆಸ್ಟಿನೊ ಅವರನ್ನು ನಂತರ ಬಿಡುಗಡೆ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಆದರೆ ಈ ದರೋಡೆಗೆ ಸಂಬಂಧಿಸಿದಂತೆ ಇನ್ನೂ ಹಲವು ಶಂಕಿತರನ್ನು ಪೊಲೀಸರು ಹುಡುಕುತ್ತಿದ್ದಾರೆ.
